དྲ་གནས་ནི་དྲ་འབུ་ཡོང་སའི་མངལ་སྒོ་ཡིན།

དྲ་གནས་ནི་དྲ་འབུ་ཡོང་སའི་མངལ་སྒོ་ཡིན།

        དྲ་རྒྱའི་སྤྱོད་སྒོ་ཉིན་རེ་བཞིན་ཤུགས་ཆེར་འགྲོ་བཞིན་པའི་ད་ལྟའི་དུས་སྐབས་འདིར།  མི་རྣམས་ཀྱིས་ཉིན་རེའི་འཚོ་བའི་ཁྲོད་ཀྱི་བྱ་བཞག་གང་མང་ཞིག་དྲ་ཐོག་ནས་སྒྲུབ་བཞིན་ཡོད་ལ།  འབྲི་ཀློག་སྦྱོར་གསུམ་ཤེས་མཁན་གྱི་མི་ཞིག་ཡིན་ཚེ་དྲ་རྒྱ་བེད་སྤྱོད་མི་གཏོང་མཁན་ཞིག་མེད་ཅེས་ལབ་ནའང་མ་འགྲིག་པ་མེད།
ཡིན་ཡང་། ཉེན་ཁ་ཧ་ཅང་ཆེ་བའི་སྐབས་བབ་ཀྱི་དངོས་ཡོད་གནས་ཚུལ་ཞིག་ནི།  ཆེ་ས་ནས་དྲ་ཐོག་ཏུ་གཞུང་གི་ཕྱག་ལས་གལ་ཆེན་ཁག་སྒྲུབ་མཁན་དང་ཆུང་ས་ནས་སྤྱིར་བཏང་གི་དྲ་ལམ་གླེང་མོལ་ལ་འཇུག་མཁན་གྱི་མི་བུ་དཀྱུས་མའི་ཁྲོད་དུ་དྲ་ཐོག་གི་བདེ་འཇགས་དང་ཉེན་སྲུང་སྐོར་གྱི་ཤེས་བྱ་འདང་ངེས་མེད་པའི་རྒྱུ་མཚན་གྱིས་དྲ་ཐོག་གི་གསང་མྱུལ་བ་དང་ཉེས་ཅན་པ་ཚོས་གོ་སྐབས་དེ་བཟུང་ནས་དྲ་རྒྱ་བེད་སྤྱོད་གཏོང་མཁན་ཚོའི་གློག་ཀླད་སྟེང་གི་ཉེན་སྲུང་གི་ནུས་བ་ཞན་པའི་མ་ལག་ཁག་ལ་འཇབ་རྒོལ་རབ་དང་རིམ་པ་བྱེད་བཞིན་ཡོད་པ་ཚང་མས་མཁྱེན་གསལ་ཡིན་པས།  དྲ་རྒྱ་བེད་སྤྱོད་གཏོང་མཁན་ཞིག་ཡིན་ཚེ་དེའི་སྐོར་གྱི་གནས་ཚུལ་ཁག་ལ་གོ་རྟོགས་ངེས་ཅན་དགོས་རྒྱུ་དེ་ཧ་ཅང་གལ་ཆེན་པོ་ཆགས་ཡོད།

        དེར་བརྟེན་འདིར་ཕྲན་གྱིས་ཁ་ཚ་དགོས་གཏུག་གི་དྲ་རྒྱའི་བདེ་འཇགས་དང་འབྲེལ་བའི་ཤེས་བྱ་ཐུང་ངུ་ཞིག་སེམས་གཏམ་གྱི་ཚུལ་དུ་བརྗོད་འདོད་བྱུང་། ཁྱེད་རང་ནམ་རྒྱུན་དྲ་ལམ་ལ་མྱུལ་དུས་སོ་སོའི་གློག་འཕྲིན་དང་།  ངོ་དེབ།  ཁྱེའུ་འཕྲིན(QQ)ཡང་ན་ཟིན་ཕྲན(weibo)སོགས་བརྒྱུད་ནས་དྲ་གནས་དང་ལྷན་དུ་སྦྱར་བའི་འཕྲིན་ཐུང་ཁྱད་མཚར་དཔེར་ན།  ཁྱེད་ཀྱི་བརྙན་པར་ཁྱད་མཚར་བོ་ཞིག་དྲ་ཐོག་ཏུ་ཤུགས་ཆེར་ཁྱབ་བཞིན་པ་དེ་མཐོང་བྱུང་ངམ། ཀྲུང་གོ་དང་འཇར་པན་དབར་གྱི་རྩོད་རྙོག་དང་འབྲེལ་བའི་གནས་ཚུལ་གསར་བ་དེ་ཀློག་རོགས། ཨ་རིའི་སྲིད་འཛིན་འོས་འདེམས་སྐོར་གྱི་གསར་འགྱུར་ཀློག་རོགས་སོགས་འབྱོར་མྱོང་ཡོད་དམ།
