དམངས་ཡོངས་དྲ་རྒྱའི་བདེ་འཇགས་ཀྱི“འགོག་སྲུང་འཛིང་རགས”བརྟན་པོར་འཛུགས་དགོས།

        དྲ་རྒྱའི་བདེ་འཇགས་མེད་ན་རྒྱབ་ཁབ་ཀྱི་བདེ་འཇགས་མེད་ལ། དཔལ་འབྱོར་སྤྱི་ཚོགས་བརྟན་བརླིང་ངང་འཁོར་སྐྱོད་ཀྱང་བྱེད་མི་ཐུབ་པས། རྒྱ་ཆེའི་མི་དམངས་མང་ཚོགས་ཀྱི་ཁེ་ཕན་ལའང་འགན་སྲུང་བྱེད་དཀའ་བ་རེད།
        ཏང་གི་ཚོགས་ཆེན་བཅོ་བརྒྱད་པའི་ཚུན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དྲ་རྒྱ་སྟོབས་ལྡན་རྒྱལ་ཁབ་འཛུགས་པའི་དགོངས་པ་གལ་ཆེན་གྱི་མཛུབ་སྟོན་འོག རང་རྒྱལ་གྱི་དྲ་རྒྱའི་བདེ་འཇགས་སྲིད་ཇུས་ཀྱི་ཁྲིམས་སྲོལ་མ་ལག་མུ་མཐུད་འཐུས་ཚང་དུ་བཏང་བ་དང་། དྲ་རྒྱའི་བདེ་འཇགས་བྱ་བའི་ལམ་སྲོལ་གྱི་ནང་རྐྱེན་རང་བཞིན་འཐུས་ཚང་དུ་གྱུར་ནས། སྤྱི་ཚོགས་ཡོངས་ཀྱི་དྲ་རྒྱའི་བདེ་འཇགས་འདུ་ཤེས་དང་ནུས་པ་མངོན་གསལ་གྱིས་མཐོར་འདེགས་བྱུང་ལ། དྲ་རྒྱའི་བདེ་འཇགས་འགན་སྲུང་མ་ལག་དང་ནུས་པ་འཛུགས་སྐྲུན་ལ་མགྱོགས་མྱུར་གྱིས་སྐུལ་འདེད་བཏང་ནས། རྒྱལ་ཁབ་ཀྱིས་དྲ་རྒྱའི་བར་སྣང་གི་དབང་ཆ་གཙོ་བོ་དང་བདེ་འཇགས། འཕེལ་རྒྱས་ཁེ་ཕན་བཅས་སྲུང་སྐྱོང་བྱེད་པར་འགན་སྲུང་སྲ་ཞིང་བརྟན་པ་འདོན་སྤྲོད་བྱས།
        དྲ་རྒྱའི་བདེ་འཇགས་སྲིད་ཇུས་ཀྱི་ཁྲིམས་སྲོལ་མ་ལག་འཐུས་ཚང་དུ་བཏང་བ།
        2022ལོའི་ཟླ6པའི་ཚེས1ཉིན། དྲ་རྒྱའི་བདེ་འཇགས་བཅའ་ཁྲིམས་དངོས་སུ་ལག་བསྟར་བྱས་ནས་ལོ་ལྔ་འགོར་ཡོད། རང་རྒྱལ་གྱི་དྲ་རྒྱའི་བདེ་འཇགས་ཁྱབ་ཁོངས་ཀྱི་རྨང་གཞིའི་རང་བཞིན་གྱི་བཅའ་ཁྲིམས་འདི་ལས་མི་སྒེར་གྱི་ཆ་འཕྲིན་སྲུང་སྐྱོང་དང་དྲ་རྒྱའི་མགོ་སྐོར་བཅོས་སྐྱོང་། གནད་འགག་ཆ་འཕྲིན་གྱི་སྒྲིག་ཆས་དང་དྲ་རྒྱའི་དངོས་མིང་ལམ་ལུགས་ལ་སྲུང་སྐྱོང་བྱེད་པ་སོགས་ཀྱི་ཕྱོགས་ནས་གཏན་འབེབས་གསལ་བོ་བྱས་ཡོད་པས། དེ་ནི་རང་རྒྱལ་གྱི་དྲ་རྒྱའི་བདེ་འཇགས་ཁྲིམས་སྐྱོང་ཅན་འཛུགས་སྐྲུན་གྱི་ལམ་ཚད་རྡོ་རིང་ལྟ་བུར་གྱུར་ཡོད།
