༄༅།།དགེ་རྒན་གནམ་བྱམས་ཚེ་རིང་གིས་མཚོ་ལྷོ་ཁུལ་མི་རིགས་མཐོ་འབྲིང་གཉིས་པར་འཆད་ཁྲིད་གནང་བ།

སྤྱི་ལོ2020ལོའི་ཟླ10བའི་ཚེས23ཉིན། མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས་དགེ་རྒན་གནམ་བྱམས་ཚེ་རིང་ལགས་ཆེད་དུ་གདན་ཞུ་གནང་ནས། སློབ་གྲྭའི་ཕྱོགས་ལས་རྣམ་རྒྱལ་གླིང་གི་ཚོམས་ཆེན་དུ་སྔ་དྲོ་བོད་ཡིག་དགེ་རྒན་རྣམ་པ་དང་ཕྱི་དྲོར་མཐོ་གསུམ་གྱི་སློབ་མ་ཡོངས་ལ་འཆད་ཁྲིད་གནང་དུ་བཅུག
ཞོགས་པའི་ཆུ་ཚོད8:30སྟེང་། སློབ་གཙོ་པདྨ་དབང་ཆེན་གྱིས་འཆད་ཁྲིད་ཀྱི་དམིགས་ཡུལ་དང་དགོས་པར་འབྲེལ་ནས། དགེ་རྒན་གནམ་བྱམས་ཚེ་རིང་ནི་མཚོ་ལྷོ་ཁུལ་ཁྲི་ཀ་རྨེ་རྒྱ་སྡེ་བའི་མི་ཡིན་ཞིང་། ནུབ་བྱང་མི་རིགས་སློབ་ཆེན་ནས་སློབ་མཐར་ཕྱིན་རྗེས་སྔ་གཞུག་ཏུ་མཚོ་ལྷོ་ཁུལ་མི་རིགས་དགེ་ཐོན་སློབ་གྲྭ་དང་མཐོ་འབྲིང་དང་པོར་དགེ་རྒན་གྱི་ཕྱག་ལས་གནང་། མི་རིགས་སློབ་གསོ་ལ་དགའ་ཞེན་ཆེ་ཞིང་མི་ཚེ་ཕྱེད་ཀ་བོད་སྐད་ཡིག་གི་སློབ་གསོའི་ཕྱོགས་སུ་བསྟིམས། མཚོ་ལྷོ་ཁུལ་གྱི་སློབ་དེབ་རྩོམ་སྒྲིག་པ་གཙོ་བོའི་གྲས་ཡིན་ཞིང་མཐོ་འབྲིང་གི་བོད་སྐད་ཡིག་གི་ཕྱོགས་ནས་ཉམས་མྱོང་ཕུན་སུམ་པ་མཆིས་པ་མ་ཟད། ཞིབ་འཇུག་གི་གྲུབ་འབྲས་ཀྱང་གཡུར་དུ་ཟ་བ་བླངས་ཡོད་ཅེས་རྒན་གནམ་བྱམས་ཚེ་རིང་ལགས་ཀྱི་མཚམས་སྦྱོར་མདོར་བསྡུས་དང་བཅས་འཆད་ཁྲིད་ལ་མདོ་འཛིན་མཛད་ཅིང་། དེའི་རྗེས་རྒན་གནམ་བྱམས་ཚེ་རིང་མཆོག་ནས་བོད་ཡིག་དགེ་རྒན་ལ《མཐོ་འབྲིང་སྐད་ཡིག་གི་ནང་དོན་དང་ཁྱད་ཆོས་བཤད་པ》ཞེས་པའི་ཁ་བྱང་གི་སྟེང་ནས་འཆད་ཁྲིད་གནང་བའི་མགོ་བརྩམས།
