པོ་ཏོ་བའི་དཔེ་ཆོས་བཞུགས་སོ།།

     འདི་ན་མར་བསོད་ནམས་བསགས་པའི་ཆོས་སྐོར་བསྟན་པ་ལ་དཔེ་ཉི་ཤུ་རྩ་གསུམ་གྱིས་བསྟན་པ་ལས། དང་པོ་མཐུན་ཕྱོགས་ལ་དཔེ་བཅུ་གཉིས་ནི།
ཨ་ཏི་ཤ་དང་རྐང་ཆད་ཀྱང་།།
སོ་མེད་རྙིལ་གྱིས་ཚོང་པའི་ལམ། །
ཞིང་པའི་སོ་ནམ་ཚོང་པའི་ཟོང་།།
ནོར་བུ་མཆོད་ན་དབུལ་བ་སེལ། །
ཞིང་རྡུལ་སེམས་ཅན་གྲངས་རྙེད་སོགས། །
ས་བོན་རང་ཤ་རང་ཁྲག་འཐུང་། །
བྱང་ཆུབ་སེམས་ཀྱིས་སྟན་ལ་འདུག །
     མི་མཐུན་པའི་ཕྱོགས་སྤང་བ་ལ་དཔེ་བཅུ་གཉིས་ནི།
མི་ཁོམ་ལུས་བླངས་སྦུར་བས་བལྟས།།
དེ་ལ་མི་བཟོ་ལྷ་འདྲེས་རྐྱེན། །
ལྷམ་ཡོད་ཆུ་ནང་བགེགས་རིགས་བཞིན།།
ཆུས་ཁེངས་འཇོལ་མོ་རབས་ཆད་བུ། །
ས་བོན་མེ་བླུག་རྡོ་ལེབ་སྟེང་།།
ས་བོན་རུལ་བ་ནོར་བུ་བཙོངས། །
     ཐེག་པ་ཆེན་པོའི་ལམ་ངོས་བཟུང་བ་ལ་དཔེ་བཅུ་གཉིས་ཀྱིས་བསྟན་པ་ལས། དང་པོ་མཐུན་ཕྱོགས་དཔེ་ལྔ་སྟེ། འགྲོ་ས་ལམ་དང་རྒྱུ་འབྲས་བཞིན།། ལྗོན་ཤིང་གསེར་འགྱུར་བདུད་རྩི་འདྲ། །
     མི་མཐུན་པའི་ཕྱོགས་སྤང་བ་ལ་དཔེ་ལྔ་སྟེ། ཆུ་ཤིང་གཤོག་ཆག་ལྷ་ཁང་ལྟ།། སྦུད་པ་འབུད་པ་འཕྱི་བ་བཞིན། །
     བྱས་པ་ཤེས་ཤིང་དྲིན་དུ་གཟོ་བ་བསྒོམ་པ་ལ། དཔེ་བདུན་གྱིས་བསྟན་པ་ལས། དང་པོ་མཐུན་ཕྱོགས་ལ་དཔེ་བཞི་སྟེ། འབུ་སྲིན་གཡག་ཙམ་ཁྱི་མིར་གཏོང་།། འདམ་བུ་གཅིག་སྟོང་རལ་གྲི་དགྲ །
     མི་མཐུན་པའི་ཕྱོགས་ལ་དཔེ་གསུམ་སྟེ། བ་གཏོར་ཆུས་ཁྱེར་མ་སྐྱེས་དགྲ། བྱམས་པ་སྒོམ་པ་ལ་དཔེ་བཅུ་གཉིས་ཀྱིས་བསྟན་པ་ལས། མཐུན་ཕྱོགས་ལ་དཔེ་དྲུག་གིས་བསྟན་ཏེ།མ་ནི་བུ་ལ་གསེར་རྙེད་པ། ། ཕ་མ་སྐྱིད་གྲོགས་སྡུག་གྲོགས་པ། ། བུ་ཆུང་ངུ་འམ་རྒྱལ་ཤེ་བཞིན།།
