བྱིས་པའི་ལུས་སེམས་བདེ་ཐང་དང་སློབ་སྦྱོང་སྐོར་གླེང་བ་ལས་བྱིས་པ་ལོ4ཅན་གྱི་སློབ་གསོ།

གཅིག རྣམ་རིག་རྒྱས་ཤིང་ཡར་རྒྱུག་མར་རྒྱུག་བྱེད་པའི་བྱིས་པ་ལོ4ཅན།
       ང་ཚོས་རྒྱུན་པར་བྱིས་པ་ལོ4ཅན་གྱི་ཁྱིམ་བདག་ཚོས་འཁང་ར་གང་མང་བྱེད་པ་ཐོས་ཐུབ། ཁོའི་བྱིས་པ་སྐད་ཅིག་ཙམ་ལ་ཡང་དལ་སྡོད་མེད་པར་ཡར་རྒྱུག་མར་རྒྱུག་བྱེད་ལ། ཁྱིམ་གྱི་དངོས་པོ་ཡོད་ཚད་བྱིས་པའི་རྩེད་ཆས་སུ་བསྒྱུར་བ་དང་། ཁང་པའི་ནང་རོལ་རྩེད་ར་བ་ལྟ་བུར་བཟོ་བ་རེད། ཐ་ན་ཁྱིམ་བདག་ལ་ལས་རང་གི་བྱིས་པར་འགུལ་རྒྱུ་མང་ནད་བྱུང་བར་དོགས་པ་ཟ་བཞིན་ཡོད། འདི་ནི་རྣམ་རིག་རྒྱས་པའི་བྱིས་པ་ལོ4ཅན་ཡིན། ཁོ་ཚོ་ཕོ་མོ་གང་ཡིན་རུང་རྣམ་རིག་རྒྱས་ལ་འཚེར་སྣང་གང་ཡང་མེད་པར་སྤྲོ་སྐྱིད་ཀྱིས་ཉིན་རེ་སྐྱེལ་བཞིན་ཡོད། ཁོ་ཚོའི་བློ་རིག་དུས་སྐབས་འདི་ལ་མགྱོགས་མྱུར་གྱིས་ནར་སོན་བཞིན་ཡོད་པ་དང་། ཁོ་ཚོ་རྒྱུན་པར་མཚར་སྣང་གིས་ཁེངས་ལ་ཉེ་འཁོར་གྱི་འཇིག་རྟེན་ལ་རྒྱུན་ཆད་མེད་པར་འཚོལ་ཞིབ་བྱེད་བཞིན་ཡོད། “འདི་ཅི་ཞིག་རེད། ཉི་མ་ཅིའི་ཕྱིར་སྒོར་དབྱིབས་ཡིན། རླུང་བུ་བསིལ་བའི་རྒྱུ་མཚན་ཅི། རླངས་འཁོར་ནང་ན་ཅི་ཞིག་ཡོད།”ཁོ་ཚོའི་དྲི་བ་ལ་རྒྱུན་ཆད་མེད། དེ་བས། ཁྱིམ་བདག་གིས་ནམ་ཡིན་ཡང«དྲིས་ལན་བརྒྱ་བ»གྲ་སྒྲིག་བྱས་ནས་བྱིས་པ་ཚོའི་དྲི་བའི་གདོང་བསུ་དགོས། ལོ4ཅན་གྱི་བྱིས་པར་ལྡེམ་ཤུགས། སྐུལ་སློང་དང་གསར་གཏོད་ཀྱི་སློབ་སྦྱོང་ཐབས་ལམ་སྤྱོད་དགོས་པ་དང་། ཁོ་ཚོ་ཞབས་བྲོའི་སྟངས་སྟབས་དང་ཕྱི་རོལ་གྱི་རོལ་རྩེད། ཟློས་གར་འཁྲབ་སྟོན་གསར་པ་སོགས་ལ་སྤྲོ་སྣང་གིས་ཁེངས་ཡོད།
(གཅིག) རྐང་འཁོབ་ལག་འཁོབ་ཀྱི་བྱིས་པ་ལོ4ཅན།
