༄༅།། སློབ་ཚན་བསྒྱུར་མའི་གནད་དོན་འགའ།
〔ནང་དོན་གནད་བསྡུས།〕འདིར་རྩོམ་པ་པོའི་སློབ་ཁྲིད་ཀྱི་ལག་ལེན་དངོས་ལས་སློབ་ཆུང་སྐད་ཡིག་སློབ་དེབ་ལ་སྒྱུར་རྩོམ་མང་བ་དང་།དོན་སྐྱོན་དང་ཚིག་སྐྱོན་མང་བ་སོགས་ཀྱི་གནད་དོན་འགའ་ལྷག་འདུག་སྙམ་པའི་མྱོང་ཚོར་དངོས་སུ་བརྗོད་པ་དང་འབྲེལ་སླད་དེའི་ཐད་ཀྱི་རེ་བ་ཕྲན་བུ་གླེང་བའོ།
གླེང་གཞི།
བོད་མི་རིགས་ནི་མདོ་དབུས་མཐོ་སྒང་དུ་འཕེལ་ཞིང་རྒྱས་ལ་ལོ་ངོ་སྟོང་ཕྲག་མང་པོའི་ལོ་རྒྱུས་ལྡན་པ་མ་ཟད། འཛམ་གླིང་གི་མི་རིགས་གང་རུང་བསྡུར་ཆོག་པའི་འོད་སྟོང་འཚེར་པའི་རིག་གནས་ལྡན། དེ་ཡང་ཚང་མས་ཤེས་གསལ་ལྟར་རིག་གནས་བཅུའམ་བཅོ་བརྒྱད་དུ་བགྲང་བ་དེར་ལོ་རྒྱུས་དང་རྩོམ་རིགགནམ་རིག་དང་ས་དཔྱད། མཚན་ཉིད་རིག་པ་དང་བཟོ་རིག་པ་སོགས་རིག་ཚན་མང་པོའི་གཞུང་ལུགས་རྒྱ་ཆེ་ཞིང་གཏིང་ཟབ་པས་རྒྱལ་སྤྱིའི་སྟེང་དུ་བོད་རིག་པ་ཞེས་གྲགས་ཏེ། རིགས་སོ་སོའི་མི་དམངས་ཀྱི་བློ་སེམས་དབང་མེད་དུ་འགུགས་བཞིན་མཆིས། དེ་བས་རང་རེའི་ཐུན་མོང་མ་ཡིན་པའི་རིག་གནས་འདི་ཉམས་པ་སླར་གསོ་དང་མ་ཉམས་གོང་འཕེལ་དུ་གཏོང་ཕྱིར་ཏང་དང་རྒྱལ་ཁབ་ཀྱིས་མཐོང་ཆེན་གནང་སྟེ་བོད་ས་གནས་སོ་སོར་བོད་ཡིག་སློབ་ཆུང་བཙུགས་ནས་བོད་རང་གི་རིག་གནས་འཛིན་སྐྱོང་སྤེལ་གསུམ་གྱི་འོས་འགན་སློབ་གྲྭ་རིམ་པར་སྤྲད། སློབ་གྲྭ་རིམ་པ་ལས་ཀྱང་སློབ་ཆུང་ནི་བྱིས་བློ་ཤེས་བྱར་འདྲེན་པའི་ཐེམ་པ་དང་ཡོན་ཏན་གྱི་རྨང་གཞི་འདིང་ས་ཡིན་པས་ཁང་བརྩེགས་མཐོན་པོ་བྲག་གི་རི་བོ་ལྟ་བུའི་རྩ་བ་ཡིན་པ་ཀུན་གྱིས་ཤེས་གསལ་ལྟར་ལགས། དེའི་ཕྱིར་སློབ་ཆུང་ནས་ཤེས་བྱའི་རྨང་བཏིང་བའི་བཟང་ངན་དང་ཤེས་བྱ་བློར་དྲངས་པའི་ཆེ་ཆུང་གིས་མི་ཚེ་གང་པོར་ཤན་ཤུགས་ཐེབས་པ་ཡིན་ཞེས་མཁས་བླུན་ཀུན་ལ་གྲགས། དེ་ལྟར་ན་སློབ་ཆུང་སློབ་མར་ཤེས་བྱའི་རྨང་བཏིང་བའི་བཟང་ངན་རྨང་འདིང་བྱེད་ཀྱི་ལག་ཆ་སྟེ།དཔེ་དེབ་ཡིན་པ་སྨྲས་མ་དགོས།ཡིན་ཡང་།ད་ལྟ་རང་རེས་སྤྱོད་བཞིན་པའི་ལྗོངས་ཞིང་ལྔས་བསྒྲིགས་པའི་ལོ་དགུའི་འོས་འགན་སློབ་གསོའི་སློབ་ཆུང་གི་《སྐད་ཡིག》སློབ་དེབ་དེ་ལ་ནི་སྒྱུར་རྩོམ་མང་པོ་བསྡུས་ཡོད་པ་མ་ཟད། དེ་དག་ལ་དོན་སྐྱོན་དང་ཚིག་སྐྱོན་མང་ལ། ནང་དོན་ཡང་གོ་དཀའ་བས་སློབ་ཆུང་སློབ་མར་རྨང་གཞི་བརྟན་པོ་འདིང་བར་བར་ཆད་ཆེ་བ་དང་། སློབ་མའི་བློ་སེམས་སློབ་ཁྲིད་དུ་འགུགས་པར་བཀག་རྒྱ་ཤིན་ཏུ་ཆེ་བས། ང་དང་ང་ལྟ་བུའི་བོད་སྐད་ཡིག་སློབ་ཁྲིད་ཀྱི་ལས་འགན་འཁུར་བའི་དགེ་རྒན་མང་པོའི་བསམ་གཞིགས་ཀྱི་གནས་ཡིན་པས་གནད་དོན་གསལ་བཤད་དང་གོང་རིམ་ལ་ཡར་ཞུའི་ཆེད་དུ་རྩོམ་ཐུང་འདི་བྲིས་པ་ཡིན།
གཤམ་འོག་ཏུ་སྒྱུར་རྩོམ་གྱི་གྲངས་མང་བ་དང་།དོན་སྐྱོན་མང་བ། ཚིག་སྐྱོན་མང་བ་བཅས་ཀྱིས་སློབ་མའི་སློབ་སྦྱོང་ལ་བཀག་རྒྱ་ཆེ་ཚུལ་དང་། ཁོ་མོའི་སེམས་ཁོང་གི་རེ་འདོད་ཙམ་ཚན་པ་དུ་མར་དབྱེ་ནས་ཞུ་བར་འདོད།
གཅིགསྒྱུར་རྩོམ་གྱི་གྲངས་མང་བ།
སྐད་ཡིག་བསླབ་དེབ་འདི་ནི་ལོ་དྲུག་ལམ་ལུགས་ཀྱི་སློབ་ཆུང་ཁྲིད་དེབ་ཡིན་པས་ལོ་རེར་དེབ་གཉིས་བྱས་ནས་བསྡོམས་པས་དེབ་བཅུ་གཉིས་ཡོད་པ་དང་ཕལ་ཆེར་སློབ་ཚན་སུམ་བརྒྱ་ལྷག་ཡོད། དེ་དག་ལ་ཞིབ་ལྟ་ཞིག་བྱས་ན་བརྒྱ་ཆ་ལྔ་བཅུ་ཡན་སྒྱུར་རྩོམ་ཡིན་པས་ཚིག་རྙོག་ཅིང་སྐྱོན་མང་བ། འཛིན་དཀའ་ཞིག་གོ་མི་བདེ་བས་དགེ་རྒན་གྱིས་ཐབས་ཇུས་