ཡིག་གཟུགསNoto Serif Tibetanའགྲེམས་སྤེལ་བྱས་པའི་གནས་ཚུལ།

     ཉེ་ཆར་ཤེས་གསལ་བྱུང་བ་ལྟར་ན། སྤྱི་ལོ2018 ལོའི་ཟླ12 ཚེས22ཉིན་གྷོ་གྷེལGoogleཡིས་སྐད་གྲགས་ཅན་གྱི་ཐོན་ཁུངས་སྒོ་ཕྱེ་བའི་དྲ་ཚིགས GitHub སྟེང་དུ Noto ཁྱིམ་རྒྱུད་ཀྱི་ཡིག་གཟུགས་བརྒྱ་དང་ལྔ་བཅུ་ལྷག་གསར་དུ་འགྲེམས་སྤེལ་བྱས་འདུག་ལ་དེའི་ནང་དུ་བོད་ཡིག་གི་ཡིག་གཟུགས་རིགས་ཤིག་འདུས་ཡོད་པ་ནིNoto Serif Tibetanཅེས་པ་དེ་རེད།
     དེ་སྔོན་སྤྱི་ལོ2015ལོའི་ཟླ9ཚེས26ཉིན་གྷོ་གྷེལGoogleཡིས་བོད་ཡིག་གི་ཡིག་གཟུགས Noto Sans Tibetanཅེས་པ་དེ་འགྲེམས་སྤེལ་བྱས་ཤིང་། ད་ལྟའི་ཆར་གྷོ་གྷེལGoogleཡིས་གཞུང་ཕྱོགས་ཀྱི་དྲ་ཚིགས་སུ་རིན་མེད་མཁོ་སྤྲོད་བྱེད་པ་མ་ཟད། དྲ་ངོས་སུ་བེད་སྤྱོད་གཏོང་ཆོག་པའི་ཡིག་གཟུགསWebFontཡི་ཚབ་ཨང་དང་བཅས་པ་ཡང་མཉམ་སྤྱོད་གནང་ཡོད་པ་རེད།
     ད་ཐེངས་འགྲེམས་སྤེལ་བྱས་པའི་ཡིག་གཟུགས་འདི་ནི་ལྕགས་པར་གྱི་ཡིག་གཟུགས Serif ཡི་ཁོངས་སུ་གཏོགས་པ་དང་། རིགས་གྲས་ཀྱི་ཆ་ནསOpenTypeདངTrueTypeརྣམ་གཞག་རིགས་གཉིས་འདུག་ལ། ཡིག་ལྗིད(Weight)ལ་རྒྱལ་སྤྱིའི་ཚད་གཞིISOཡིས་གཏན་འཁེལ་བྱས་པ་ལྟར་སྤྱིར་བཏང་དང་ཤ་ཆེན། ཤིན་ཏུ་ཤ་ཆེན། ཕྲ་བ་དང་ཤིན་ཏུ་ཕྲ་བ་སོགས་རིགས་དགུ་བཀར་འདུག་པས་འདི་ནི་དེང་རབས་འཕྲུལ་རིག་ལོ་རྒྱུས་ཁྲོད་དུ་བོད་ཡིག་གི་ཐོལ་བརྒལ་ཆེན་པོ་ཞིག་ཡིན་པ་མ་ཟད་བོད་ཡིག་གི་ཡིག་ལྗིད་ལ་ལམ་སྲོལ་གསར་བ་ཞིག་གཏོད་པ་རེད།
     ཡིག་གཟུགསNoto Serif Tibetanཕབ་ལེན་དང་ཚོད་ལྟ་བྱས་པ་བརྒྱུད། ཡིག་ཚུགས་ཀྱི་ཆ་ནས་དེ་སྔའིNoto Sans Tibetanཡིག་གཟུགས་དང་ཤིན་ཏུ་ཆ་འདྲ་བ་ཞིག་ཡིན་པ་དང་། ཁྱད་ཆོས་གཙོ་བོ་ནིOpenTypeརྣམ་གཞག་མཁོ་སྤྲོད་བྱེད་པ་དང་ཡིག་ལྗིད་སྣ་དགུ་ལ་དབྱེ་འདུག་པ་དེ་ནི་གཤམ་གྱི་དཔེ་རིས་ལྟར།
Noto Serif Tibetanརབ་ཏུ་ཕྲ་བའི་ཡིག་གཟུགས།
     གཞན་ཡང་། OpenTypeརྣམ་གཞག་ཅན་གྱི་ཡིག་གཟུགས་ནི་དེང་རབས་ཀྱི་འཕྲུལ་རིག་ཁྲོད་དུ་དར་ཁྱབ་ཆེན་པོ་ཡིན་ལ། Microsoft དངAdobeསོགས་ཀྱིས་མཚོན་པའི་འཛམ་གླིང་ཐོག་གི་སྙན་གྲགས་ཆེ་ཤོས་ཀྱི་སྤྱི་གཉེར་ཁང་དག་གིས་ཀྱངTrueTypeརྣམ་གཞག་ཅན་དོར་ཏེOpenTypeརྣམ་གཞག་ཅན་སྤྱོད་པར་མོས་པ་རེད། ཡིན་ན་ཡང་བོད་ཡིག་གི་ཡིག་གཟུགས་ཁྲོད་དུOpenTypeརྣམ་གཞག་ཅན་གྱི་ཡིག་གཟུགས་ཤིན་ཏུ་དཀོན་པོ་ཡིན་པ་དང་། Noto Serif Tibetan ནི་ད་གཟོདOpenTypeརྣམ་གཞག་ཅན་གྱི་བོད་ཡིག་གི་ཡིག་གཟུགས་དེ་ཆགས་ཡོད་པ་རེད།