མདོ་ཁམས་ལ་འབུལ་སྡུད་རྫོང་དུས་ཀྱི་ཡི་གེ།

     ཨོཾ་སྭ་སྟི། གསུང་རབ་ཀུན་གྱི་རྒྱ་མཚོར་གནས་བཅས་ཤིང་། །དགའ་བཞིའི་ནོར་བུས་རིམ་གཉིས་སྤྱི་བོར་མཛེས། །ཕྲིན་ལས་བཟང་པོའི་ནོར་ལ་དབང་འབྱོར་པ། །རྗེ་བཙུན་བླ་མ་གདེངས་ཅན་དབང་པོ་རྒྱལ། །ཉེས་པའི་དགྲ་ཚོགས་འདམ་བུའི་གྲོང་ཁྱེར་བཅོམ། །སྲིད་ཞིའི་དཔལ་འབྱོར་གསེར་གྱི་དྲྭ་བས་སྤྲས། །ཟུང་འཇུག་བདེ་བའི་ཡན་ལག་བདུན་ལྡན་པ། །སྟོན་པ་གླང་པོ་དེ་ལ་གུས་ཕྱག་འཚལ། །གང་ཞིག་ཐོས་ན་མུ་སྟེགས་རི་དྭགས་བུ། །སྐྲག་མཛད་བདག་མེད་སེང་གེའི་སྒྲ་སྒྲོགས་ཤིང་། །སྐལ་བཟང་གདུལ་བྱའི་གངས་རི་ཉེར་མཛེས་པ། །དམ་ཆོས་སེང་གེའི་སྒྲ་དབྱངས་དེ་ལ་འདུད། །བདུད་དཔུང་བྱེ་བས་སྐེམ་པར་མི་ནུས་ཤིང་། །རྣམ་དག་བསླབ་གསུམ་པདྨོའི་ཕྲེང་བས་བརྒྱན། །འབྱོར་ལྡན་བསོད་ནམས་ཆུ་བོ་འདུ་བའི་གཞི། །དགེ་འདུན་པད་མཚོ་ཆེ་ལ་གུས་ཕྱག་འཚལ། །
     དེ་ལྟར་བླ་མ་དང་དཀོན་མཆོག་གསུམ་ལ་མཆོད་པར་བརྗོད་པ་སྔོན་དུ་བཏང་སྟེ་དཔལ་ཨེ་ཝྃ་ཆོས་ལྡན་གྱི་གཙུག་ལག་ཁང་ནས་མང་དུ་ཐོས་པའི་དགེ་སློང་བསོད་ནམས་སེང་གེས་མདོ་ཁམས་ཀྱི་སའི་ཆར་བཞུགས་པའི་དཔལ་ལྡན་ས་སྐྱ་པའི་བསྟན་པ་འཛིན་པའི་དགེ་བའི་བཤེས་གཉེན་རྣམས་ཀྱི་སྙན་དུ་ཕུལ་བ། རྗེ་བླ་མ་རྡོ་རྗེ་འཆང་ཆེན་པོ་སངས་རྒྱས་མིའི་གཟུགས་སུ་སྤྲུལ་པ་དེས། བདེ་བར་གཤེགས་པའི་བསྟན་པ་ཡོངས་སུ་རྫོགས་པའི་བཤད་སྒྲུབ་འདུས་པ་དཔལ་ལྡན་ས་སྐྱ་པའི་བཀའ་སྲོལ་མི་ཉམས་པར་བྱ་བའི་ཕྱིར་དང་། ཁམས་གསུམ་གྱི་སེམས་ཅན་ལ་ཕན་བདེ་འབྱུང་བའི་ཕྱིར་དུ་ཡི་དམ་ལྷའི་ལུང་བསྟན་བཞིན་དཔལ་ཨེ་ཝྃ་ཆོས་ལྡན་གྱི་དགོན་པ་བཏབ། རྒྱ་བོད་ཀྱི་རྟེན་བྱིན་རླབས་ཅན་ཕྱག་ཏུ་བྱུང་བ་རྣམས་དང་། གསར་དུ་བཞེངས་པ་ལམ་འབྲས་བླ་མ་བརྒྱུད་པའི་སྐུ་ཚན་པ་གསུམ་དང་། བསྟན་པའི་གཙོ་བོའི་གསེར་སྐུ་ཆེས་ཆེ་བ་ལ་སོགས་པའི་རྟེན་གསུམ་ངོ་མཚར་བ་བྱིན