        ཉེ་བའི་ལོ་འགའི་རིང་། རང་རྒྱལ་གྱིས་དྲ་རྒྱའི་བདེ་འཇགས་ཁྱབ་ཁོངས་ཀྱི་སྟེང་རིམ་ཇུས་འགོད་ལ་མགྱོགས་མྱུར་ངང་སྐུལ་འདེད་བཏང་སྟེ། དྲ་རྒྱའི་བདེ་འཇགས་བཅའ་ཁྲིམས་ལག་ལེན་དང་དངོས་འབེབས་གཏིང་ཟབ་བྱེད་པའི་རྨང་གཞིའི་སྟེང་། དྲ་རྒྱའི་བདེ་འཇགས་དང་འབྲེལ་བ་ཡོད་པའི་འཐབ་ཇུས་འཆར་འགོད་དང་དང་བཅའ་ཁྲིམས་ཁྲིམས་སྲོལ། ཚད་གཞི་དང་དམིགས་ཚད་གཏན་འབེབས་དང་འཐུས་ཚང་དུ་བཏང་བས། དྲ་རྒྱའི་བདེ་འཇགས་ཀྱི“གདུང་བཞི་ཀ་བརྒྱད”ཕལ་ཆེར་བཙུགས་ཡོད།
        འཐབ་ཇུས་བཀོད་སྒྲིག་ལ་ཤུགས་བསྣན་པ། «རྒྱལ་ཁབ་དྲ་རྒྱའི་བར་སྣང་གི་བདེ་འཇགས་འཐབ་ཇུས»ཁྱབ་བསྒྲགས་བྱས་ཤིང་། གཞི་གྲངས་བདེ་འཇགས་བཅའ་ཁྲིམས་དང་མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས། «གནད་འགག་ཆ་འཕྲིན་རྨང་གཞི་སྒྲིག་ཆས་ཀྱི་བདེ་འཇགས་ཀྱི་སྲུང་སྐྱོང་སྲོལ་ཡིག»སོགས་ཀྱི་བཅའ་ཁྲིམས་ཁྲིམས་སྲོལ་རབ་དང་རིམ་པ་གཏན་ལ་ཕབ་ཏེ། «རླངས་འཁོར་གཞི་གྲངས་བདེ་འཇགས་ཀྱི་དོ་དམ་གཏན་འབེབས་འགའ(ཚོད་ལྟ)»སོགས་སྲིད་ཇུས་ཡིག་ཆ་གཏན་འབེབས་བྱས་ནས། དྲ་རྒྱའི་བདེ་འཇགས་ལས་དོན་ཁྲིམས་སྐྱོང་ཅན་གྱི་རྣམ་པས་འཁོར་སྐྱོད་བྱེད་དུ་བཅུག
        དྲ་རྒྱའི་བདེ་འཇགས་ཀྱི་ཉེན་ཁ་འགོག་པའི་ནུས་པར་ཤུགས་བསྣན་པ། «རྒྱལ་ཁབ་དྲ་རྒྱའི་བདེ་འཇགས་དོན་རྐྱེན་གྱི་འཕྲལ་བསྟུན་སྔོན་ཇུས»ལག་བསྟར་བྱས་ཏེ། དྲ་རྒྱ་བདེ་འཇགས་འཕྲལ་བསྟུན་དང་དོན་རྐྱེན་ཐག་གཅོད་ནུས་པ་མཐོར་འདེགས་སུ་བཏང་། དྲ་རྒྱའི་བདེ་འཇགས་ཞིབ་བཤེར་ལམ་ལུགས་དང་སྤྲིན་རྩིས་ཞབས་ཞུ་བདེ་འཇགས་དཔྱད་དཔོག་ལམ་ལུགས་བཙུགས་ནས། «དྲ་རྒྱའི་བདེ་འཇགས་ཞིབ་བཤེར་བྱེད་ཐབས»དང«སྤྲིན་རྩིས་ཞབས་ཞུ་བདེ་འཇགས་དཔྱད་དཔོག་བྱེད་ཐབས»ཁྱབ་བསྒྲགས་བྱས་ཤིང་། འདོན་སྤྲོད་ཕྲེང་འབྲེལ་གྱི་དྲ་རྒྱའི་བདེ་འཇགས་ཉེན་ཁ་ནུས་ལྡན་ངང་སྔོན་འགོག་དང་མེད་པར་བཏང་། «གཞི་གྲངས་རྒྱལ་མཚམས་བརྒལ་བའི་བདེ་འཇགས་དཔྱད་དཔོག་བྱེད་ཐབས»དངོས་སུ་བཏོན་ཏེ། རྒྱལ་ཁབ་ཀྱི་གཞི་གྲངས་རྒྱལ་མཚམས་བརྒལ་བའི་བདེ་འཇགས་དོ་དམ་ཀྱི་ཆུ་ཚད་ཇེ་མཐོར་བཏང་།
        དྲ་རྒྱའི་བདེ་འཇགས་རྒྱལ་ཁབ་ཚད་གཞིའི་མ་ལག་འཐུས་ཚང་དུ་བཏང་བ། «རྒྱལ་ཁབ་ཀྱི་དྲ་རྒྱའི་བདེ་འཇགས་ཚད་ལྡན་ཅན་བྱ་བའི་བསམ་འཆར་འགའ»དཔར་འགྲེམ་བྱས་ཏེ། དྲ་རྒྱའི་བདེ་འཇགས་ཀྱི་རྒྱལ་ཁབ་ཚད་གཞིར་གཅིག་གྱུར་གྱི་ལག་རྩལ་ཁོངས་སྒྲིལ་ཕྱོགས་ནས་དྲ་རྒྱའི་བདེ་འཇགས་རྒྱལ་ཁབ་ཀྱི་ཚད་གཞི340བཟོས་ནས་ཁྱབ་བསྒྲགས་བྱས་པ་བརྒྱུད། རང་རྒྱལ་གྱིས་གཙོ་ཁྲིད་བྱས་ཤིང་དེའི་ཁྲོད་དུ་ཞུགས་པའི་རྒྱལ་སྤྱིའི་ཚད་གཞི་མང་པོ་ཁྱབ་བསྒྲགས་བྱེད་པར་སྐུལ་འདེད་བཏང་ཡོད་པས། རང་རྒྱལ་གྱི་དྲ་རྒྱའི་བདེ་འཇགས་ཚད་གཞིའི་རྒྱལ་སྤྱིའི་སྐད་ཆ་བཤད་དབང་དང་ཤུགས་རྐྱེན་མངོན་གསལ་གྱིས་མཐོར་འདེགས་བྱུང་ཡོད།
        འཇོན་མི་སྐྱེད་སྲིང་ཇེ་མགྱོགས་སུ་བཏང་ནས་འགོག་སྲུང་ནུས་པ་མཐོར་འདེགས་བྱས།
        2022ལོའི་ཟླ7པའི་ཚེས1ཉིན་ཀྲུང་དབྱང་དྲ་འཕྲིན་གཞུང་ལས་ཁང་གི་མཛུབ་ཁྲིད་འོག་དྲ་རྒྱའི་བདེ་འཇགས་སློབ་གླིང་གི་སློབ་མའི་གསར་གཏོད་རོགས་དངུལ་གྱི་འཆར་གཞི་དངོས་སུ་ལག་བསྟར་བྱེད་མགོ་བརྩམས། ཐེན་རུང་ཞིན་ཚན་རྩལ་སྡེ་ཚོགས་དང་། ཆི་ཨན་ཞིན་སྡེ་ཚོགས། ཝུའེ་ལའེ། གྲོག་མ་སྡེ་ཚོགས། ཀྲུང་གོ་དྲ་སྦྲེལ་འཕེལ་རྒྱས་ཐེབས་རྩ་ལྷན་ཚོགས་ཀྱི་དྲ་རྒྱའི་བདེ་འཇགས་ཆེད་དོན་ཐེབས་རྩ་བཅས་རོགས་སྐྱོར་བྱེད་མཁན་ཡིན་པའི་ཆ་ནས། བསྟུད་མར་ལོ་ལྔའི་རིང་སློབ་མ1200ཡིས་གསར་གཏོད་ཞིབ་འཇུག་བྱེད་པར་མ་དངུལ་གྱིས་རོགས་སྐྱོར་བྱ་རྒྱུ་རེད།