       བྱིས་པ་ལོ4ཅན་ལ་རྣམ་རིག་རྒྱས་ཀྱང་། ལུས་ཕུང་གི་མཐུན་སྦྱོར་རང་བཞིན་ད་དུང་སྨིན་ཐག་ཆོད་མེད་པས་སྐབས་ལ་ལར་རྐང་འཁོབ་ལག་འཁོབ་ཡིན་པ་དང་། རྒྱུན་པར་དངོས་པོ་ཡར་སློག་མར་སློག་དང་ཁོར་ཡུག་རྫབ་རྫོབ་ཏུ་གཏོང་བ་རེད། ཁོ་ཚོར་ཞིབ་ཕྲའི་འགུལ་སྟངས་ལ་ད་དུང་བྱང་ཆ་མི་ལྡན་པས། ཡི་གེ་དང་རི་མོ་འབྲི་དུས་རྒྱུན་པར་ལག་མཐིལ་གྱིས་སྨྱུ་གུ་འཛིན་ཞིང་། ཁོ་ཚོ་ལུས་རྩལ་ལ་ཧ་ཅང་དགའ། དཔེར་ན། རྒྱུག་པ་དང་མཆོང་བ། འཛེག་པ་སོགས་བྱས་ཏེ་ལྷིང་འཇགས་ངང་གནས་གཅིག་ནས་འདུག་མི་ཐུབ།
(གཉིས) གྲོགས་པོ་སྒྲིག་པར་དགའ་བའི་ལོ4ཅན་གྱི་བྱིས་པ།
       ལོ4ཅན་གྱི་བྱིས་པ་ནི་མི་རྒྱུས་མེད་དང་འབྲེལ་འདྲིས་བྱེད་པར་དགའ་ལ། གྲོགས་པོ་སྒྲིག་པ་དང་། རྩེད་རོགས་དང་མཉམ་དུ་རྩེད་པ། ཉེན་མཆོང་དང་འགྲན་སློང་རང་བཞིན་གྱི་རོལ་རྩེད་ལ་དགའ་བ་དང་། དོ་སྣང་བྱེད་ཡུལ་མགྱོགས་མྱུར་ངང་དངོས་པོ་གཅིག་ནས་དངོས་པོ་གཞན་ལ་འཁོར་བ་དང་། ཁོ་ཚོ་ད་ལྟ་ཤིང་དུམ་རྩེད་ཆས་རྩེ་བཞིན་ཡོད་ནའང་སྐར་མ་གཅིག་མ་འགོར་བར་མེ་འཁོར་རྩེ་བ་རེད། དངོས་པོ་གསར་པར་མཚར་སྣང་འཚོལ་ཞིབ་ཀྱི་འདུན་པས་ཁེངས་ཡོད། ཁོ་ཚོ་ཨ་མར་བརྩེ་བ་དྲག་པོ་ཡོད་མོད། འོན་ཀྱང་ཡོད་ཚད་མི་དར་མར་རྒྱབ་རྟེན་མི་བྱེད། མི་དར་མ་ནང་བཞིན་ལས་ཀར་དགའ་བ་ལྟར་སྣང་ལ། དཔེར་ན། ཁྱིམ་ཕྱགས་པ་དང་ཅོག་ཙེ་ལ་ཕྱི་བདར་གཏོང་བ། ཉལ་ཐུལ་ལྟེབས་པ། དཀར་ཡོལ་དང་ཐུར་མ་སོ་སོར་འཇོག་པ་སོགས་བྱེད། ཡིན་ཡང་། མི་དར་མས་རོགས་འདེགས་བྱེད་དགོས། ལོ5ལ་སོན་ཉེ་བའི་བྱིས་པ་སྐབས་ལ་ལར་སེམས་ཁྲལ་དང་། འཇིགས་སྐྲག་སྐྱེས་པའམ་ཡང་ན་རྨི་ལམ་ངན་པ་རྨི་སྲིད།
