བོད་སྐད་ཀྱི་མིང་ཚོམ་འབྲུ་གསུམ་གཏན་འཇགས་མའི་རྣམ་གཞག་མདོར་བསྡུས།（དང་པོ）
དང་པོ། མིང་ཚོམ་འབྲུ་གསུམ་གཏན་འཇགས་མའི་གོ་དོན་བཤད་པ།
དེ་ཡང་མིང་ཚོམ་ནི་སྒྲ་དོན་གང་རུང་གི་ཆ་ནས་གྲུབ་ཆ་དང་ཁྱད་ཆོས་མིང་ལས་མང་ཙམ་ཡོད་པའི་མིང་འདུས་པའི་རྗོད་བྱེད་ཀྱི་དུམ་བུ་སྟེ། དེ་ལ་འབྲུ་གྲངས་མང་ཉུང་མི་འདྲ་བ་རིགས་སུ་དགར་བ་རེ་རེ་ལའང་རང་ཉིད་བརྗོད་བྱ་དོན་ལ་ལྟོས་པའི་རྗོད་བྱེད་རྣམ་པ་གཏན་འཇགས་མ་ཞེས་བྱ་བ་དེ་ཡིན། མིང་ཚོམ་འབྲུ་གསུམ་གཏན་འཇགས་མ་དེ་ནི་མིང་ཚོམ་འབྲུ་གསུམ་གཏན་འཇགས་ཅན་མ་ཡིན་པ་ཞིག་ཡོད་པ་དང་ལྟོས་བཅས་ཀྱི་སྒོ་ནས་བཞག་པ་སྟེ། མིང་ཚོམ་ཡིན་ལ་འབྲུ་གསུམ་ཡིན་ན་མིང་ཚོམ་འབྲུ་གསུམ་ཅན་ཡིན་ཀྱང་། མིང་ཚོམ་འབྲུ་གསུམ་གཏན་འཇགས་མ་ཉིད་ཡིན་པའི་ངེས་པ་མེད། དཔེར་ན་སྲིད་པ་གསུམ། ཁྱུང་སྔོན་སྐྱེས། འཇམ་དཔལ་དབྱངས་ཞེས་པ་ལྟ་བུ་སོགས་ལ་མཚོན་ན། རྗོད་བྱེད་དུམ་བུ་དེ་དག་འདུས་མིང་ངམ། མིང་གི་ཚོམ་བུ་དང་འབྲུ་གསུམ་ཅན་ཡིན་ཀྱང་དེ་དག་རེ་རེ་ནས་རང་ཉིད་སྐབས་དོན་ལ་ལྟོས་པའི་རྗོད་བྱེད་རྣམ་པ་གཏན་འཇགས་པ་ཞིག་མིན་ཏེ། དཔེར་ན་མིང་ཚོམ་དེ་དག་ནི་སྲིད་པ་གསུམ། ཁྱུང་གི་སྔོན་ལ་སྐྱེས་པ་བོ། འཇམ་དབྱངས། འཇམ་པའི་དཔལ་དང་ལྡན་པའི་དབྱངས་ཞེས་སོགས་སུ་རང་ཉིད་མིང་གི་ངོ་བོ་སྔར་བཞིན་བཟུང་ཡོད་པ་གཞིར་བྱས་སྡུད་སྐྱེད་གང་རུང་བྱེད་ཆོག་པ་ཡིན་པས་ན། མིང་ཚོམ་འབྲུ་གསུམ་པ་དེ་རིགས་རང་ཉིད་རྣམ་པའི་སྒོ་ནས་གཏན་འཇགས་པ་མིན་ཞེའོ།། འོ་ན་ཅི་ལྟ་བུ་ཞིག་ལ་མིང་ཚོམ་འབྲུ་གསུམ་གཏན་ཆགས་མ་ཟེར་རམ་ཞེ་ན། དེ་ནི་སྒྲ་ཡི་རྣམ་ཆ་གསུམ་ལྡན་ལ་དོན་རྒྱུ་མིང་ལས་མང་ཙམ་ཡོད་པ་གང་ཞིག མིང་ཚོམ་རང་ཉིད་ཀྱི་གྲུབ་ཆ་བརྗེ་བ་དང་ཁ་གཏོར་བའམ་སྣོན་འཕྲི་བྱེད་མི་རུང་ཞིང་། སྒྲ་སྦྱོར་ལ་གདངས་སྟབས་ངེས་ཅན་ཡོད་ཕྱིར་མིང་དང་ཚིག་གཉིས་ལས་ཚིག་ལ་ཉེ་ཙམ་ཡོད་ཀྱང་། མིང་ཚིག་གཉིས་སུ་ཕྱེ་བའི་ཚིག་གི་སྦྱོར་བ་ལ་ཞུགས་ཚེ་ཚིག་ཚན་ཏེ་ཚིག་གི་གྲུབ་ཆའི་གོ་ས་འཛིན་པས་མིང་དང་མཐུན་ཆ་ཡོད་པ་ཞིག་གོ ། དཔེར་ན་རྒྱ་མ་བོད། སྟོབས་པོ་ཆེ། ལྷེམས་སེ་ལྷེམ། ཀྱུ་རུ་རུ་ཞེས་པ་སོགས་ཀྱི་མིང་ཚོམ་འབྲུ་གསུམ་མ་ལ་སྒྲ་དོན་གང་རུང་གི་ཆ་ནས་གྲུབ་ཆ་དང་ཁྱད་ཆོས་མིང་ལས་ཆ་བསགས་མང་ཙམ་ཡོད་པ་ཡིན་ཏེ། རྐྱང་མིང་ལ་གྲུབ་རྒྱུ（མིང་རྒྱུ）གཅིག་དང་འདུས་མིང་ལ་རྩ་བའི་ཆ་ནས་གྲུབ་རྒྱུ་མངོན་པར་ཐོན་པ་གཉིས་སུ་ཤས་ཆེ་བ་ཡིན་ཀྱང་མིང་ཚོམ་འབྲུ་གསུམ་གཏན་ཆགས་མ་དཔེར་ན་རྒྱ་མ་བོད། སྟོབས་པོ་ཆེ། ལྷེམས་སེ་ལྷེམ། ཀྱུ་རུ་རུ་ཞེས་པ་ལྟ་བུ་སོགས་གྲུབ་རྒྱུ་མངོན་པར་ཐོན་པ་གསུམ་ཡོད་པའོ།། མིང་ཚོམ་དང་ཉེ་བའི་འདུས་མིང་གི་སྒྲ་འབྲུ་སྡུད་སྐྱེད་བྱེད་མི་རུང་བ་ཞིག་སྟེ། དཔེར་ན། རྒྱ་མ་བོད་ཅེས་པའི་སྒྲ་ནི་རྒྱ་མའམ་མ་བོད་དམ་རྒྱ་བོད་དམ་རྒྱ་མ་དང་བོད་ཅེས་པ་སོགས་གང་དུའང་སྡུད་སྐྱེད་བྱ་ཐབས་མེད་པའི་ཕྱིར། དེ་བཞིན་འདུས་མིང་ལ་སྒྲའི་སྡེབ་སྦྱོར་གྱི་གདངས་སྟབས་སམ་ཆ་ཡར་ཀློག་སྟངས་སོགས་ཀྱི་ངེས་སྲོལ་མེད་ཀྱང་མིང་ཚོམ་འབྲུ་གསུམ་གཏན་ཆགས་མར་ཚིག་གི་སྡེབ་སྦྱོར་གྱི་གདངས་སྟབས་ངེས་ཅན་ཡོད། ད་དུང་དཔེར་ན། ཁོ་ནི་རྒྱ་མ་བོད་ཅིག་རེད་ཅེས་པའི་ཚིག་ལ་མཚོན་ན་ཚིག་དེ་བརྗོད་གཞི་གསལ་རྗོད་ཅན་གྱི་ཚིག་ཡིན་པ་གང་ཞིག་ལ། རྒྱ་མ་བོད་ཅེས་པ་ནི་གསལ་རྗོད་ཀྱི་ཚིག་ཚན་འགྲུབ་བྱེད་ཡིན་པ་ལས་རང་ཉིད་ཚིག་ཚན་དུ་མ་ལས་གྲུབ་པའི་སྐབས་དོན་ཆ་ཚང་བའི་ཚིག་མ་ཡིན་པའི་ཕྱིར། གཉིས་པ་མ་གྲུབ་ན། དེར་ཐལ། རྒྱ་མ་བོད་ཅེས་པའི་རྗོད་པ་དེ་རང་ངོས་ནས་རང་བཞིན་གྱི་ཁྱད་པར་དེ་གཞི་གང་ལ་ལྟོས་པ་དང་དེ་ཡང་ཡིན་སྒྲུབ་དགག་སྒྲུབ་གང་དུ་བྱས་པ་སོགས་ཅི་ཡང་གོ་རྒྱུ་མེད་པའི་ཕྱིར། དེས་ན་མིང་ཚོམ་འབྲུ་གསུམ་དེ་རིགས་ཚིག་ལས་ཆུང་བའི་དུམ་བུ་ཡིན་གྱི་ཚིག་མ་ཡིན་པ་གོ་སླའོ།།
གཉིས་པ། མིང་ཚོམ་འབྲུ་གསུམ་ཏགན་འཇགས་མའི་རྣམ་གྲངས།
མིང་ཚོམ་འབྲུ་གསུམ་གཏན་འཇགས་མར་རྗོད་བྱེད་དག་བརྗོད་བྱ་དོན་ལ་གཞོལ་ཚུལ་གྱི་སྒོ་ནས་དབྱེ་ན། རང་བཞིན་རྗོད་པ་དང་། ཚད་རྗོད་པ། བསྣན་གསལ་གྱི་རྗོད་པ་དང་། ཆོས་རྣམ་རྗོད་པ་སོགས་རྣམ་གྲངས་དུ་མ་ཡོད་ལ། རྣམ་གྲངས་རེ་རེའི་མཚན་མཚོན་རིམ་པར་འགོད་པ་ལ།
གཅིག རང་བཞིན་རྗོད་པའི་སྒྲ།
མིང་ཚོམ་འབྲུ་གསུམ་གཏན་འཇགས་མ་རང་བཞིན་རྗོད་པའི་སྒྲ་ཞེས་པ་ནི་སྐབས་དོན་དུ་གྲུབ་པའི་དངོས་པོ་གང་དེའི་ངོ་བོ་ནི་རང་རྒྱུ་གཉིས་ལ་འབྲེལ་ཞིང་རང་རྒྱུ་རང་རྒྱུའི་ཅིག་ཤོས་གང་དང་ཡང་མི་མཚུངས་ལ་རང་ཉིད་ཕུང་གསུམ་པ་ལྟ་བུར་ཡོད་པ་སྟོན་བྱེད་ཀྱི་སྒྲ་ཞིག་གོ །
རང་བཞིན་རྗོད་པའི་སྒྲུབ་འགྲུབ་བྱེད་ཀྱི་རྐྱེན