        གནས་སྟངས་དེ་འདྲའི་སྐབས་སུ་ཁྱེད་ཀྱིས་རང་ཉིད་ཀྱི་འདོད་བློ་ལྟར་བསམ་བློ་སྣ་གཅིག་མ་བཏང་བར་ཡིད་གཉིས་ཐེ་ཚོམ་གང་ཡང་མེད་པའི་སྒོ་ནས་དྲ་གནས་དེ་དག་གི་སྟེང་དུ་ཐད་ཀར་བསྣུན་རྐྱང་བྱེད་ཀྱི་ཡོད་དམ། དོན་དངོས་ཐོག་བྱེད་ལས་དེ་འདྲའི་རིགས་ཀྱིས་རང་ཉིད་གཅིག་པུ་ཙམ་མ་ཡིན་པར་རང་ཉིད་ཀྱི་ཉེ་འཁོར་གྲོགས་པོ་དང་རང་ཉིད་འཚོ་གནས་བྱེད་སའི་སྤྱི་ཚོགས་ཧྲིལ་པོའི་བདེ་འཇགས་ལ་དོ་ཐོག་གཏོང་གི་ཡོད།  གང་ཡིན་ཞེ་ན།  དྲ་གནས་དེ་འདྲའི་རིགས་ཕལ་ཆེ་བ་ཞིག་ནི་མུན་ནག་གི་ལྭ་བ་གྱོན་མཁན་གྱི་གསང་མྱུལ་བ་གནག་སེམས་ཅན་དེ་ཚོས་བསྐུར་ཡོང་གི་ཡོད་ལ།  ཁོང་ཚོས་ཉེན་སྲུང་མེད་པའི་ང་ཚོའི་གློག་ཀླད་ཀྱི་མ་ལག་གི་སྟེང་དུ་འཇབ་རྒོལ་བྱེད་པའི་ངན་ཇུས་འཐེན་གྱི་ཡོད་སྟབས།   ཟུར་སྣོན་དང་འདྲ་བར་དྲ་གནས་དེ་དག་གིས་ཀྱང་ཉེན་ཚབས་ཅན་གྱི་ནད་འབུའི་རིགས་ཁུར་ཡོང་ནས་ག་དུས་ཡིན་ཡང་ང་ཚོར་གནོད་འཚེ་གཏོང་སྲིད་པ་ཚང་མས་ཧ་གོ་དགོས། འོན་ཀྱང་ཁྱེད་ཀྱིས་འཚབ་ཚོམ་མེད་པར་དྲ་གནས་འབྱོར་ཚད་ཚང་མའི་སྒང་ལ་བསྣུན་རྐྱང་བྱས་ན་དེ་ནི་ཁྱེད་ཀྱིས་གསང་མྱུལ་བ་རང་ཉིད་ཀྱི་གློག་ཀླད་དུ་མགྲོན་འགུག་བྱས་པ་དང་གཅིག་མཚུངས་ཡིན་པས།  དྲ་གནས་གི་ལམ་ཁ་དེ་བརྒྱུད་ནས་མི་གཞན་པས་རང་ཉིད་ཀྱི་གློག་ཀླད་ལ་སྟངས་འཛིན་བྱས་ནས་མི་སྒེར་གྱི་གསང་བའི་གནས་ཚུལ་ཆ་ཚང་བརྐུ་འགྲོ་གི་རེད། 