་རླབས་ཀྱི་དཔལ་འབར་བ་རྣམས་ཀྱི་དྲུང་དུ་མར་མེའི་ཕྲེང་བ་ལ་སོགས་པའི་མཆོད་རྫས་ཕུལ་དུ་བྱུང་བ་དང་། རྗེ་བཙུན་གོང་མ་བཞིའི་དུས་ཆེན་གྱི་རྒྱུན་འཛུགས་པར་མཛད། རྗེ་བླ་མ་བདེ་བ་ཅན་དུ་གཤེགས་པའི་རྗེས་སུ། ཆོས་རྗེ་མུས་ཆེན་དཀོན་མཆོག་རྒྱལ་མཚན་ཞེས་མཚན་ཡོངས་སུ་གྲགས་པ་རྣལ་འབྱོར་དབང་ཕྱུག་དང་། ས་ཆེན་གྱི་ཞལ་གཟིགས་པ་དེ་དང་། རྗེ་བླ་མ་ཡབ་སྲས་དེ་གཉིས་ཀྱིས་དུས་གསུམ་མཁྱེན་པའི་མངོན་ཤེས་ཀྱིས་རྒྱལ་ཚབ་དམ་པར་བསྐོས་པ་ཆོས་རྗེ་ཀུན་དགའ་དབང་ཕྱུག་པ་དང་དཔོན་སློབ་གཉིས་ཀྱིས་རྡོ་རྗེ་འཆང་ཆེན་པོའི་ནང་རྟེན་རྗེ་ཉིད་ཀྱི་སྐུ་འདྲ་དང་། སྟོན་པའི་གསེར་སྐུ་ཆེས་ཆེ་བ་དང་། ཕྱི་རྟེན་བདེ་གཤེགས་མཆོད་རྟེན་བརྒྱད། གཙང་ཁང་གི་ནང་དུ་གསེར་འབུམ་དང་བཅས་པ་བཞེངས་ཏེ་དེ་དག་གི་དྲུང་དུའང་མར་མེའི་ཕྲེང་བ་ལ་སོགས་པའི་མཆོད་རྫས་གསར་དུ་བཙུགས། ཟླ་བ་བྱུང་ངོ་ཅོག་གི་ཉེར་ལྔ་ལ་ཟླ་མཆོད་དང་། དུས་ཆེན་ལ་བདེ་དགྱེས་གསང་གསུམ་ལ་སོགས་པའི་དཀྱིལ་འཁོར་ཆེན་པོ་ལྔའི་སྒྲུབ་མཆོད་ཞག་གྲངས་མང་པོ་སྦྲེལ་བ་བཙུགས་པ་འདི་ནི་མཐོང་བ་ཐམས་ཅད་ཀྱིས་མངོན་སུམ་དུ་གྲུབ་ཀྱང་དད་ལྡན་རྣམས་ཀྱི་དད་པ་གསལ་འདེབས་པའི་ཕྱིར་བྲིས་པ་ཡིན། ངེད་ཀྱང་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་བའི་དགོན་པར་སྡེ་སྣོད་གཙོ་བོར་གྱུར་པའི་མདོ་སྔགས་ཀྱི་བཤད་ཉན་སྟོབས་ཆེ་བ་ཚུགས་ཡོད་ནའང་། ངོར་པའི་སློབ་དཔོན་ཆེ་སྒྲེས། ལས་ཚན་གྱི་གྲྭ་བ་ཐམས་ཅད་ཀྱིས་གདན་ས་བྱེད་དགོས་གསུང་བ་ནན་ཆེས་པས་བཟློག་མ་ནུས་པ་དང་། རྗེ་བླ་མ་ཡབ་སྲས་ཀྱིས་སངས་རྒྱས་ཀྱི་བསྟན་པ་ལ་བྱ་བ་བྱས་ཚུལ་ཆ་ཤས་རེ་ལ་བསམས་ནའང་སྐུ་དྲིན་འཁོར་མེད་དྲན་ནས་མ་འོངས་པ་ན་འདིར་འགྱུར་གྱི་ལྷུས་ཐིངས་པ་མེད་ཀྱང་། གཞན་བྱ་ཐབས་ཀྱང་མ་རྙེད། བློས་དོར་ཡང་མ་ནུས་པས་ཡོས་ལོ་ཧོར་ཟླ་དང་པོའི་ཚེས་ལྔའི་ཉིན་ནས་གདན་སའི་ཁུར་བླངས་པ་ཡིན། ངེད་ཀྱིས་རང་སར་བབ་པའི་ཁུར་ཁུར་བ་འདི་བཞིན་དུ། དད་ལྡན་གྱི་སློབ་ཚོགས་དམ་ཚིག་གི་རྒྱན་གྱིས་མཛེས་ཤིང་རྣམ་དཔྱོད་ཀྱི་བཞིན་རས་གསལ་བ་ཐམས་ཅད་ཀྱིས་ཀྱང་རང་སར་བབ་པའི་ཁུར་ཁུར་དགོས། དེའི་དོན་སྤྱིར་དམ་པའི་ཆོས་ཀྱི་བཤད་སྒྲུབ་ལ་བརྩོན་པ་ཡིན་ནའང་། ད་ལན་སྐབས་སུ་བབ་པ་སྔར་གྱི་དཀོན་མཆོག་གི་མཆོད་པ་དང་། དུས་མཆོད་ཀྱི་རྒྱུན་རྣམས་མི་ཉམས་པའི་ཕྱིར་དང་། དེ་ལ་བརྟེན་ནས་བསྟན་པ་དར་བ་དང་། སེམས་ཅན་ལ་བདེ་སྐྱིད་འབྱུང་བའི་ཕྱིར་དང་། འབྱོར་ལྡན་རྣམས་ཀྱི་རྒྱུ་ཆེ་ཆུང་གང་ཕུལ་ཡང་ཇི་སྲིད་དཀར་མེ་དང་། དུས་མཆོད་ཀྱི་རྒྱུན་མ་ཆད་ཀྱི་བར་དུ་རྒྱ་མཚོ་ཆེན་པོ་ལ་ཆུ་ཐིགས་ལྟར་དབྱེར་མེད་དུ་འདྲེས་པར་འགྱུར་བས་དེ་དག་ལའང་ཕན་གདགས་པའི་ཕྱིར་དུ་འབུལ་སྡུད་ལ་ས་སྐྱ་བཀའ་བཅུ་པ་སངས་རྒྱས་རྒྱལ་མཚན་དཔོན་སློབ་བཏང་ཡོད་པ་ལ་རང་རང་གི་ཕྱག་རྫས་གང་འབྱོར་འབུལ་བ། སྐབས་སུ་བབ་པའི་སྦྱིན་བདག་བསྐུལ་བ། འགྲོ་འདུག་གི་སྐྱེལ་བསུ། གྲོགས་ལྡན་གྱི་མི་གོ་ཆོད་གང་དགོས་སར་གཏོང་བ་རྣམས་མཛད་པར་ཞུ། འདུས་བྱས་ཀྱི་དགེ་རྩ་རྣམས་ཀྱི་ནང་ནས། བླ་མ་ཞལ་བཞུགས་པའི་དུས་སུ་བསྙེན་བཀུར་ཞབས་ཐོག་དང་། འདས་པའི་རྗེས་སུ་དུས་ཀྱི་མཆོད་པ་གཟུང་བ་འདི་ཉིད་བསོད་ནམས་ཆེ་བ་ཡིན་ཏེ། རྩ་རྒྱུད་བརྟག་གཉིས། གུར། བདེ་མཆོག་རྩ་རྒྱུད་དང་། གསང་བ་འདུས་པའི་རྒྱུད་ལ་སོགས་པ་རྣམས་ལས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་བླ་མ་ལ་རག་ལས་པ་དང་། དུས་གསུམ་གྱི་སངས་རྒྱས་ཐམས་ཅད་མཆོད་པའི་བསོད་ནམས་བླ་མའི་བ་སྤུའི་ཁུང་བུ་གཅིག་ལ་མཐོང་བ་ལ་སོགས་མང་དུ་གསུངས། ཀླུ་སྒྲུབ་ཡབ་སྲས་ཀྱིས་ཀྱང་། མཆོད་པ་ཐམས་ཅད་སྤངས་ནས་ནི། །བླ་མ་མཆོད་པ་ཡང་དག་བརྩམ། །དེ་མཉེས་པས་ནི་ཀུན་མཁྱེན་པའི། །ཡེ་ཤེས་མཆོག་ནི་འཐོབ་པར་འགྱུར། །གང་གིས་བསྐལ་པ་བྱེ་བར་ནི། །བརྒྱ་ཕྲག་ཏུ་ཡང་རྙེད་དཀའ་བ། །དེ་ཉིད་སངས་རྒྱས་བརྩོན་ལྡན་ལ། །སྐྱེ་བ་འདིར་ནི་སྩོལ་བར་མཛད། །ཅེས་སོགས་མང་དུ་གསུངས། དཔལ་ལྡན་ས་སྐྱ་པཎྜི་ཏའི་ཞལ་ནས་ཀྱང་། དུས་གསུམ་གྱི་སངས་རྒྱས་ཐམས་ཅད་བླ་མ་ལ་འདུས་པས་བླ་མ་གཅིག་པུ་ལ་གསོལ་བ་བཏབ་པས་དུས་གསུམ་གྱི་སངས་རྒྱས་ཐམས་ཅད་ལ་གསོལ་བ་བཏབ་པར་འགྱུར་བའི་ཕྱིར་དང་། རྟེན་འབྲེལ་ཐམས་ཅད་རང་འགྲིག་ཏུ་འགྲོ་བའི་རྒྱུ་མཚན་དེ་ཡིན་ཅེས་གསུངས། དེ་ལྟར་ན་འདི་དཔོན་སློབ་ཀྱི་ལག་ཏུ་གང་འཕྲོད་ཨེ་ཝྃ་དུ་འཕྲོད་ངེས་ཡིན་པས་ཆུད་མི་ཟ། ཨེ་ཝྃ་དུ་གང་འཕྲོད་བླ་མ་སངས་རྒྱས་མཆོད་པས་ངོ་བོ་བཟང་བ་དང་། དུས་མཆོད་ཀྱི་རྒྱུན་ལ་འདྲེས་པས་ཐབས་རྒྱ་ཆེ་བར་ཤེས་པར་བྱས་ནས་རང་རང་གི་འབྱོར་པའི་སྟོབས་བཞིན་དད་པ་དང་བརྩོན་པས་དགེ་བའི་རྩ་བ་ཕུན་སུམ་ཚོགས་པ་བསྒྲུབ་པར་མཛོད་ཅིག །
     ཟླ་གམ་དབང་གི་དཀྱིལ་འཁོར་དབུས་གནས་ཤིང་། །ཡན་ལག་རབ་རྒྱས་རིན་ཆེན་རྒྱན་ཕྲེང་ལྡན། །ཁམས་གསུམ་འདོད་པ་ཀུན་ལ་དབང་སྒྱུར་བ། །འདོད་པའི་རྒྱལ་པོས་དོན་འདི་དགེ་ལེགས་མཛོད། །འོད་ཟེར་དམར་པོའི་ཕྲེང་བས་སྲིད་གསུམ་གསལ། །ཨུཏྤལ་དམར་པོའི་མདའ་གཞུས་ཁམས་གསུམ་འགུགས། །ཁྲོ་ཆགས་བཞད་པའི་སྤྱན་ཟུར་གཡོ་བ་ཅན། །རིག་བྱེད་ལྷ་མོ་དེ་ཡིས་དགེ་ལེགས་མཛོད། །གླང་ཆེན་ཞལ་ལྡན་འཛུམ་ཁྲོའི་མཆེ་བ་གཙིགས། །གཞོན་ནུ་ལང་ཚོ་དར་དམར་ཅོད་པན་བཅིངས། །བཅུ་གཉིས་ཕྱག་ཅན་ཞབས་གཉིས་འགྱིང་བག་ཅན། །ཁྲོ་རྒྱལ་དེ་ཡིས་དོན་འདིའི་དགེ་ལེགས་མཛོད། །རྗེ་བཙུན་བརྒྱུད་པར་བཅས་པ་ཐམས་ཅད་ཀྱིས། །བསྟན་དང་བསྟན་འཛིན་བསྲུང་བར་བཀའ་བསྒོས་པའི། །སྲུང་མའི་དབང་པོ་བགྲང་ཡས་ཐམས་ཅད་ཀྱིས། །འགལ་རྐྱེན་བསལ་ཞིང་མཐུན་རྐྱེན་སྒྲུབ་པར་མཛོད། །
     ཡོས་ལོ་ཧོར་ཟླ་ལྔ་པའི་ཚེས་གསུམ་གྱི་ཉིན་དགེ་ཞིང་བཀྲ་ཤིས་པའི་ཡི་གེ་འདི་མདོ་ཁམས་ཤར་ཕྱོགས་སུ་ཕུལ་བ་དགེ །དགེའོ། །