        དྲ་རྒྱའི་བར་སྟོང་གི་འགྲན་རྩོད་དེ་མཐར་གཏུགས་ནས་བཤད་ན་འཇོན་མིའི་འགྲན་རྩོད་ཡིན།
        ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ས་གནས་སོ་སོ་དང་སྡེ་ཚན་སོ་སོས་སྲིད་ཇུས་དང་བྱེད་ཐབས་རབ་དང་རིམ་པ་བཏོན་ནས་དྲ་རྒྱའི་བདེ་འཇགས་རིག་ཚན་འཛུགས་སྐྱོང་དང་འཇོན་མི་གསོ་སྐྱོང་གི་འཕེལ་རིམ་ཇེ་མགྱོགས་སུ་གཏོང་བར་སྐུལ་འདེད་བཏང་སྟེ། དྲ་རྒྱའི་བདེ་འཇགས་སློབ་གསོ་དང་ལག་རྩལ། ཐོན་ལས་བཅས་མཉམ་འདྲེས་འཕེལ་རྒྱས་ལ་སྐུལ་འདེད་བཏང་།
        དྲ་རྒྱའི་བདེ་འཇགས་ཀྱི་འཇོན་མི་གསོ་སྐྱོང་ལམ་སྲོལ་གསར་གཏོད་བྱེད་པ། «དྲ་རྒྱའི་བདེ་འཇགས་རིག་ཚན་འཛུགས་སྐྱོང་དང་འཇོན་མི་གསོ་སྐྱོང་ལ་ཤུགས་སྣོན་པའི་སྐོར་གྱི་བསམ་འཆར»དཔར་འགྲེམས་བྱས་ཏེ་དྲ་རྒྱའི་བར་སྣང་བདེ་འཇགས་ཀྱི་རིམ་པ་དང་པོའི་རིག་ཚན་བཙུགས་ནས། དྲ་རྒྱའི་བདེ་འཇགས་སློབ་གླིང་རྩེ་གྲ་འཛུགས་སྐྱོང་གི་དཔེ་སྟོན་རྣམ་གྲངས་ལག་བསྟར་བྱ་རྒྱུ་རེད། མིག་སྔར་རྒྱལ་ནང་གི་མཐོ་སློབ60ལྷག་ལ་དྲ་རྒྱའི་བདེ་འཇགས་སློབ་གླིང་བཙུགས་པ་དང་། མཐོ་སློབ200ལྷག་ལ་དྲ་རྒྱའི་བདེ་འཇགས་ཀྱི་དངོས་གཞིའི་ཚན་ཁག་གི་ཆེད་ལས་བཙུགས། ལོ་རེར་དྲ་རྒྱའི་བདེ་འཇགས་ཀྱི་མཐར་ཕྱིན་སློབ་མ་ཁྲི2ལས་བརྒལ་ཡོད།
        ཀྲུང་དབྱང་དྲ་འཕྲིན་གཞུང་ལས་ཁང་གིས་འབྲེལ་ཡོད་སྡེ་ཁག་དང་མཉམ་དུ་ཝུའུ་ཧན་གྲོང་ཁྱེར་གྱིས་རྒྱལ་ཁབ་དྲ་རྒྱའི་བདེ་འཇགས་འཇོན་མི་དང་གསར་གཏོད་རྟེན་གཞི་འཛུགས་སྐྲུན་བྱེད་པར་མཛུབ་སྟོན་གནང་སྟེ། རྒྱལ་ཁབ་ཀྱི་དྲ་རྒྱའི་བདེ་འཇགས་འཇོན་མིའི་