སྙན་ངག་མེ་ལོང་མའི་སྡོམ་ཚིག་མཁས་པའི་སྙིང་ནོར་བློ་གསལ་མགྲིན་པའི་རྒྱན་གཅིག

༄༅། །སྙན་ངག་མེ་ལོང་མའི་སྡོམ་ཚིག་མཁས་པའི་སྙིང་ནོར་བློ་གསལ་མགྲིན་པའི་

རྒྱན་གཅིག་མུཀྟི་ཀའི་ཕྲེང་བ་ཞེས་བྱ་བ་བཞུགས་སོ། ། 

        ༈ རྒྱལ་ཀུན་མཁྱེན་རབ་དམར་སེར་ལི་ཁྲིའི་ཁམས། །གཅིག་བསྡུས་འོད་ཞགས་རྣོན་པོས་ཤེས་བྱའི་ཁྱོན། །གསལ་མཛད་ནང་གི་ཉི་མ་སྨྲ་བའི་ལྷ། །འཇམ་དཔལ་རྣོན་པོས་ངག་གི་ཤིས་པ་སྒྲུབས། །རབ་དཀར་འོ་མའི་ཆུ་གཏེར་གཡོ་བའི་འཇིངས། །རབ་སྙན་དྲི་ཟའི་འཕང་འགྲོ་འཁྲོལ་བའི་ཉམས། །རབ་མཛེས་ཚངས་སྲས་དབྱངས་ཅན་ངག་གི་ལྷ། །རབ་དང་ཕུལ་བྱུང་སྨྲ་བའི་ཤིས་པ་སྒྲུབས། །ཕུལ་བྱུང་མཁས་རྒུའི་སྙིང་ནོར་ཚིག་གི་སྦྱོར། །དཎྜིའི་དགོངས་པའི་མུཀྟི་ཀ་ཡི་ཕྲེང༌། །རྣམ་གྲངས་དར་གྱི་སྲད་བུ་ལ་བརྒྱུས་ཏེ། །བཀོད་ལེགས་བློ་གསལ་མགྲིན་པའི་སྐྱེས་སུ་འདེགས། །དུས་ཀྱི་ཐུན་མཚམས་ཐ་མ་འདིར། །བཅུ་ཕྲག་ཤེས་བྱ་རིག་པའི་གཞུང༌། །སྨྲ་བའི་ཉི་མ་ཕལ་ཆེར་ནུབ། །འགའ་ཞིག་སྒྲ་གཅན་ཁ་ན་ཟིམ། །མུན་སྟུག་སྨག་རུམ་འཐུག་པོའི་ནང༌། །འབྱུང་པོའི་བྱ་ཚོགས་འབུམ་ཕྲག་གིས། །འདི་ཀོ་མཁོ་མེད་གཞུང་ཡིན་ཞེས། །མགྲིན་པ་བསྡེབས་ནས་མཉམ་དུ་གླེང༌། །རྒྱུ་ཚོགས་ཤེས་པ་མཁོ་མེད་ན། །འབྲས་བུ་ཀུན་མཁྱེན་མཁོ་མེད་སྨོས། །རྒྱུ་མ་ཚོགས་པའི་འབྲས་བུ་དག་ ཀུན་མཁྱེན་ཡིན་ཀྱང་རྙེད་ནུས་མིན། །མ་བསླབས་ཀུན་མཁྱེན་འགྱུར་སྲིད་ན། །ལས་འབྲས་རྫུན་ཞེས་སྨྲ་བར་གྱིས། །ཤེས་བྱ་ཕྱོགས་རེ་ཙམ་བསླབས་པས། །ཀུན་མཁྱེན་ཐོབ་པར་ནུས་སོ་ལོ། །ཤེས་བྱ་ཀུན་ལ་མ་བསླབས་ན། །ཀུན་མཁྱེན་ནམ་མཁའི་མཐའ་ལྟར་རིང༌། །དེ་སླད་རྒྱལ་བ་མ་ཕམ་པས། །དེ་ལ་དེ་བརྩོན་བྱ་ཞེས་གསུངས། །སྒྲ་ཚད་གསོ་བཟོ་ནང་དོན་དང༌། །སྙན་ངག་མངོན་བརྗོད་སྡེབ་སྦྱོར་རྩིས། །ཟློས་གར་བཅས་ཏེ་བཅུ་ཕྲག་གནས། །མཁྱེན་ན་མཁས་པའི་གོ་ས་སྙེགས། །རང་གིས་སྦྱངས་པའི་ཤེས་བྱ་དེ། །ཆེ་མཐོ་ནམ་མཁའི་དབྱིངས་བཏེགས་ནས། །རང་ཉིད་རྨོངས་པའི་རིག་གཞུང་ལ། །སྨོད་པ་བླུན་པོའི་རང་མཚང་ཡིན། །༈སྔོན་ཀྱི་འཕགས་ཡུལ་སྙན་ངག་མཁན། །རམ་ཤ་རྨ་དང་བྷ་ར་ཏ། །སོགས་ཀྱི་གཞུང་ལས་བསྟན་པ་རྣམས། །དཎྜིས་མེ་ལོང་ནང་དུ་བསྡུས། །འདི་ལ་ལེའུ་གསུམ་ཡོད་དེ། །དང་པོར་བརྒྱ་དང་བཅོ་ལྔ་དང༌། །གཉིས་པར་སུམ་བརྒྱ་དྲུག་ཅུ་ལྔ།། །གསུམ་པར་བརྒྱ་དང་གྱ་དྲུག་སྟེ། །བསྡོམས་པས་ཤོ་ལོ་ཀ་ཡི་གྲངས། །དྲུག་བརྒྱ་དྲུག་ཅུ་རྩ་དྲུག་གོ །༈ གང་ཞིག་བརྗོད་བྱའི་དངོས་པོ་དག །ཕུན་ཚོགས་རྗོད་བྱེད་ཚིག་གི་ཉམས། །རྣ་བར་སྙན་ཞིང་ཡིད་ལ་ནི། །འཇེབས་པ་སྙན་ངག་མཚན་ཉིད་ཡིན། །༈ འདི་བཤད་གཞུང་གི་སྔོན་འགྲོ་གསུམ། །སྙན་ངག་ཤེས་པའི་ཕན་ཡོན་དང༌། །མ་ཤེས་པ་ཡི་ཉེས་དམིགས་དང༌། །སྙན་ངག་ཕུན་སུམ་ཚོགས་པའི་རྒྱུའོ། །༈ འཆད་དང་རྩོད་དང་རྩོམ་པ་དང༌། །ཤགས་འགྱེད་ཟུར་ཟ་གླེང་མོ་སོགས། །རྫོད་ཚིགསྔ་ཕྱི་མི་འགལ་ཞིང༌། །དོན་གྱི་ཆ་ལ་སྐྱོན་མེད་པ། །བློ་ལྡན་ཀུན་གྱིས་གོ་སླ་བ། །སྙན་ངག་ཤེས་པའི་ཕན་ཡོན་ཡིན། །༈ བརྗོད་དོན་ལོག་པར་བཀྲལ་བ་དང༌། །ཚིག་དོན་སྔ་ཕྱི་འབྲེལ་མེད་དང༌། །གྲོང་ཚིག་ཕལ་སྐད་འདྲེས་པ་སོགས། །སྙན་ངག་མི་ཤེས་པ་ཡི་སྐྱོན། །༈ སྐྱེས་སྦྱངས་ཤེས་རབ་མྱུར་བ་ལས། །རང་བཞིན་སྨྲ་བརྗོད་བདེ་བ་དང༌། །བརྡ་སྤྲོད་མངོན་བརྗོད་སྡེབ་སྦྱོར་དང༌། །ཕྱི་དང་ནང་གི་བརྗོད་གཞི་ཀུན། །མང་ཐོས་བརྩོན་པས་ཕྱུག་པ་ནི། །སྙན་ངག་ཕུན་སུམ་ཚོགས་པའི་རྒྱུའོ། །རྒྱུ་ཚོགས་པ་ལས་འབྲས་སྐྱེ་བ། །རྟེན་འབྱུང་རྒྱལ་མོའི་རྩ་ཁྲིམས་ཏེ། །མ་ཚང་མེད་རྒྱུ་དེ་ལས་ནི། །འབྲས་བུ་གང་གིས་ཟློག་ནུས་མིན། །

        ༈ དེ་ལྟར་སྔོན་འགྲོ་གསུམ་ཤེས་ནས། །ལུས་དང་རྒྱན་དང་སྐྱོན་སེལ་གསུམ། །སྙན་ངག་གཞུང་འདིའི་བརྗོད་བྱ་ཡིན། །

