logo

མི་ཆོས་གཙང་མ་བཅུ་དྲུག་ལས་མཐོང་བའི་ལེགས་བཤད་གཏམ་གྱི་མེ་ཏོག

རྩོམ་པ་པོ།:བདེན་པའི་མྱུ་གུ ཡོང་ཁུངས།:ལུག་ཚང་དཔལ་ཡོན། དུས་ཚོད།:2023-01-31 ཀློག་གྲངས།:
སྔོན་བྱོན་མཁས་པའི་གདམས་ངག་རིན་ཆེན་ནོར། །
སྲོང་བཙན་སྒམ་པོའི་གསུང་གི་བདུད་རྩི་ཆེ། །
མི་ཆོས་གཙང་མ་བཅུ་དྲུག་ཁྲིམས་ཀྱི་སྲོལ། །
གཏམ་གྱི་མེ་ཏོག་ཀུན་གྱི་གཟིགས་མོར་སྤྲོ། །

དཀོན་མཆོག་གསུམ་ལ་མོས་གུས་བསྐྱེད་པ།
དཀོན་མཆོག་གསུམ་ལ་མོས་ཤིང་གུས་པ་བསྐྱེད། །
སྙིང་ནས་སྐྱབས་དང་མགོན་གྱི་སྲོག་ལ་བཟུང་། །
ལས་དང་རྒྱུ་འབྲས་གཏན་ཚིགས་དོན་དུ་གཉེར། །
ཡ་རབས་ལམ་ལ་འཇུག་པ་ལེགས་བཤད་གཏམ། །

དམ་པའི་ཆོས་བཙལ་ཞིང་བསྒྲུབ་པ།
དམ་པའི་སྐྱེས་བུ་གང་དུ་གནས་ན་ཡང་། །
དམ་པའི་ལྷ་ཆོས་བཙལ་ཞིང་བསྒྲུབས་པ་ཡི། །
དམ་ཚིག་སྲོག་ལྟར་སྲུང་བའི་མཛད་འཕྲིན་དག།
དམ་བཅའ་བརྟན་པོས་སྐྱོང་བ་ལེགས་བཤད་གཏམ། །

ཕ་མ་ལ་དྲིན་ལན་འཇལ་བ།
ས་སྟེང་འདི་ན་བཀའ་དྲིན་རི་ལས་མཐོ། །
སྔོན་མོ་མཚོ་ལས་ཟབ་པའི་ཐུགས་རྗེ་ཅན། །
དྲིན་ཆེན་ཕ་མའི་དྲིན་ལན་འཇལ་བ་ཡི། །
ལས་ལ་གོམས་འདི་ངོ་མཚར་ལེགས་བཤད་གཏམ། །

ཡོན་ཏན་ཅན་ལ་ཞེ་མཐོང་ཡོད་པ།
ཡངས་པའི་རྒྱལ་ཁམས་སྟོན་པའི་སེམས་དཔའ་ཞིག།
ལེགས་ཉེས་བླང་དོར་འབྱེད་པའི་དམ་པ་དེ། །
ཡོན་ཏན་ཅན་ལས་སུ་ཡང་མི་དམིགས་པས། །
གུས་ཤིང་ཞེ་མཐོང་ཡོད་པ་ལེགས་བཤད་གཏམ། །

རིགས་མཐོ་བ་དང་རྒན་པར་བཀུར་སྟི་ཆེ་བ།
རིགས་མཐོ་རྒན་པའི་ཕོ་མོ་སུ་ཡིན་ཡང་། །
བཀུར་སྟི་ཆེ་བའི་སྲོལ་བཟང་མ་ཉམས་པར། །
རྣམ་དག་སེམས་ཀྱིས་སྙིང་ནས་འདུད་པ་ཡི། །
གུས་པའི་ཕྱི་ཐག་རིང་པོ་ལེགས་བཤད་གཏམ། །

ཡུལ་མི་ཁྱིམ་མཚེས་ལ་ཕན་འདོགས་པ།
ཀུན་ལ་བརྩེ་སེམས་སྙིང་རྗེའི་འཛུམ་ཆུང་བཀྲ། །
ཡུལ་མི་ཁྱིམ་མཚེས་ཕན་འདོགས་རེ་བས་ཁེངས། །
མི་དོན་བཟང་པོར་གོམས་པའི་འདུ་ཤེས་བརྟན། །
ཕན་ཚུན་རོགས་རེས་ཟབ་པ་ལེགས་བཤད་གཏམ། །

བཀའ་དྲང་ཞིང་སེམས་ཆུང་བ།
སྣ་ཚོགས་གཡོ་སྒྱུའི་ཐབས་དང་རིག་པ་ཡིས། །
བསླུ་ཞིང་རྨོངས་པའི་ལམ་དུ་མ་ཞུགས་པར། །
བཀའ་གསུང་དྲང་ཞིང་སེམས་རྒྱ་ཆུང་བ་ཡི། །
མི་ཆོས་དོན་དུ་གཉེར་བ་ལེགས་བཤད་གཏམ། །

ཉེ་དུ་མཛའ་བཤེས་ལ་གཞུང་རིང་བ།
ལས་ཀྱིས་འཕྲད་པའི་ཉེ་དུ་མཛའ་བཤེས་ལ། །
གཞུང་རྒྱུད་རིང་བའི་བརྩེ་བ་མ་དོར་བར། །
དཀའ་བའི་བྱ་བ་ཅི་དང་ཅི་མཆིས་ཀྱང་། །
གཞོགས་འདེགས་ཐབས་ཀྱིས་སྒྲུབ་པ་ལེགས་བཤད་གཏམ། །

