༄༅།།མཚོ་ལྷོ་ཁུལ་མི་རིགས་མཐོ་འབྲིང་དང་པོས་ཀུན་སྤྱོད་སློབ་གསོ་སྐོར་གྱི་འཆད་ཁྲིད་སྤེལ་བ།

དེ་ཡང《ཤིང་གི་བསྟན་བཅོས》ལས། “ཀླད་ཆུང་རང་བཞིན་ངན་པ་ལ། །ཡོན་ཏན་ཡོད་ཀྱང་ཕན་མི་ཐོགས། །རྩ་བ་དུག་ཏུ་གནས་པ་ཡི། །མེ་ཏོག་མཛེས་ཀྱང་སུ་ལ་མཁོ། །”ཞེས་པ་ལྟར་མི་གཞི་གསོ་སྐྱོང་བྱེད་པ་ལ་ཤེས་བྱ་ཡོན་ཏན་ཁྲིད་པ་ཙམ་གྱིས་མི་ཆོག་པར་ཀུན་སྤྱོད་སློབ་གསོ་གཙོ་བོར་འཛིན་དགོས་པ་དང་། ན་ཆུང་སློབ་བུ་རྣམས་ཀྱི་ནང་བསམ་པའི་ཀུན་སློང་དང་ཕྱིའི་ལུས་ངག་གི་སྤྱོད་པ་དཔེ་ལེགས་ཅན་དུ་གཏོང་བ་དང་། སྤྱོད་ཡོན་གཉིས་ལྡན་གྱི་ཤེས་ལྡན་མི་སྣ་གསོ་སྐྱོང་བྱ་བར་དམིགས་ནས། སྤྱི་ཟླ10པའི་ཚེས22ཉིན་གྱི་དགོང་དྲོའི་ཆུ་ཚོད7སྟེང་། མཚོ་ལྷོ་ཁུལ་མི་རིགས་མཐོ་འབྲིང་དང་པོའི་ཀུན་སྤྱོད་སློབ་གསོ་ཁང་གིས་མཐོ་གཉིས་ལོ་རིམ་ཁག་གི་ཁག་གཙོ་གཞོན་པ་རྒན་ཏཱ་རེ་རྒྱལ་ལགས་གདན་དྲངས་ནས་སློབ་གྲྭའི་སྙན་ཞུའི་ཚོམས་ཁང་ཆེན་མོ་རུ་མཐོ་གཅིག་རིམ་པའི་སློབ་བུ་ཡོངས་ལ“ཕྱིའི་ཀུན་སྤྱོད་ཡག་ན་མི་ཆོས་ཡིན། ནང་ཀུན་སློང་གཙང་ན་ལྷ་ཆོས་ཡིན”ཞེས་པ་བརྗོད་གཞིར་བྱས་པའི་ཀུན་སྤྱོད་སློབ་གསོ་སྐོར་གྱི་འཆད་ཁྲིད་སྤེལ། 
འཆད་ཁྲིད་ཀྱི་གོ་རིམ་ཁྲོད་རྒན་ལགས་ཀྱིས་འཇིག་རྟེན་མི་ཆོས་ཀྱི་སྤང་བླང་གི་རྣམ་གཞག་བརྗོད་བྱའི་གནད་དུ་བཟུང་ཞིང་རྒྱབ་རྟེན་གྱི་ལུང་དང་སྒྲུབ་བྱེད་ཀྱི་རིགས་པ། དོན་དངོས་ཀྱི་དཔེ་མང་པོ་བཀོད་ནས་སློབ་བུ་རྣམས་ལ་སྐད་ཆ་བཤད་སྟངས་དང་གོན་པ་གྱོན་ལུགས། མི་དང་འགྲོགས་ལུགས། ཡ་རབས་ཚུལ་གྱི་མི་ཞིག་བྱ་བར་གཞེན་སྐུལ་དང་། སྤྱོད་པ་ལེགས་ཤིང་ཡོན་ཏན་ལྡན་པའི་དུས་རབས་གསར་བའི་སྤྱི་ཚོགས་རིང་ལུགས་ཀྱི་རྒྱུན་འཛིན་པ་ཞིག་ཏུ་འགྱུར་བར་འབད་དགོས་པའི་སྐོར་གྱི་ཀུན་སྤྱོད་སློབ་གསོ་སྐོར་གྱི་གདམས་ངག་གི་གྲུ་ཆར་སྣུམ་པོ་ན་ཆུང་སློབ་བུ་རྣམས་ཀྱི་ཡིད་ཀྱི་གཤིན་ས་རུ་ངང་གིས་གཏོར་བས་ཚོགས་རའི་སློབ་བུ་ཡོངས་ཀྱི་ཡིད་ཀྱི་དབང་པོ་ཅིག་ཅར་ཏུ་འཕྲོག