     མི་མཐུན་ཕྱོགས་སྤང་བ་ལ་དཔེ་དྲུག་སྟེ། སྲེག་བྱེད་མེ་དང་ཡི་དྭགས་ལྟར།། ཁྱི་འདྲ་ཞོ་ཆེ་སྡུག་བསྔལ་བཞིན། ། ཉི་མ་བརྒྱ་བསྒོམ་མ་ལ་སྡུག།
     སྙིང་རྗེ་སྒོམ་པ་ལ་དཔེ་དགུ་ཡིས་བསྟན་པ་ལས། དང་པོ་མཐུན་ཕྱོགས་ལ་དཔེ་ལྔ་སྟེ།
དམུས་ལོང་འབྲོག་འཁྱམས་མི་གཙང་དོང་།།
ཁ་རླངས་ཁྲི་གཉན་ཡུལ་སྣ་གདོང་། །
མི་མཐུན་པའི་ཕྱོགས་ལ་དཔེ་བཞི་སྟེ།
སྔགས་པ་ར་གསོད་ཕྱུག་རྒན་ལ། །
བུ་བསད་ནོར་གསོག་ཁྲ་སྤྱང་བཞིན། །
     སྨོན་པ་བྱང་ཆུབ་ཀྱི་མཆོག་ཏུ་སེམས་བསྐྱེད་པའི་ཆོས་སྐོར་ལ་དཔེ་བཞི་བཅུ་ཞེ་གསུམ་གྱིས་བསྟན་པ་ལས།དང་པོ་མཐུན་ཕྱོགས་ལ་དཔེ་ཉི་ཤུ་རྕ་གཉིས་ཀྱིས་བསྟན་ཏེ།
ཆུ་འདོད་བདུད་རྕི་རམ་བུ་གསེར། །
ཆུ་རྒལ་འོར་གཅིག་ཞང་མོན་ཟེར། །
བུ་སྟོར་ལག་བཅིངས་སྒལ་བཅོས་འདྲ།།
ཆུ་རྙེད་གྲུ་འདྲེན་ལུག་རྫི་བཞིན། །
འདམ་རྫབ་པདྨ་མཆོད་ཐང་བསྐྱེད།།
ཡིད་བཞིན་ནོར་བུ་དགེ་སློང་བཞིན། །
བྱམས་པས་གསུངས་པའི་རྣམ་ཐར་ལས། །
ཡིད་བཞིན་བདུད་རྕི་ཉི་འོད་བཞིན། །
རྡོ་རྗེ་གདན་ལ་བསྐོར་མཛད་ཚེ། །
རྒན་མོས་མ་ཧེ་བུ་གཅེས་མ། །
ཞིང་པའི་ཆུ་ལུད་ཆུ་ཆེན་བཞིན།།
ཤ་གཟུག་མྱུ་གུ་ཆོས་བདུན་བསླབ། །
     མི་མཐུན་ཕྱོགས་ལ་དཔེ་ཉི་ཤུ་རྕ་གཅིག་གིས་བསྟན་ཏེ།
དགྲ་བོ་ཡུལ་འབྱིན་ཟན་གཡོས་ལྟར། །
ཟས་ངན་འཚོལ་དང་ལད་མོ་བཞིན། །
རྨ་ཁའི་ཤུ་བ་དང་སྣ་ཁྲག །
རྔ་ཡོད་ཙམ་ན་འབྲས་མི་འབྱུང་། །
ཆུ་ཁར་བོར་བཞིན་སྨན་རྒྱལ་ཐོགས། །
གྲུ་འཛིན་རྒྱལ་པོ་གྲུ་པ་འདྲ། །
རྒན་མོའི་དགེ་རྩ་སྤྲེའུའི་བུ། །
རང་འགྲངས་ཙམ་ན་གང་གིས་ཉུང་། །
བདེན་བྲལ་ལོ་བསྒྱུར་ཁྱི་ལྟར་ཟུག །
སྔགས་པ་མར་འཚོང་ཡེ་འབྱུང་བཞིན། །
