དགེ་རྒན་དང་དགེ་རྒན་གྱི་ཁྱད་པར།

ཁྲིད་ལ་བྱང་བའི་དགེ་རྒན་གྱིས་སློབ་མ་སློབ་སྦྱོང་གི་བདག་པོར་བསྐྱེད་ཅིང་ཁྲིད་ལ་རྨོངས་པའི་དགེ་རྒན་གྱིས་སློབ་མ་སྐར་མ་ལེན་པའི་ལག་ཆར་སྤྱོད།
ཁྲིད་ལ་བྱང་བའི་དགེ་རྒན་གྱིས་སློབ་མ་མི་རུ་བཀུར་ཞིང་ཁྲིད་ལ་རྨོངས་པའི་དགེ་རྒན་གྱིས་སློབ་མ་སྣོད་ཙམ་དུ་ལྟ།
ཁྲིད་ལ་བྱང་བའི་དགེ་རྒན་གྱིས་སློབ་མའི་བཟང་ལ་བསྟོད་ཅིང་ཁྲིད་ལ་རྨོངས་པའི་དགེ་རྒན་གྱིས་སློབ་མའི་ངན་ལ་རྟོག
ཁྲིད་ལ་བྱང་བའི་དགེ་རྒན་གྱིས་སློབ་མར་སེམས་སྟོན་ཞིང་ཁྲིད་ལ་རྨོངས་པའི་དགེ་རྒན་གྱི་སློབ་མར་ཁུ་ཚུར་སྟོན།
ཁྲིད་ལ་བྱང་བའི་དགེ་རྒན་གྱིས་དག་པ་དང་གཙང་བ་གནད་དུ་འཛིན་ཞིང་ཁྲིད་ལ་རྨོངས་པའི་དགེ་རྒན་གྱིས་རྣམ་པ་དང་གྲངས་ཀ་གཙིགས་སུ་འཛིན།
ཁྲིད་ལ་བྱང་བའི་དགེ་རྒན་གྱིས་ལག་ལེན་གྱི་ཟབ་སར་སྐྱེལ་ཅིང་ཁྲིད་ལ་རྨོངས་པའི་དགེ་རྒན་གྱིས་ངོ་གདོང་དང་ངོས་འཛིན་ཚད་དུ་བྱེད།
ཁྲིད་ལ་བྱང་བའི་དགེ་རྒན་གྱིས་སྤྱོད་བཟང་དཔེ་རུ་སྟོན་ཅིང་ཁྲིད་ལ་རྨོངས་པའི་དགེ་རྒན་གྱིས་བསླབ་བྱ་ངག་ནས་ཟློ།
ཁྲིད་ལ་བྱང་བའི་དགེ་རྒན་གྱིས་འབྲས་བུ་མདུན་དུ་འཕེན་ཞིང་ཁྲིད་ལ་རྨོངས་པའི་དགེ་རྒན་གྱིས་འཆར་གཞི་སྔོན་ལ་སྒྲོག
ཁྲིད་ལ་བྱང་བའི་དགེ་རྒན་གྱིས་འགལ་རྐྱེན་གྲོགས་སུ་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་འགལ་བ་དགྲ་རུ་འཛིན།
ཁྲིད་ལ་བྱང་བའི་དགེ་རྒན་གྱིས་རང་ཉིད་ཞབས་འདེགས་པར་བསམ་ཞིང་ཁྲིད་ལ་རྨོངས་པའི་དགེ་རྒན་གྱིས་རང་ཉིད་དཔོན་དུ་འཛིན།
ཁྲིད་ལ་བྱང་བའི་དགེ་རྒན་གྱིས་བྱིས་པའི་འཛུམ་མདངས་ལས་རང་གི་རིན་ཐང་འཚོལ་ཞིང་ཁྲིད་ལ་རྨོངས་པའི་དགེ་རྒན་གྱིས་བྱིས་པའི་རྒྱུགས་ལན་ལས་རང་གི་གཟི་བརྗིད་འཚོལ།
ཁྲིད་ལ་བྱང་བའི་དགེ་རྒན་གྱིས་ཕྱོགས་རིས་ནི་ཐོག་མའི་སྤང་བྱར་འཛིན་ཞིང་ཁྲིད་ལ་རྨོངས་པའི་དགེ་རྒན་གྱིས་ཕྱོགས་འཛིན་ནི་ཐབས་དང་ལམ་དུ་སྒོམ།