ཡ་རབས་ཀྱི་རྗེས་བསྙེག་ཅིང་ཕྱི་ཐག་རིང་བ།
ཡ་རབས་རྗེས་བསྙེག་ལེགས་པའི་ལམ་ལ་ཞུགས། །
ཕྱི་ཐག་རིང་བའི་བརྩེ་བ་ཆུ་བོའི་རྒྱུན། །
ཆད་མེད་ལྷུང་ལྷུང་འབབ་པའི་ངང་ཚུལ་བཞིན། །
བརྩོན་པས་མ་བཏང་བརྩོན་པ་ལེགས་བཤད་གཏམ། །
༡༠
ཟས་ནོར་ལ་ཚོད་འཛིན་པ།
རྒྱས་ཟ་རྒྱས་འཐུང་བག་མེད་རྒྱས་སྤྲོས་ཀྱིས། །
འཚོ་བའི་དུས་ཡུན་འགྱངས་ཐབས་མི་གནང་བར། །
ཟས་ནོར་ཀུན་ལ་ཚོད་འཛིན་བྱེད་པ་ཡི། །
ལུགས་སྲོལ་བཟང་པོ་དེ་ནི་ལེགས་བཤད་གཏམ། །
༡༡
སྔར་དྲིན་ཅན་གྱི་མི་རྩད་གཅོད་པ།
ཕན་པས་སྐྱོང་བའི་སྐྱེ་འགྲོ་སུ་ཡིན་ཡང་། །
སེམས་ཀྱི་གཏིང་ནས་རྩྭ་ལྟར་མི་འདོར་བར། །
སྔར་བྱས་དྲིན་ཅན་མི་དེ་བརྩད་གཅོད་པའི། །
དྲིན་ལན་འཇལ་བའི་སེམས་འདི་ལེགས་བཤད་གཏམ། །
༡༢
བུ་ལོན་དུས་སུ་འཇལ་ཞིང་བྲེ་སྲང་ལ་གཡོ་མེད་པ།
དཀའ་བའི་དུས་སུ་རེ་བའི་དོན་སྐོང་བ། །
སྙིང་ནས་མ་བརྗེད་བུ་ལོན་དུས་སུ་འཇལ། །
འཇལ་བྱེད་བྲེ་དང་འདེགས་བྱེད་སྲང་གི་ཚད། །
གཡོ་མེད་དྲང་པོར་གཉེར་བ་ལེགས་བཤད་གཏམ། །
༡༣
ཀུན་ལ་ཕྲག་དོག་ཆུང་བ།
ཀུན་ལ་ཕན་སེམས་འོ་མའི་མདོག་ཅིག་མཁོ། །
ཀུན་ལ་ཕྲག་དོག་སྦྲུལ་གྱི་ལྕེ་མ་གཡུགས། །
ཀུན་གྱི་བྱ་བ་ཆེ་ཆུང་གང་ཡིན་ཡང་། །
ཀུན་གྱིས་བསྒྲུབས་ཤིང་འཁྱོངས་འདི་ལེགས་བཤད་གཏམ། །
༡༤
ངན་པའི་གྲོས་ལ་མི་ཉན་ཞིང་རང་ཚུགས་འཛིན་པ།
ངན་པའི་གྲོས་ལ་མི་ཉན་དྲང་པོའི་ལམ། །
རང་ཚུགས་འཛིན་པ་གལ་འགངས་ཤིན་ཏུ་ཆེ། །
ལེགས་པར་བསམ་ནས་ལེགས་པའི་དོན་སྒྲུབ་པ། །
དགེ་ལེགས་བྱ་བའི་འདུན་མ་ལེགས་བཤད་གཏམ། །
༡༥
ངག་འཇམ་ཞིང་སྨྲ་བ་ཉུང་བ།
ངག་ཚིག་འཇམ་ཞིང་སྨྲ་བ་ཉུང་བ་ཡི། །
ཡ་རབས་དམ་པའི་ལུགས་སྲོལ་སྲོག་ལྟར་སྲུང་། །
ལྷག་བསམ་གངས་ཀྱི་རི་བོའི་མདོག་ལས་དཀར། །
གཞུང་རྒྱུད་བལ་ལས་འཇམ་པ་ལེགས་བཤད་གཏམ། །
༡༦
ཐེག་པ་ཆེ་ཞིང་བློ་ཁོག་ཡངས་པ།
ཐེག་པ་ཆེ་ཞིང་བློ་ཁོག་ཡངས་པ་ཡི། །
ལས་ལ་ཞུགས་ནས་དོན་གཉིས་སྲོག་ལྟར་སྲུང་། །
བརྩོན་པའི་འབྲས་བུ་གཡུར་དུ་ཟ་བ་ཡི། །
ལྷུག་ལྷུག་ཟེའུ་འབྲུ་རྒོད་པ་ལེགས་བཤད་གཏམ། །

མཇུག་གཏམ།
མི་ཆོས་མི་ཡིས་སྒྲུབ་ཅིང་འབད་པ་ཡི། །
གལ་ཆེན་གལ་ཆུང་དོན་ལ་མི་སེམས་པར། །
དུས་ཀུན་དུས་གསུམ་འཁྱོངས་བའི་འདོད་པའི་རྩེ། །
བསམ་དོན་བསམ་པ་འགྲུབ་ན་ལེགས་བཤད་གཏམ། །
                                                                          ༢༠༢༣/༡/༡༠དགོང་མོ་རང་ཤག་ཏུ་མཇུག་རྫོགས་པར་བྲིས།
འབྲེལ་ཡོད་འོས་སྦྱོར།