     སྦྱིན་པ་སོ་སོའི་མཚན་ཉིད་བཤད་པ་ལ་དཔེ་བཅུ་དྲུག་གིས་བསྟན་ཏེ། དང་པོ་མཐུན་ཕྱོགས་ལ་དཔེ་དགུས་བསྟན་པ་ལས། དང་པོ་ཟང་ཟིང་གི་སྦྱིན་པ་ལ་དཔེ་ལྔ་སྟེ། སྦྲུལ་སྐོགས་རི་དྭགས་ཁྱིམ་བདག་བཞིན། ། དགེ་སློང་ཁོ་བོ་མཁས་པ་ལགས། །
     ཆོས་ཀྱི་སྦྱིན་པ་ལ་དཔེ་གཉིས་ཏེ། དགོན་པའི་དགེ་སློང་ཁ་ཏོན་ཀློག། མི་འཇིགས་པའི་སྦྱིན་པ་ལ་དཔེ་གཉིས་ཏེ། རྒྱལ་རིགས་འཇིགས་སའི་རབ་བྱུང་བཞིན།།
     མི་མཐུན་ཕྱོགས་སྤང་བ་ལ་དཔེ་བདུན་ལས། ཟང་ཟིང་སྦྱིན་པའི་མི་མཐུན་ཕྱོགས་ལ་དཔེ་བཞི་སྟེ། མར་ལ་ཏི་ཐོ་ཁྲག་ལ་ཁྱི། ། བག་མ་རྣ་བའི་ལྷན་པ་འདྲ། །
     བྱང་པ་སྟོན་མོ་ཆོས་ཀྱི་སྦྱིན་པའི་མི་མཐུན་ཕྱོགས་ཀྱི་དཔེ་སྟེ། མེས་ཚིག་རྒོད། མི་འཇིགས་པའི་སྦྱིན་པའི་མི་མཐུན་པ་ལ་དཔེ་གཉིས་ཏེ། སེང་གེ་བསད་འདྲ་ཀོང་བུ་ལྡག །སྡོམ་པ་གསུམ་སོ་སོའི་མཚན་ཉིད་བཤད་པ་ལ་དཔེ་བཞི་བཅུ་ཞེ་ལྔས་བསྟན་ཏེ། མཐུན་ཕྱོགས་ལ་དཔེ་ཉི་ཤུ་རྩ་བཞིས་བསྟན་པ་ལ། དང་པོ་སྡོམ་པའི་ཚུལ་ཁྲིམས་ལ་དཔེ་བཅོ་བརྒྱད་ཀྱིས་བསྟན་ཏེ།
རྩྭ་འམ་མི་གཙང་འདམ་སྐྱེས་བཞིན། །
དོང་གི་ཁ་ཆོད་ཆུ་ཡོན་འདྲ།།
འབྲུ་མར་སྣོད་འདྲ་མར་མེ་བཞིན། །
གླང་ཆེན་མྱོས་པ་ཁལ་བཀལ་བ།།
འོན་ལོང་ལྐུགས་པའི་འདུ་ཤེས་སོགས། །
བུ་ཤ་སྨན་བཞིན་གཅོང་ཅན་ཟས།།
རྨ་དཀྲིས་བཞིན་དུ་རྫི་བུའི་གོས། །
བྲན་མོ་བཞིན་དུ་ལུག་རྫི་ལྟར།།
གཏུན་པོ་ལག་གིས་དགྲ་འདུལ་བཞིན། །
རབ་ཏུ་ཡང་ཡང་གསེར་འབུམ་བརྒྱ།།
     དགེ་བ་ཆོས་སྡུད་ཀྱི་ཚུལ་ཁྲིམས་ལ་དཔེ་གཉིས་ཏེ། རླན་གྱིས་སྡུད་བསྐྱེད་རྐང་མིག་ལྡན།།
     སེམས་ཅན་དོན་བྱེད་ཀྱི་ཚུལ་ཁྲིམས་ལ་དཔེ་བཞི་སྟེ། ཕ་མ་མི་སྐྱོ་ཟླ་འོད་སོགས།། མིག་གིས་བལྟས་ནས་རང་ལུས་ལ། །
     ཚུལ་ཁྲིམས་ཀྱི་སྤང་བྱ་མི་མཐུན་ཕྱོགས་ལ་དཔེ་ཉི་ཤུ་རྩ་གཅིག་གིས་བསྟན་ཏེ། སྡོམ་པའི་ཚུལ་ཁྲིམས་མི་མཐུན་ཕྱོགས་ལ་དཔེ་བཅུ་གསུམ་གྱིས་བསྟན་པ་ནི།
ཁྱི་འདྲ་ཟླ་གྲགས་སྦོམ་དགའ་མོ།།
སྟག་དང་སེང་གེ་སྐྱིན་ཐང་ཆུ། །
རལ་སྐོལ་གླང་སྟོར་བྲམ་ཟེ་མོ།།
ཕུའི་གླང་བུ་བསྙེན་གནས་འདིས། །
ཤིག་གིས་ཆོས་དབྱིངས་དགེ་འདུན་གྱིས།།
ཨག་ཚོམ་མེ་བུས་བཏེག་ནས་བརྡབས། །
     དགེ་བ་ཆོས་སྡུད་ཀྱི་མི་མཐུན་ཕྱོགས་དཔེ་གཉིས་ཏེ། མེས་བསྲེགས་འདབ་གཤོག་མེད་པའི་བྱ།།
     སེམས་ཅན་དོན་བྱེད་ཀྱི་མི་མཐུན་ཕྱོགས་ལ་དཔེ་ལྔ་སྟེ། སྣམ་བུ་བོར་བཙོངས་མ་ཡར་བུ།། སྦྲང་བུ་བསྔོས་བསྒྱུར་ཕན་གནོད་སྐྱེལ། །
     བཟོད་པའི་མཚན་ཉིད་བཤད་པ་ལ་དཔེ་ཉི་ཤུ་རྩ་བརྒྱད་ཀྱིས་བསྟན་ཏེ། མཐུན་ཕྱོགས་ལ་དཔེ་བཅུ་གཉིས་ཀྱིས་བསྟན་པ་ལས། དང་པོ་ཆོས་ལ་ངེས་སེམས་ཀྱི་བཟོད་པ་ལ་དཔེ་གཉིས་ཏེ། ས་དང་མགར་བའི་འོག་རྡོ་བཞིན། །
     གནོད་པ་ལ་ཇི་མི་སྙམ་པའི་བཟོད་པ་ལ་དཔེ་བརྒྱད་དེ། དྲང་སྲོང་ཤིང་བཞིན་ཤ་ཁམ་འགའ། ། བཟོད་རྟེན་གཤེན་སྟོན་རུབ་ཆོས་བཞིན། ། ཁ་ཉེན་གནོད་བྱེད་སྐད་གཏོང་འདྲ།།
     སྡུག་བསྔལ་དང་ལེན་གྱི་བཟོད་པ་ལ་དཔེ་གཉིས་ཏེ། ཉ་པ་ལ་སོགས་རྟག་ཏུ་ངུ་།།
     བཟོད་པའི་མི་མཐུན་ཕྱོགས་ལ་དཔེ་བཅུ་དྲུག་གིས་བསྟན་པ་ལས། ཆོས་ལ་ངེས་སེམས་བཟོད་པའི་མི་མཐུན་ཕྱོགས་ལ་དཔེ་གཉིས་ཏེ། ཁྱི་ཁལ་མི་ཐེག་ཤའུ་བཞིན། །
     གནོད་པ་ལ་ཇི་མི་སྙམ་པའི་བཟོད་པའི་མི་མཐུན་ཕྱོགས་ལ་དཔེ་བཅུ་གཉིས་ཏེ།
རྒན་གཞོན་བཟོད་པ་བྱེད་མི་སྟེ། །
ཕོག་རྩི་མདུང་གཅིག་བྱ་རོག་འུག།
ཕྱི་མེས་ཤི་འདྲ་ཁྱི་རྫོག་འདྲ། །
