logo

ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཟླ་མཇུག་རིག་རྩལ་སྤྲོ་ཚོགས་བསྡུས་པ།

རྩོམ་པ་པོ།:སྟག་རིག་འབྲུག་ཐར། ཡོང་ཁུངས།:མཚོ་སྔོན་པོ་དྲ་བ། དུས་ཚོད།:2011-03-28 ཀློག་གྲངས།:


དམངས་སྲོལ་རིག་གནས《གཉེན་སྟོན་གྱི་ཆོ་ག》ཚན་པ་ཞིག་འཁྲབ་བཞིན་པ།


ཉམས་བརྒྱད་གར་གྱི་ཡོ་ལང་ཁྲོད་ནས་ལང་ཚོ་གསར་བ་བསུས།

            སློབ་གྲྭའི་རིག་གནས་འཚོ་བ་ཕུན་སུམ་ཇེ་ཚོགས་དང་སློབ་སྦྱོང་གི་ངལ་དུབ་སེལ་ཆེད་དམ་སློབ་གྲྭའི་སྒྱུ་རྩལ་ཕྱོགས་ཀྱི་མཁའ་དབུགས་གསར་བ་སྔོག་འདོན་བྱེད་ཆེད། 2011ལོའི་སྐབས་དང་པོའི་ཟླ་མཇུག་རིག་རྩལ་སྤྲོ་ཚོགས་དེ་ཟླ3པའི་ཚེས27ཉིན་ཏེ་གཟའ་ཉི་མའི་ཕྱི་དྲོའི་དུས་ཚོད་བེད་སྤྱད་ནས་སློབ་གྲྭའི་དགེ་བཟོ་བ་དང་སློབ་མ་སྟོང3ལྷག་གི་མཉམ་འབྲེལ་གྱི་རྩོལ་བའི་འོག་ནས་བདེ་ལེགས་ངང་མཇུག་སྒྲིལ་བ་རེད།


གེ་སར་རྒྱལ་བོའི་འཁྲབ་ཚན་ཞིག་ཚང་མའི་མིག་གི་དགའ་སྟོན་དུ་ཕུལ།


ལོ་ཆུང་བྱིས་པ་དག་གི་མ་བཅོས་འཛུམ་ཆུང་རེ་ན་མ་འོངས་པ་འོད་སྣང་གིས་ཁེངས།

            ཐེངས་འདིའི་རིག་རྩལ་སྤྲོ་ཚོགས་སུ་ཁྱོན་བསྡོམས་རྩེད་མོ31ཙམ་ཡོད་མོད། སློབ་གྲྭའི་རིག་རྩལ་མགོ་བས་ཚེས26ཉིན་གྱི་སྐྱ་འགྲན《ཐོག་མའི་འགྲན་བསྡུར》ཁྲོད་རྩེད་མོ21བདམས་ཐོན་བྱུང་། རྩེད་མོ21གི་ཁྲོད་དུ་ཞབས་བྲོའི་རིགས་ལ་བོད་རིགས་ཞབས་བྲོ། སོག་རིགས་ཞབས་བྲོ། རྒྱ་གར་རིགས་ཀྱི་ཞབས་བྲོ་སོགས་དང་། གླུ་གཞས་ཀྱི་རིགས་ལ་བཞད་གར། ཁ་ཤགས། རྒྱན་གོས་འཁྲབ་སྟོན། དམངས་སྲོལ་རྩེད་མོ་སོགས་རྣམ་པ་མང་པོ་འདུས་ཡོད་པ་རེད།


སློབ་གྲྭའི་དགེ་བཟོ་བ་རྣམ་པས་ཀྱང་མི་རིགས་ཀྱི་དྲི་མ་མ་ཡལ་བའི་ཨ་རྩེད་ཚན་པ་ཞིག་འཁྲབ་ལེན་བྱེད་བཞིན་པ།


སོག་རིགས་ཀྱི་ཞབས་བྲོ་རྩེ་བའི་ཚུལ་རེད།

            ཚེས27ཉིན་གྱི་གྱ་ནོམ་པའི་གར་གྱི་རྣམ་གྲངས་དང་ཡིད་ཀྱི་དང་བ་འདྲེན་པའི་སྟངས་སྟབས། དགའ་དགོད་ཀྱི་ཡོ་ལང་རྫོགས་པའི་ལྟད་མོ་རེ་རེས་དགེ་སློབ་ཡོངས་ལ་སྐྱིད་སྣང་གི་སེམས་ཁམས་དང་སྤྲོ་སྣང་གི་འཛུམ་མདངས་བྱུང་ཞིང་། མིག་དབང་ཅིག་ཅར་འཕྲོག་པའི་རེབ་འདིའི་སྤྲོ་སྐྱིད་ལྷན་འཛོམས་ཀྱིས་ཚང་མའི་སེམས་སུ་བརྗེད་དཀའ་བའི་བག་ཆགས་ཟབ་མོ་བཞག་པས། དུས་ཚོད་གཉིས་ཙམ་རིང་གི་ཛ་དྲག་གི་འགྲན་བསྡུར་ཇི་ལྟར་མཇུག་རྫོགས་པའང་མ་ཚོར་བ་རེད།


མཉེན་ལྕུག་གི་ལག་ཟུང་བརྒྱུད་ནས་མཛའ་བརྩེའི་ཨ་ལོང་གཅིག་ཏུ་སྒྲིལ། 


འཇོ་སྒེག་གི་མཚར་ཉམས་ཁྲོད་ནས་རྒྱ་གར་ཞབས་བྲོ་འཁྲབ་བཞིན་པའི་ཚུལ་རེད།

            གཅིག་ལས་གཅིག་ལྷག་གི་སྣ་ཚོགས་པའི་ལྟད་མོའི་ཁྲོད་ནས་བརྩོན་འགྲུས་གླིང་གི་སྐོར་ལས་ལོ་རིམ་དགུ་བའི་འཛིན་གྲྭ་བཞི་བའི་དམངས་ཁྲོད་རྩེད་མོ《གེ་སར་རྒྱལ་བོའི་འཁྲབ་ཚན》ཞིག་ལ་ཨང་དང་པོའི་བྱ་དགའ་ཐོབ་པ་དང་། ལོ་རིམ་དགུ་བའི་འཛིན་གྲྭ་ལྔ་བའི་བོད་རིགས་ཞབས་བྲོ《མཚོ་སྔོན་པོའི་བསྟོད་གླུ》ལ་ཨང་གཉིས་པའི་བྱ་དགའ་དང་། ལོ་རིམ་དགུ་བའི་འཛིན་གྲྭ་གཉིས་པའི་དམངས་སྲོལ་རྩེད་མོ《གཉེན་སྟོན་བཀྲ་ཤིས་གཡང་འཁྱིལ》ལ་བྱ་དགའ་ཨང་གསུམ་པ་ཐོབ་པ་རེད། གཞན་བློ་ལྡན་གླིང་གི་སྐོར་ལས་ལོ་རིམ་དང་པོའི་འཛིན་གྲྭ་གཉིས་པའི《རྡོག་བྲོ》ལ་ཨང་དང་པོའི་བྱ་དགའ་དང་ལོ་རིམ་དང་པོའི་འཛིན་གྲྭ་དང་པོའི《དཔྱིད་དཔལ་གང་དུ་ཤར》ཞེས་པར་བྱ་དགའ་ཨང་གཉིས་པ་ཐོབ་པ་རེད།


འབྲེལ་ཡོད་འོས་སྦྱོར།