༄༅།།མཐོ་འབྲིང་བོད་སྐད་ཡིག་སློབ་ཁྲིད་ཀྱི་བགྲོ་གླེང་ཚོགས་འདུ་མཚོ་ལྷོ་ཁུལ་མི་རིགས་མཐོ་འབྲིང་གཉིས་པར་བསྡུས།

2020ལོའི་ཟླ11པའི་ཚེས20ཉིན། མཚོ་ལྷོ་ཁུལ་བོད་སྐད་ཡིག་མཚན་ལྡན་དགེ་རྒན་ལས་དོན་ཁང་གིས་རྩ་འཛུགས་བྱས་པའི“མཐོ་འབྲིང་བོད་སྐད་ཡིག་སློབ་ཁྲིད་ཀྱི་བགྲོ་གླེང་ཚོགས་འདུ་དེ་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པར་མཇུག་ལེགས་པར་བསྡུས།
ཉིན་གཉིས་རིང་གི་བགྲོ་གླེང་ཁྲོད་དུ། མཚོ་ལྷོ་ཁུལ་མི་རིགས་མཐོ་འབྲིང་དང་པོ་དང་གཉིས་པ། གསུམ་པ་བཅས་ཀྱི་ཚབ་བྱེད་དགེ་རྒན་དྲུག་གིས་སྔ་གཞུག་ལྟར་རང་རང་གི་མི་ལོ་དུ་མའི་སློབ་ཁྲིད་ཉམས་མྱོང་དང་སྦྲེལ་ནས། བོད་སྐད་ཡིག་གི་འགན་འཁྲི་དང་ཁྱད་ཆོས། ངེས་སྦྱོང་དང་འདེམས་སྦྱོང་གི་ནང་དོན་གྲུབ་ཚུལ་དང་ཁྲིད་ཐབས། ན་གཞོན་བོད་ཡིག་དགེ་རྒན་གྱི་འཕེལ་རྒྱས་དང་སྐྱོང་ཐབས། སློབ་མ་སྐྱོང་སྟངས་དང་སློབ་སྦྱོང་བྱེད་ཐབས། དཔེ་ཀློག་དང་རྩོམ་འབྲི། རྒྱུགས་ཕུད་སྟངས་སོགས་བརྗོད་བྱ་སྣ་ཚོགས་དང་ཟུར་སྣ་མང་གི་ཐད་ནས་གཏམ་བཤད་གནང་ཞིང་། གཏམ་བཤད་རེ་རེའི་མཇུག་ཏུ་བཀོད་སྒྲིག་ལྟར་ཚོགས་ཞུགས་པ་ཡོངས་ཀྱིས་བརྗོད་གཞི་དང་འབྲེལ་ནས་རང་རང་གི་ལྟ་ཚུལ་གསོང་བོར་བརྗོད་དེ་བསམ་ཚུལ་དང་ཉམས་མྱོང་བརྗེ་རེས་ཀྱི་བགྲོ་གླེང་ལེགས་པར་མཛད། སློབ་གཙོ་པདྨ་དབང་ཆེན་གྱིས་སྤྱི་སྡོམ་གྱི་གཏམ་བཤད་གནང་ཞིང་། ཁ་བཏགས་ཐུང་རུང་ལྷ་རྫས་དང་མེ་ཏོག་ཆུང་རུང་མཆོད་རྫས་ཀྱི་དཔེ་བཞིན་ཚོགས་བཅར་བའི་དགེ་རྒན་ཡོངས་ལ་སློབ་རའི་དུས་དེབ《རྨ་གཡང་ཕྱུག་མོའི》དེབ་ཕྲེང་གི་ལེགས་སྐྱེས་ཕུལ།
སློབ་གཙོ་གཞོན་པ་སྟོབས་ལྡན་གྱིས་ངོ་སྤྲོད་གནང་བ་ལྟར་ན་མཚོ་ལྷོ་ཁུལ་བོད་སྐད་ཡིག་མཚན་ལྡན་དགེ་རྒན་ལས་དོན་ཁང་ནི་སློབ་གསོ་ཅུའུའི་སྲིད་འཛིན་སྡེ་ཁག་གི་བཀོད་སྒྲིག་འོག་2018ལོར་གསར་འཛུགས་གནང་ཞིང་ལྟེ་གནས་མཚོ་ལྷོ་ཁུལ་མི་རིགས་མཐོ་འབྲིང་དང་པོར་བཙུགས་ཡོད་པ་དང་། ལོ་སྔོན་མར་མཚོ་སྔོན་ཐོན་སློབ་ཆེན་མི་རིགས་དགེ་འོས་སློབ་གླིང་གི་དགེ་རྒན་རྣམས་གདན་འདྲེན་ཞུས་ནས་ཁུལ་མི་རིགས་མཐོ་འབྲིང་དང་པོར་འཆད་ཁྲིད་གནང་བའི་བྱ་འགུལ་སྤེལ་བ་བརྩིས་ན་ད་རེ་ནི་གཉིས་པ་དེ་ཡིན་འདུག