སྔོན་ལ་བོང་བདག་སྡོམ་ལ་ཤིང་།།
ཤ་འུ་ཤ་སྦྲང་མིག་བཞིན་དུ། །
སྡུག་གྲོང་བུད་མེད་ཆུ་གླེང་འབྱིན།།
     སྡུག་བསྔལ་དང་ལེན་གྱི་བཟོད་པའི་མི་མཐུན་ཕྱོགས་ལ་དཔེ་གཉིས་ཏེ། ལས་ལ་ངན་པ་ཁ་འདེ་མངར།།
     བརྩོན་འགྲུས་ཀྱི་མཚན་ཉིད་བསྟན་པ་ལ། དཔེ་ཉི་ཤུ་རྩ་བརྒྱད་ཀྱིས་བསྟན་ཏེ། དང་པོ་མཐུན་ཕྱོགས་ལ་དཔེ་བཅོ་བརྒྱད་ཀྱིས་བསྟན་པ་ལས།གོ་ཆའི་བརྩོན་འགྲུས་ལ་དཔེ་བཞི་སྟེ། ཕྱ་མཁར་ཐོབ་འདྲ་ནོར་བུ་ལེན།། སྨན་པ་མེ་ཏོག་བྲན་ཁོལ་འདྲ། །
     སྦྱོར་བའི་བརྩོན་འགྲུས་ལ་དཔེ་བདུན་ཏེ།
མགོ་ལ་མེ་ཤོར་པང་དུ་སྦྲུལ།།
མེ་ཚིག་འདོན་པ་ས་ཆུ་གཏོད། །
ནས་ཕུང་ཆུས་ཁྱེར་སྡོམ་པ་བཞིན།།
གླང་རྒན་ལྕག་གིས་པྲད་པྲད་ཀྱིས། །
     ཕྱིར་མི་ལྡོག་པའི་བརྩོན་འགྲུས་ལ་དཔེ་བདུན་གྱིས་བསྟན་ཏེ། ཐོགས་མེད་བྱམས་པ་ཤིག་དང་འདྲ། ། བྱང་པའི་ར་མདའ་ཆུ་རྡོ་འབིགས། ། གསེར་འཚེངས་ནོར་སྤེད་ཉུང་ཐུག་འཐུང་།།
     བརྩོན་འགྲུས་ཀྱི་མི་མཐུན་ཕྱོགས་དཔེ་ལ་དཔེ་བཅུ་གཉིས་ཀྱིས་བསྟན་པ་ལས། གོ་ཆའི་བརྩོན་འགྲུས་ཀྱི་མི་མཐུན་པ་ལ་དཔེ་གཉིས་ཏེ། གྲོད་སྐོགས་མེ་ལ་ཝ་མོ་རོ། །
     སྦྱོར་བའི་བརྩོན་འགྲུས་ཀྱི་མི་མཐུན་པའི་ཕྱོགས་ལ་དཔེ་དྲུག་སྟེ། ཉི་བཙོན་གློ་རྡོལ་བྱ་བྱེའི་ཟན། ། ཁྱི་ཡི་འཁུར་བ་ར་སྣོར་མ།། བྱིས་པ་པོངས་དང་གང་སྙོམས་འདྲ། །
     ཕྱིར་མི་ལྡོག་པའི་བརྩོན་འགྲུས་ཀྱི་མི་མཐུན་པ་ལ་དཔེ་བཞི་སྟེ། བྱང་པ་གསེར་བརྐོ་ལྒང་བུག་འདོད། ། བརྒྱུགས་པས་རྒྱ་གར་སེ་མོ་གྲུ །
     བསམ་གཏན་གྱི་ཆོས་སྐོར་དཔེ་ཉི་ཤུ་རྩ་བཞིས་བསྟན་པ་ལས། དང་པོ་མཐུན་ཕྱོགས་ལ་དཔེ་བཅུ་གཅིག་གིས་བསྟན་ཏེ། བསམ་གཏན་གྱི་རྒྱུ་བསྟན་པ་ལ་དཔེ་གསུམ་སྟེ།