ཐེངས་འདིའི་སེམས་ལ་འབབ་པའི་བརྗོད་བྱའི་དོན་དང་རྣ་ལ་སྙན་པའི་རྗོད་བྱེད་ཀྱི་ཚིག་གིས་དྲངས་པའི་འཆད་ཁྲིད་ཀྱི་བྱ་འགུལ་འདིས་གསར་སྐྱེས་སློབ་བུ་རྣམས་ལ་གཏམ་སྤྱོད་དྲང་པོ་དང་། ཞི་དུལ་བག་ཡོད། ཡིད་བརྟན་བརྩོན་འགྲུས་། རྒན་བཀུར་ཆུང་བྱམས་ཀྱི་བསམ་བློ་མངའ་བའི་སློབ་བུ་ཞིག་ཏུ་འགྱུར་བར་སྐུལ་འདེད་དང་སྣེ་ཁྲིད་ཀྱི་ནུས་པ་བླ་ལྷག་ཐོན་ཡོད།  
ཐེངས་འདིའི་འཆད་ཁྲིད་དགེ་རྒན་ཏཱ་རེ་རྒྱལ་ལགས་ནི་ལོ་རབས་བརྒྱད་ཅུ་བའི་སྟོད་དུ་མཚོ་ཆེན་ཁྲི་གཤོག་རྒྱལ་མོའི་འགྲམ་རྒྱུད་དུ་སྐྱེས་ཤིང་། ཕ་མ་བཟང་པོའི་སྐུ་དྲིན་གྱིས་ཆུང་དུས་ནས་སློབ་གྲྭ་ཆུང་འབྲིང་ཆེ་གསུམ་རིམ་པར་འགྲིམ་པའི་སྐལ་བ་ལྡན། 2006ལོ་ནས་བཟུང་མཚོ་ལྷོ་ཁུལ་མི་རིགས་མཐོ་འབྲིང་དང་པོའི་བོད་སྐད་ཡིག་གི་དགེ་རྒན་གྱི་འགན་ཁུར།  2012ལོར་ནུབ་བྱང་མི་རིགས་སློབ་ཆེན་གྱི་བོད་ཀྱི་སྐད་ཡིག་རིག་གནས་སློབ་གླིང་དུ་རྩོམ་རིག་ཆེད་གཉེར་གྱི་ཤེས་རམས་པའི་བསླབ་གནས་བླངས།  ད་ལྟའི་བར་སློབ་གྲྭ་དང་ཁུལ་རིམ་པའི་རྐང་འཛིན་དགེ་རྒན་དང་ཕུལ་བྱུང་དགེ་རྒན་སོགས་ཀྱི་བྱ་དགའ་མང་པོ་ཐོབ་པར་མ་ཟད། 《ནུབ་བྱང་མི་རིགས་སློབ་ཆེན་གྱི་རིག་གཞུང་དུས་དེབ》དང《ཟླ་ཟེར》《བོད་ཀྱི་སློབ་གསོ》《གངས་རྒྱན་མེ་ཏོག》སོགས་སུ་དཔྱད་རྩོམ་དང་ལྷུག་རྩོམ། སྙན་ངག་སོགས་བརྩམས་ཆོས་སུམ་ཅུ་ལྷག་སྤེལ་མྱོང་། 2006ལོར《གངས་རྒྱན་ན་ཆུང་ཚགས་པར》ཁང་གིས་སྤེལ་བའི“མི་དང་རང་བྱུང་ཁམས”ཞེས་པ་བརྗོད་བྱ་ཡིན་པའི་རྩོམ་ཡིག་འགྲན་བསྡུར་ཁྲོད་ཕུལ་བྱུང་བྱ་དགའ་ཐོབ། 2009ལོར་མཚོ་སྔོན་རླུང་འཕྲིན་ཁང་གིས་སྤེལ་བའི“འཕོ་འགྱུར་གྱི་ལོ་ཟླ”ཞེས་པའི་ལྷུག་རྩོམ་འགྲན་བསྡུར་ཁྲོད་བྱ་དགའ་ཨང་དང་པོ་ཐོབ།  2019ལོར་ཨ་མདོ་བརྙན་འཕྲིན་ཁང་གི་འཆད་ཁྲིད་མུན་སེལ་སྒྲོན་མེ་ལེ་ཚན་དུ《ནོར་ནག་གི་རིག་གནས་སྐོར་གླེང་བ》ཞེས་པའི་འཆད་ཁྲིད་བྱས། ད་ལྟ་སྔར་མུས་བཞིན་མཚོ་ལྷོ་ཁུལ་མི་རིགས་མཐོ་འབྲིང་དང་པོར་དགེ་རྒན་གྱི་འགན་ཕྲག་ཏུ་བླངས་ཏེ་དཔེ་ཁྲིད་གཤིས་སྐྱོང་གི་བྱ་བར་འབད་བཞིན་ཡོད།