ཡོད་ཚད་བཀོལ་ཀྱང་སློབ་མར་དེ་བཞིན་གྱི་འབྲས་སུ་མི་འབྱུང་། དེ་ཡང་དཔེ་ཞིག་བཀོད་ན། སྐད་ཡིག་དེབ་བདུན་པར་སློབ་ཚན་ཉེར་བཞི་བཀོད་ཡོད་ལ་དེ་ལས་སློབ་ཚན་བཅུ་གསུམ་སྒྱུར་རྩོམ་ཁོ་ན་ཡིན། དེ་དག་གིས་སློབ་ཚན་སྤྱིའི་བརྒྱ་ཆའི་ང་བཞི་ཟིན་ཞིང་། ནང་དོན་གྱི་ཆ་ནས་ཚན་རིག་དང་། དཔའ་བོའི་ལོ་རྒྱུས། བྱེ་ཐང་གི་འཚོ་བ་སོགས་ཕྱོགས་སྣ་མང་འདུས་པས་བྱིས་པ་ཚོའི་བློ་སྒོ་འབྱེད་པར་དགེ་མཚན་ཆེན་པོ་ལྡན་པར་སྣང་ཡང་། དོན་ངོ་མ་དེ་ལྟར་ཡིན་མིན་ལ་དཔྱད་པ་ཟབ་མོ་བྱ་འོས། དེ་ཡང་ཐོག་མར《སྐད་ཡིག》སློབ་དེབ་ཡིན་པས་དེའི་དམིགས་ཡུལ་དང་ཁྱད་ཆོས། དགེ་མཚན་བཅས་བོར་ནས། རང་རེའི་རིག་གནས་དེ་ལ་སློབ་བུ་ཚོའི་བློ་སེམས་འདྲེན་པའི་ནུས་པ་དང་རྒྱབ་འགལ་དུ་སོང་བའི་སྐད་དག་མིན་ཡ་མ་ཟུང་ལ་བརྟེན་ཞིང་བྱིས་བློ་དང་ཐག་རིང་བའི་རིག་ཚན་སྣ་མང་དང་འབྲེལ་བ་མང་དུ་བྱས་ནས་བསླབ་རྒྱུ་ནི་སློབ་བུ་ཚོའི་ཤེས་རབ་ཆད་པའི་རྒྱུ་རུ་འགྱུར་ཉེན་ཆེ། ཡང་ཁ་ཅིག་གིས་རྒྱ་ནག་གི་ལོ་རྒྱུས་དང་དཔའ་བོའི་ཆེ་བ།ལེ་ཧྥུང་གི་སྙིང་སྟོབས་སོགས་ཀྱི་བག་ཆགས་སློབ་བུའི་སེམས་ལ་བཞག་ནས་མེས་རྒྱལ་ལ་དགའ་ཞིང་མི་དམངས་ལ་གཅེས་པའི་གཞོན་རབས་པ་གསོ་སྐྱོང་བྱ་རྒྱུར་ཕན་ཐོགས་ཡོད་ཅེ་ན་བདེན་མོད། འོན་ཀྱང་། བོད་སྐད་ཡིག་ཁོ་ནས་དེ་ལྟར་བྱས་ན་ཁྲིད་ཚན་གཞན་དག་གིས་ཅི་བྱ།ལྷག་པར་དུ་རྒྱུའི་སྐད་ཡིག་སློབ་དེབ་དུའང་སློབ་ཚན་དེ་དག་ཡང་ནས་བསྐྱར་དུ་བསླབ་དགོས་པས་ནང་དོན་གྱི་ཆ་ནས་བསྐྱར་བཟློས་མིན་ནམ། དུས་ཚོད་ཀྱི་ཆ་ནས་འཕྲོ་བརླག་ཏུ་སོང་བ་མིན་ནམ་སྙམ།
ཡང《སྐད་ཡིག》སློབ་དེབ་བདུན་པའི་རང་རྩོམ་སློབ་ཚན་