དྲི་མེད་སྣོད་དུ་ཆུ་གཙང་བཞིན། །
དབེན་པ་ལས་སྐྱེས་ཆོག་ཤེས་པ། །
     བསམ་གཏན་གྱི་ངོ་བོ་ལ་དཔེ་གཉིས་ཏེ། གཞུ་བདུངས་ཞགས་པས་གླང་ཆེན་འཛིན། །
     བསམ་གཏན་རྒྱུད་ལ་བརྟན་པར་བྱ་བ་ལ་དཔེ་གསུམ་སྟེ། རི་བོ་རྒྱ་མཚོ་དོམ་བཞིན་དུ། །
     བུམ་ནང་མར་མེ་བསམ་གཏན་རྒྱུད་ལ་བརྟན་པའི་རྟགས་ལ་དཔེ་གསུམ་སྟེ། སེང་རྒྱལ་བཞིན།། རྒྱ་མཚོ་དངས་ལ་སྐུ་མཐོང་ཤི།
     བསམ་གཏན་གྱི་མི་མཐུན་པའི་ཕྱོགས་ལ་དཔེ་བཅུ་གསུམ་གྱིས་བསྟན་ཏེ།
མ་དག་སྣོད་འདྲ་ཁྲོམ་ཟིས་ཁྱེར། །
སྟན་ཐོག་ཚོང་འདུས་ཤ་མེད་བྱ། །
སུག་ཟོང་བྲེ་རེ་རྟ་ཆུ་རྫིང་།།
རྟ་བཤའ་ལྷ་གསོལ་བདེན་མཐོང་ན། །
བྱང་པ་མོ་བཞིན་རྟགས་མེད་འདྲ།།
མར་ཟན་གནས་བརྟན་ཉ་ཟམ་བཞིན། །
     ཤེས་རབ་སྟོང་ཉིད་ཀྱི་ཆོས་སྐོར་བཤད་པ་ལ་དཔེ་དྲུག་ཅུས་བསྟན་ཏེ།དང་པོ་མཐུན་ཕྱོགས་ལ་དཔེ་སུམ་ཅུ་རྩ་ལྔ་བསྟན་པ་ལ། ཤེས་རབ་སྟོང་པ་ཉིད་ཀྱི་ཡོན་ཏན་བསྟན་པ་ལ་དཔེ་བཅུ་སྟེ།
སྐྱེས་བུ་མིག་ཅན་ཟས་ལ་ལྕེ། །
བཅུད་ལེན་བུ་ག་ཆུང་ངུ་ནས།།
དགུ་གཞུག་བདུད་རྩི་བྱ་འཕུར་འདྲ། །
སྒྲོན་མེ་ཕ་ལམ་ཟོར་མི་ལྕི།།
     ཐོས་པའི་ཤེས་རབ་ལ་བསླབ་པ་ལ་དཔེ་བརྒྱད་ཀྱིས་བསྟན་ཏེ།
ཐབ་ཆེན་འཛིན་པ་རྨི་ལམ་བཞིན།།
སྒྱུ་མ་དང་འདྲ་རབ་རིབ་སོགས། །
སྟག་མོ་ཀེང་རུས་རྭ་དང་བྲག།
བཙུན་མོ་ཤི་འདྲ་རྒྱ་འབག་མིག །
ཕྲན་ཚེགས་བསགས་པས་ཕྱུག་པོར་འགྱུར།།
     ཐོས་པའི་དོན་དེ་ཉིད་བསམ་པའི་ཤེས་རབ་ཀྱིས་གཏན་ལ་དབབ་པ་ལ་དཔེ་གཉིས་ཀྱིས་བསྟན་ཏེ། ཁང་སྟོང་རྐུན་མ་སྲིན་པོ་བཙལ།།
     ཐོས་བསམ་གཉིས་ཀྱིས་ཤེས་རབ་ཀྱིས་གཏན་ལ་ཕབ་པའི་དོན་ལ། སྒོམ་པའི་ཤེས་རབ་ཀྱིས་གོམས་འདྲིས་མཐར་ཕྱིན་པར་བྱ་བ་ལ་དཔེ་བཅོ་ལྔ་སྟེ།
