བོད་ལྗོངས་ཀྱི་ལས་རིགས་གསར་སྐྲུན་ཁྱབ་ཁོངས་སུ་མཐོ་རིམ་མཐར་ཕྱིན་སློབ་མའི་ཞུགས་ཚད་མཐོ།

ཉི་མ་བསྟན་འཛིན།

     བོད་ལྗོངས་ཀྱི་སྲོལ་རྒྱུན་རིག་གནས་དང་དུས་རབས་ཀྱི་འཕེལ་འགྱུར་མཐུན་སྦྱོར་བྱེད་པའི་དུས་འདིར། བོད་ལྗོངས་ཀྱི་མཐར་ཕྱིན་སློབ་ཆེན་སློབ་མ་ལས་རིགས་གསར་སྐྲུན་གྱི་ཁྲོད་དུ་གསར་གཏོད་དང་། རང་མི་རིགས་ཀྱི་སྲོལ་རྒྱུན་རིག་གནས་དང་དུས་རབས་ལ་སྦྱར་ཏེ་ས་ཁོངས་ཀྱི་ཁྱད་འཕགས་རང་བཞིན་དང་ཐོན་ཁུངས་སོགས་འདོན་སྤེལ་གང་ལེགས་སྒོས་བོད་ལྗོངས་ཀྱི་སྲོལ་རྒྱུན་ཞིང་ལས་ལས་རིགས་དང་ལག་བཟོའི་ལས་རིགས་ནས་ཡུལ་སྐོར་ལས་རིགས་དང་བཟའ་བཏུང་ལས་རིགས་སོགས་ཁྱབ་ཁོངས་སོ་སོར་གསར་སྐྲུན་བྱེད།
     2009ལོར་ཉི་མ་བསྟན་འཛིན་ནི་སི་ཁྲོན་སློབ་ཆེན་ནས་མཐར་ཕྱིན་པ་དང་། ཁོས་བཟའ་ཆས་དུག་སེལ་ཁེ་ལས་ཤིག་གཉེར་རྒྱུ་ནི་རང་གི་ལས་རིགས་གསར་སྐྲུན་གྱི་ལས་གཞི་ཐོག་མ་རུ་བདམས་ཤིང་། ད་ལྟ་ཁོ་ནི་ལྷ་ས་གྲོང་ཁྱེར་མཐོ་སློབ་མཐར་ཕྱིན་མི་སྣའི་ཚོང་ལས་གསར་འཇུག་མཐུན་ཚོགས་ཀྱི་གྲ་སྒྲིག་ཚན་ཆུང་གི་འགོ་གཙོ་དང་། ལྷ་ས་བོད་ཡུལ་དུག་སེལ་ཀུང་ཟིའི་མ་རྐང་འཇོག་མཁན་སོགས་ཡིན་ལ། བཟའ་ཆས་དུག་སེལ་ཀུང་ཟི་ནི་ལྷ་སའི་བཟའ་ཆས་དུག་སེལ་ཚོང་རའི་ཟིན་ཚད80%ཡན་ཡིན། ཁེ་ལས་ལས་གཉེར་གྱི་ཁྱབ་ཁོངས་ནི་ཉི་གློག་དང་། འཛུགས་སྐྲུན། བཟའ་བཏུང་སོགས་ཁྱབ་ཁོངས་སོ་སོར་རྒྱ་བསྐྱེད་ལ། མི་བརྒྱ་ཕྲག་ལྷག་གི་ལས་ཞུགས་དཀའ་ངལ་སེལ་བ་རེད།

     ཉི་མ་བསྟན་འཛིན་གྱིས་བཤད་རྒྱུར། གནའ་བོའི་མཁར་གྲོང་ལྷ་ས་འདི་ན་སྔར་ལས་མང་བའི་མཐོ་རིམ་མཐར་ཕྱིན་སློབ་ཆེན་སློབ་མས་ལས་རིགས་གསར་སྐྲུན་ལ་རྒྱུས་ལོན་དང་དེར་བསམ་བློ་གཏོང་བ། དེར་ཚོད་ལྟ་བྱེད་པའི་སྟེགས་བུ་ཞིག་དང་། ཁོ་ཚོ་ཕན་ཚུན་ཉམས་མྱོང་བརྗེ་རེས་དང་། ཐོན་ཁུངས་མཉམ་སྤྱོད། མཉམ་དུ་འཕེལ་རྒྱས་དང་མཉམ་འབྲེལ་སོགས་བྱེད་པའི་སྟེགས་བུ་དང་རྩ་འཛུགས་ཤིག་དགོས། དེར་བརྟེན་ཁོས་ལྷ་ས་གྲོང་ཁྱེར་མཐོ་སློབ་མཐར་ཕྱིན་མི་སྣའི་ཚོང་ལས་གསར་འཇུག་མཐུན་ཚོགས་ཀྱི་གྲ་སྒྲིག་བྱ་བའི་མགོ་བརྩམས་པ་དང་། གྲ་སྒྲིག་ཚན་ཆུང་ལ་ནོར་བུ་དགྲ་འདུལ་དང་། བཀྲ་ཤིས། ཡོན་ཏན་རྒྱ་མཚོ་སོགས་ལས་རིགས་གསར་སྐྲུན་ཁྲོད་ཉམས་མྱོང་དང་གྲུབ་འབྲས་ལེགས་པའི་བོད་ལྗོངས་ཀྱི་མཐོ་རིམ་མཐར་ཕྱིན་སློབ་མ14ལས་གྲུབ་པ་དང་། དེར་གྱོན་ཆས་དང་། ཆ་འཕྲིན་ལག་རྩལ(IT)། བཟའ་བཏུང་། ཡུལ་སྐོར། སློབ་གསོའི་གསོ་སྦྱོང་སོགས་ཁྱབ་ཁོངས་དུ་མ་འདུས།

བཀྲ་ཤིས་ཀྱིས་གྱོན་ཆས་ཇུས་འགོད་བྱེད་པ།

     དེ་མིན་གྱོན་ཆས་ཇུས་འགོད་བྱེད་པའི་བཀྲ་ཤིས་ཀྱི་ཡིད་འོངས་མའི་གྱོན་ཆས་མཚན་རྟགས་ནི་བོད་ལྗོངས་ཀྱི་སྲོལ་རྒྱུན་གྱོན་ཆས་དེ་དེང་རབས་ཀྱི་རྒྱུ་ཆར་མཐུན་སྦྱོར་གནང་བའི་ཇུས་འགོད་ལེགས་པོ་ཞིག་ཡིན་ཞིང་། རྒྱལ་ཁབ་ཕྱི་ནང་དུ་དགའ་བསུ་མི་དམན་པ་བྱེད་པ་ཡིན།