མིང་མཐའི་པ་བ་དང་བདག་སྒྲའི་སྦྱོར་ཚུལ་ལ་མདོ་ཙམ་དཔྱད་པ།

8 ཡང་ལ་ལས་སྤྱིར་མིང་མཐའི་པ་བ་ཐོབ་ཐང་ལ་བསྟུན་ཞིང་གྲངས་གནས་ཀྱི་སྐབས་དང་། ཁ་དོག་གི་སྐབས་སུ་དེ་ལྟར་པོ་སྦྱར་དགོས་ཟེར་ཡང་གྲངས་གནས་ཀྱི་སྐབས་དང་ཁ་དོག་གི་སྐབས་སུ་ཐོབ་ཐང་ལ་མི་བསྟུན་པའི་རྒྱུ་མཚན་ཅི་ཡིན། དེ་ལྟར་གྲངས་གནས་སྐབས་དང་བོ་ཞེས་པོ་སྒྲ་སྦྱར་ན་དྲང་བོ་དང་། མང་བོ་ཞེས་པོ་སྒྲ་སྦྱར་ནའང་གནོད་བྱེད་ཅི་ཡང་མེད་ཅིང་། རྐང་བ་དང་རྔ་བ་ཞེས་པའང་རྐང་པ་དང་རྔ་པ་རྣམ་པ་ཀུན་ཏུ་མཚུངས་དགོས་པས་དེ་ལྟ་ན་རང་གི་མིང་མཐའི་པ་བ་ཐོབ་ཐང་དང་བསྟུན་དགོས་པས་རྩ་བའི་དམ་བཅའ་རང་གིས་བཤིགས་པ་ལས་མ་འདས།
9 ཡང་ཁང་དཀར་སྐལ་བཟང་ཚུལ་ཁྲིམས་ཀྱིས།“མཁས་དབང་གོང་མ་གཉིས་ནི་བརྡ་སྤྲོད་ལ་བྱང་བའི་ཡོངས་སུ་གྲགས་པའི་མཁས་དབང་རྩོད་མེད་ལོས་ཡིན་ཀྱང་དབུས་གཙང་དག་པའི་ཞིང་དུ་སློབ་གཉེར་གནང་མ་མྱོང་བའི་དབང་གིས་ཡུལ་དབུས་ཀྱི་སྐད་ལ་མ་བྱང་བའི་རྐྱེན་གྱིས་ཡུལ་སྐད་མངོན་གསལ་དོད་པོ་དེ་འདྲ་ཤོར་བར་མངོན། དཔེར་ན་མཁས་པ་དེ་གཉིས་ཀྱིས། ལྷ་ས་སྨོན་ལམ་ཆེན་མོར། རྐང་བ་ཆོས་ཅན། རང་བཞིན་གྱིས་སྟོང་བ་ཡིན་ཏེ། རྟེན་འབྲེལ་ཡིན་པའི་ཕྱིར་ཞེས་རྟགས་གསལ་འཕངས་ཚེ། དབུས་གཙང་མཁས་པ་སྨོས་མེད་ཐོག  ཨ་མདོའི་ཡུལ་དུ་འཁྲུངས་པའི་བཅུ་ཕྲག་རིག་པའི་དབང་ཕྱུག་འཇམ་དབྱངས་བཞད་པ་དང་། ཐུའུ་བཀྭན་ཆོས་ཀྱི་ཉི་མ། གུང་ཐང་འཇམ་པའི་དབྱངས། དགེ་བཤེས་ཤེས་རབ་རྒྱ་མཚོ་སོགས་ཀྱང་ཡུལ་དབུས་ཀྱི་མིང་ཚིག་ལ་བྱང་བའི་དབང་གིས་བཞད་གད་ཤོར་བ་ཐེ་ཚོམ་མེད།⑸”ཟེར་བ་ནི་ངེས་པར་དགོད་བྲོ་བའི་སྐད་ཆ་སྟེ། བདག་སྒྲ་དང་མིང་མཐའི་པ་བ་ཐོབ་ཐང་ལ་བསྟུན་མི་དགོས་པའི་སྒྲུབ་བྱེད་བ་སྤུ་ཙམ་ཡང་མེད་པས་སོ། །ཁོང་རྣམ་པ་གཉིས་ཀྱིས་སྨོན་ལམ་ཆེན་མོར་རྟགས་གསལ་འཕེན་དུས་ལྷ་སའི་གདངས་ཀྱིས་འཕངས་ན་ལྷ་ས་བས་བ་ལpavཀློག་པས་ལྷ་ས་བ་ཚོར་ཡང་གད་མོ་ཞིག་མི་ཡོང་ལ། ཨ་མདོ་སྐད་ཀྱིས་འཕངས་ན་ཁོང་རྣམ་པ་སྤྲོ་སང་ངེར་འགྲོ་ངེས་པ་ཡིན་ནོ། །
10 ཡང་ལ་ལས་བདག་སྒྲ་ཐོབ་ཐང་དང་མ་བསྟུན་པར་པ་ཁོ་ན་སྦྱར་ན་ལེགས་ཏེ་དཔེར་ན་གླ་པ་དང་གླ་བ་ཞེས་སྦྱར་ན་དང་བོས་བདག་སྒྲ་སྟོན་ལ་གཉིས་པས་རི་དྭགས་ཡིན་པའི་ཁྱད་པར་འབྱེད་ཐུབ་ཟེར་བ་ནི་བསམ་གཞིག་གནང་ནས་གསུངས་པའི་སྐད་ཆ་ཞིག་ཡིན་ལ། བདག་སྒྲ་ཕྲད་རང་དབང་ཅན་དུ་དགོངས་པའི་སྒྲུབ་བྱེད་ལེགས་པོ་ཞིག་ཡིན་མོད། དེ་ནི་སུ་ཏིའི་རྗེས་སུ་འབྲངས་པ་ལས་བྱུང་བའི་གོམས་སྲོལ་གྱི་ལྟ་བ་ཞིག་ཡིན་པ་ལས། ཁྱབ་པ་མེད་དེ་དེ་ལྟར་བྱེད་ན་བ་ཡིག་བདག་སྒྲར་ཁས་ལེན་དོན་མེད་ན་ཡང་བ་ཡིག་བདག་སྒྲ་ཁས་ལེན་པ་ནི་ད་ལྟ་གཅིག་མཐུན་དུ་སོང་བས་ན་པ་ཡིག་ཁོ་ནར་བདག་སྒྲར་ཁས་ལེན་པའི་ལྟ་བ་དེ་ནི་ཅུང་གུ་དོག་ཏུ་སོང་བར་མངོན་ནོ། །
11 ཡང་ལ་ལས་བདག་སྒྲ་ཐོབ་ཐང་དང་མི་བསྟུན་ཏེ་སྔོན་གྱི་བཀའ་བསྟན་ལས་ཀྱང་པ་བྲིས་འདུག་ཟེར་ན་དེ་ཡང་མ་ངེས་པའི་སྒྲུབ་བྱེད་ཅིག་སྟེ་ད་ལྟའང་གཅིག་གྱུར་འབྱུང་བཞིན་མེད་ན་སྔོན་གྱི་དཔེ་ཆ་དག་ཏུ་མཐུན་མི་མཐུན་ཅི་རིགས་འབྱུང་བ་སྨོས་མ་དགོས་ལ། གོང་དུ་བརྗོད་པ་ལྟར་སྒྲ་བ་རྣམས་ཀྱང་མི་མཐུན་པ་སྣ་ཚོགས་བྱུང་བས་ན་མཁས་པ་ཚད་ལྡན་དག་གིས་བྲིས་པའི་གཞུང་རྣམས་སུའང་མི་མཐུན་པ་ཡོད་པ་སྨོས་མ་དགོས་ལ། ལྷག་པར་དཔེ་དེ་དག་ཏུ་བྱུང་བ་མཁས་པ་སྔོན་མ་དེ་དག་གི་དགོངས་པ་ཡིན་པའི་ངེས་པའང་མེད་དེ་ཡི་གེ་བ་དང་ཞུ་དག་པ་དག་གི་འདོད་དབང་དུ་འཁྱེར་བ་གང་མང་ཞིག་ཡོད་པ་ཞུ་དག་པ་དག་གིས་ཞུ་དག་བྱས་ཏེ་གཅིག་གྱུར་བྱུང་བ་མངོན་སུམ་དུ་མཐོང་བས་སོ། །
        འོ་ན་དཔེ་དག་མོའམ་སྔོན་གྱི་ཡིག་ཚང་དག་ནའང་ཐོབ་ཐང་ངེས་པ་མེད་པའམ་ཡང་ན་གོང་གི་བཤད་ཚུལ་དེ་དག་དང་མཐུན་པའི་བྲིས་པ་ཡོད་དོ་ཞེ་ན་ལོས་ཡོད་དེ། གོང་དུ་བཤད་པ་ལྟར་ད་ལྟའི་བར་དུ་བདག་སྒྲ་དང་མིང་མཐའི་པ་བ་ལ་བཞེད་པ་མི་མཐུན་ཞིང་གཅིག་གྱུར་མེད་པ་དང་གཅིག  ཡི་གེ་བ་དང་དཔར་ཞུ་པས་རང་གི་འདོད་བློའི་དབང་གིས་འདོད་འཁྱེར་གྱི་དབང་དུ་སོང་བ་ཡོད་པ་དང་གཉིས། མང་བོ་ཞིག་གིས་མིང་མཐའི་པ་བ་དང་བདག་སྒྲའི་པ་བའི་ཁྱད་པར་ལ་དོ་སྣང་མི་བྱེད་པར་ལག་ལ་གང་ཐོན་དང་། ངག་ལ་གང་བདེར་འབྲི་བཞིན་པ་དང་གསུམ་པོ་ནི་ང་ཚོའི་བདག་སྒྲའི་པ་བ་དང་མིང་མཐའི་པ་བའི་སྦྱོར་ཚུལ་ལ་བསམ་གཞིག་དགོས་པའི་གནད་དོན་འདི་བྱུང་བ་སྟེ་སྔོན་གྱི་གཞུང་དག་ཏུ་སྣ་ཚོགས་བྲིས་པ་དེས་ང་ཚོའི་བརྡ་སྤྲོད་གཅིག་གྱུར་མིན་པ་དང་ཚད་ལྡན་མིན་པའི་རྟགས་ཡིན་ལ། གཞུང་ལུགས་ཀྱིས་ལག་ལེན་ལ་ནུས་པ་གདོན་ཐུབ་ཀྱིན་མེད་པའི་རྟགས་ཡིན་ནོ། །
        དེས་ན་པ་པོ། བ་བོ། མ་མོ། ཅན་ལྡན་མཁན་རྣམས་བདག་སྒྲར་ངེས་པར་ཁས་ལེན་ དགོས་པ་ནི་སྐད་ཆས་བདེན་དཔང་བྱས་པས་འགྱུར་བ་མེད་པ་བཞིན་ད་ལྟའི་བརྡ་སྤྲོད་སྨྲ་བ་དག་གིས་ཁས་མི་ལེན་ག་མེད་དུ་གྱུར་ཅིང་། དེ་བས་ང་ཚོས་ངེས་པར་སྦྱོར་སྟངས་གཅིག་གྱུར་བྱ་དགོས་ལ་ལྷག་པར་གློག་ཀླད་ཀྱིས་ཡིག་བསྒྱུར་སོགས་ཀྱི་སྐབས་སུ་བརྡ་སྤྲོད་ཚད་ལྡན་ཅན་དུ་མ་སོང་ན་དཀའ་ངལ་ཆེན་པོ་ཞིག་ཏུ་འགྱུར་ངེས་ཤིང་བདག་སྒྲ་ཕྲད་རང་དབང་ཅན་དུ་བཟུང་ནས་རང་རང་གི་འདོད་ཞེན་གྱི་རྗེས་སུ་འབྲངས་ན་ཉོག་འཛོལ་ཆེན་པོར་འགྱུར་བས་སོ། །
        དེ་བས་ས་གནས་ཀྱི་ཕྱོགས་ཞེན་དང་། རང་ལུགས་ཀྱི་མཁྲེགས་འཛིན་སོགས་ཅི་ཡང་མི་དགོས་པར་བདག་སྒྲའི་པ་བ་དང་མིང་མཐའི་པ་བའི་སྦྱོར་ཚུལ་གྱི་ཐད་ནས་རྩོད་པ་ཅི་ཡང་མི་དགོས་པར་ཐོབ་ཐང་དང་བསྟུན་ན་དགེ་མཚན་ཆེ་སྟེ་ཐོབ་ཐང་དང་བསྟུན་ནས་གང་འདོད་དུ་འབྲི་མི་རུང་བ་དང་གཅིག མཁས་པ་ནས་བྱིས་པའི་བར་དུ་ཐོབ་ཐང་བློ་ཐོན་པ་ཙམ་གྱིས་པ་བའི་སྦྱོར་ཚུལ་ལ་མཁས་པ་དང་གཉིས། གྲངས་དང་ཁ་དོག་ལ་པོ་དང་ཡང་ན་བདག་སྒྲའི་ཆ་ཡའམ་ཡང་ན་སྤྱིར་བཏང་དམིགས་བསལ་སོགས་ཀྱི་ཞིབ་ཆ་ཕྲ་ཞིང་ཞིབ་པ་བྱས་ནའང་དབྱེ་བ་མི་འཁོར་བའི་གཞུང་ལུགས་རྙོག་འཛིང་ཅན་བཟོ་མི་དགོས་པ་དང་གསུམ། ཐོབ་ཐང་ལ་བསྟུན་པ་ནི་གསར་བཤད་དང་གསར་བཟོ་མ་ཡིན་པར་སྔོན་ནས་མཁས་པས་གཏན་ལ་ཕབ་ཡོད་པ་དང་བཞི། གློག་ཀླད་དུ་ཡི་གེ་གཏག་པའམ་ནོར་བཅོས་བྱེད་དུས་བཀའ་བརྡ་གཅིག་གིས་པ་བ་དང་པོ་བོ་སོགས་ཐག་གཅོད་པ་དང་ལྔ། པ་བའི་སྦྱོར་ཚུལ་སྤྱི་འགྲོས་ཅན་དུ་གྱུར་པ་ནི་གཞུང་ལུགས་ཚད་ལྡན་ཅན་དུ་འགྱུར་བའི་རྟགས་མཚན་ཡིན་པ་དང་དྲུག་གོ།
        འོ་ན་པ་བའི་སྦྱོར་ཚུལ་སྔོན་བྱོན་མཁས་པས་ཇི་ལྟར་གཏན་ལ་ཕབ་ཡོད་ཅེ་ན་ཞྭ་ལུ་ལོ་ཆེན་གྱིས《དག་ཡིག་ཟ་མ་ཏོག》ལས།“ཀ་ད་བ་ས་ན་མ་པ། །”ཞེས་དང་།“ང་འ་ར་ལ་འདོགས་ཅན་དང་། རྐྱང་བའི་རྗེས་སུ་པ་ཕྱེད་ཝར། །འབོད་པ་རྣམས་ལ་བ་སྦྱར་ཞིང་། །⑹”ཞེས་འབྱུང་ལ། 