ནམ་མཁའི་དཀྱིལ་ལྟར་སྒྱུ་མ་མཁན།།
མཁའ་བརྩིགས་ཁེབས་འབྱེད་ལྟོ་ཟ་མཁས། །
ལག་པས་བཟུང་ནས་མིག་གིས་ལྟ།།
རྐང་པ་བྱ་ཡི་གཤོག་པ་འདྲ། །
བུ་ཆུང་ཉི་མ་སྤྲིན་ཁེབས་བཞིན།།
རྡོ་རྗེ་ཕ་ལམ་ནོར་བུ་འདྲ། །
ནད་པའི་ཕ་བཞིན་ཡིད་བཞིན་ནོར།།
དཔག་བསམ་ཤིང་དང་བུམ་པ་བཟང་། །
     ཤེས་རབ་ཀྱི་མི་མཐུན་ཕྱོགས་ལ་དཔེ་ཉི་ཤུ་རྩ་ལྔས་བསྟན་པ་ལས། ཤེས་རབ་སྟོང་པ་ཉིད་ཀྱི་རྩི་ཡིས་མ་ཟིན་པའི་སྐྱོན་བསྟན་པ་ལ་དཔེ་བཞི་སྟེ། དམུས་ལོང་བརྒྱ་ཕྲག་ལྟད་མོ་མི། ། འཇག་མའི་མི་རྟ་དུག་སྡོང་འདྲ།།
     ཐོས་པའི་ཤེས་རབ་ཀྱི་མི་མཐུན་པ་ལ་དཔེ་དགུ་སྟེ།
ཁ་ཟས་མི་གཙང་ལག་སྟོང་འགྲོ།
ལ་ལ་སྟོང་འབྱམ་ལྷགས་པ་འགམ། །
སྙེ་མ་ལོང་མ་ས་སྒང་འདྲ།།
ལྡན་མ་པུར་བུར་རྦ་དགེ་མཐོང་། །
གླེནཆེན་གླེན་ཆུང་ལྡེར་བཟོའི་མིག།
     བསམ་པའི་ཤེས་རབ་ཀྱི་མི་མཐུན་ཕྱོགས་ལ་དཔེ་བཞི་སྟེ། སྦྲུལ་ལ་འོ་མ་སྦྲུལ་བསྲུངས་ལྟར།། སྤྱང་རྒོད་ཁྱི་དང་ར་མདའ་ཀུན། །
     སྒོམ་པའི་ཤེས་རབ་ཀྱི་མི་མཐུན་པ་ལ་དཔེ་བརྒྱད་དེ། ཆུ་མཐོང་སྐྲ་ཤད་འཁྱག་སྟེང་མཁར།།གྲལ་མགོར་རྗེས་ལ་ཁྲུས་སྨན་འདྲ། ། རྐང་གཤོག་ཡ་མེད་སྨིག་རྒྱུ་སྙེག།
     གསང་སྔགས་ཀྱི་སྒོར་འཇུག་པར་འདོད་པ་ལ། སྔགས་ཀྱི་མཚན་ཉིད་བསྟན་པ་
ལ་དཔེ་བཅུ་དགུས་བསྟན་ཏེ། དང་པོ་སྔགས་ཀྱི་ཡོན་ཏན་བསྟན་པ་ལ་དཔེ་དྲུག་སྟེ།
ལག་གི་བཟོ་བྱེད་རྨ་བྱ་བཞིན།།
གསེར་རྩི་དང་འདྲ་རྟ་བཟང་ཞོན། །
མ་ར་ན་ཛ་བ་ཛ་ར།།
     སྔགས་ཀྱི་ཉེས་དམིགས་བསྟན་པ་ལ་དཔེ་བཅུ་གསུམ་གྱིས་བཤད་དེ།
བོད་ན་མི་འདུག་གོ་མི་ཆོད།།
མེ་ཆུ་བསྲེས་པས་རབ་འབྱོར་གྱིས། །
ཕས་ཕམ་དོ་མིན་བོ་སྦྲེལ་བཞིན།།