ཐོག་མར་ཁོང་གིས་ཉེ་ཆར་གསེར་ཆེན་རྫོང་དུ་བཙུགས་པའི་ཧྲང་ཧེའི་གྲོང་ཁྱེར་གྱི་སྒེར་བཙུགས་སློབ་གྲྭའི་ཡན་ལག་ཏུ་གཏོགས་པ། ཏེ་ཝེ་སི་གསོ་སྦྱོང་ཚད་ཡོད་ཀུང་ཟི་ཞེས་པའི་སྒེར་བཙུགས་སློབ་གྲྭ་ཞིག་ཏུ་དགེ་རྒན་གྱི་ཕྱག་ལས་གནང་བཞིན་པའི་རང་གི་མིག་སྔའི་གནས་ཚུལ་གྱི་སྐོར་ཅུང་ཟད་ཞུས་རྗེས། དུས་ཚོད་གསུམ་གྱི་དུས་ཡུན་སྤྱད་ནས་སློབ་དེབ་ཀྱི་རྩོམ་རྣམས་སྒྱུ་རྩལ་རྩོམ་རིག་དང་སྤྱིར་བཏང་རྩོམ་ཡིག མྱུར་སྤྱོད་རྩོམ་ཡིག་གསུམ་དུ་འདུ་ཞིང་། དེ་ལས་རྟོགས་བརྗོད་རྩོམ་རིག་ནི་དེང་རབས་ཀྱི་དབྱེ་སྲོལ་ལྟར། སྒྱུ་རྩལ་རྩོམ་རིག་གི་རྩོམ་ལུས་རྣམ་པ་བཞིའི་གྲས་ཀྱི་སྒྲུང་གཏམ་དུ་བཞག་ན་ལེགས་ཚུལ་དང་། འདེམས་སྦྱོང་དེབ་གསུམ་པ་ཤིན་ཏུ་གལ་ཆེ་ཚུལ། ཚན་རིག་ངོ་སྤྲོད་སྐོར་གྱི་གསལ་བཤད་རྩོམ་ཡིག་དག་བསྒྱུར་རྩོམ་རེད་ཅེས་སྣང་ཆུང་གིས་འདོར་མི་རུང་བ་དང་། བོད་ཡིག་དགེ་རྒན་ལ་མཚོན་ནའང་རང་བྱུང་ཚན་རིག་སྐོར་གྱི་ཤེས་བྱ་ངེས་ཅན་ཞིག་མཁོ་བ་སོགས་ལྗོངས་ཞིང་ལྔའི་མཐོ་འབྲིང་གི་བོད་ཡིག་སློབ་དེབ་ལས། ལྟ་ཀློག་དང་དཔྱད་མྱོང་གི་སྐོར། གོ་བརྡ་སྤྲོད་པ་དང་བརྗེ་རེས། འཚོལ་དཔྱད་རང་བཞིན་གྱི་སློབ་སྦྱོང་། རྩོམ་རིག་ཤེས་བྱ་དང་ལེགས་རྩོམ་ངོ་སྤྲོད་བཅས་ངེས་སྦྱོང་དེབ་ལྔ་བོའི་སྤྱི་ཁོག་ལ་དོན་ཚན་ཆེན་པོ་བཞི་དང་། སྐད་དང་ཡི་གེའི་ཉེར་སྤྱད། རྩོམ་རིག་བརྩམས་ཆོས་ཀྱི་མྱོང་ཚོར། རིག་གཞུང་གི་སྐོར་བཅས་འདེམས་སྦྱོང་གི་དེབ་གསུམ་གྱི་སྤྱི་ཁོག་ལ་དོན་ཚན་གསུམ་བཅས་རང་གི་མི་ལོ་དུ་མའི་སློབ་ཁྲིད་ཀྱི་ཉམས་མྱོང་དང་ཞིབ་འཇུག་དང་འབྲེལ་ཏེ། ཁ་གསལ་ཞིང་གནད་འདུས་པ། གོ་རིམ་ལྡན་ཅིང་ཕྱོགས་བསྡུས་ཀྱི་སྒོ་ནས་གསུངས་ཤིང་། སློབ་གཙོ་གཞོན་པ་སྟོབས་ལྡན་གྱིས་སྤྱི་སྡོམ་མཛད་ནས་སྔ་དྲོའི་འཆད་ཁྲིད་ཀྱི་མཇུག་ཡོངས་སུ་བསྡུས་ཤིང་། ཕྱི་དྲོར་མཐོ་གསུམ་གྱི་སློབ་མ་རྣམས་ལ་མཐོ་རྒྱུགས་ཀྱི་བོད་ཡིག་རྒྱུགས་གཞིའི་སྐོར་ནས་འཆད་ཁྲིད་གནང་ངོ་། །