        ༈ ལུས་ནི་བརྗོད་དོན་གོ་བྱེད་ཀྱི། །ཚོགས་གསུམ་ཕྲེང་བའི་བདག་ཉིད་དོ། །དེ་ལ་བཅད་ལྷུག་སྤེལ་མ་གསུམ། །ཚིགས་བཅད་ཅེས་པ་ཚིག་གི་ཕྲེང༌། །རྐང་པས་ངེས་པར་གཅོད་པར་འདོད། །༈ སྡེབ་སྦྱོར་དབང་གིས་རྒྱ་སྐད་ཐོག་ པྲིཏ་ཛཱ་ཏི་གཉིས་སུ་ངེས། །འབྲིའི་ཚུལ་སྡེབ་སྦྱོར་གཞུང་དུ་གསལ། །བོད་སྐད་རྐང་པ་རེ་རེའི་ནང༌། །ཚེག་ཁྱིམ་གསུམ་ནས་སོ་ལྔ་བར། །ཡོད་ཅིང་རྐང་པ་བཞི་རེ་ལ། །ཚིག་བཅད་ཅེས་པའི་ཐ་སྙད་འདོགས། །སྦྱོར་ཚུལ་སྒོ་ནས་བཞིར་འགྱུར་ཏེ། །གྲོལ་བ་དང་ནི་རིགས་དང་མཛོད། །འདུས་པ་རྣམས་སུ་མཁས་པས་བཤད། །གྲོལ་བ་བརྗོད་དོན་གང་ཡིན་ཏེ། །ཚིག་བཅད་གཅིག་ཏུ་རྫོགས་པར་འདོད། །རིགས་ནི་བརྗོད་དོན་གཅིག་ཉིད་པོ། །ཚིག་བཅད་དུ་མ་འདས་པའི་མཐར། །བྱ་ཚིག་གཅིག་གིས་སྟོན་པར་འདོད། །མཛོད་ནི་བརྗོད་བྱ་སྣ་ཚོགས་པ། །རྗོད་བྱེད་གཅོད་མཚམས་ཤོ་ལོ་ཀ། །བྱ་ཚིག་མང་ཉུང་ཅི་རིགས་སོ། །འདུས་པ་ཚིགས་བཅད་བྱ་ཚིག་བཅས། །དུ་མས་དོན་གཅིག་སྟོན་པར་འདོད། །དེ་དག་ས་རྒའམ་ལེའུ་ཡིས། །བཅིངས་པ་སྙན་ངག་ཆེན་པོར་བཤད། །༈ དེ་ལ་འཇུག་པའི་སྒོ་གསུམ་སྟེ། །སྒོ་དང་སྲོག་དང་རྩོམ་ཚུལ་ལོ། །ཤིས་བརྗོད་ཕྱག་བྱ་ངེས་བསྟན་གསུམ། །སྙན་ངག་ཆེན་པོར་འཇུག་པའི་སྒོ། །༈ གང་ཞིག་བརྗོད་དོན་སྙིང་པོའི་ཆ། །སྙན་ངག་གི་ནི་སྲོག་ཡིན་ནོ། །དབྱེ་ན་ཆོས་དང་ཐར་པ་ནོར། །འདོད་པ་བཅས་ཏེ་སྡེ་བཞི་དང༌། །དེ་ལས་འཕྲོས་པའི་ལོ་རྒྱུས་སོགས། །སྔོན་བྱུང་འདས་དང་ད་ལྟ་ཡི། །གྲོང་ཁྱེར་རྒྱ་མཚོ་རི་དང་དུས། །ཉི་ཟླ་འཆར་ནུབ་སྐྱེད་ཚལ་དང༌། །ཆུ་ཡི་རོལ་རྩེད་ཆང་འཐུང་བ། །དགའ་སྟོན་དང་ནི་དུས་མ་ཚོགས། །གཉེན་བསུ་གཞོན་ནུ་སྐྱེས་འཕེལ་དང༌། །གྲོས་དང་ཕོ་ཉ་འགྲོ་འོངས་དང༌། །གཡུལ་འཐབ་མངའ་ཐང་དར་བ་སོགས། །བརྗོད་བྱའི་ཕྱིར་ན་སྲོག་ཡིན་ནོ། །༈ རྩོམ་ཚུལ་བསྟོད་པའི་ཡུལ་དེ་ཡི། །དགྲ་སྡེ་ཕྱོགས་ལ་ཆེས་བསྔགས་ནས། །དེ་ལས་བསྟོད་ཡུལ་རྒྱལ་བའི་ཉམས། །བསྟོད་ཚུལ་མཛེས་པའི་མཆོག་ཅེས་བཤད། །༈ རྐང་པས་མ་བཅད་ཚིག་སྦྱོར་དག་ གཅོད་མཚམས་ངེས་མེད་སྣ་ཚོགས་རྒྱུན། །ལྷུག་པའི་ལུས་ཏེ་དབྱེ་བ་གཉིས། །བརྗོད་པ་དང་ནི་གཏམ་ཉིད་དེ། །དནྜིས་འདི་གཉིས་གཅིག་ཏུ་འདོད། །༈ རྐང་པས་བཅད་དང་མ་བཅད་པ། །ཕན་ཚུན་བསྲེས་པ་སྤེལ་མར་འདོད། །༈ ངག་གི་རང་བཞིན་དེ་དག་ཀྱང༌། །ལེགས་སྦྱར་དང་ནི་རང་བཞིན་སྐད། །ཟུར་ཆགས་སྐད་དང་ཤ་ཟའི་སྟེ། །སྐད་རིགས་བཞི་ལས་བརྩམས་པར་བཤད། །འདི་བཞི་བོད་སྐད་ལ་མེད་ཀྱང༌། །རྗེས་མཐུན་རེ་རེ་ཞ་ལུས་གསུངས། །

        ༈ སྙན་ངག་མཛེས་པར་བྱེད་པ་ཡི། །ཆོས་རྣམས་རྒྱན་ཞེས་རབ་ཏུ་བརྗོད། །དེ་ལ་ཐུན་མོང་མིན་པ་དང༌། །ཐུན་མོང་རྒྱན་ཏེ་རྣམ་པ་གཉིས། །༈ འཕགས་ཡུལ་ལྷོ་ཤར་གཉིས་པོ་ཡི། །སོ་སོ་ཁོ་ནའི་ལམ་སྲོལ་རྒྱན། །ཐུན་མོང་མིན་པའི་རྒྱན་ཡིན་ནོ། །དེ་ལ་ལྷོ་ཕྱོགས་བཻདསྐྲརྟ་དང༌། །ཤར་ཕྱོགས་གཽ་ཌཱ་བའི་ལུགས་གཉིས། །ལྷོ་ཕྱོགས་ཡི་གེ་འཇམ་ཞིང་ཡང༌། །ཤར་པས་རྩུབ་ཅིང་ལྕི་བས་ཁྱད། །ཡི་གེ་འཇམ་དང་བརྗོད་པ་ལྷོད། །ཡངས་དང་སྲོག་ཅུང་དོན་གཅིག་ཅིང༌། །དེ་བཞིན་རྩུབ་དང་ལྕི་བ་དང༌། །དམ་དང་སྲོག་ཆེན་རྣམས་ཀྱང་གཅིག་ འཕགས་ཡུལ་གསལ་བྱེད་སོ་བཞི་ལས། །ཕོ་ཡིག་ལྔ་དང་མོ་ཡིག་ལྔ།། །ཤིན་ཏུ་མོ་ལྔ་མཐའ་གནས་བཞི། །འཇམ་པའི་ཡི་གེ་བཅུ་དགུ་ཡིན། །མ་ནིང་ལྔ་དང་འཐུག་པོ་ལྔ།། །དྲོ་བ་བཞི་དང་མཐའ་ཟད་གཅིག །རྩུབ་པའི་ཡི་གེ་བཅོ་ལྔར་འདོད། །བོད་ཡིག་གསལ་བྱེད་སུམ་བཅུ་ལས། །སྡེ་བ་ལྔ་པ་ཡན་ཆད་ཀྱི། །གཉིས་པ་བཏོན་པས་བཅུ་གཉིས་དང༌། །འ་ཡ་ར་ལ་ཨ་ཡིག་བཅས། །འཇམ་པའི་ཡི་གེ་ཉི་ཤུ་ཡིན། །མ་ནིང་ལྔ་དང་ཞ་ཟ་ཤ། །ས་དང་ཧ་བཅས་བཅུ་པོ་འདི། །རྩུབ་པའི་ཡི་གེ་ཉིད་ཡིན་ཞེས། །སྔོན་བྱོན་བོད་ཀྱི་མཁས་པས་བཤད། །༈ སྦྱར་བ་རབ་དྭངས་མཉམ་ཉིད་དང༌། །སྙན་དང་ཤིན་ཏུ་གཞོན་པ་དང༌། །དོན་གསལ་བ་དང་རྒྱ་ཆེ་བ། །བརྗིད་དང་མཛེས་དང་ཏིང་ངེ་འཛིན། །ཡོན་ཏན་འདི་བཅུ་བཻདརྦྷ་པའི། །ལམ་གྱི་སྲོག་ཏུ་བཤད་པ་ཡིན། །འདི་དག་ཕལ་ཆེར་ལྡོག་པ་ཡིས། །གཽ་ཌཱ་པ་ཡི་ལམ་སྲོལ་མཚོན། །༈ འཇམ་པ་ཤས་ཆེ་རྩུབ་པ་ཡང༌། །ཅུང་ཟད་བསྲེས་པ་ལྷོ་ལུགས་དང༌། །འཇམ་པ་ཁོ་ན་དེ་ལ་ཡང༌། །ཡི་གེ་གཅིག་གིས་རྗེས་འཁྲིད་ཅན། །ཤར་བའི་ལུགས་ཀྱི་སྦྱར་བའོ། །༈ བརྗོད་བྱ་རྗོད་བྱེད་གཉིས་ཀའི་ཆ། །འཇིག་རྟེན་གྲགས་པ་གཙོར་བྱས་སྟེ། །སྦྱར་བས་གོ་སླ་ལྷོ་ལུགས་དང༌། །སྔོན་དུས་གྲགས་པ་མི་ལྡན་ཡང༌། །ངེས་ཚིག་ཙམ་གྱིས་ངག་སྦྱོར་དེ། །བཤད་དུ་རུང་བའི་དོན་ཅན་ནི། །ཤར་བས་འདོད་པའི་རབ་དྭངས་ཡིན། །༈ འཇམ་རྩུབ་ཡི་གེ་དོ་མཉམ་ཞིང༌། །ཕྱོགས་སུ་མ་ལྷུང་ལྷོ་ལུགས་དང༌། །ཕྱེད་སྔ་འཇམ་ཞིང་ཕྱི་རྩུབ་པའམ། །གཅིག་རྩུབ་གཞན་འཇམ་མི་མཉམ་ཅན། །ཤར་བའི་ལུགས་ཀྱི་མཉམ་ཉིད་ཡིན། །༈ ཡི་གེ་སྐྱེ་གནས་བརྩེགས་པ་སོགས། །སྒྲ་མཚུངས་ཉེ་བའི་ཉམས་ལྡན་པ། །ལྷོ་བའི་ལུགས་ཀྱི་སྙན་པ་དང༌། །སྐྱེ་གནས་ལ་སོགས་གང་ཡིན་ཡང༌། །སྒྲ་མཚུངས་ཙམ་གྱིས་ཆོག་མིན་པར། །རྗེས་འཁྲིད་ཁོ་ན་ཤར་བའི་ལུགས། །༈ འཇམ་ཡིག་ཤུགས་ཆེ་རང་ཤུགས་ཀྱིས། །ངག་ནས་བརྗོད་བདེ་ལྷོད་བ་དང༌། །རྩུབ་ཡིག་མང་པོ་ཚོགས་ཆེན་པོས། །བརྗོད་པར་བྱ་བའི་རང་བཞིན་ཅན། །ཤར་བའི་ལུགས་ཏེ་ཤིན་ཏུ་གཞོན། །བརྗོད་དོན་ཚིག་གང་ཐོས་མ་ཐག །སྒྲ་དོན་ལ་བརྟེན་རྟོགས་སླ་བས་ སླར་ཡང་ཁྱད་པར་མ་ལྷོད་པར། །དོན་གསལ་བ་དེ་གཉིས་ཀའི་ལུགས། །༈ བསྔགས་པའི་ཚིག་སྦྱོར་འགའ་ཞིག་ལས། །ཁྱད་འཕགས་ཡོན་ཏན་རྟོགས་ནུས་པ། །དེ་ནི་རྒྱ་ཆེ་རྒྱན་ཡིན་ཞེས། །ལྷོ་ཤར་གཉིས་ཀའི་འདོད་པར་མཐུན། །༈འཇམ་རྩུབ་ཆ་མཉམ་ཚིག་སྡུད་མང༌། །ལྷོ་བའི་ལུགས་ཀྱི་བརྗོད་པ་སྟེ། །འཇམ་རྩུབ་དོ་མི་མཉམ་པ་དང༌། །ཚིག་སྡུད་མང་བ་ཤར་བའི་ལུགས། །འཇིག་རྟེན་གྲགས་ཚད་དང་བསྟུན་ཏེ། །རན་པའི་སྙན་ཚིག་ལྷོ་པའི་ལུགས། །གྲགས་ཚད་ལས་བརྒལ་འུད་བཤད་ཀྱིས། །སྒྲོ་བཏགས་ཤར་པས་མཛེས་པར་མདོད། །༈ འཇིག་རྟེན་ལུགས་ཀྱི་རྗེས་འབྲང་ནས། །ཆོས་དང་ཆོས་ཅན་ཕན་ཚུན་དུ། །རྒྱན་ཞེས་ལྷོ་ཤར་གཉིས་ཀས་འདོད། །དབུས་འགྱུར་འཕགས་པའི་ལྷོ་ཤར་གྱི། །ཐུན་མོང་མིན་པའི་རྒྱན་འདི་དག་ ལམ་དང་ལུགས་སྲོལ་ཙམ་མ་གཏོགས། །བོད་ལ་དེ་ཙམ་རྒྱུག་མི་ཆེ། །འོན་ཀྱང་རིག་པ་འཕེལ་བའི་སླད། །སྔོན་བྱོན་བོད་ཀྱི་མཁས་པ་ཚོས། །བོད་ཡིག་འཇམ་རྩུབ་དང་བསྟུན་ནས། །ལད་མོའི་ཚུལ་དུ་སྤེལ་བ་ཡིན། །སྙན་ཚིག་མཁས་པའི་སྙིང་གི་ནོར། །བློ་གསལ་མགྲིན་པ་མཛེས་པའི་རྒྱན། །མུཀྟི་ཀ་ཡི་ཕྲེང་བ་ལས། །ལེའུ་དང་པོའི་སྡོམ་ཚིག་གོ །

        ༈ ལྷོ་ཤར་གཉིས་ཀས་ཐུན་མོང་དུ། །འདོད་པ་ཐུན་མོང་རྒྱན་ཡིན་ནོ། །དེ་ལ་དོན་རྒྱན་སྒྲ་རྒྱན་དང༌། །གབ་ཚིག་རྒྱན་ཏེ་རྣམ་པར་གསུམ། །༈ གང་ཞིག་བརྗོད་བྱའི་དོན་གྱི་ཉམས། །གཙོ་བོར་འདོན་པ་དོན་རྒྱན་ཡིན། །འདི་དོན་ཉེ་བར་སྟོན་པའི་ཕྱིར། །སྙན་ངག་ལེའུ་བར་པ་གསུངས། །༈ རང་བཞིན་བརྗོད་དང་དཔེ་དང་ནི། །གཟུགས་ཅན་གསལ་བྱེད་སྐོར་བ་དང༌། །འགོག་དང་དོན་གཞན་བཀོད་པ་དང༌། །ལྡོག་པ་ཅན་དང་སྲིད་པ་ཅན། །བསྡུས་དང་ཕུལ་བྱུང་རབ་བཏགས་དང༌། །རྒྱུ་དང་ཕྲ་མོ་ཆ་དང་རིམ། །དགའ་དང་ཉམས་ལྡན་གཟི་བརྗིད་ཅན། །རྣམ་གྲངས་བརྗོད་དང་ཀུན་ཏུ་ཕན། །རྒྱ་ཆེར་བསྙོན་འདོར་སྦྱར་བ་དང༌། །ཁྱད་པར་མཚུངས་པར་སྦྱོར་པ་དང༌། །འགལ་དང་སྐབས་མིན་བརྗོད་པ་དང༌། །ཟོལ་བསྟོད་ངེས་པར་སྟོན་པ་དང༌། །ལྷན་ཅིག་བརྗོད་དང་ཡོངས་བརྗེས་ཤིས། །རབ་སྤེལ་དེ་ནས་དགོངས་པ་ཅན། །དོན་རྒྱན་སོ་ལྔ་འདི་དག་ནི། །ལེའུ་བར་པའི་བརྗོད་གཞི་ཡིན། །༈ དངོས་རྣམས་རང་བཞིན་སྒྲོ་སྐུར་དང༌། །ཤུགས་སྟོན་ཙམ་མིན་དྲང་པོ་བརྗོད། །རང་བཞིན་བརྗོད་པའི་རྒྱན་ཏེ་བཞི། །རིགས་དང་བྱ་བ་ཡོན་ཏན་རྫས། །༈ མཚོན་བྱེད་དཔེ་དང་མཚན་བྱ་དོན། །མཚུངས་པར་སྟོན་པ་དཔེ་རྒྱན་ཡིན། །ཆོས་དཔེ་དངོས་དཔེ་བཟློག་པའི་དཔེ། །ཕན་ཚུན་དཔེ་དང་ངེས་ངེས་མེད། །བསྡུས་དང་ཕུལ་བྱུང་རབ་བཏགས་རྨད། །རྨོངས་དང་ཐེ་ཚོམ་གཏན་འབེབས་དཔེ། །སྦྱར་དང་མཉམ་ཉིད་རྨད་དང་བསྔགས་་ ངོ་བསྟོད་དེ་ཉིད་ཐུན་མོང་ནིན། །བྱུང་མིན་སྲིད་མན་མང་བའི་དཔེ། །བརྗོད་འདོད་འགལ་དང་དགག་པའི་དཔེ། །རྣམ་འགྱུར་ཕྲེང་བ་ངག་དོན་དང༌། །ཟླ་བོ་དངོས་དང་མཚུངས་སྦྱོར་དཔེ། །རྒྱུ་ཡི་དཔེ་སྟེ་སུམ་ཅུ་གཉིས། །དཔེ་ཡི་རྒྱན་གྱི་དབྱེ་བ་ཡིན། །༈ རྟགས་ཐ་དད་དང་ཚིག་ཐ་དད། །དཔེ་དོན་མཆོག་དམན་ཆེ་བ་རྣམས། །སྙན་ངག་མཁན་གྱི་སྐྱོན་རྩི་ཡང༌། །སྦྱོར་ཚུལ་ཤེས་ན་རྒྱན་དུ་འགྱུར། །༈ དཔེ་དོན་མཚུངས་པར་གསལ་བྱེད་སྒྲ། །ཤོང་དཔང་ལོ་ཙཱས་རེ་གསུམ་བསྒྱུར། །དུས་ཕྱིས་སྣར་ཐང་པཎ་ཆེན་གྱིས། །རྫོགས་པར་བསྒྱུར་ཏེ་རེ་ལྔར་འགྱུར། །དེ་ལ་སྡེ་ཚན་བཞིར་ཕྱེས་ཏེ། །དཔེ་དོན་གསལ་བྱེད་ཉེ་གཉིས་དང༌། །འདྲ་དོན་གསལ་བྱེད་ཉི་ཤུ་དང༌། །དཔེ་རྒྱན་གསལ་བྱེད་བཅོ་ལྔ་དང༌། །དེ་ལྟ་བུ་སོགས་བརྒྱད་རྣམས་སོ། །༈ བཞིན་ལྟར་ལྟ་བུ་ཇི་ལྟར་མཐུན། །མཚུངས་དང་ཡང་དག་མཚུངས་དང་མཉམ། །ཡང་དག་གསལ་དང་ངེས་པར་གསལ། །རབ་གསལ་གཟུགས་ཀྱི་ཟླ་བོ་དང༌། །མཉེན་པོ་དང་ནི་དགྲ་ཟླ་བྱེད། །སོ་སོར་རྟོགས་དང་འགྲན་དང་འདྲ། །ལྟ་བཅས་བསླུ་བ་རིགས་མཐུན་དང༌། །རྗེས་སུ་སྨྲ་སྟེ་ཉེར་གཉིས་ནི། །སྡེ་ཚན་དང་པོའི་དབྱེ་སྒོ་ཡིན། །༈ གཟུགས་བརྙན་ཅན་དང་སོ་སོར་སྡེབ། །གཟུགས་མཚུངས་གཟུགས་མཉམ་གཟུགས་གཞལ་དང༌། །མཚན་ཉིད་མཐུན་དང་མཚན་ཉིད་འདྲ། །མཚན་ཉིད་མཚུངས་དང་མཐུན་ཕྱོགས་དང༌། །དཔེར་བྱས་དཔེ་དང་རྟོག་དང་དམན། །ཅུང་ཟད་དམན་དང་རབ་ཏུ་སྨྲ། །སོ་སོར་ཟློག་དང་རིགས་མཐུན་མཉམ། །ཆོས་མཐུན་དང་ནི་ཆོས་ཐུན་མོང༌། །འདྲ་དོན་གསལ་བྱེད་ཉི་ཤུ་ཡིན། །༈ འབྲུ་མང་པོ་ཡི་ཚིག་སྡུད་དང༌། །འགྲན་དང་རྒྱལ་དང་སྡང་དང་འཁུ། །མི་མཐུན་སྒྲོག་དང་འཐབ་དང་འཕྱ། །སྨ་འབེབས་སྨད་པ་ཅོ་འདྲི་འགོག་ རྒོད་དང་ཕྲག་དོག་མི་བཟོད་བྱེད། །དཔེ་རྒྱན་གསལ་བྱེད་བཅོ་ལྔ་ཡིན། །དེ་ཡི་སྐལ་བཟང་འཕྲོག་བྱེད་དང༌། །དེ་ཡི་མཛེས་པ་ཟུམ་པར་བྱེད། །དེ་དང་འགྲན་ལས་ཚར་གཅོད་དང༌། །དེ་ཡི་རྗེས་སུ་རྐང་པ་འཇོག་ དེ་ཡི་ནུས་པ་འཇུག་པ་དང༌། །དེ་ཡི་ངང་ཚུལ་དེ་འགོག་པ། །དེ་ཡི་རྗེས་སུ་བྱེད་པ་སྟེ། །དེ་ལྟ་བུ་སོགས་བརྒྱད་ཡིན་ནོ། །འདི་ནི་དབྱངས་ཅན་དགྱེས་གླུའི་སྲོལ། །ཡིན་གྱི་མཚུངས་གསལ་འདྲེན་ཚུལ་ལ། །བོད་མཁས་སི་ཏུའི་རྗེས་འབྲངས་བཅས། །བཞེད་ཚུལ་སོ་སོའི་གཞུང་དུ་གཟིགས། །༈ རྩ་བས་དངོས་སུ་མ་ཟིན་པ། །ཆ་གྲོགས་སྤུན་ཟླ་མཐོང་ཐོས་དྲན། །རེག་ཕམ་སྙེག་འཛེགས་སེམས་པ་སྟེ། །དབྱེ་བའི་རྣམ་གྲངས་བཅུ་གཅིག་འདི། །རིན་སྤུངས་སྡེ་བས་བཞེད་པ་ལྟར། །དབྱངས་ཅན་དགྱེས་གླུའི་གཞུང་དུ་བཀོད། །དཔེ་ཡི་རྒྱན་གྱི་ཚིག་སྦྱོར་ལ། །མཚུངས་གསལ་འདི་དག་ཤིན་ཏུ་གལ། །༈ བརྗོད་བྱའི་དོན་དེ་དཔེ་ཡི་གཟུགས། །བཀོད་པའི་རྒྱན་དེ་གཟུགས་རྒྱན་ཡིན། །བསྡུས་དང་མ་བསྡུས་བསྡུས་མ་བསྡུས། །མཐའ་དག་ཆ་ཤས་ཆ་ཤས་ཅན། །ཡན་ལག་གཅིག་སོགས་ལྡན་མི་ལྡན། །མི་མཉམ་ཁྱད་པར་འགལ་དང་རྒྱུ། །སྦྱར་དང་དཔེ་ལྡོག་འགོག་པ་དང༌། །མཉམ་འཇོག་གཟུགས་ཅན་གྱི་གཟུགས་ཅན། །བསྙོན་དོར་བཅས་ཏེ་ཉི་ཤུ་འདི། །གཟུགས་རྒྱན་དབྱེ་བའི་རྣམ་གྲངས་ཡིན། །༈ རིགས་དང་བྱ་བ་ཡོན་ཏན་རྫས། །ཚིག་གཅིག་ལ་ནི་གནས་པ་ཡིས། །གལ་ཏེ་ངག་ཀུན་ལ་ཕན་ན། །དེ་ནི་གསལ་བྱེད་རྒྱན་དུ་འདོད། །རིགས་དང་བྱ་བ་ཡོན་ཏན་རྫས། །ཐོག་མར་བརྗོད་པའི་གསལ་བྱེད་དང༌། །རིགས་དང་བྱ་བ་བར་མཐའ་གསལ། །ཕྲེང་བ་འགལ་དོན་དོན་གཅིག་སྦྱར། །དངོས་བསྟན་དབྱེ་བ་བཅུ་གཉིས་དང༌། །ཤུགས་བསྟན་བཞི་དང་བཅུ་དྲུག་གོ་ ༈ ཚིག་སྦྱོར་གང་གི་ཐོག་མཐའ་བར། །བརྗོད་དོན་གསལ་བྱེད་ཚིག་དང་དོན། །ཅི་རིགས་ཟློས་པ་བསྐོར་པའི་རྒྱན། །དབྱེ་ན་དོན་བསྐོར་ཚིག་བསྐོར་དང༌། །གཉིས་ཀ་བསྐོར་པའི་རྒྱན་དང་གསུམ། །༈ དགག་བྱ་གང་ཞིག་གཟུང་བ་དེ། །འགོག་བྱེད་དགག་ཚིག་དངོས་སམ་དོད། །ཅི་རིགས་ཀྱིས་ནི་འགོག་བྱེད་པ། །དེ་ནི་འགོག་པའི་རྒྱན་ཡིན་ནོ། །བྱུང་བ་མངོན་གྱུར་འབྱུང་འགྱུར་ཆོས། །ཆོས་ཅན་རྒྱུ་འབྲས་རྗེས་གནང་དབང༌། །མ་གུས་ཤིས་བརྗོད་རྩུབ་མོ་གྲོགས། །འབད་དང་གཞན་དབང་ཐབས་དང་ཁྲོ། །མྱ་ངན་འགྱོད་དང་ཐེ་ཚོམ་སྦྱར། །དོན་གཞན་རྒྱུས་འགོག་ཉི་ཤུ་གསུམ། །༈ བསྒྲུབ་བྱའི་དངོས་འགའ་སྔོན་བཀོད་ནས། །དེ་ཡི་སྒྲུབ་བྱེད་ནུས་པ་ཅན། །དངོས་པོ་གཞན་ཞིག་འགོད་པ་དེ། །དོན་གཞན་བཀོད་པའི་རྒྱན་ཞེས་བྱ། །ཀུན་ཁྱབ་ཁྱད་པར་སྦྱར་དང་འགལ། །འོས་པ་དང་ནི་མི་འོས་པ། །འོས་ཤིང་མི་འོས་དེ་བཟློག་བརྒྱད། །༈ སྒྲས་ཟིན་པའམ་ཤུགས་ལ་ནི། །དཔེ་དོན་མཚུངས་པར་བསྟན་ནས་ཕྱིས། །ལྡོག་ཆོས་གང་ཞིག་ལ་བརྟེན་ནས། །ཁྱད་པར་འབྱེད་པ་ལྡོག་པའི་རྒྱན། །གཅིག་ལྡོག་གཉིས་ལྡོག་སྦྱར་དང་འགོག། གཏན་ཚིགས་ལྡོག་པ་ཅན་དང་ལྔ།། །༈ རྟེན་གྱི་དབྱེ་དང་དཔེ་ཅན་ལྷག། མཚུངས་ཆོས་སྒྲས་ཟིན་འབྱེད་ཆོས་ལྡོག་ རིགས་མཐུན་ལྡོག་པ་ཅན་དང་བཅུ། །༈ རབ་ཏུ་གྲགས་པའི་རྒྱུ་ཟློག་ནས། །གང་ཞིག་རྒྱུ་གཞན་ཅུང་ཟད་ཙམ། །གང་དུ་རང་གི་ངོ་བོ་ཉིད། །སྟོན་པ་དེ་ནི་སྲིད་པ་ཅན། །ཕྱི་ནང་ཤེས་བྱེད་རྒྱུ་གཉིས་དང༌། །འབྲས་བུ་རང་གི་ངོ་བོ་ཙམ། །སྟོན་པའི་སྲིད་པ་ཅན་དང་གསུམ། །༈ དངོས་པོ་གཞན་ཞིག་བརྗོད་འདོད་ནས། །དེ་དང་མཚུངས་པའི་དངོས་པོ་གཞན། །བསྡུས་པའི་ཚུལ་གྱིས་བརྗོད་པ་གང༌། །དེ་ནི་བསྡུས་བརྗོད་རྒྱན་ཡིན་ནོ། །སྤྱི་དང་ཁྱད་གཞི་ཐ་དད་དང༌། །ཁྱད་པར་ཐ་དད་ཐ་དད་མིན། །སྔོན་མེད་བསྡུས་བརྗོད་རྒྱན་དང་བཞི། །༈ བརྗོད་འདོད་དེ་ཉིད་འཇིག་རྟེན་གྱི། །མཚམས་ལས་བརྒལ་བའི་འུད་ཤོད་ཀྱིས། །རྗོད་པ་ཕུལ་བྱུང་རྒྱན་ཡིན་ཏེ། །ཁྱད་འཕགས་ཐེ་ཚོམ་ངེས་པ་དང༌། །གྲགས་པ་བརྗོད་པའི་ཕུལ་བྱུང་བཞི། །༈ སེམས་དང་ལྡན་མིན་ཇི་ལྟར་ཡང༌། །བརྗོད་བྱའི་དངོས་པོ་དེ་ཉིད་ལ། །རྣམ་པར་གཞན་ཞིག་སྒྲོ་བཏགས་ནས། །བརྗོད་པ་རབ་བཏགས་རྒྱན་དུ་འདོད། །སེམས་ལྡན་སེམས་མེད་རབ་རྟོག་གཉིས། །ཏིང་འཛིན་རབ་རྟོག་བཞིན་སྒྲ་ཅན། །སྙམ་དང་དྭོགས་དང་ངེས་དང་འདྲ། །མིན་ནམ་ཞེས་སོགས་རབ་རྟོག་གི་ གསལ་བྱེད་འདིར་སྟོན་དྲུག་ཉིད་དོ། །༈ བྱེད་པོ་ཤེས་བྱེད་དངོས་མེད་སོགས། །རྒྱུ་ཡི་ཁྱད་པར་འགའ་ཞིག་ལ། །བརྟེན་ནས་དེ་མཐུན་འབྲས་བུ་དག་ གོ་བར་བྱེད་པ་རྒྱུ་རྒྱན་ཡིན། །དངོས་དང་དངོས་མེད་མཚར་རྒྱུ་སྟེ། །རྩ་བའི་དབྱེ་བ་གསུམ་ཡོད་དེ། །དང་པོ་དངོས་པོའི་རྒྱུ་ལ་གཉིས། །བྱེད་པོའི་རྒྱུ་དང་ཤེས་བྱེད་རྒྱུ། །བྱེད་པོ་ལ་ཡང་རྣམ་གཉིས་ཏེ། །སྒྲུབ་བྱེད་རྒྱུ་དང་ལས་ཀྱི་རྒྱུ། །སྒྲུབ་བྱེད་རྒྱུ་ལ་རྣམ་གཉིས་ཏེ། །སྐྱེད་བྱེད་རྒྱུ་དང་ཉམས་བྱེད་རྒྱུ། །ལས་རྒྱུ་ལའང་གཉིས་ཡོད་དེ། །རྣམ་འགྱུར་རྒྱུ་དང་ཐོབ་བྱེད་རྒྱུ་་ ཤེས་བྱེད་རྒྱུལ་རྣམ་གཉིས་ཏེ་ ཕྱི་དང་ནང་གི་ཤེས་བྱེད་རྒྱུ། །དེ་དག་དངོས་པོའི་རྒྱུ་དྲུག་ཡིན། །གཉིས་པ་དངོས་མེད་རྒྱུ་ལ་གཉིས། །སྔར་ནས་མེད་དང་ཞིག་ནས་མེད། །ཕན་ཚུན་མེད་དང་སྤངས་ནས་མེད། །མེད་དགག་རྒྱུ་ནི་རྣམ་བཞི་དང༌། །བཟློག་པའི་རྒྱུ་གཅིག་མ་ཡིན་དགག །དངོས་མེད་རྒྱུ་རྒྱན་བསྡོམས་པས་ལྔ། །གསུམ་པ་མཚར་བའི་རྒྱུ་ལ་ལྔ།། །རིང་འབྲས་རྒྱུ་འབྲས་ལྷན་ཅིག་པ། །འབྲས་བུ་སྔོན་དང་རིགས་མིན་རྒྱུ། །རིགས་པའི་རྒྱུ་དང་མཚར་རྒྱུ་སྟེ། །བསྡོམས་པས་དབྱེ་བ་བཅུ་དྲུག་གོ་ ༈ བསམ་དོན་སྒྲས་ཟིན་མ་བརྗོད་པར། །ལུས་དང་ངག་གི་བརྡ་ཐབས་ལས། །གོ་བར་ནུས་པ་ཕྲ་མོའི་རྒྱན། །ཟུར་དང་རྣམ་པ་ཕྲ་མོ་གཉིས། །༈ དོན་དེའི་སྐྱོན་མཚང་འགེབས་པའི་སླད། །སྒྲིབ་བྱེད་ཆོས་མཐུན་མཛེས་པ་ཞིག་ རྗོད་པའི་ཟོལ་ཀྱིས་སྒྲིབ་པ་དེ། །ཆ་ཡི་རྒྱན་གྱི་མཚན་ཉིད་ཡིན། །འོས་པ་དང་ནི་མི་འོས་དང༌། །བསྟོད་པའི་ཆ་ལས་སྨད་པ་དང༌། །སྨད་པའི་ཆ་ལས་བསྟོད་པ་བཞི། །༈ དཔེ་ཅན་འགའ་ཞིག་གོ་རིམ་བཞིན། །སྔོན་དུ་བཀོད་ནས་དེ་དག་གི་ འཇལ་བྱེད་དཔེ་རྣམས་རིམ་གྱིས་བཀོད། །དེ་ནི་རིམ་པ་ཅན་གྱི་རྒྱན། །༈ རྒྱུ་རྐྱེན་འགའ་ཞིག་ལ་བརྟེན་ནས། །ནང་སེམས་དགའ་བ་ཁྱད་པར་ཅན། །སྐྱེས་བར་རྗོད་པའི་ཚིག་སྦྱོར་དེ། །དགའ་བའི་རྒྱན་གྱི་མཚན་ཉིད་ཡིན། །དངོས་ཐོབ་གཟུགས་བརྙན་ལས་བྱུང་གཉིས། །༈ ནང་གི་བསམ་པའི་འགྱུར་བ་ལ། །བརྟེན་ནས་ཕྱི་ཡི་ལུས་ངག་ཏུ། །ཐོན་པའི་ཉམས་དག་སྟོན་པའི་ངག་ དེ་ནི་ཉམས་ལྡན་རྒྱན་ཞེས་བྱ། །སྒེག་དང་དྲག་ཤུལ་དཔའ་བ་དང༌། །སྙིང་རྗེ་མི་སྡུག་གཞད་གད་དང༌། །རྨད་བྱུང་འཇིགས་རུང་ཉམས་ཏེ་བརྒྱད། །༈ རྗོད་བྱེད་ཚིག་བརྗིད་དྲེགས་པའི་ཉམས། །གཟེངས་སུ་མཐོ་བ་སྟོན་པའི་ངག་ གཟི་བརྗིད་ཅན་གྱི་རྒྱན་ཏེ་གཅིག་ ༈འདོད་དོན་དངོས་སུ་མ་བརྗོད་པར། །དེ་ཉིད་བསྒྲུབ་པར་བྱ་བའི་སླད། །རྣམ་པ་གཞན་ཞིག་བརྗོད་པ་གང༌། །དེ་ནི་རྣམ་གྲངས་རྒྱན་ཏེ་གཅིག་ ༈ བྱ་བ་འགའ་ཞིག་རྩོམ་པ་ལ། །སྐལ་བ་ཡི་ནི་སྟོབས་ལས་ཀྱང༌། །དེ་ཡི་སྒྲུབ་བྱེད་ཕུན་ཚོགས་གང༌། །ཀུན་ཕན་རྒྱན་ཏེ་གཅིག་ཉིད་དོ། །༈ བརྗོད་དོན་དེ་ཉིད་བསམ་པ་དང༌། །འབྱོར་པ་གང་ཡང་རུང་སྒོ་ནས། །ཁྱད་པར་འཕགས་པ་སྟོན་པའི་ངག་ རྒྱ་ཆེན་རྒྱན་གྱི་ངོ་བོར་འདོད། །དབྱེ་ན་བསམ་འབྱོར་རྒྱ་ཆེ་གཉིས། །༈ བརྗོད་དོན་དངོས་པོའི་གནས་ལུགས་ལ། །བསྙོན་ནས་དོན་གཞན་ཅུང་ཟད་ཙམ། །བསྟན་པ་དེ་ནི་བསྙོན་དོར་རྒྱན། །ཆོས་ལ་བསྙོན་དང་ཡུལ་ལ་བསྙོན། །རང་བཞིན་བསྙོན་པའི་རྒྱན་དང་གསུམ། །༈ སྒྲ་དོན་གང་རུང་གི་སྒོ་ནས། །རྗོད་བྱེད་གཅིག་ཏུ་སྦྱར་བ་ལས། །བརྗོད་དོན་དུ་མ་གོ་ནུས་པ། །དེ་ནི་སྦྱར་བའི་རྒྱན་དུ་འདོད། །ཚིག་གི་གཅོད་མཚམས་ཐ་དད་མིན། །ཐ་དད་ཚིག་འདྲའི་སྦྱར་བ་དང༌། །བྱ་བ་གཅིག་དང་འགལ་མིན་པ། །བྱ་བའི་ཡུལ་ཅན་སྦྱར་བ་དང༌། །ངེས་པར་ཅན་དང་ངེས་པར་འགོག། འགལ་མིན་འགལ་བ་ཅན་དང་དགུ་ ༈ བརྗོད་བྱའི་དངོས་དེར་རྒྱུ་རྐྱེན་སོགས། །ཁྱད་ཆོས་འགའ་ཞིག་མ་ཚང་ཡང༌། །ཁྱད་པར་ཚང་པ་ལས་ལྷག་པ། །སྟོན་པ་ཁྱད་པར་བརྗོད་པའི་རྒྱན། །ཡོན་ཏན་རིགས་དང་བྱ་བ་རྫས། །རྒྱུ་ཡི་ཁྱད་པར་བརྗོད་པ་ལྔ། །༈ བརྗོད་འདོད་སྐྱོན་ཡོན་གང་རུང་ཞིག་ མཚུངས་དོན་མེད་པའི་དཔེ་ཞིག་དང༌། །བསྟོད་སྨད་ཅི་རིགས་ཀྱི་སྒོ་ནས། །མཚུངས་པར་སྦྱོར་པ་མཚུངས་སྦྱོར་རྒྱན། །དབྱེ་ན་བསྟོད་སྨད་མཚུངས་སྦྱོར་གཉིས། །༈ འགལ་ཟླ་སྒྲུབ་བྱེད་སླད་དུ་ནི། །འགལ་བའི་ཆོས་དང་ཆོས་ཅན་འགའ། །གཞི་གཅིག་སྟེང་དུ་མཉམ་དུ་སྡེབ། །དེ་ནི་འགལ་བའི་རྒྱན་དུ་འདོད། །གཞི་ཐ་དད་དང་བྱ་བ་འགལ། །གཞི་གཅིག་ཡོན་ཏན་གཉིས་འགལ་དང༌། །རྫས་འགལ་རྫས་དང་ལས་འགལ་བ། །བྱ་བ་འགལ་དང་སྦྱར་འགལ་དྲུག་ ༈ རང་ལས་དམན་པའི་ཡུལ་ཞིག་ལ། །བསྟོད་པ་བྱེད་པ་སྐབས་མིན་ཀྱང༌། །རྐྱེན་གྱི་དབང་གིས་བསྟོད་འདོད་པ། །སྐབས་མིན་བསྟོད་པའི་རྒྱན་ཏེ་གཅིག་ ༈ གང་ཞིག་བརྗོད་གཞི་གཟུང་བ་དེར། །རྗོད་ཚུལ་སྐྱོན་ལྟར་སྣང་ན་ཡང༌། །དོན་ལ་ཆེ་བའི་ཡོན་ཏན་ཉིད། །ཉེ་བར་སྟོན་པ་ཟོལ་བསྟོད་དེ། །མཐུ་དཔའ་སྟོབས་ཀྱི་ཟོལ་བསྟོད་གསུམ། །༈ སྟོན་བྱེད་དཔེ་སྔོན་བཀོད་པ་དེས། །དེ་དང་མཚུངས་པའི་བསྟན་བྱའི་དོན། །མཆོག་དམན་རང་བཞིན་གསལ་བྱེད་པ། །དེ་ནི་ངེས་སྟན་རྒྱན་ཏེ་གཉིས། །མཆོག་དང་མཆོག་མིན་ངེས་བསྟན་ནོ། །༈ བརྗོད་དོན་དེ་དང་འབྲེལ་བ་ཡི། །ཡོན་ཏན་བྱ་བ་གང་ཡང་རུང༌། །ལྷན་ཅིག་ཚོགས་པ་སྟོན་པའི་ངག་ དེ་ནི་ལྷན་ཅིག་བརྗོད་པའི་རྒྱན། །ཡོན་ཏན་ལྷན་ཅིག་བརྗོད་པ་དང༌། །བྱ་བ་ཐ་དད་བྱ་བ་གཅིག་ ལྷན་ཅིག་བརྗོད་པའི་རྒྱན་ཏེ་གསུམ། །༈ བརྗོད་བྱའི་དོན་རྣམས་ཕན་ཚུན་དུ། །བརྗེ་རེས་བྱེད་པ་ཡོངས་བརྗེས་རྒྱན། །༈ འདོད་བྱའི་དོན་དེ་འགྲུབ་པའི་སླད། །སྨོན་ཚིག་སྦྱོར་བ་ཤིས་བརྗོད་ཡིན། །༈ ཐ་དད་རྒྱན་གསུམ་བསྲེས་ཤིང་སྤེལ། །དེ་ནི་རབ་སྤེལ་རྒྱན་ཡིན་ཏེ། །ཕན་ཚུན་ལྟོས་པའི་རབ་སྤེལ་དང༌། །སྟོབས་མཚུངས་རབ་སྤེལ་རྒྱན་དང་གཉིས། །༈ རྩོམ་མཁན་རང་གི་བསམ་དོན་ལྟར། །སྙན་ངག་རྩོམ་པའི་དགོས་དོན་དེ། །གསལ་བར་མཚོན་པ་དགོངས་རྒྱན་ཡིན། །དེ་ཡི་ཆོས་བཞི་རྒྱས་བཤད་ན། །དངོས་པོ་ཡི་ནི་ཚིག་རྣམས་ཀུན། །ཕན་ཚུན་ཕན་པར་བྱེད་པ་ཉིད། །དོན་དང་བྲལ་བའི་ཁྱད་པར་རྣམས། །མ་བྱས་གནས་སུ་བསྔགས་པ་དང༌། །བརྗོད་རིམ་སྟོབས་ལས་དངོས་པོ་ནི། །ཟབ་མོ་དག་ཀྱང་གསལ་པ་སྟེ། །དེཀུན་དགོངས་པའི་དབང་གྱུར་ཕྱིར། །དེ་དག་དགོངས་པ་ཅན་ཡིན་ནོ། །དེ་ལྟར་ལེའུ་བར་བ་ཡི། །དོན་རྒྱན་སོ་ལྔའི་མཚན་ཉིད་དང༌། །ནང་ཚན་དཔེར་བརྗོད་དངོས་བསྟན་གྲངས། །དྲིལ་བས་ཉིས་བརྒྱ་རྩ་གསུམ་ཡོད། །དེ་ཉིད་རྨང་གཞིར་བྱས་པའི་སྟེང༌། །ད་དུང་རྒྱ་བོད་མཁས་པ་ཚོའི། །མཁྱེན་རྩལ་མུ་མཐའ་མེད་པ་ལས། །བྱུང་བའི་སྙན་ཚིག་རྣམས་ལའང་གཟིགས། །སྙན་ཚིག་མཁས་པའི་སྙིང་གི་ནོར། །བློ་གསལ་མགྲིན་པའི་མཛེས་རྒྱན་གཅིག །མུཀྟིཀ་ཡི་ཕྲེང་བ་ལས། །ལེའུ་གཉིས་པའི་སྡོམ་ཚིག་གོ།

        ༈ སྒྲ་རྒྱན་གབ་ཚིག་སྐྱོན་སེལ་རྣམས། །བསྟན་ཕྱིར་ལེའུ་ཐ་མ་གསུངས། །༈ སྒྲ་དོན་གཉིས་ལས་གཙོ་བོ་སྒྲའི། །ཉམས་ལ་བརྟེན་ནས་བརྗོད་དོན་དག །གསལ་ཞིང་རྗོད་ཚིག་སྙན་པ་ཡི། །ཚིག་སྦྱོར་དེ་ནི་སྒྲ་རྒྱན་ཡིན། །དེ་ལ་ཟུང་ལྡན་རྣམ་བཞག་དང༌། །བྱ་དཀའི་ཁྱད་པར་གཞན་བརྗོད་པ། །དབྱངས་སོགས་ངེས་པའི་བྱ་དཀའ་གསུམ། །༈ བར་མ་ཆོད་དང་བར་ཆོད་དག །ཡི་གེ་ཚོགས་པ་བསྐོར་བ་ནི། །ཟུང་ལྡན་རྒྱན་ཏེ་དབྱེ་བའི་སྒོ། །བྱ་སླའི་རྐང་བ་དང་པོ་ལ། །ཡོད་པའི་ཟུང་ལྡན་བྱ་དཀའ་པ། །གནས་གཞན་ཡོད་པའི་ཟུང་ལྡན་དང༌། །ཀུན་ཏུ་ཟུང་ལྡན་བསྲེས་པ་དང༌། །ཟློག་པའི་ཟུང་ལྡན་དང་རྣམ་དྲུག །༈ བྱ་སླ་རྐང་པ་དང་པོ་ལ། །ཡོད་པའི་ཟུང་ལྡན་ནང་བསྲེས་གྲངས། །བར་མ་ཆོད་པའི་ཟུང་ལྡན་དང༌། །བར་དུ་ཆོད་པའི་ཟུང་ལྡན་དང༌། །ཆོད་ཅིང་མ་ཆོད་ཟུང་ལྡན་གསུམ། །༈ བར་མ་ཆོད་པའི་ཟུང་ལྡན་ལ། །རྐང་པ་གཅིག་གཉིས་གསུམ་བཞི་རུ། །རེ་རེ་གཉིས་གཉིས་གསུམ་གསུམ་བཞིར། །དབྱེ་བས་རྣམ་གྲངས་བཅོ་ལྔ་ཡོད། །༈ བར་དུ་ཆོད་པའི་ཟུང་ལྡན་ལ། །གཉིས་རེ་ཡོད་པའི་དབྱེ་བ་དྲུག །གསུམ་རེ་ཡོད་པའི་དབྱེ་བ་གསུམ། །བཞི་ཡོད་གཅིག་སྟེ་བཅུ་བཅུ་ཡི་ཐོག །ཆ་གཉིས་ཡོད་པའི་དབྱེ་བ་གསུམ། །བསྣན་པས་དབྱེ་ངོ་བཅུ་གསུམ་ཡོད། །༈ ཆོད་ཅིང་མ་ཆོད་ཟུང་ལྡན་ལ། །སྔ་མ་གཉིས་འདྲ་ཕྱི་མ་གཉིས། །ཐོག་མཐའ་གཉིས་འདྲ་བར་བ་གཉིས། །རྐང་པ་བཞི་ཡི་ཐ་མ་ལ། །ཡོད་པའི་ཟུང་ལྡན་རྒྱན་དང་གསུམ། །༈ ཚིགས་སུ་བཅད་པའི་རྐང་བ་ཡི། །ཐོག་མར་ཁོ་ནར་མ་ཡིན་པར། །གནས་གཞན་ལ་ཡང་ཡོད་པ་དེ། །བྱ་དཀའི་གནས་གཞན་ལ་ཡོད་པའི། །ཟུང་ལྡན་རྒྱན་ཏེ་དབྱེ་བའི་གྲངས། །བཞི་ཀའི་དབུས་ན་ཡོད་པ་དང༌། །མཐར་ཡོད་བར་མཐའ་གཉིས་ཀ་དང༌། །ཐོག་མ་གཉིས་དང་ཐ་མ་གཉིས། །གནས་གསུམ་ལ་ཡོད་དྲུག་པོ་ཉིད། །བར་ཆོད་ཆོད་ཅིང་མ་ཆོད་པ། །གཉིས་ཏེ་སྦྱར་བས་བཅུ་གཉིས་འགྱུར། །༈ ཚིགས་རྐང་སྔ་མའི་མཐའ་མ་དང་།། ཕྱི་མའི་ཐོག་མ་སྒྲ་མཚུངས་སྦྱོར།། མཐའ་ཐོག་སྦྱོར་བའི་ཟུང་ལྡན་ཡིན།། ༈དོན་གྱི་གོ་བ་ཐ་དད་ཀྱི། །རྐང་པ་འགའ་འམ་མཐའ་དག་ནི། །རྗོད་བྱེད་གཟུགས་མཚུངས་ཉིད་སྦྱོར་བ། །དེ་ནི་ཀུན་ཏུ་ཟུང་ལྡན་ཟེར། །རྐང་པ་བཟླས་དང་ཚིགས་བཅད་བཟླས། །ཟུང་ལྡན་ཆེན་པོའི་རྒྱན་དང་གསུམ། །༈ རྐང་པ་ལན་གཅིག་བཟླས་པ་དྲུག །ལན་གཉིས་བཟླས་པའི་དབྱེ་བ་གསུམ། །ལན་གསུམ་བཟླས་པ་གཅིག་གི་ཐོག །ཚིག་བཅད་བཟླས་དང་ཟུང་ལྡན་ཆེ། །རེ་རེ་བསྣན་པས་བཅོ་ལྔ་འོ། །༈ ཚིགས་བཅད་གཅིག་གི་ནང་ཚན་དུ། །ཟུང་ལྡན་སྣ་ཚོགས་ཕན་ཚུན་དུ། །བསྲེས་པའི་སྒྲ་ཡི་རྒྱན་ཞིག་ལ། །བསྲེས་པའི་ཟུང་ལྡན་རྒྱན་ཞེས་ཟེར། །༈ ཚིགས་བཅད་ལུགས་འབྱུང་ལས་བཟློག་ནས།། ཀློག་རུང་བཟློག་པའི་ཟུང་ལྡན་ཡིན།། རྐང་བཟློག་ཚིགས་བཅད་ཕྱེད་བཟློག་དང་།། རངས་པོ་བཟློག་པའི་ཟུང་ལྡན་གསུམ།། ༈བྱ་དཀའི་ཁྱད་པར་གཞན་གནས་པར། །བ་ལང་གཅིན་གྱི་བྱ་དཀའ་དང༌། །འཁོར་པའི་བྱ་དཀའ་རྣམ་པ་གཉིས། །༈ ཚིགས་བཅད་གོང་འོག་ཕྱེད་སྔ་ཕྱིར། །བ་ལང་གཅིན་ལྟར་འལོག་པོ་རུ། །ཀློག་ཏུ་རུང་བའི་ཚིག་སྦྱོར་དེ། །བ་ལང་གཅིན་གྱི་བྱ་དཀའ་ཡིན། །༈ ཚིགས་བཅད་གོང་འོག་ཕྱེད་འཁོར་ན། །ཕྱེད་དུ་འཁོར་བའི་བྱ་དཀའི་རྒྱན། །༈ ཚིགས་སུ་བཅད་པའི་སྟེང་འོག་དང༌། །གྲ་བཞི་མཐའ་དབུས་ཕྱོགས་ཀུན་ནས། །ལུགས་འབྱུང་ལུགས་ལྡོག་ཅི་རིགས་སུ། །སྒྲ་མཚུངས་པ་འམ་ཀློག་རུང་བ། །དེ་ནི་ཀུན་བཟང་འཁོར་ལོའི་རྒྱན། །ཟླུམ་པོ་དང་ནི་གྲུ་བཞི་གཉིས། །གཞན་ཡང་རིན་སྤུངས་དཔལ་སྒང་དང༌། །རྒྱལ་དབང་གཉིས་པ་ལྔ་པ་དང༌། །བོད་མཁས་པཎ་ཆེན་བདུན་པ་དང༌། །དེང་གི་ཚེ་ཏན་ཞབས་དྲུང་སོགས། །མཁས་པ་སོ་སོའི་རྣམ་དཔྱོད་ལས། །བཟོ་དབྱིབས་སྡེབ་སྒྲིགས་སྣ་ཚོགས་ཡོད། །དེ་དག་སོ་སོའི་གསུང་ལ་གཟིགས། །༈ དབྱངས་དང་གནས་དང་ཡི་གེ་རྣམས། །ངེས་པར་གང་དུ་བྱ་དཀའ་བ། །བཞི་ལ་སོགས་ལ་རབ་བསྟན་འདི། །དབྱངས་སོགས་ངེས་པའི་བྱ་དཀའི་རྒྱན། །དེ་ལ་དབྱངས་དང་གནས་དང་ནི། །གསལ་བྱེད་ངེས་པ་རྣམ་གསུམ་སྟེ། །དེ་དག་ནང་གསེས་རེ་རེ་ལའང༌། །རྐང་པ་བཟི་ལ་བཞི་དང་གསུམ། །གཉིས་དང་གཅིག་ཏུ་ངེས་པ་སྟེ། །བསྡོམས་པས་རྣམ་གྲངས་བཅུ་གཉིས་སོ། །

        ༈ གབ་བྱའི་བརྗོད་དོན་གང་ཡིན་དེ། །གབ་བྱེད་ཚིག་གི་སྦྱོར་བ་ཡིས། །མངོན་པར་སྒྲིབ་ཏེ་སྐབས་མིན་གྱིས། །གོ་མི་ནུས་པ་གབ་ཚིག་རྒྱན། །ཀུན་ཚོགས་སླུ་བྱེད་རིམ་པ་བྲལ། །རབ་བཅོམ་མཐུན་གཟུགས་རྩུབ་མོ་གྲངས། །རབ་བཏགས་མིང་འདུས་བསྒྲིབས་མཐུན་སྒྲ། །རྨོངས་དང་ཡོངས་འཕྲོག་གཅིག་གཉིས་སྒྲིབ། །ཡོངས་འདྲེས་རྒྱན་ཏེ་བཅུ་དྲུག་ཡོད། །༈ཚིག་མཚམས་སྦྱར་བས་དོན་སྦས་པ། །ཀུན་ཏུ་ཚོགས་པའི་གབ་ཚིག་ཡིན། །༈ གབ་བྱེད་ཡོངས་གྲགས་སྒྲས་ཕྱེར་ནས། །གབ་བྱ་སླུ་བ་སླུ་བྱེད་རྒྱན། །༈ ཚིག་སྦྱོར་ཤིན་ཏུ་འཁྲུགས་པ་ཡིས། །དོན་ལ་རྨོངས་བྱེད་རིམ་པ་བྲལ། །༈ སྒྲ་དོན་གང་རུང་སྦྱོར་བས་དོན། །རྟོགས་དཀའི་ཚིག་ཕྲེང་རབ་བཅོམ་རྒྱན། །༈ བཏགས་པའི་དོན་བཀོད་ཚིག་སྡེབ་ཀྱིས། །བརྗོད་དོན་སྒྲུབ་པ་མཐུན་པའི་གཟུགས། །༈ མཚན་ཉིད་ཡོད་ཙམ་ངེས་ཚིག་དང༌། །ལྡན་པའི་ཚིག་རྒྱན་རྩུབ་མོ་འོ། །༈ གྲངས་ཀྱི་མིང་གིས་གབ་བྱ་དེ། །རྨོངས་བྱེད་གྲངས་ཀྱི་གབ་ཚིག་ཡིན། །༈ བརྗོད་དོན་གཞན་དུ་སྒྲོ་བཏགས་ཏེ། །སྒྲིབ་པ་རབ་བཏགས་གབ་ཚིག་ཡིན། །༈ དོན་མང་ལ་འཇུག་མིང་གཅིག་ཉིད། །གབ་བྱར་བཏགས་པ་འདུས་པའི་རྒྱན། །༈ ཚིག་གི་ཆོས་མཚུངས་ལ་རིག་པས། །དོན་གཞན་སྒྲིབ་པ་བསྒྲིབས་པས་སོ། །༈ དངོས་མིང་མི་གསལ་རྣམ་གྲངས་སྒྲ། །བཀོད་པ་དོན་སྒྲིབ་མཐུན་པའི་སྒྲ། །༈ བརྗོད་དོན་དངོས་སུ་བསྟན་ན་ཡང༌། །ཚིག་གིས་རྨོངས་བྱེད་རྨོངས་པ་ཡིན། །༈ ཚིག་སྦྱོར་སྔ་མའི་བརྗོད་དོན་རྣམས། །ཕྱི་མས་འཕྲོག་པ་ཡོངས་འཕྲོག་ཡིན། །༈ རྟེན་སྦས་བརྟེན་པ་གཅིག་པུ་གསལ། །ཚིག་སྦྱོར་དེ་ནི་གཅིག་བསྒྲིབས་སོ། །༈ རྟེན་དང་བརྟེན་པ་གཉིས་ཀ་སྦས། །ཚིག་སྦྱོར་དེ་ནི་གཉིས་ཀ་བསྒྲིབས། །༈ གབ་ཚིག་མཚན་ཉིད་སྣ་ཚོགས་པ། །འདྲེས་པ་དེ་ནི་ཡོངས་འདྲེས་རྒྱན། །