《དག་ཡིག་ངག་སྒྲོན》ལས། “མིང་མཐའི་པ་བའི་དབྱེ་བ་ནི། །ག་ད་ན་པ་མ་ས་དང་། །ད་དྲག་ཅན་མཐར་པ་དང་ནི། །ང་འ་ར་ལ་མཐའ་མེད་མཐའི། །བ་ཕྱེད་ཝར་འབོད་རྣམས་ལ་བ། །གཞན་ལ་པ་ཉིད་སྦྱར་ཏེ་དཔེར། །ཟག་པ་མེད་པ་ཕན་པ་མཆོག ། ཐོབ་པ་དམ་པ་མཁས་པ་རུ། །གྱུར་པ་དང་བ་ལ་དགའ་བ། །མྱུར་བར་མཇལ་བར་སྤྲོས་པ་ལས། །⑺”ཞེས་སྔོན་ནས་ཐོབ་ཐང་དང་བསྟུན་དགོས་པའི་བསྡོམས་ཚིག་དགེ་མཚན་ཆེ་བ་ཞིག་བཟོས་ཤིང་། ལྷག་པར་གནད་ཆེ་བ་ཞིག་ནི་སྔོན་སྐད་ཆ་ལ་བརྟེན་ནས་ཡི་གེ་བཟོས་པ་ཡིན་ནའང་། ད་ནི་ཡི་གེས་སྐད་ཆ་ཚད་ལྡན་དུ་གཏོང་བའི་དུས་སུ་སླེབས་པས་མཁས་དབང་དམུ་དགེ་བསམ་གཏན་གྱིས་བཞེད་པ་ལྟར་བདག་སྒྲ་དང་མིང་མཐའ་ཡོད་ཚད་ཐོབ་ཐང་དང་བསྟུན་ན་སྐད་ཆ་གཅིག་གྱུར་དུ་འགྲོ་བ་ལའང་སྐུལ་འདེད་བྱ་ཐུབ་ཅིང་། ལག་ལེན་གྱི་སྟེང་ནས་ཀྱང་ཉོག་དྲ་ཅི་ཡང་མེད་པས་དགེ་མཚན་ལས་གནོད་པ་ཅི་ཡང་མེད་པར་བསམ་མོ། །
མཆན་འགྲེལ།
①ཀརྨ་སི་ཏུ་བསྟན་པའི་ཉིན་བྱེད།《ཀརྨ་སུ་ཏུའི་སུམ་རྟགས་འགྲེལ་ཆེན་མུ་ཏིག་ཕྲེང་མཛེས》མཚོ་སྔོན་མི་རིགས་དཔེ་བསྐུན་ཁང་། ཤ103
②ཀརྨ་སི་ཏུ་བསྟན་པའི་ཉིན་བྱེད། 《ཀརྨ་སུ་ཏུའི་སུམ་རྟགས་འགྲེལ་ཆེན་མུ་ཏིག་ཕྲེང་མཛེས》མཚོ་སྔོན་མི་རིགས་དཔེ་བསྐུན་ཁང་། ཤ104
③ཀརྨ་སི་ཏུ་བསྟན་པའི་ཉིན་བྱེད།《ཀརྨ་སུ་ཏུའི་སུམ་རྟགས་འགྲེལ་ཆེན་མུ་ཏིག་ཕྲེང་མཛེས》མཚོ་སྔོན་མི་རིགས་དཔེ་བསྐུན་ཁང་། ཤ105
④པྲ་ཏི་རིན་ཆེན་དོན་འགྲུབ།《པྲ་ཏི་རིན་ཆེན་དོན་འགྲུབ་ཀྱི་སུམ་རྟགས་དགོངས་འགྲེལ》མཚོ་སྔོན་མི་རིགས་དཔེ་སྐུན་ཁང་། ཤ55