        ང་ཚོར་འབྱོར་བའི་དྲ་གནས་དེ་དག་གིས་ཇི་ལྟར་གནོད་འཚེ་གཏོང་གི་རེད་ཟེར་ན།  སྤྱིར་བཏང་ནས་དོགས་གཞི་ཅན་དང་ཉེན་ཚབས་ཅན་གྱི་དྲ་གནས་གང་མང་ཞིག་ང་ཚོས་ཡིད་ཆེས་བཅོལ་འོས་པའི་ཚོགས་པ་དཔེར་ན་མཚོ་སྔོན་བོད་སྐད་རླུང་འཕྲིན་གྱི་དྲ་ཚིགས་ཀྱི་ངོ་བོར་བརྫུས་ནས་ཡོང་གི་རེད་ལ།  ཡང་ཁ་ཤས་ཤིག་ནི་བོད་ཀྱི་རྩོམ་རིག་དྲ་བ་སོགས་ཀྱི་ངོ་བོའི་ཐོག་ཡོང་སྟེ་ང་ཚོ་དྲ་གནས་དེ་དག་ལ་མྱུལ་བར་སྐུལ་མ་བྱས་ནས་མཚམས་རེར་ང་ཚོ་མགོ་བོ་རྨོངས་སུ་འཇུག་གི་ཡོད།  གནས་སྟངས་དེ་འདྲའི་འོག་ཏུ་ང་ཚོས་ཀྱང་དྲ་གནས་དེ་དག་གི་སྟེང་དུ་བསྣུན་ནས་གནས་ཚུལ་གསར་བ་དང་རྩོམ་ཡིག་གསར་བ་ཁག་ལྟ་ཀློག་བྱེད་པའི་གོམས་གཤིས་ངན་པ་འཇགས་ཡོད།  ཡིན་ཡང་།  བརྒྱུད་རིམ་དེའི་ཁྲོད་དུ་ཉེན་ཚབས་ཅན་གྱི་དྲ་གནས་དེ་དག་གིས་ང་ཚོ་དྲ་ངོས་གཞན་ཞིག་ལ་ཁྲིད་ནས་དེ་རུ་ང་ཚོའི་གློག་ཀླད་ལ་ནད་ཡམས་སྤེལ་གྱི་ཡོད་པས།  དྲ་གནས་ལའང་ཟུར་སྣོན་དང་གཅིག་མཚུངས་ཀྱི་ཉེན་ཁ་ཡོད་པ་ཚང་མས་ངེས་པར་དུ་ཡིད་འཛིན་བྱེད་དགོས།

        དྲ་གནས་ནི་རང་ཉིད་ཀྱི་གློག་ཀླད་ནང་གི་གནས་ཚུལ་བརྐུ་བྱེད་ཀྱི་བརྒྱུད་ལམ་གཙོ་བོ་ཞིག་ཡིན་པས། དྲ་གནས་སྐོར་གྱི་ཉེན་ཁ་ལ་གཡོལ་བའི་ཐབས་ལམ་འཚོལ་རྒྱུ་ནི་ང་ཚོ་ཚང་མས་སྣང་མེད་དུ་འཇོག་མི་ཉན་པའི་དོན་དག་གལ་ཆེན་ཞིག་རེད། གལ་ཏེ་གཤམ་དུ་འཁོད་པའི་ལམ་སྟོན་ཁག་གི་རྗེས་སུ་འཇུག་པ་ཡིན་ན།  ཁྱེད་ཀྱིས་སོ་སོའི་དྲ་ཐོག་གི་བདེ་འཇགས་བརྟན་སྲུང་བྱེད་ཐུབ།
གཅིག  ཁྱེད་ལ་དྲ་གནས་རིགས་འབྱོར་སྐབས་ངེས་པར་དུ་དྲ་གནས་གཏོང་མཁན་གྱི་མི་དེ་སོ་སོའི་ངོ་ཤེས་ཡིན་མིན་བརྩད་གཅོད་གཏོང་དགོས་ལ།  གལ་སྲིད་ངོ་མི་ཤེས་ན་མི་དེས་བསྐུར་བའི་དྲ་གནས་གི་སྟེང་དུ་མ་བསྣུན་པར་རང་སོར་འཇོག་དགོས།  གལ་ཏེ་ངོ་ཤེས་གྲོགས་པོ་ཞིག་གི་མིང་ཐོག་ནས་འབྱོར་རུང་།  ཁྱེད་ཀྱིས་དྲ་གནས་དེ་ཁ་ཕྱེ་འདོད་ཚེ། སོ་སོའི་གྲོགས་པོར་དངོས་སུ་འབྲེལ་བ་བྱས་ནས་དྲ་གནས་དེ་དོན་དངོས་ཐོག་ཁོང་གིས་བཏང་བ་ཡིན་མིན་ཁག་ཐེག་བྱེད་དགོས།  