(གསུམ) སྐད་ཆ་བཤད་པར་དགའ་བའི་ལོ4ཅན་གྱི་བྱིས་པ།
       ལོ4ཅན་གྱི་བྱིས་པ་གཞན་གྱི་སྐད་ཆར་མཉན་པར་དགའ་བར་མ་ཟད། རང་ཉིད་ཀྱང་སྐད་ཆ་བཤད་པར་དགའ་ལ། སྐད་ཆ་བཤད་ནས་ཚར་རྒྱུ་མེད་ལ་ཐ་ན་རྙོག་འཛིང་གི་མིང་ཚིག་ཀྱང་བཤད་པར་དགའ། ཚོད་ལྟ་བྱས་ནས་ཐ་སྙད་དང་ཚིག་གྲུབ་གསར་པ་བཤད་པར་དགའ་བ་དང་། སྐབས་ལ་ལར་སྐད་ཆ་བཙོག་པ་དང་དམོད་ཚིག་བཤད་པ་དང་། གཏམ་རྒྱུད་ལ་མཉན་རྒྱུར་ཡང་དགའ།
(བཞི) རོལ་རྩེད་ཀྱི་ཁྲོད་ནས་སློབ་སྦྱོང་བྱེད་པར་མཁས་པའི་ལོ4ཅན་གྱི་བྱིས་པ།
       ལོ4ཅན་གྱི་བྱིས་པ་རོལ་རྩེད་དང་འཚོལ་ཞིབ་ཁྲོད་སློབ་སྦྱོང་བྱེད་པར་མཁས་ཤིང་། རོལ་རྩེད་ཀྱི་འགུལ་སྟངས་བརྒྱུད་ནས་མིག་དང་ལག་པའི་མཐུན་སྦྱོར་ནུས་པ་ཇེ་དྲག་ལ་གཏོང་བ་ཡིན། ཁོ་ཚོས་བསམ་པའི་འཆར་སྒོ་ཡོད་པའི་རོལ་རྩེད་ལ་བརྟེན་ནས་མི་དར་མའི་ཚུགས་ཀར་ལད་ཟློས་བྱེད་པ་དང། ཡང་ན་རོལ་རྩེད་ཁྲོད་ཀྱི་ཚུགས་ཀ་འཁྲབ་པ། རོལ་མོ་དང་བྱིས་གླུ། འགྱུར་ཁུགས་སོགས་ལ་དགའ། ཁོ་ཚོས་ཤ་གནད་ཆེ་བར་བརྟེན་ནས་སློབ་སྦྱོང་བྱེད་པ་ལས་ཤ་གནད་ཆུང་བར་བརྟེན་པ་མིན། དཔེར་ན། ཤིང་དུམ་རྩེད་ཆས་དང་མ་དཔེ་སྒྲིག་པ་ལས་ཤོག་སྨྱུག་གི་ལས་བྱ་འབྲི་བ་མིན།
(ལྔ) ཞིབ་ཕྲའི་འགུལ་སྟངས་སྨིན་ཐག་ཆོད་མེད་པའི་ལོ4ཅན་གྱི་བྱིས་པ།
       གནད་དུ་ཁེལ་བའི་མཐོང་ཚོར་དང་ཞིབ་ཕྲའི་འགུལ་སྟངས་མེད་པས་དཔེ་ཀློག་དང་ཡིག་འབྲི་ལ་དཀའ་ཁག་ཡོད་ལ། ཁོ་ཚོས་མཛུ་གུ་དང་ལག་མཐིལ་ཧྲིལ་པོས་ཡི་གེ་འབྲི་བ་དང་། བྲིས་པའི་ཡི་གེ་ཆེ་ལ་ཡག་པོ་མིན། ཚོན་བཏང་ན་ཡང་དྲ་མིག་ལས་བརྒལ་བ་རེད།
(དྲུག) སློབ་སྦྱོང་ལ་དགའ་མོད་སེམས་རྣལ་དུ་ཕབ་པའི་དུས་ཚོད་ཅུང་ཐུང་བའི་ལོ4ཅན་གྱི་བྱིས་པ།