⑤ཚ་སྤྲུལ་ངག་དབང་བློ་བཟང་།《ལེགས་བཤད་ལྗོན་དབང་གིས་སློབ་དེབ》 མི་རིགས་དཔེ་སྐྲུན་ཁང་། ཤ84
⑥ཀར་ལེབ་ཞབས་དྲུང་པད་མ་རྡོ་རྗེ། 《ཀར་ལེབ་སུམ་རྟགས།》བོད་ལྗོངས་མི་དམངས་དཔེ་སྐྲུན་ཁང་། ཤ31
⑦ཚེ་ཏན་ཞབས་དྲུང་།《ཐོན་མིའི་ཞལ་ལུང》ཀན་སུའུ་མི་རིགས་དཔེ་སྐྲུན་ཁང་། ཤ179
⑧ཚེ་ཏན་ཞབས་དྲུང་།《ཐོན་མིའི་ཞལ་ལུང》ཀན་སུའུ་མི་རིགས་དཔེ་སྐྲུན་ཁང་། ཤ 181
⑨《དམུ་དགེ་བསམ་གཏན་གྱི་གསུང་འབུམ་པོད་ལྔ་བ》མཚོ་སྔོན་མི་རིགས་དཔེ་སྐྲུན་ཁང་། ཤ480
⑩ཀརྨ་སི་ཏུ་བསྟན་པའི་ཉིན་བྱེད།《ཀརྨ་སུ་ཏུའི་སུམ་རྟགས་འགྲེལ་ཆེན་མུ་ཏིག་ཕྲེང་མཛེས》མཚོ་སྔོན་མི་རིགས་དཔེ་བསྐུན་ཁང་། ཤ105
⑴《དམུ་དགེ་བསམ་གཏན་གྱི་གསུང་འབུམ་པོད་ལྔ་བ།》 མཚོ་སྔོན་མི་རིགས་དཔེ་སྐྲུན་ཁང་། ཤ478
⑵ཐོན་མི་སམ་བྷོ་ཊ་དང་དངུལ་ཆུ་ཡབ་སྲས།《སུམ་རྟགས་རྩ་བ་དང་དེའི་འགྲེལ་བ་སུ་ཏུའི་ཞལ་ལུང།》མི་རིགས་དཔེ་སྐྲུན་ཁང་། ཤ35
⑶《མི་ཉག་བུ་ཕྲུག་གི་གསུང་འབུམ་ཕྱོགས་བསྒྲིགས།》 མི་རིགས་དཔེ་སྐྲུན་ཁང་། ཤ 239
⑷ཚ་སྤྲུལ་ངག་དབང་བློ་བཟང་།《ལེགས་བཤད་ལྗོན་དབང་གིས་སློབ་དེབ》 མི་རིགས་དཔེ་སྐྲུན་ཁང་། ཤ85
⑸ཁང་དཀར་སྐལ་བཟང་ཚུལ་ཁྲིམས། 《རྣལ་འབྱོར་སྤྱོད་པ་དང་དབུ་མ་བའི་ལྟ་གྲུབ་དཀའ་གནད་ཕྱོགས་བསྡོམས།》 གངས་ལྗོངས་ནང་རིག་མཐུན་ཚོགས། ཤXV
⑹ཞྭ་ལུ་ལོ་ཙཱ་བ། 《དག་ཡིག་ཟ་མ་ཏོག》《དག་ཡིག་ཕྱོགས་བསྒྲིགས》མཚོ་སྔོན་མི་རིགས་དཔེ་སྐྲུན་ཁང་། ཤ87
⑺དཔལ་སྒང་ལོ་ཙཱ་བ་སོགས། 《ངག་སྒྲོན་རྩ་འགྲེལ་དང་དེའི་ཡང་འགྲེལ》《དག་ཡིག་ངག་སྒྲོན》 མི་རིགས་དཔེ་སྐྲུན་ཁང་། ཤ522