ཐེངས་འདིའི་བྱ་འགུལ་ནི་ལས་དོན་ཁང་གི་ཆེད་ལས་ཀྱི་སྣེ་ཁྲིད་དང་དཔེ་སྟོན། ཤན་སྟོབས་ཀྱི་ནུས་པ་འདོན་སྤེལ་ལེགས་པོ་བྱེད་པ་དང་ན་གཞོན་དགེ་རྒན་ཀྱི་ཆེད་ལས་འཕེལ་རྒྱས་བསྐྱེད་སྲིང་བྱེད་པ། བོད་སྐད་ཡིག་གི་སློབ་ཁྲིད་ཀྱི་ཆུ་ཚད་མཐོར་འདེགས་དང་སློབ་ཁྲིད་སློབ་གསོའི་བགྲོ་གླེང་བརྗེ་རེས་ལ་སྔར་ལས་ལྷག་པར་ཤུགས་སྣོན་བྱེད་པ། ད་དུང་སློབ་ཁྲིད་ཀྱི་ཐོན་ཁུངས་ལེགས་སྒྲིག་དང་སློབ་ཁྲིད་ཀྱི་ཡོངས་ཁུངས་རྒྱ་བསྐྱེད་པ་བཅས་ལ་དམིགས་ཏེ་འཛུགས་གཉེར་གནང་བ་ཡིན་ཞེས་མཐོ་འབྲིང་དང་པོའི་སློབ་གཙོ་གཞོན་པ་དང་ལས་སྒྲུབ་ཁང་གི་འགན་འཛིན་པ་ཀླུ་འབུམ་རྒྱལ་གྱིས་གསུངས། མཚོ་ལྷོ་ཁུལ་བོད་སྐད་ཡིག་མཚན་ལྡན་དགེ་རྒན་ལས་དོན་ཁང་གི་མི་སྣ་དང་ཁུལ་སློབ་ཁྲིད་ཞིབ་འཇུག་ཁང་གི་འབྲེལ་ཡོད་མི་སྣ། མཐོ་འབྲིང་གསུམ་པ་དང་མཐོ་འབྲིང་ལྔ་བ་བཅས་ནས་ཁྱོན་བསྡོམས་མི་སུམ་ཅུ་ལྷག་ཚོགས་འདུར་ཞུགས་ཤིང་། ཁུལ་སློབ་གསོ་ཞིབ་འཇུག་ཁང་གི་བཀོད་སྒྲིག་ལྟར་མཚོ་ལྷོ་ཁུལ་མི་རིགས་མཐོ་འབྲིང་གཉིས་པས་ཚོགས་འདུ་ལེགས་འགྲུབ་འབྱུང་བར་མཐུན་རྐྱེན་གང་ལེགས་སྦྱར།
ཐེངས་འདིའི་བགྲོ་གླེང་ཚོགས་འདུ་བརྒྱུད་ནས་བོད་སྐད་ཡིག་གི་སློབ་ཁྲིད་སློབ་གསོའི་རྒྱུ་སྤུས་དང་དགེ་རྒན་གྱི་བསླབ་ཚན་བྱང་ཚད། སློབ་ཁྲིད་ནུས་རྩལ་སོགས་ཇི་ལྟར་སྔར་ལས་ལྷག་པའི་སྒོ་ནས་ཡར་རྒྱས་དང་མཐོར་འདེགས་སུ་གཏོང་བར་གོ་རྟོགས་འཕེལ་ཅིང་སྐུལ་འདེད་ཀྱི་ནུས་པ་ཐོན་པ་མ་ཟད། མཚོ་ལྷོ་ཁུལ་གྱི་བོད་སྐད་ཡིག་མཚན་ལྡན་དགེ་རྒན་ལས་སྒྲུབ་ཁང་བདེ་ཐང་དང་གོ་རིམ་ལྡན་པའི་ངང་ནས་འཕེལ་རྒྱས་སུ་འགྲོ་བར་ཡང་ཉམས་མྱོང་འདོན་སྤྲོད་བྱས།