གཉིས། གལ་སྲིད་ཁྱེད་ལ་འབྱོར་བའི་དྲ་གནས་དེ་དག་ནམ་རྒྱུན་ལྟ་བུར་མངོན་གྱི་ཡོད་རུང་།  སོ་སོའི་བདེ་འཇགས་ལ་དོ་ཕོག་མ་འགྲོ་བའི་ཕྱིར་དུ་ག་དུས་ཡིན་ཡང་བརྟག་དཔྱད་གཏོང་རྒྱུ་ནམ་ཡང་བརྗེད་མི་ཉན།  གློག་འཕྲིན་ནང་འབྱོར་བའི་དྲ་གནས་གི་རིགས་ཡིན་ན།  དྲ་རྒྱའི་ཁ་བྱང་ངོ་མ་དེ་མདའ་རྩེའི་རྩིབས་ཀྱི་ཡིག་སྒམ་ནང་མངོན་གྱི་རེད།  རྗེ་མེལgmailདང་གློག་འཕྲིན་དྲ་བྱང་གཞན་པའི་ཁྲོད་དུ།  དྲ་རྒྱའི་ཁ་བྱང་ངོ་མ་དེ་ཁྱེད་ཀྱི་བཤེར་ཆས་འོག་གི་གཡོན་ཕྱོགས་ཀྱི་ཟུར་ངོས་སུ་ཡོད་པའི(statusBar)ནང་དུ་མངོན་གྱི་ཡོད།  ཁྱེད་ཀྱི་གློག་འཕྲིན་ནང་འབྱོར་བའི་དྲ་གནས་ཁ་ཤས་དང་ལྟ་བུའི་ངོ་བོར་བརྫུས་ནས་ཡོང་གི་རེད།  ཡིན་ཡང་གོང་དུ་ཞུས་ཟིན་པ་ལྟར།  དྲ་གནས་དེ་རིགས་ཀྱིས་ཁྱེད་རང་དྲ་བྱང་གཞན་ཞིག་གི་ངོས་སུ་ཁྲིད་ནས་དེ་རུ་སྒེའུ་ཁུང་རྟགས་ཅན་གྱི་བཤེར་ཆས(windows browser) དཔེར་ནExplorer, Safari, Chrome སོགས་བརྒྱུད་ནས་གནོད་འཚེ་ཅན་གྱི་དྲ་འབུ་རིགས་ཁྱེད་ཀྱི་གློག་ཀླད་དུ་འཛུལ་བར་སྒུག་ནས་བསྡད་ཡོད།
གསུམ། ཁྱེད་དང་མཉམ་དུ་བགོ་བཤའ་བརྒྱབ་པའི་གནས་ཚུལ་དང་གསར་འགྱུར་རིགས་ཐད་ཀར་དྲ་གནས་བརྒྱུད་ནས་བཙལ་བ་ཡིན་ན།  ཉེན་ཁ་ཧ་ཅང་ཆེ་བས།  དྲ་གནས་སྒང་ལ་ཐད་ཀར་མ་བསྣུན་པར།  དེའི་ཚབ་ཏུ་འཚོལ་ཞིབ་འཕྲུལ་ཆས་བརྒྱུད་ནས་དྲ་གནས་དེ་དང་འབྲེལ་བའི་གནས་ཚུལ་སྐོར་གྱི་བརྗོད་གཞི་འཚོལ་ཞིབ་བྱེད་དགོས།