       ཁོ་ཚོ་གཏམ་རྒྱུད་ལ་མཉན་པ་དང་རང་ཉིད་གཅིག་པུས་རི་མོའི་དེབ་ཀློག་པར་དགའ། བར་སྐབས་འདི་ནི་རྩིས་སློབ་པའི་དུས་སྐབས་ཡིན། བྱིས་པས་ཤིང་དུམ་རྩེད་ཆས་དང་སྒྱུ་འཕྲུལ་གྲུ་བཞི་མ། བྱེ་མ། ཆུ་སོགས་རྒྱུ་ཆ་བྱས་ནས་ཆེ་ཆུང་དང་དབྱིབས། རིང་ཚད་དང་ཤོང་ཚད་སོགས་འཚོལ་ཞིབ་བྱས་ཆོག་པ་དང་། གྲངས་རྩི་བ་དང་རིགས་དབྱེ་བའི་བྱ་འགུལ་སྤེལ་ནས། གཏམ་རྒྱུད་ལ་མཉན་པའི་རྣམ་པ་སྤྱད་དེ་གྲངས་རིག་ལ་སློབ་སྦྱོང་བྱས་ཆོག དཔེར་ན། དཀར་ཡོལ་དང་ཐུར་མ། ལྷམ་སོགས་རྩིས་ཆོག དུས་སྐབས་འདིའི་བྱིས་པའི་སློབ་སྦྱོང་གི་འགྲོས་ཤིན་ཏུ་མགྱོགས་མོད། འོན་ཀྱང་། རྒྱུན་མཐུད་ནས་སློབ་སྦྱོང་བྱེད་པའི་དུས་ཚོད་ཅུང་ཐུང་བ་དང་། དུས་རིམ་མང་པོ་དང་དུས་ཡུན་ཐུང་ངུའི་སློབ་སྦྱོང་གི་ཐབས་ལམ་སྤྱོད་དགོས།
(བདུན) སྒྲིག་ལམ་མི་བརྩི་བའི་ལོ4ཅན་གྱི་བྱིས་པ།
       ལོ4ཅན་གྱི་བྱིས་པས་ལད་ཟློས་བྱས་ནས་སློབ་སྦྱོང་བྱེད་ལ། ཁོ་ཚོའི་བྱ་སྤྱོད་ཡོ་བསྲང་བྱེད་སླ་བ། དེ་བས་ནོར་འཁྲུལ་ཅན་གྱི་བྱ་སྤྱོད་དུས་ཐོག་ཏུ་བསྒྱུར་བཅོས་བྱེད་འོས། རྣམ་རིག་རྒྱས་པའི་ལོ4ཅན་གྱི་བྱིས་པར“སྒྲིག་ལམ་མི་བརྩི”བའི་སྣང་ཚུལ་ཡོད་པ་དང་། གལ་ཏེ་ཁོ་ཚོར་ཁོང་ཁྲོ་བསླངས་ན་རྡོག་ཐོས་རྒྱག་པར་མ་ཟད་ཁ་ཆུ་ཡང་འཕེན་ལ། ཡར་རྒྱུག་མར་རྒྱུག་དང་ཡར་མཆོང་མར་མཆོང་བྱས་ནས་ཧོལ་རྒྱུག་བྱེད་སླ། དུས་སྐབས་འདིའི་བྱིས་པའི་སྐད་ཆའི་ནུས་པ་མགྱོགས་མྱུར་ངང་འཕེལ་རྒྱས་སུ་འགྲོ་བཞིན་ཡོད་པ་དང་། ཁྱིམ་བདག་དང་དགེ་རྒན་གྱིས་སྐད་ཆའི་ལམ་ནས་བྱ་སྤྱོད་ཚད་ལྡན་དུ་བཏང་ཆོག་ལ། གནས་ལུགས་བཤད་དེ་མི་ལེགས་པའི་བྱ་སྤྱོད་ལེགས་བཅོས་བྱེད་ཆོག །