འཛིན་གྲྭའི་ཀྲུའུ་རིན་གྱིས་དོ་སྣང་བྱེད་དགོས་པའི་སྐོར།
འཛིན་གྲྭའི་ཀྲུའུ་རིན་གྱིས་ཇི་ལྟར་བགྱིས་ན་ད་གཟོད་སློབ་མའི་ཕྱོགས་ཡོངས་ཀྱི་སློབ་གསོའི་སྤུས་ཚད་མཐོར་འདེགས་བྱུང་བ་དང༌། འཛིན་གྲྭའི་བདག་གཉེར་གྱི་བྱ་བའི་ཐད་གྲུབ་འབྲས་ངེས་ཅན་ཞིག་འཐོབ་ཐུབ་ཅེ་ན། བདག་གིས་གཤམ་ནས་འདིའི་སྐོར་ཅུང་ཙམ་གླེང་བར་བྱ།
དགེ་སློབ་བར་ལ་བརྩེ་སེམས་ཡོད་དགོས། དགེ་སློབ་བར་གྱི་བརྩེ་སེམས་ནི་མ་བུ་བར་གྱི་བརྩེ་སེམས་དང་འདྲ་བར་ཕན་ཚུན་ལ་ཡིད་ཆེས་དང་རོགས་རམ་བྱེད་དགོས་པ་མ་ཟད། དགེ་རྒན་གྱི་སློབ་མའི་ཡོངས་ལ་བརྩི་འཇོག་དང་ཤེས་རྟོགས། འདྲ་མཉམ་གྱི་ལྟ་ཚུལ་བཅངས་ཏེ་ཁོ་ཚོ་དང་མཉམ་དུ་རྩེད་མོ་སོགས་ཀྱི་ལས་ལ་ཞུགས་ནས་ཕན་ཚུན་བགྲོ་གླེང་བྱས་ཚེ། སློབ་མའི་དགེ་རྒན་གྱིས་བཤད་པའི་སྐད་ཆ་སོགས་ཡིད་ལ་འཛིན་ཐུབ་པ་དང། སློབ་མའི་སེམས་ཁམས་ལའང་འགྱུར་ལྡོག་བྱུང་ནས་གོམས་གཤིས་མི་ལེགས་པ་དག་རང་ཤུགས་ཀྱིས་འགྱུར་ངེས་ལ། ད་དུང་དགེ་རྒན་ནི་རང་གི་བློས་ཐུབ་ཀྱི་གྲོགས་པོ་བཟང་བོ་དང་དགེ་རྒན་ཡག་པོ་ཞིག་ཏུ་བརྩིས་ནས་ཅི་གསུང་དང་དུ་ལེན་པ་མ་ཟད་ཁོ་ཚོའི་སློབ་སྦྱོང་གི་དགའ་སྣང་ཡང་ཇེ་ལེགས་སུ་འགྲོ་ཐུབ་པ།
འཛིན་གྲྭའི་ལས་བྱེད་པ་འདེམ་བསྐོ་བྱེད་པར་མཁས་དགོས། འཛིན་གྲྭའི་ལས་བྱེད་པ་ནི་འཛིན་གྲྭའི་ཀྲུའུ་རིན་གྱིས་འཛིན་གྲྭའི་བྱ་བ་ལེགས་པར་བསྒྲུབ་པའི་ཟམ་པ་ལྟ་བུ་ཞིག་ཡིན། ཁོ་ཚོ་ནི་དགེ་རྒནདང་སློབ་མ་བར་གྱི་འབྲེལ་འདྲིས་དུས་དང་རྣམ་པ་ཀུན་ཏུ་དམ་པོར་སྦྲེལ་བར་བྱེད་མཁན་ཡིན་པས། འཛིན་གྲྭའི་ལས་བྱེད་པ་འདེམ་བསྐོ་བྱེད་སྐབས་སུ་འཛིན་གྲྭའི་ཀྲུའུ་རིན་གྱིས་སློབ་མ་ཡོངས་དང་མཉམ་དུ་ཀུན་སྤྱོད་བཟང་བ། འཁུར་སེམས་ཆེ་བ། སློབ་སྦྱོང་ལ་ནན་ཏན། སློབ་འབྲས་ལེགས་པ། དགེ་བཀུར་སློབ་བྱམས་དང་སློབ་གྲྭའི་ཕྱི་ནང་ཀུན་ཏུ་རང་རྟོགས་ཀྱིས་སློབ་གྲྭ་དང་འཛིན་གྲྭའི་སྒྲིག་ལམ་སྣ་ཚོགས་བརྩི་སྲུང་བྱེད་པ་ཞིག་བསྐོས་རྗེས། ལས་བྱེད་པ་རེ་རེར་ལས་འགན་དང་འགན་ཁུར་དམིགས་ཚད་གཏན་འཁེལ་བྱེད་དགོས། ལས་འགན་བསྒྲུབ་རྒྱུའི་གོ་རིམ་ཁྲོད་དུའང་ཁོ་ཚོར་ཡིད་ཆེས་དང་རྒྱབ་སྐྱོར། གཟེངས་བསྟོད་དང་སྐུལ་སློང་བྱས་ན། འཛིན་གྲྭའི་སློབ་སྲོལ་དང་སྒྲིག་ལམ། གཙང་སྦྲ། སྤྱི་རྫས་བདག་གཉེར། སློབ་གྲོགས་བར་གྱི་འགྲིག་མཐུན་བཅས་ཕྱོགས་གང་ཐད་ནས་ཡར་རྒྱས་འབྱུང་བར་གདོན་མི་ཟ།
