རྒྱལ་ཡོངས་ཁུལ་རིམ་སྲིད་གཞུང་གི་བོད་ཡིག་དྲ་ཚིགས་ཐོག་མ་སྟེ་མགོ་ལོག་བོད་རིགས་རང་སྐྱོང་ཁུལ་མི་དམངས་སྲིད་གཞུང་གི་དྲ་ཚིགས་པར་གཞི་གསར་བ་དངོས་སུ་ཤར་གཏོང་བྱས།

       མགོ་ལོག་བོད་རིགས་རང་སྐྱོང་ཁུལ་མི་དམངས་སྲིད་གཞུང་བོད་ཡིག་དྲ་ཚིགས་ནི་རྒྱལ་ཡོངས་ཀྱི་ཁུལ་རིམ་པའི་བོད་ཡིག་དྲ་ཚིགས་ཐོག་མ་ཡིན་ལ། གྲངས་འཛིན་སྲིད་གཞུང་འཛུགས་སྐྲུན་གྱི་རྣམ་པ་གསར་བར་བསྟུན་པ་དང་བརྡ་འཕྲིན་དེང་རབས་ཅན་གྱི་རེ་འདུན་སྐོང་ཆེད། པར་གཞི་རྣམ་པ་གསར་རྐྱང་ལ་བསྒྱུར་བའི་ལས་དོན་རབ་དང་རིམ་པ་བརྒྱུད་མཐར་ཟླ12པའི་ཚེས28ཉིན་དྲ་ཚིགས་དངོས་སུ་ཤར་གཏོང་བྱས། ཁུལ་སྲིད་གཞུང་གི་ཁུལ་དཔོན་གཞོན་པ་ཤེས་རབ་དང་འབྲེལ་ཡོད་དྲུང་ཡིག་ཆེན་མོ་གཞོན་པ་དྲ་ཚིགས་པར་གཞི་གསར་བ་ཤར་གཏོང་མཛད་སྒོར་ཞུགས།

       པར་གཞི་གསར་རྐྱང་གི་དྲ་ཚིགས་ཀྱིས་སྲིད་དོན་སྤྱི་བསྒྲགས་དང་དྲ་ལམ་དོན་སྒྲུབ། མང་ཚོགས་ཐེ་ཞུགས་བཅས་འགན་ནུས་ཆེན་པོ་གསུམ་དམིགས་སུ་འཛིན་པ་རྒྱུན་འཁྱོངས་བྱས་ཤིང་། མི་དམངས་དྲ་བ་དང་མཚོ་སྔོན་ཞིང་ཆེན་སྲིད་གཞུང་བོད་ཡིག་དྲ་ཚིགས་བར་གྱི་བརྡ་འཕྲིན་ཐོན་ཁུངས་འབྲེལ་མཐུད་མཉམ་སྤྱོད་མངོན་འགྱུར་བྱུང་ཡོད་ལ། དྲ་ཚིགས་སུ་ཁྱོན་རིམ་པ་དང་པོའི་ཚན་བྱང11དང་རིམ་པ་གཉིས་པའི་ཚན་བྱང47རིམ་པ་གསུམ་པའི་ཚན་བྱང22ཇུས་འགོད་བྱས་ཡོད་པས།མགོ་ལོག་ཁུལ་གྱིས་ས་གནས་ཀྱི་དངོས་ཡོད་གནས་བབ་ལ་རྐང་ཚུགས་ཤིང་ས་གནས་ཀྱི་ཁྱད་ཆོས་འབུར་དུ་ཐོན་པ། གྲངས་ཉུང་མི་རིགས་ས་ཁུལ་གྱི་མང་ཚོགས་ཀྱི་དགོས་མཁོ་སྐོང་བ་དང་སྲིད་འཛིན་ཕན་ནུས་མཐོར་འདེགས་གཏོང་བའི་ཐབས་ལམ་གལ་ཆེན་ཞིག་ཡིན་པར་མ་ཟད། རྒྱ་ཆེའི་ལས་བྱེད་མང་ཚོགས་ཀྱི་བརྡ་འཕྲིན་རེ་འདུན་སྣ་ཚོགས་སྔར་ལས་གང་ལེགས་སྐོང་བའི་བྱེད་ཐབས་དགེ་མཚན་ལྡན་པ་ཞིག་ཀྱང་ཡིན།

       མགོ་ལོག་བོད་རིགས་རང་སྐྱོང་ཁུལ་མི་དམངས་སྲིད་གཞུང་བོད་ཡིག་དྲ་ཚིགས་ཀྱིས་ཞབས་ཞུའི་ལས་གཞི་ཡི་དྲ་ལམ་བཀོལ་སྤྱོད་ལས་དོན་ལ་མི་མཐུད་དུ་སྐུལ་འདེད་གཏོང་ངེས་ཡིན་ལ། བརྡ་འཕྲིན་སྤྱི་བསྒྲགས་དང་སྲིད་དོན་ཞབས་ཞུ། སྲིད་དམངས་རམ་སྐྱོར། ཚོང་གཉེར་ཁོར་ཡུག་ཇེ་ལེགས་སོགས་ཀྱི་ཕྱོགས་ནས་ལག་ལེན་གསར་གཏོད་བྱས་ཏེ་སྲིད་དོན་སྤྱི་བསྒྲགས་ཀྱི་སྤུས་ལེགས་སྒེའུ་ཐེམ་དང་སྤྱི་པའི་ཞབས་ཞུ་ཡི་མཉམ་སྤྱོད་སྟེགས་བུ། དམངས་སྲིད་རམ་སྐྱོར་གྱི་སྟབས་བདེའི་འབྲེལ་ཟམ་བཅས་འཛུགས་སྐྲུན་བྱ་རྒྱུ་མ་ཟད། རྒྱ་ཆེའི་མང་ཚོགས་ལ་བརྡ་འཕྲིན་ཞབས་ཞུ་སྔར་ལས་མང་བ་ཞིག་མཁོ་འདོན་གནང་བ་དང་མགོ་ལོག་སྤུས་མཐོ་འཕེལ་རྒྱས་ལ་གསར་གཏོད་ཀྱི་སྒུལ་ཤུགས་མཁོ་འདོན་གནང་ཆེད། བོད་ཡིག་གི་ལམ་ནས་དྲ་ཞུགས་མཁན་རྣམས་ཀྱིས་དང་ལེན་བྱེད་སྤྲོ་བའི་རྣམ་པ་བརྒྱུད་དེ་མགོ་ལོག་གི་གཏམ་རྒྱུད་ལེགས་པར་འཆད་པ་དང་མགོ་ལོག་གི་སེམས་གཏམ་བརྒྱུད་སྒྲོག་ཕྱོགས་ལ་སྟོབས་ཤུགས་རྩལ་དུ་འདོན་རྒྱུ་ཡིན།