མཐོ་ས་དང་གསར་གཏོད་མཐོ་ས། ཐོན་ལས་འདུས་སྡོད་ཁུལ་བསྐྲུན་རྒྱུ་རེད། རྒྱལ་ཁབ་དྲ་རྒྱའི་བདེ་འཇགས་སློབ་གསོའི་ལག་རྩལ་ཐོན་ལས་མཉམ་འདྲེས་འཕེལ་རྒྱས་ཚོད་ལྟ་ཁུལ་འཛུགས་སྐྲུན་བྱས་ཏེ། དྲ་རྒྱའི་བདེ་འཇགས་སློབ་གསོའི་ལག་རྩལ་ཐོན་ལས་མཉམ་འདྲེས་འཕེལ་རྒྱས་ཀྱི་ལམ་ལུགས་གསར་བ་དང་རྣམ་པ་གསར་བ་འཚོལ་ཞིབ་བྱ་རྒྱུ་རེད།
        ས་གནས་སོ་སོའི་ལས་དོན་ལའང་གྲུབ་འབྲས་གཡུར་དུ་ཟ་བ་ཐོབ་ཡོད། པེ་ཅིང་དུ་རྒྱལ་ཁབ་དྲ་རྒྱའི་བདེ་འཇགས་ཐོན་ལས་གླིང་གིས་དྲ་རྒྱའི་བདེ་འཇགས་ཐོན་ལས་གཅིག་བསྡུས་འཕེལ་རྒྱས་དང་དྲ་རྒྱའི་བདེ་འཇགས་ཀྱི་ལྟེ་བའི་ལག་རྩལ་ཚད་བརྒལ་ལ་གཙོ་གནད་དུ་སྐུལ་འདེད་བཏང་བ་དང་། ཨན་ཧུའེ་ཧོ་ཧྥེ་ཡིས་དྲ་རྒྱའི་བདེ་འཇགས་ཐོན་ལས་འཕེལ་རྒྱས་ལ་ཤུགས་བསྣན་ནས་ལས་རིགས་ཀྱི་སྣེ་འདྲེན་ཁེ་ལས་མགྱོགས་མྱུར་ངང་འཕེལ་རྒྱས་སུ་བཏང་། གསར་གཏོད་རྣམ་པའི་ཁེ་ལས་འབྲིང་ཆུང་འཕེལ་རྒྱས་མགྱོགས་མྱུར་བྱུང་ནས། རྒྱལ་ཡོངས་ཀྱི་ཞིང་ཆེན་བརྒལ་བའི་རྒྱལ་ཁབ་རིམ་པའི་དྲ་རྒྱའི་བདེ་འཇགས་ཐོན་ལས་གླིང་ཐོག་མ་ཁྲེང་ཏུའུ་དང་ཁྲུང་ཆིང་དུ་དོན་འཁྱོལ་བྱས་ནས། ནུབ་རྒྱུད་ཀྱི་དྲ་རྒྱའི་བདེ་འཇགས་ཐོན་ལས་གསར་གཏོད་འཕེལ་རྒྱས་ལ་སྣེ་ཁྲིད་བྱེད་པའི་མཐོ་ས་བསྐྲུན་རྒྱུ་རེད།
        སྟོབས་དང་ལྡན་པའི་སྲིད་ཇུས་དང་བྱེད་ཐབས་ཀྱིས་དྲ་རྒྱའི་བདེ་འཇགས་ཀྱི་འཇོན་མི་གསོ་སྐྱོང་དང་ལག་རྩལ་གསར་གཏོད། ཐོན་ལས་འཕེལ་རྒྱས་བཅས་ཀྱི་སྐྱེ་ཁམས་བཟང་པོ་མགྱོགས་མྱུར་ངང་ཆགས་པར་རམ་འདེགས་བྱས།
        དྲ་རྒྱའི་བདེ་འཇགས་ཀྱི་འགོག་སྲུང་འཛིང་རགས་མཉམ་དུ་སྐྲུན་པ།