བསླབ་ཚན་དགེ་རྒན་དང་འབྲེལ་བ་དམ་པོ་འཛུགས་དགོས། འཛིན་གྲྭའི་ཀྲུའུ་རིན་གྱིས་བསླབ་ཚན་དགེ་རྒན་གྱི་གཞོགས་འདེགས་དང་རོགས་སྐྱོར་ལ་བརྩོན་ལེན་བྱས་ཏེ་དུས་རྒྱུན་ཏུ་བསླབ་ཚན་སོ་སོའི་དགེ་རྒན་ལ་འབྲེལ་གཏུག་དང་འབྲེལ་བ་དམ་པོ་བཅོས་ནས་རང་གི་སློབ་མར་རྒྱུས་ལོན་བྱེད་རྒྱུ་ལས་གཞན་ཁོ་ཚོ་དང་ཆབས་ཅིག་ཕྱོགས་གང་ཐད་ནས་རོགས་རམ་དང་སློབ་གསོ་བཏང་སྟེ་སློབ་མའི་སློབ་སྦྱོང་གི་དམིགས་ཡུལ་གསལ་བོ་ཡོང་བ་དང། སློབ་སྲོལ་ཇེ་ཡག་ཏུ་གཏོང་བ། སློབ་སྦྱོང་གི་རྣམ་འགྱུར་དྲང་ཞིང། སློབ་འབྲས་མཐོར་འདེགས་ཡོང་བར་བྱེད་རྒྱུ་ནི་འཛིན་གྲྭའི་ཀྲུའུ་རིན་གྱི་བྱ་བའི་བྱ་ཐབས་གཙོ་བོ་ཞིག་ཡིན།
ཁྱིམ་བདག་དང་འབྲེལ་འདྲེས་བྱ་དགོས། འཛིན་གྲྭའི་ཀྲུའུ་རིན་གྱིས་རྒྱུན་ཏུ་འབྲེལ་གཏུག་བྱེད་ཐབས་སྣ་ཚོགས་ལ་བརྟེན་ནས་སློབ་མའི་ཁྱིམ་བདག་དང་འབྲེལ་འདྲིས་བྱས་ཏེ། ཁྱིམ་ཚང་གི་གནས་ཚུལ་དང་ཁྱིམ་བདག་གི་རིག་གནས་ཆུ་ཚད། འཚོ་བའི་ཆ་རྐྱེན། བསམ་བློའི་གོ་རྟོགས་སོགས་ལ་རྒྱུས་ལོན་བྱས་ནས་སློབ་མའི་སློབ་སྦྱོང་གི་གྲུབ་འབྲས་དང། སློབ་གྲྭའི་ནང་གི་འགྲོ་འདུག་སྤྱོད་སྟངས་སོགས་ཁྱིམ་བདག་ལ་ངོ་སྤྲད་དེ་མི་འགྲིག་ས་དང་མི་ལེགས་ས་ཁྱིམ་བདག་ལའང་ཁ་ཏ་སློབ་གསོའམ་འཛིན་གྲྭའི་བྱ་བར་རྒྱབ་སྐྱོར་བྱེད་དུ་འཇུག་དགོས། ལྷག་པར་ད་ལྟའི་སློབ་མ་མང་ཆེ་ཤས་ནི་བུ་ཕྲུག་གཅིག་རྐྱང་ཡིན་པས་ཅུང་ཙམ་གཅེས་ལང་དུ་ཤོར་ཡོད་རྐྱེན། དགེ་རྒན་གྱི་ཁ་ལ་མི་ཉན་པ་དང་བསམ་བློའི་ཀུན་སྤྱོད་བཙོག་པ། སློབ་སྦྱོང་བྱེད་རྒྱུའི་སྤྲོ་སྣང་མེད་པས་ཕ་མ་ཡིས་ཀྱང་ཆུང་དུས་ནས་རང་ཚུགས་ཀྱི་སྙིང་སྟོབས་དང་དཀའ་སྤྱད་སྙིང་རུས་བསྐྱེད་དགོས་པའི་སློབ་གསོ་གང་མང་བཏང་སྟེ་དགེ་རྒན་དང་མཉམ་འབྲེལ་གྱིས་སློབ་མར་ཁོར་ཡུག་ལེགས་པོ་ཞིག་བསྐྲུན་ཏེ་ཆུང་དུས་ནས་བསམ་བློའི་སྤུས་ཚད་བཟང་པོ་ཞིག་ཆགས་སུ་འཇུག་པར་སློབ་གསོ་གཏོང་རྒྱུ་གལ་ཆེ།
རྗེས་ལུས་སློབ་མར་བཅངས་པའི་ལྟ་ཚུལ་འགྱུར་དགོས། དུས་རྒྱུན་དུ་དགེ་རྒན་ལ་ལས་སློབ་མ་བཟང་པོར་དགའ་མགུ་བྱེད་པ་དང་རྗེས་ལུས་སློབ་མར་མི་རངས་པའི་རྣམ་འགྱུར་སྟོན་པས། འཛིན་གྲྭའི་ཀྲུའུ་རིན་གྱིས་འཛིན་གྲྭའི་སྒྲིག་ལམ་ལག་བསྟར་བྱེད་སྐབས་ངེས་པར་དུ་དྲང
