བོད་ཀྱི་སྒྲ་རིག་པའི་གཞུང་ལས་བྱུང་བའི་བརྒྱད་ཚན་འགའི་དོན་རགས་ཙམ་བཤད་པ།
བོད་གངས་ཅན་པའི་སྐད་དང་སྒྲའི་རྣམ་གཞག་གསལ་བར་སྟོན་པའི་བསྟན་བཅོས་རྣམས་སུ་བརྒྱད་ཚན་དུ་མ་ཞིག་བྱུང་བ་ནི། ཡི་གེའི་སྐྱེ་གནས་བརྒྱད་དང་། ཡི་གེ་འཇུག་པའི་གནས་བརྒྱད་དང་། རྣམ་དབྱེ་བརྒྱད་དང་། སྔོན་རྗེས་ཀྱི་འཇུག་ཚུལ་བྱེད་པ་བརྒྱད་བཅས་ཡིན་ཞིང་། དེ་དག་ནི་བོད་ཀྱི་སྒྲ་རིག་པའི་གཞུང་གི་སྡོམ་དང་སྙིང་བོར་སྨིན་པས། འདིར་རང་དང་སྐལ་མཉམ་རྣམས་ལ་ཕན་དུ་རེ་ནས་གོ་སླ་བའི་ངག་གིས་ཅུང་ཟད་སྤྲོ་བ་ལ་ཞུགས་པར་འདོད་དོ།།
༡.ཡི་གེའི་སྐྱེ་གནས་བརྒྱད།
དཔང་ལོ་ཙྰ་བ་བློ་གྲོས་བརྟན་པས། བརྗོད་འདོད་དབང་གིས་རླུང་གཡོས་ཤིང་།། དེ་ཡིས་གནས་དང་བྱེད་པ་དང་།། རྩོལ་བ་བསྐྱེད་དེ་དབུགས་དབྱུང་དང་།། ལྷན་ཅིག་ཡི་གེའི་གདངས་རྣམས་སྐྱེ།། ཞེས་གསུངས་པ་ལྟར་རྣམ་པར་རྟོག་པའི་ཀུན་སློང་དང་། གནས་དང་། བྱེད་པ་དང་། རླུང་བཞིན་ཡི་གེའི་གདངས་རྣམས་བསྐྱེད་པའི་རྒྱུ་བཞི་ཡིན་ཞིང་། དེ་དག་རིམ་པ་བཞིན་དྲིལ་བུ་འཁྲོལ་མཁན་གྱི་མི་དང་། དྲིལ་བུ་ཁོག་པ་དང་། དྲིལ་བུའི་ལྕེ་དང་། དྲིལ་བུ་སྐྱོད་པའི་ལག་པ་དང་འདྲ་བར་གསུངས་ལ། གནས་ནི་བརྒྱད་དེ། མགྲིན་པ་དང་། སྣ། སྤྱི་བོ། ཁོག་པ། རྐན། ལྕེ། སོ། མཆུ་བཅས་ཡིན་པ་དང་། གནས་དེ་རྣམས་ཀྱང་བསྡུས་ན་མགྲིན་པ། སྣ། སྤྱི་བོ་གསུམ་ནི་དོག་པའི་གནས་དང་། ལྷག་མ་ལྔ་ནི་ཡངས་པའི་གནས་སུ་འདུ་བ་དང་། བྱེད་པ་གཙོ་བོ་ལྕེ་རྐན་གཉིས་གནས་རྣམས་སུ་འཕྲད་པའི་དབང་གིས་ཕྲད་པ་དང་། ཅུང་ཟད་ཕྲད་པ། བཙུམ་པ། ཕྱེ་བ། དོག་པ། ཡངས་པ་དྲུག་ཏུ་འགྱུར་བ་ལས་སྐད་གདངས་ཐ་དད་པ་བྱུང་བ་ནི་ཡི་གེ་ཡིན་ཏེ། དེ་ཡང་ཕན་ཚུན་ལྟོས་འཇོག་གིས་གནས་བྱེད་རྩོལ་བའི་ཁྱད་པར་གསལ་བ་དང་མི་གསལ་བ་གཉིས་སུ་གྲུབ་པས་དབྱངས་གསལ་གྱི་དབྱེ་བ་གཉིས་བྱུང་བ། སྒྲའི་ང་རོ་ཙམ་ལ་དབྱངས་དང་དེ་མཚོན་བྱེད་ཨི་ཨུ་ཨེ་ཨོ་བཞི་སྒྲ་རྩོལ་ཞན་པས་མོར་བཏགས་པ་དང་། གནས་དང་བྱེད་པའི་རྣམ་འགྱུར་གསལ་ཞིང་མིང་ཚིག་བརྗོད་པ་སྟོན་བྱེད་ཀྱི་བྱེད་པ་གཙོ་བོར་གྲུབ་པས་ཀ་སོགས་སུམ་ཅུར་གསལ་བྱེད་དང་སྤྱིར་ཕོ་ཡིག་ཏུ་བཞག་པ་ཡིན། གཞན་དུ་ན་ཁོག་པ་མགྲིན་པ་དང་། སྤྱི་བོ་ལྕེར་འདུས་ཏེ། གནས་ལ་མགྲིན་རྐན་སོ་མཆུ་དང་།། ལྕེ་རྩེའི་སྟེང་དང་སྣ་ལྡན་དྲུག ། ཅེས་གནས་དྲུག་ཏུ་བྱེད་པའང་ཡོད་མོད། མགྲིན་པ་དང་ཁོག་པ་གཉིས་ནི་ཐུན་མོང་གི་གནས་དང་། གཞན་རྣམས་གཙོ་ཆེར་སོ་སོར་ངེས་པ་སྟེ། ཀ་སྡེ་གཙོ་བོ་མགྲིན་པ། ཅ་སྡེ་རྐན། ཏ་སྡེ་སོ། པ་སྡེ་མཆུ་ལས་སྐྱེ་བས་གསལ་བྱེད་སུམ་ཅུར་སྡེ་བ་ཕྱེད་དང་བརྒྱད་དུ་བྱས་པ་ནི་གནས་མཚུངས་ཀྱི་ཡི་གེ་བཞི་རེ་སྡེ་ཚན་གཅིག་ཏུ་བསྡེབས་ཏེ་སྒྲ་རྩོལ་དྲག་པ། བར་མ། ཞན་པ། ཤིན་ཏུ་ཞན་པའི་ཁྱད་པར་ལྟར་ཡི་གེ་སྔ་ཕྱིའི་གོ་རིམ་བསྒྲིགས་པར་མ་ཟད། མགྲིན་པ། རྐན། སོ། མཆུ་ཡིས་རིམ་གྱིས་ནང་ནས་ཕྱི་ལྟར་དང་པོ་ཀ་སྡེ། གཉིས་པ་ཅ་སྡེ། གསུམ་པ་ཏ་སྡེ། བཞི་བ་པ་སྡེར་བྱས་པ་ཡིན་ཏེ། རྟགས་འཇུག་ཏུ། ཕོ་དང་མ་ནིང་མོ་དང་ནི།། ཤིན་ཏུ་མོ་དང་བཞི་བཞི་རུ།། སྡེ་བ་བཞི་བ་ཡན་ཆད་དབྱེ།། ཞེས་གསུངས་པས་སོ།། གསལ་བྱེད་ཀྱི་སྡེ་བ་ཕྱི་མ་རྣམས་གོང་མ་བཞི་ལྟར་སྐྱེ་གནས་དང་སྒྲ་རྩོལ་གྲལ་མི་མཉམ་ན་ཡང་གཙོ་ཆེ་བའི་དབང་དུ་བྱས་ཏེ་སོ་ནས་མགྲིན་པར་མས་རིམ་དུ་སྡེ་བ་བསྒྲིགས་ཏེ། ལྔ་བ་ཙ་སྡེ། དྲུག་པ་ཞ་སྡེ། བདུན་པ་ར་སྡེ། བརྒྱད་པ་ཧ་ཨ་ཕྱེད་དུ་བྱས་ཏེ་སླར་མགྲིན་པར་བསྡུས་པའོ།། ཙ་ཚ་ཛ་ཟ་ས་ལྔ་ནི་ལྕེ་རྩེ་དང་སོ་ལས་བྱུང་ཞིང་། ཡ་ཞ་ཤ་གསུམ་ལྕེ་དཀྱིལ་དང་རྐན། འ་ཧ་ཨ་གསུམ་མགྲིན་པ། ཝ་ཡིག་མཆུ། ར་ཡིག་སྤྱི་བོ། ལ་ཡིག་སོ་ལས་འབྱིན་ཅིང་། སྒོས་སུ་ང་ཉ་ན་མ་ཡ་བཞི་བོ་རང་རང་གི་སྐྱེ་གནས་མ་ཟད་སྣ་སྒྲ་དང་བཅས་པར་འབྱིན་ནོ།། བྱེད་པ་ནི། མགྲིན་སྐྱེ་རྣམས་གཙོ་བོ་ལྕེ་རྩེའི་བྱེད་པ་དང་། རྐན་སྐྱེ་རྣམས་ལྕེའི་རྩེར་ཉེ་བའི་བྱེད་པ། སོ་སྐྱེ་རྣམས་ལྕེ་རྩེའི་བྱེད་པ། མཆུ་བྱུང་རྣམས་མཆུ་རང་གི་བྱེད་པ། ར་ཡིག་གི་བྱེད་པ་ཡང་ལྕེ་རྩེར་ཉེ་བ་ཡིན་ཞིང་། དེ་དག་གཙོ་ཆེ་བའ
