བོད་ཡིག་རྩིས་འཁོར་ཉེར་སྤྱོད་ལག་རྩལ་ཆེད་ལས་ཀྱི་དངོས་སྦྱོང་རྟེན་གཞིའི་སྒོ་འབྱེད་མཛད་སྒོ་བསྡུས་པ།

བོད་ཡིག་རྩིས་འཁོར་ཉེར་སྤྱོད་ལག་རྩལ་ཆེད་ལས་ཀྱི་དངོས་སྦྱོང་རྟེན་གཞིའི་སྒོ་འབྱེད་མཛད་སྒོ་བསྡུས་པ།

     སྤྱི་ཟླ3པའི་ཚེས16ཉིན། བློ་བཟང་ཚན་རྩལ་ཚད་ཡོད་ཀུང་ཟིས་མཚོ་སྔོན་རྒྱང་སྒྲོག་བརྙན་འཕྲིན་སློབ་ཆེན་གྱི་བོད་ཡིག་རྩིས་འཁོར་ཉེར་སྤྱོད་ལག་རྩལ་ཆེད་ལས་ཀྱི་དངོས་སྦྱོང་རྟེན་གཞིའི་སྒོ་འབྱེད་མཛད་སྒོ་དང2016ལོའི་སྐབས་དང་པོའི་སློབ་མ་གསར་བའི་སློབ་མགོ་རྩོམ་པའི་མཛད་སྒོ་དེ་ཁྲི་ཀ་རྫོང་དུ་བསྡུས་ཤིང་། མཚོ་སྔོན་རྒྱང་སྒྲོག་བརྙན་འཕྲིན་སློབ་ཆེན་གྱི་སློབ་གཙོ་དབྱང་ཙི་ཡན་དང་། ཁུལ་ཨུའི་རྒྱུན་ཨུ། ཁུལ་དཔོན་གཞོན་པ། དྲིལ་སྒྲོག་པུའི་འགོ་གཙོ་ཡེ་ཝན་ལིན། དེ་མིན་སྐུ་མགྲོན་དང་སློབ་མ་བརྒྱ་ལ་ཉེ་བ་མཛད་སྒོར་ཞུགས།

     བློ་བཟང་ཚན་རྩལ་ཚད་ཡོད་ཀུང་ཟིའི་སྤྱི་ཁྱབ་འགན་འཛིན་པ་བློ་བཟང་གིས་ཀུང་ཟིའི་འཕེལ་རྒྱས་གནས་ཚུལ་མཚམས་སྦྱོར་བྱས་པ་དང་། མཚོ་སྔོན་རྒྱང་སྒྲོག་བརྙན་འཕྲིན་སློབ་ཆེན་གྱི་སློབ་གཙོ་གཞོན་པ་ཞིན་ཧེ་ཀྲུའུ་ཡིས་གཏམ་བཤད་སྤེལ། མཚམས་སྦྱོར་གནང་བ་ལྟར་ན། ཀུང་ཟི་འདི་ནི་སློབ་གྲྭ་དང་ཁེ་ལས་མཉམ་འཛུགས་དངོས་སྦྱོང་རྟེན་གཞིར་གཏན་འཁེལ་བྱས་རྗེས། མཉམ་དུ་དེང་རབས་ཁེ་ལས་ལ་མཁོ་བའི་སྤྱོད་འཐུས་ལག་རྩལ་མི་སྣ་སྐྱེད་སྲིང་བྱ་རྒྱུ་དང་། ཁེ་ལས་དང་མཉམ་དུ་བསླབ་ཞིབ་དང་ཐོན་རྫས་གསར་བ་སྔོག་འདོན་བྱེད་པར་བརྒྱུད། ཐོན་སྐྱེད་ཀྱི་དངོས་ཡོད་གནད་དོན་ཐག་གཅོད་བྱེད་པ་དང་། ཁེ་ལས་ལ་ལག་རྩལ་མི་སྣ་མཁོ་འདོན་དང་ཆ་འཕྲིན་གྱི་རྒྱབ་སྐྱོར་བྱས་ཏེ། མཐོ་རིམ་སློབ་གྲྭའི་སྤྱི་ཚོགས་ཞབས་ཞུ་ནུས་པ་ཐོན་པར་བྱེད་པ་ཡིན། མིག་སྔའི་བར། གནས་གཞི་འདིའི་ཐོག་མའི་སློབ་མ34དང་སློབ་ལོ་ལོ3དང་། མཐར་ཕྱིན་རྗེས་ཆེད་སྦྱོང་གི་ཡོན་གནས་ལོན་པ་ཡིན།