        ༈ སྙན་ངག་ཕུན་སུམ་ཚོགས་པའི་གཞི། །ལུས་སྲོག་རྒྱན་གྱི་ཉམས་འགྱུར་ལས། །ལྡོག་པའི་སྒྲ་དོན་སྐྱོན་ཅན་ནི། །སྙན་ངག་མཁན་པོས་སྐྱོན་དུ་བགྲངས། །དོན་ཉམས་དོན་འགལ་དོན་གཅིག་པ། །ཐེ་ཚོམ་ཅན་དང་རིམ་པ་ཉམས། །སྒྲ་ཉམས་གཅོད་མཚམས་ཉམས་པ་དང༌། །སྡེབ་སྦྱོར་ཉམས་དང་མཚམས་སྦྱོར་བྲལ། །ཡུན་དུས་སྒྱུ་རྩལ་འཇིག་རྟེན་དང༌། །ལུང་རིགས་དག་དང་འགལ་བ་སྟེ། །བཅུ་པོ་འདི་དག་སྙན་ངག་སྐྱོན། །ཚིག་ཕྲེང་མང་པོ་ཚོགས་ན་ཡང༌། །དོན་གྱིས་སྟོང་པ་དོན་ཉམས་སྐྱོན། །༈ བརྗོད་དོན་སྔ་མས་ཕྱི་མ་འཇོམས། །འགལ་བའི་དོན་ཅན་ཉིད་ཀྱི་སྐྱོན། །༈ དགོས་མེད་དོན་གཅིག་ཡང་ཡང་བཟླས། །དོན་གཅིག་པ་ཡི་སྐྱོན་ཉིད་དོ། །༈ བརྗོད་དོན་ངེས་བཟུང་བྲལ་བ་ལས། །སོམ་ཉི་སྐྱེད་བྱེད་ཐེ་ཚོམ་སྐྱོན། །མདོར་བསྟན་རྗེས་བཤད་གོ་རིམ་དག་ འཁྱམས་ན་རིམ་པ་ཉམས་པའི་སྐྱོན། །༈ སྒྲ་དོན་མཚོན་ཚུལ་མ་འབྲེལ་བ། །སྒྲ་ཉམས་པ་ཡི་སྐྱོན་ཡིན་ནོ། །༈ ཚིག་རྐང་གཅོད་མཚམས་ངལ་གསོ་བྲལ། །གཅོད་མཚམས་ཉམས་པའི་སྐྱོན་དུ་བགྲང༌། །༈ ཡི་གེ་ལྷག་ཆད་ལྕི་ཡང་དག། ཇི་བཞིན་མི་གནས་སྡེབ་སྦྱོར་ཉམས། །༈ ཚིག་དོན་སྔ་ཕྱི་མཚམས་སྦྱོར་བྲལ། །དེ་ནི་མཚམས་སྦྱོར་བྲལ་བའི་སྐྱོན། །༈ཡུལ་སོགས་འགལ་བ་ཞེས་པ་ནི། །ཡུལ་ནི་རི་ནགས་ཡུལ་འཁོར་དང༌། །དུས་ནི་ཉིན་མཚན་དབྱར་དགུན་སོགས། །སྒྱུ་རྩལ་གླུ་དང་གར་སོགས་མཚོན། །འཇིག་རྟེན་ཞེས་པ་སྣོད་དང་བཅུད། །རིགས་པ་གཏན་ཚིགས་ཉིད་ལ་སྟེ། །ལུང་ནི་ཕྱི་ནང་གཞུང་ལུགས་སོགས། །དྲུག་པོ་དག་དང་འགལ་བ་ནི། །ཡུལ་སོགས་ཉམས་པའི་སྐྱོན་ཞེས་བགྲངས། །༈ སྦྱོར་ཚུལ་མཁས་པའི་ཁྱད་པ་ལས། །དེ་དག་ལས་ལྡོག་དམིགས་བསལ་ཉིད། །དེ་ལྟར་སྐྱོན་ཡོན་ཁྱད་པར་དག། ཤེས་ནས་སྐྱོན་བྲལ་ཚངས་པའི་དབྱངས། །དཔལ་ལྡན་དྲན་དབང་མགུ་བའི་སྐྱེས། །བློ་གསལ་མགྲིན་པའི་རྒྱན་དུ་སྟོན། །སྙན་ཚིག་མཁས་པའི་སྙིང་གི་ནོར། །བློ་གསལ་མགྲིན་པ་མཛེས་རྒྱན་གཅིག །མུཀྟིཀ་ཡི་ཕྲེང་བ་ལས། །ལེའུ་གསུམ་པའི་སྡོམ་ཚིག་གོ །

        ༈ དུས་རབས་ཉི་ཤུའི་འདུ་འཛིན་སྤྲིན་བཞིན་གཡོ། །སྔོན་བྱོན་མཁས་པའི་སྙན་གཞུང་མཚོ་ལྟར་ཟབ། །དེ་སླད་ཕལ་ཆེར་རིག་པའི་ཁྱད་ནོར་གྱི། །གྲོང་ཁྱེར་འདི་ལ་ཕྱོགས་སླེབས་མགྲོན་པོ་བཞིན། །ཕུལ་བྱུང་མཁས་རྒུ་རལ་པའི་ཅོན་པན་ལ། །དབང་བསྒྱུར་སྙན་ཚིག་གསེར་གྱི་འཁོར་ལོའི་འཕྲུལ། །འཆད་རྩོད་རྩོམ་པས་ཁ་ལོ་བསྒྱུར་བ་ལས། །རྫོགས་ལྡན་གསར་པས་འགྲོ་འདི་སླར་ཡང་འཚོ། །གངས་ཅན་གཙུག་ལག་རིག་པའི་དབྱིག་འཛིན་མ། །དུས་ཀྱི་ཀློང་དུ་བྱིང་པར་མ་བཟོད་དེ། །ལྷག་བསམ་འཇུག་པ་བཅུ་པའི་དཔུང་ཤུགས་ཀྱིས། །གྱེན་དུ་འདེགས་པའི་ངལ་བ་འདི་བྱས་དགེས། །འཆད་པ་ཚིག་དོན་མ་འཁྱོགས་ཚངས་པའི་ཐིག་ རྩོད་པ་མི་ཤིགས་རྡོ་རྗེའི་ཐོག་གི་འདའ། །རྩོམ་པ་སྙན་འཇེབས་དྲི་ཟའི་ན་ཆུང་གླུ། །རྣམ་གསུམ་མཁས་པས་འཛམ་གླིང་མཛེས་གྱུར་ཅིག །

        ཞེས་སྙན་ངག་མེ་ལོང་གི་སྡོམ་ཚིག་མཁས་པའི་སྙིང་ནོར་བློ་གསལ་མགྲིན་པའི་རྒྱན་གཅིག་མུཀྟིཀའི་ཕྲེང་བ་ཞེས་བྱ་བ་འདི་ནི་གངས་ཅན་བོད་ཀྱི་མདོ་ཁམས་ར་བ་སྒང་གི་ཉེ་འགྲམ་ཏྲེ་ཤོད་ཡུལ་སྐྱེས་སྤྲང་འཁྱམས་གཙུག་ལག་སྨྲ་བ་བེ་རི་འཇིགས་མེད་དབང་རྒྱལ་བས་རབ་བྱུང་བཅུ་བདུན་པའི་ཉག་མ་གསུམ་པ་དཀར་པོ་ཞེས་པ་ས་སྦྲུལ་ ༡༩༨༩ ལོར་བརྩམས་ཤིང།་ སླར་ཡང་ ༡༩༩༥  ན་ཚོད་ལྡན་ལོར་ཞུས་དག་གིས་སྣོན་འཕྲི་ཅུང་ཟད་བྱས་ཏེ་ བློ་གླིང་གཙུག་ལག་སློབ་གྲྭར་སྙན་ངག་མེ་ལོང་མའི་འཛུབ་འཁྲིད་བྱེད་སྐབས་ཆོས་སྡེ་ཆེན་པོ་དཔལ་ལྡན་འབྲས་དཀར་སྤུངས་པའི་གླིང་གི་རང་ཤག་རྫ་མའྀ་སྤྱིལ་བུ་ལྔ་རིག་ནོར་བུའི་ལྡིང་ཁང་དུ་སྦྱར་བ་དགེ་ལེགས་འཕེལ། །