སེང་གེའི་འོ་མ་ཚོང་པ་གསེར། །
སྦྲུལ་སྨྱུག་མཚོན་ཆའི་འཁོར་ལོ་འདྲ།།
བཙན་དུག་ཟོས་ན་གཏིང་རྡོ་འདོགས། །
ང་ལ་ཆ་མེད་ཨ་ཕོ་ཟེར།།
     བླ་མའི་བཀའ་དྲིན་དྲན་པས་དད་གུས་ཀྱིས་བླ་མ་མཉེས་པར་བྱ་བ་ལ་དཔེ་བཅུ་གསུམ་བསྟན་པ་ལས་དང་པོ་མཐུན་ཕྱོགས་ལ་དཔེ་བདུན་གྱིས་བསྟན་པ་ནི།
ཕུ་ཆུ་རྫིང་བཏང་ས་བརླན་དང་།།
བ་གླང་མི་ཁྱུ་མི་མཉམ་མཉམ། །
ལྟོགས་པའི་ཟས་སྟེར་ཉེ་རྒྱལ་བཞིན།།
བུ་དང་ཆུང་མ་རང་སྲོག་ཀྱང་། །
ཨ་ཏི་ཤ་དང་རིགས་ངན་བཞིན།།
     བླ་མའི་བཀའ་དྲིན་མི་དྲན་པ་སྤང་བ་ལ་དཔེ་དྲུག་སྟེ། ཕ་མེས་གང་བས་དོན་མ་གྲུབ།།མོན་མོ་མ་མཐོང་སྲུང་མ་ཡེལ། ། བཙུན་མོ་ཆོས་ཉན་རྐང་མགྱོགས་བཞིན།།
     བསྔོ་བའི་ཆོས་སོ་སོར་བསྟན་པ་ལ་དཔེ་བཅུ་དགུས་བསྟན་པ་ལས། དང་པོ་མཐུན་ཕྱོགས་ལ་དཔེ་དགུ་ཡིས་བསྟན་ཏེ།
གསེར་དངུལ་མགར་བ་ཁྲིད་འདྲ་ཞེས། །
ཆུ་ཐིགས་ལྗོན་ཤིང་ཁར་ཕོག་སྣ།།
བསྐྱོད་དང་དངོས་པོ་བསྔོས་བསྒྱུར་བྱས། །
ཆུ་ཁྱེར་སྐྲ་ནས་སྦྲེལ་ཐག་ཅན།།
     བསྔོ་བའི་མི་མཐུན་པའི་ཕྱོགས་བསྟན་པ་ལ་དཔེ་བཅུས་བསྟན་ཏེ།
སྐར་མདའ་དགྲ་ལ་ཁམ་བྱེད་ཕྱིར།།
མཆིལ་མ་ཐང་ལ་ཆུ་ཤིང་བཞིན། །
བསགས་པ་ཁྱིས་ཁྱེར་ཁུ་ཚུར་བྲག །
བང་ཁར་མུན་ཡུགས་དུག་ཅན་ཟས། །
མུ་སྟེགས་མཆོད་སྦྱིན་བུབ་པའི་སྟེང་། །
གཏིང་རྡོ་སྦྲགས་ནས་རྡོག་པས་ཕུལ། །
དགྲ་ཟིན་ཕྱེ་ནས་གྲྭ་བཞི་ནས།།
ཟན་རྡོག་གཅིག་ལ་གཙུབ་ཤིང་མེ། །
མཁས་པ་མར་མེ་མཛད་ཀྱི་གཞུང་།།
སྐྱེས་བུ་གསུམ་གྱི་ཐར་པའི་ལམ། །
ངོ་སྤྲོད་གསལ་བྱེད་དཔེ་ཡི་ཆོས།།
ཅུང་ཟད་མདོར་བསྡུས་བཀོད་པ་འདི། །
བདག་གཞན་དོན་ཀུན་གྲུབ་གྱུར་ནས།།
མཐའ་ཡས་སེམས་ཅན་དོན་བྱེད་ཤོག །