        མིག་སྔར་དྲ་རྒྱའི་བར་སྣང་དང་དངོས་ཚན་སྤྱི་ཚོགས་མཉམ་འདྲེས་ཟབ་མོ་བྱུང་བ་དང་། གྲངས་འཛིན་ཅན་གྱི་ཚད་གཞི་རྒྱུན་ཆད་མེད་པར་གཏིང་ཟབ་ཏུ་སོང་ནས། དཔལ་འབྱོར་དང་སྤྱི་ཚོགས་སྤུས་ཚད་མཐོ་བའི་ངང་འཕེལ་རྒྱས་འགྲོ་བར་སྒུལ་ཤུགས་བསྣན་པ་དང་དུས་མཚུངས་སྔར་བྱུང་མྱོང་མེད་པའི་འགྲན་སློང་མང་པོ་ཀྱང་འཕྲད་ཡོད།
        ཉེན་ཁ་དང་འགྲན་སློང་ལ་ཧུར་ཐག་གིས་གདོང་གཏད་དེ་དྲ་རྒྱའི་བདེ་འཇགས་ཀྱི་འགོག་སྲུང་འཛིང་རགས་མཉམ་དུ་སྐྲུན་ཡོད། ཉེ་བའི་ལོ་འགའི་རིང་། འབྲེལ་ཡོད་སྡེ་ཚན་གྱིས་མི་སྒེར་གྱི་ཆ་འཕྲིན་སྲུང་སྐྱོང་ལས་དོན་གྱི་ཆུ་ཚད་དང་ལྟ་སྐུལ་དོ་དམ་བྱེད་ཤུགས་རྒྱུན་ཆད་པར་ཇེ་ཆེར་བཏང་ཡོད།
        2019ལོ་ནས་བཟུང་། ཀྲུང་དབྱང་དྲ་འཕྲིན་གཞུང་ལས་ཁང་སོགས་སྡེ་ཚན་བཞིས་མཉམ་འབྲེལ་ངངAPPཁྲིམས་འགལ་དང་སྒྲིག་འགལ་ངང་མི་སྒེར་གྱི་ཆ་འཕྲིན་བསྡུ་རུབ་དང་བེད་སྤྱོད་ཀྱི་ཆེད་དོན་བཅོས་སྒྲིག་བྱས་ཏེ། ཁྲིམས་འགལ་སྒྲིག་འགལ་གྱི་གནད་དོན་ཚབས་ཆེན་ཡོད་པའིAPPལ་ཡོངས་བསྒྲགས་ངང་བརྡ་ཁྱབ་གཏོང་བ་དང་། དག་ཐེར་བྱེད་པའི་བཀའ་རྒྱ་བསྒྲགས་པ། དྲ་ཐོག་ནས་མེད་པར་གཏོང་བ་སོགས་ཀྱི་ཆད་གཅོད་བྱེད་ཐབས་སྤྱད་པས་ཁྲིམས་འགལ་སྒྲིག་འགལ་གྱི་བྱ་སྤྱོད་ལ་ཟིལ་གྱིས་བསྣན་པ་རེད།
        པར་རྒྱག་འཕྲུལ་ཆས་ཀྱིས་སྒེར་གྱི་གསང་དོན་རྐུ་ཁྱེར་དང་། གསང་བའི་བརྙན་ལམ་ཉོ་ཚོང་བྱེད་པ། རྐུ་བཤེར་ལག་རྩལ་སོགས་སྤྱད་ནས་སྤྱི་དམངས་མི་སྒེར་གྱི་གསང་བ་ལྐོག་བཤེར་བྱེད་པའི་བྱ་སྤྱོད་ཁྲིམས་འགལ་ངང་སྤེལ་བར་དམིགས་ནས། 2021ལོའི་ཟླ5བ་ནས་བཟུང་ཀྲུང་དབྱང་དྲ་འཕྲིན་གཞུང་ལས་ཁང་གིས་འབྲེལ་ཡོད་སྡེ་ཚན་དང་མཉམ་དུ་བརྙན་ལེན་ཡོ་ཆས་དང་མཉམ་དུ་ཁྲིམས་འགལ་ཉེས་གསོག་གི་བྱ་སྤྱོད་ལ་གཅིག་བསྡུས་ངང་བཅོས་སྒྲིག་བྱས་ནས། རིགས་སོ་སོའི་ལས་སྟེགས་ཀྱིས་འབྲེལ་ཡོད་སྒྲིག་འགལ་གནོད་ཡོད་ཆ་འཕྲིན་ཁྲི3ལྷག་ཐག་གཅོད་བྱེད་པར་ལྟ་སྐུལ་བྱས་པ་དང་། ཁྲིམས་འགལ་ཉོ་ཚོང་དང་འབྲེལ་བ་ཡོད་པའི་ཁྲིམས་འགལ་གྱི་རྩིས་ཐོའི་ཨང་གྲངས5600ལྷག་ཐག་གཅོད་བྱས་པ་དང་། ཁྲིམས་འགལ་ཐོན་རྫས3000ལྷག་མེད་པར་བཏང་།