ཁྲིད་ལ་བྱང་བའི་དགེ་རྒན་གྱིས་དྲི་བ་ནི་བྱིས་པའི་བློ་སྒོ་འབྱེད་པའི་ལྡེ་མིག་ཏུ་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་དྲི་བ་ནི་བྱིས་པའི་རྒོད་གཤིས་འཇོམས་པའི་ཐོ་བར་སྤྱོད།
ཁྲིད་ལ་བྱང་བའི་དགེ་རྒན་གྱིས་ཚུར་དྲི་བ་འདོན་པ་ནི་འཕེལ་རྒྱས་སུ་འཛིན་ཞིང་ཁྲིད་ལ་རྨོངས་པའི་དགེ་རྒན་གྱིས་ཚུར་དྲི་བ་འདོན་པ་ནི་མ་གུས་པར་བསྙད།
ཁྲིད་ལ་བྱང་བའི་དགེ་རྒན་གྱིས་སློབ་མའི་ཤེས་རབ་ལ་རྣོ་འབྱིན་ཞིང་ཁྲིད་ལ་རྨོངས་པའི་དགེ་རྒན་གྱིས་སློབ་མའི་ཁེ་ཕན་གྱི་སྲེད་པ་སློང་།
ཁྲིད་ལ་བྱང་བའི་དགེ་རྒན་གྱིས་བདེ་ཐང་རྩ་བར་འཛིན་ཞིང་ཁྲིད་ལ་རྨོངས་པའི་དགེ་རྒན་གྱིས་བསླབ་འབྲས་གཙོ་བོ་བྱེད།
ཁྲིད་ལ་བྱང་བའི་དགེ་རྒན་གྱིས་སློབ་མ་ནི་སྔོག་ན་ཚར་རྒྱུ་མེད་པའི་གཏེར་ཁུངས་སུ་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་སློབ་མ་ནི་ཅི་ཡང་བཏབ་ཆོག་པའི་ཞིང་སར་བརྩི།
ཁྲིད་ལ་བྱང་བའི་དགེ་རྒན་གྱིས་སློབ་མས་མི་སློབ་པ་དེ་ཐན་དུ་བརྩི་ཞིང་ཁྲིད་ལ་རྨོངས་པའི་དགེ་རྒན་གྱིས་སློབ་མས་མི་ཤེས་པ་དེ་མཚང་དུ་བགྲང་། 
ཁྲིད་ལ་བྱང་བའི་དགེ་རྒན་གྱིས་སློབ་སྦྱོང་ནི་སྤྱོད་ཡོན་གསོ་བ་ལ་གོ་ཞིང་ཁྲིད་ལ་རྨོངས་པའི་དགེ་རྒན་གྱིས་སློབ་སྦྱོང་ནི་བསླབ་དེབ་དང་སྦྱང་གཞི་སྐྱོར་བ་ལ་བྱེད།
ཁྲིད་ལ་བྱང་བའི་དགེ་རྒན་གྱིས་བརྡ་དང་རྣམ་འགྱུར་གྱིས་དོན་སྟོན་པར་རམ་འདེགས་བྱེད་ཅིང་ཁྲིད་ལ་རྨོངས་པའི་དགེ་རྒན་གྱིས་ཚིག་ལ་ཚིག་གི་ལྷན་པ་འདེབས་པར་བརྩོན།
ཁྲིད་ལ་བྱང་བའི་དགེ་རྒན་གྱིས་སློབ་མ་དམིགས་འབེན་དུ་བརྩི་ཞིང་ཁྲིད་ལ་རྨོངས་པའི་དགེ་རྒན་གྱིས་བསླབ་འབྲས་དམིགས་ཡུལ་དུ་བྱེད།
ཁྲིད་ལ་བྱང་བའི་དགེ་རྒན་གྱིས་སློབ་མའི་ཆེད་དུ་སྒྲིག་སྲོལ་བརྩི་ཞིང་ཁྲིད་ལ་རྨོངས་པའི་དགེ་རྒན་གྱིས་སྒྲིག་ལམ་སྲུང་ཕྱིར་སློབ་མར་བསྟུན།
ཁྲིད་ལ་བྱང་བའི་དགེ་རྒན་གྱིས་ཕམ་ཁ་ལས་ཉམས་མྱོང་ལེན་ཞིང་ཁྲིད་ལ་རྨོངས་པའི་དགེ་རྒན་གྱིས་ཕམ་ཉེས་ཀྱི་ཁ་གཡོར་ས་འཚོལ།
ཁྲིད་ལ་བྱང་བའི་དགེ་རྒན་གྱིས་བདེན་པ་གོང་དུ་བཀུར་ཞིང་ཁྲིད་ལ་རྨོངས་པའི་དགེ་རྒན་གྱིས་རྫུན་པ་ཐབས་སུ་འཛིན།