བཞི། རང་ཉིད་ལ་འབྱོར་བའི་དྲ་གནས་ཁག་ལ་བརྟག་དཔྱད་གཏོང་ཕྱིར། དྲ་གནས་དེ་ངོ་བཤུས་བརྒྱབ་ནས་ས་ཀྱི་བར་སྟོང་དེར་བླུགས་རྗེས།  དྲ་གནས་གང་དེར་དྲ་འབུ་ཡོད་མེད་ཀྱི་ལན་ལ་སྒུག   འོན་ཀྱང་ཡིད་འཇོག་བྱེད་དགོས་པའི་དོན་གནད་གལ་ཆེན་ཞིག་ནིvirustotalཡིས་དྲ་འབུ་འགོག་སྲུང་གི་མཉེན་ཆས་མ་ལག་བཅུ་བཞི་ལྷག་བེད་སྤྱོད་བཏང་ནས་ཞིབ་བཤེར་དང་བརྟག་དཔྱད་གཏོང་གི་ཡོད་རུང་།  དེས་གནོད་པ་ཅན་གྱི་ཡིག་ཆ་དང་དྲ་གནས་ཡོད་ཚད་ངོས་འཛིན་ཐུབ་ཀྱི་མེད་ལ།  ལྷག་པར་དུ་ཚོགས་པ་དང་མི་སྡེ་གང་རུང་ལ་དམིགས་འབེན་དུ་བཟུང་བའི་དྲ་འབུ་གསར་བའི་རིགས་དེ་བས་ཀྱང་ངོས་འཛིན་ཐུབ་རྒྱུ་ཁག་པོ་ཡིན་པས།  དྲ་གནས་འདྲ་མིན་འབྱོར་དུས།  མ་བསྣུན་སྔོན་ལ་བསམ་བློ་གཏོང་རྒྱུ་དེ་ཁྱེད་ཀྱི་གདམ་ཀ་ཡག་ཤོས་དེ་ཡིན།  དེ་ལྟར་བྱས་ན་ཁྱེད་ཀྱིས་དྲ་ཐོག་གི་ཉེན་ཁའི་རིགས་འགོག་སྲུང་བྱེད་ཐུབ་པ་ཡིན་ལ།  མི་གཞན་པས་ཁྱེད་ཀྱི་གློག་ཀླད་རྩ་བ་ཉིད་ནས་སྟངས་འཛིན་བྱེད་མི་ཐུབ་པས་དྲ་ཐོག་གི་བདེ་འཇགས་ཁྱེད་ལ་དབང་ངེས་ཡིན།
        འདི་ནི་ཉེ་ཆར་འབྱོར་བའི་ཉེན་ཁ་ཅན་གྱི་དྲ་གནས་ཁག་ཅིག་རེད་ལ། གོ་རྟོགས་གསལ་པོ་ཡོང་ཆེད་འདིར་རྒྱ་ཆེ་བའི་ཀློག་པ་པོ་ཚོར་པར་རིས་ཀྱི་ལམ་ནས་གསལ་སྟོན་བྱས་པ་ཡིན།

དཔྱད་གཞི་ཡིག་ཆ།
དྲ་ཐོག་གི་བདེ་འཇགས་མཁོ་ནhttpsཞེས་པའི་བདེ་འཇགས་ཀྱི་མཐུན་རྐྱེན་འཕར་མ་དེ་བེད་སྤྱོད་གཏོང་དགོས་ལ།  དེའི་སྐོར་གྱི་རྩོམ་ཡིག་ཀློག་འདོད་ན་མཆོད་མེ་བོད་ཀྱི་རྩོམ་རིག་དྲ་ངོས་ཕེབས་ནས་ཞིབ་ཕྲ་ཀློག་ཆོག་ལ། བརྙན་པར་ལམ་ནས་གཟིགས་འདོད་ན་དྲ་གནས་འདི་ངོ་བཤུས་བརྒྱབ་རྗེས་བཤེར་ཆས་ནང་བླུགས་ནས་གཟིགས།</ p>
ཟུར་སྣོན་གྱི་ཉེན་ཁ་དང་འབྲེལ་བའི་རྩོམ་ཡིག་ཀློག་འདོད་ན་མཚོ་སྔོན་པོ་བོད་ཡིག་ཟིན་བྲིས་ནང་གསལ་བའི་རྩོམ་ཡིག འདི་ཀློག་ཐུབ་ན་ལེགས་ལ།  བརྙན་པར་གྱི་ལམ་ནས་གཟིགས་འདོད་ཚེ།