        དྲ་རྒྱའི་བདེ་འཇགས་ནི་མི་དམངས་ཀྱི་ཆེད་དུ་ཡིན་པ་དང་། དྲ་རྒྱའི་བདེ་འཇགས་ནི་མི་དམངས་ལ་བརྟེན་དགོས་པ་ཡིན། དྲ་རྒྱའི་བདེ་འཇགས་སྲུང་སྐྱོང་བྱེད་པ་ནི་སྤྱི་ཚོགས་ཡོངས་ཀྱི་ཐུང་མོང་གི་འགན་འཁྲི་ཡིན་པས། སྲིད་གཞུང་དང་ཁེ་ལས། སྤྱི་ཚོགས་རྩ་འཛུགས། རྒྱ་ཆེ་བའི་དྲ་དམངས་བཅས་མཉམ་དུ་དེའི་ཁྲོད་དུ་ཞུགས་དགོས།
        2014ལོ་ནས་བཟུང་། ཀྲུང་དབྱང་དྲ་འཕྲིན་གཞུང་ལས་ཁང་སོགས་སྡེ་ཁག་གིས་བསྟུད་མར་ལོ9ལ་རྒྱལ་ཡོངས་ཀྱི་ཁྱབ་ཁོངས་སུ་རྒྱལ་ཁབ་དྲ་རྒྱའི་བདེ་འཇགས་དྲིལ་སྒྲོག་གཟའ་འཁོར་གྱི་བྱ་འགུལ་སྤེལ་བ་དང་། གོ་བདེ་ཞིང་ཤེས་སླ་བ་དང་མང་ཚོགས་ཀྱིས་ལྟ་འདོད་ཅིང་ཉན་སྤྲོ་བའི་བྱེད་ཐབས་ཀྱིས་དྲ་རྒྱའི་བདེ་འཇགས་འདུ་ཤེས་དྲིལ་སྒྲོག་དང་། དྲ་རྒྱའི་བདེ་འཇགས་ཤེས་བྱ་ཁྱབ་གདལ་དུ་བཏང་ནས། དྲ་རྒྱའི་བདེ་འཇགས་ལག་རྩལ་ཁྱབ་སྤེལ་བཏང་བས། སྤྱི་ཚོགས་ཡོངས་ཀྱི་དྲ་རྒྱའི་བདེ་འཇགས་འདུ་ཤེས་དང་འགོག་སྲུང་ནུས་རྩལ་ལ་མཐོར་འདེགས་ཆེན་པོ་བྱུང་།
        ཏང་གི་ཚོགས་ཆེན་བཅོ་བརྒྱད་པའི་ཚུན་དུ། ཕྱོགས་སོ་སོས་མཉམ་དུ་དམ་འཛིན་དང་དོ་དམ་བྱེད་པའི་རྣམ་པ་ཡག་པོ་ཆགས་ཡོད་ཅིང་། སྤྱི་ཚོགས་ཡོངས་ཀྱི་དྲ་རྒྱ་སྟོབས་ལྡན་རྒྱལ་ཁབ་འཛུགས་པའི་ལག་ལེན་གྱི་སྟོབས་ཤུགས་ཆེན་པོ་མཉམ་དུ་སྒྲིལ་ནས། དམངས་ཡོངས་དྲ་རྒྱའི་བདེ་འཇགས་ཀྱི“འགོག་སྲུང་འཛིང་རགས”བརྟན་པོར་བཙུགས་ནས། མི་དམངས་མང་ཚོགས་དུང་ཕྱུར་དུ་མས་དྲ་རྒྱའི་བར་སྣང་ཁྲོད་ཐོབ་སྣང་དང་སྐྱིད་སྣང་། བདེ་སྣང་སྔར་ལས་མང་པོ་ཐོབ་བཞིན་ཡོད། །