ཁྲིད་ལ་བྱང་བའི་དགེ་རྒན་གྱིས་མཚར་སྣང་དང་དོགས་བློ་ནི་གསར་བཏོད་ཀྱི་ས་བོན་དུ་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་ཨ་མཚར་དང་ཅིའི་ཕྱིར་ཟེར་ཚད་པྲ་ཚག་བློ་མང་གི་ཞད་དུ་འཛིན།
ཁྲིད་ལ་བྱང་བའི་དགེ་རྒན་གྱིས་ཅི་ལྟར་སློབ་པའི་ཐབས་སྟོན་ཞིང་ཁྲིད་ལ་རྨོངས་པའི་དགེ་རྒན་གྱིས་ཅིའི་ཕྱིར་སློབ་པའི་དགོས་པ་སྐྱོར།
ཁྲིད་ལ་བྱང་བའི་དགེ་རྒན་གྱིས་བྱིས་པ་སྐྱོང་བ་ཆོས་སུ་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་བྱིས་པའི་ཟུར་ནས་ཁ་བཏོན་ཟློ།
ཁྲིད་ལ་བྱང་བའི་དགེ་རྒན་གྱིས་མ་འདང་བ་རྣམས་ཤུགས་ཀྱིས་འཚོལ་ཞིང་ཁྲིད་ལ་རྨོངས་པའི་དགེ་རྒན་གྱིས་མི་ལེགས་པའི་ཁག་གཞན་ལ་འགེལ།
ཁྲིད་ལ་བྱང་བའི་དགེ་རྒན་གྱིས་སློབ་མའི་རྒྱུད་ཚོད་ལ་བསྟུན་པར་བྱེད་ཅིང་ཁྲིད་ལ་རྨོངས་པའི་དགེ་རྒན་གྱིས་རང་གི་འཇོན་ཐང་ངོམ་རྐྱང་བྱེད།
ཁྲིད་ལ་བྱང་བའི་དགེ་རྒན་གྱིས་རྒྱུན་པར་གཞན་གྱི་ཡོན་ཏན་བགྲང་ཞིང་ཁྲིད་ལ་རྨོངས་པའི་དགེ་རྒན་གྱིས་རྟག་ཏུ་རང་གི་ཆེ་བ་བརྗོད།
ཁྲིད་ལ་བྱང་བའི་དགེ་རྒན་གྱིས་སློབ་མའི་བསམ་འཆར་ཉེ་བར་བསྡུ་ཞིང་ཁྲིད་ལ་རྨོངས་པའི་དགེ་རྒན་གྱིས་ཅི་འདོད་བཀའ་ཡི་གཟེར་བུ་འདེབས།
ཁྲིད་ལ་བྱང་བའི་དགེ་རྒན་གྱིས་སློབ་མའི་འཚར་ལོངས་ལ་དོ་ཁུར་བྱེད་ཅིང་ཁྲིད་ལ་རྨོངས་པའི་དགེ་རྒན་གྱིས་སློབ་མའི་རྒྱུགས་འབྲས་ལ་སེམས་ཁྲལ་བྱེད།
ཁྲིད་ལ་བྱང་བའི་དགེ་རྒན་གྱིས་བྱིས་པར་བྱིས་པའི་མིག་གིས་ལྟ་ཞིང་ཁྲིད་ལ་རྨོངས་པའི་དགེ་རྒན་གྱིས་བྱིས་པར་མི་རྒན་གྱི་ཐིག་འདེབས།
མདོར་ན་ཁྲིད་ལ་བྱང་བའི་དགེ་རྒན་གྱིས་ལག་ནས་ལྷ་བཞེངས་ཤིང་ཁྲིད་ལ་རྨོངས་པའི་དགེ་རྒན་གྱིས་ཁ་ནས་ལྷ་བཞེངས་པར་བྱེད་དོ། །

གསལ་བཤད། རྒན་ཚེ་བརྟན་ལགས་ཀྱི་ཁྲིད་ལ་བྱང་བའི་དགེ་རྒན་དང་ཁྲིད་ལ་རྨོངས་པའི་དགེ་རྒན་ཞེས་པའི་རྩོམ་ཡིག་མཐོང་བས་ཚིག་དོན་དེ་དང་མཐུན་པར་རང་གི་དྲན་ཚུལ་ཞབས་མཆན་དུ་བཀོད་པ།