ཨུ་རུ་སིའི་སློབ་གསོ་བ་ནས་སློབ་ཆུང་སློབ་མའི་དཔེ་ཁུག་གི་ལྗིད་ཚད་གླེང་བ།

ཨུ་རུ་སིའི་སློབ་གསོ་བ་ནས་སློབ་ཆུང་སློབ་མའི་དཔེ་ཁུག་གི་ལྗིད་ཚད་གླེང་བ།
               གཡག་ཚེ་བརྟན། 

         བྱ་བ་གང་ཞིག་ལ་མཚོན་ནའང་མགོ་ལེགས་པོ་ཞིག་རྩོམ་རྒྱུ་ནི་བྱ་བ་གང་དེ་ལེགས་འགྲུབ་འབྱུང་མིན་གྱི་ཁག་ཐེག་གཙོ་བོ་ཞིག་ཡིན། སློབ་གསོའི་ངོས་ཐད་ནས་བཤད་ན་སློབ་ཆུང་གི་དུས་རིམ་ནི་རྨང་གཞིའི་དུས་རིམ་ཡིན་པས་སློབ་གསོའི་ཞིབ་འཇུག་པ་མང་པོ་ཞིག་གིས་དུས་རིམ་འདིའི་སློབ་མ་རྣམས་ཀྱི་འཕེལ་རྒྱས་ལ་ཐུགས་ཁུར་ཆེན་པོ་བྱེད་ཀྱིན་ཡོད།  ཉེ་བའི་ཆར་ཨུ་རུ་སིའི་སློབ་གསོ་བ་མང་པོ་ཞིག་གིས་སློབ་ཆུང་སློབ་མ་རྣམས་ལུས་སེམས་བདེ་ཐང་ངང་འཚར་ལོངས་འབྱུང་བར་དམིགས་ནས་སློབ་མའི་སློབ་སྦྱོང་གི་ཁུར་བོའི་ལྕི་ཡང་བརྗོད་གཞིར་བཟུང་ནས་དེའི་སྐོར་གྱི་བགྲོ་གླེང་བྱས་འདུག
དཔེ་ཁུག་གི་ལྗིད་ཚད། 
         སློབ་ཆུང་སློབ་མའི་ལུས་ཁམས་ཀྱི་ཁྱད་ཆོས་དང་བསྟུན་ནས་སློབ་ཁུག་གི་ལྗིད་ཚད་ག་འདྲ་ཞིག་ཡིན་འོས་པའི་སྐོར་གླེང་སྐབས།  ཕཱ་ནིས་དཔེ་ཁུག་ལྗིད་དྲགས་ན་བྱིས་པའི་བདེ་ཐང་ལ་གནོད་པ་ཡོད་ཅེས་ཁྱིམ་བདག་རྣམས་ལ་བྱིས་པའི་དཔེ་ཁུག་གི་ལྗིད་ཚད་དེ་རང་གི་ལུས་པོའི་ལྗིད་ཚད་ཀྱི10％ལས་བརྒལ་མི་རུང་བའི་བསམ་འཆར་བཏོན།  འབྲེལ་ཡོད་ཀྱི་གཏན་འཁེལ་ལྟར་ན་ལོ་རིམ་དང་པོ་ནས་གསུམ་པའི་སློབ་མ་རྣམས་ཀྱི་སློབ་དེབ་རེའི་ལྗིད་ཚད་ཁེ300ལས་བརྒལ་མི་རུང་བ་དང་།  ལོ་རིམ་ལྔ་བ་ནས་དྲུག་པར་ཁེ400 ལས་བརྒལ་མི་རུང་།   ལོ་རིམ་བདུན་པ་ནས་དགུ་བར་ཁེ500ལས་བརྒལ་མི་རུང་།  ལོ་རིམ་བཅུ་བ་ནས་བཅུ་གཅིག་པར་ཁེ600ལས་བརྒལ་མི་རུང་ངོ་།།  
         དེ་བཞིན་དུ་ལོ་རིམ་དང་པོ་དང་གཉིས་པའི་སློབ་མའི་དཔེ་ཁུག་གི་ལྗིད་ཚད་དེ་སྤྱི་རྒྱ་གཅིག་དང་ཕྱེད་ཀ་ལས་བརྒལ་མི་རུང་ལ།  ལོ་རིམ་གསུམ་པ་དང་བཞི་བའི་ཚད་གཞི་དེ་སྤྱི་རྒྱ་གཉིས་དང་ཕྱེད་ཀ་ཡིན།  ལོ་རིམ་མཐོ་ཤོས་ཁག་གི་སློབ་མའི་དཔེ་ཁུག་གི་ལྗིད་ཚད་དེ་ཡང་སྤྱི་རྒྱ་གཉིས་དང་ཕྱེད་ཀ་ལས་བརྒལ་མི་རུང་ལ།    ལྗིད་ཚད་འདི་ལྟ་བུའི་དཔེ་ཁུག་ཅིག་ཁུར་ནས་རྐང་ཐང་དུ་འགྲོ་བའི་ལམ་ཐག་དེ་སྤྱི་ལེ་གསུམ་ལས་བརྒལ་མི་རུང་བར་བཤད།
ངལ་གསོའི་དུས་ཚོད། 
         དེ་ཡང་སློབ་ཁྲིད་འཚོགས་པའི་དུས་ཚོད་དང་སློབ་གསེང་ངལ་གསོའི་དུས་ཚོད་རིང་ཐུང་གི་ཐད་ལ།    ཆེད་མཁས་པས་གཅིག་གྱུར་གྱི་གཏན་འཁེལ་དང་ཁ་ཚོན་བཅད་མི་འདུག  སློབ་མའི་ལོ་ན་དང་བློ་རྩེ་སྒྲིམ་པའི་ནུས་པའི་ཆེ་ཆུང་ལ་གཞིགས་ནས་ལོ་རིམ་དང་པོ་ཡིན་ན་ཐུན་གཅིག་གི་དུས་ཚོད་དེ་སྐར་མ35ལས་བརྒལ་མི་རུང་བ་དང་།  ལོ་རིམ་གཉིས་པ་ནས་བཞི་བ་སྐར་མ40ལས་བརྒལ་མི་རུང་།  ལོ་རིམ་མཐོ་ཤོས་ཁག་སྐར་མ45ལས་བརྒལ་མི་རུང་།  སློབ་གསེང་ངལ་གསོའི་དུས་ཚོད་དེ་སྐར་མ10ནས་སྐར་མ15ཡུན་ཙམ་ལེགས་པར་བཤད།  ཕྱི་དྲོའི་དུས་ཚོད་ཁག་ཏུ་གླུ་དབྱངས་དང་རི་མོ།   རྩལ་སྦྱོང་སོགས་ཀྱི་སློབ་ཁྲིད་བཀོད་སྒྲིག་བྱས་ན་ལེགས་པར་བཤད།