ཁྲི་ཀ་རྫོང་དུ་ལྔ་བཞིའི་ན་གཞོན་དུས་ཆེན་བསུ་བའི་གཟེངས་བསྟོད་ཚོགས་འདུ་དང་རིག་རྩལ་འཁྲབ་སྟོན་སྤེལ།

ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་མས་བྲོ་འཁྲབ་ཀྱིན་པ།

     དབྱར་ཟླ་ལྔ་བའི་དུས་འདིར་ཡུལ་གྲུ་སོ་སོར་གསོན་ཉམས་དང་ལྗང་མདོག་གི་འཇིག་རྟེན་གསར་བ་ཞིག་ཏུ་གྲུབ་པས། ཁྲི་ཀ་རྫོང་གི་ལས་རིགས་སོ་སོ་དང་དམངས་ཀྱི་འཚོ་བ། རིག་གནས་དར་རྒྱས་སོགས་ལའང་རེ་བས་བརྟས་འདུག དུས་ཀྱི་འཁོར་བསྐྱོད་ཀྱིས་ལོ་རེའི་ལྔ་བཞི་ན་གཞོན་དུས་ཆེན་ལ་སླེབས་པ་དང་མཉམ་དུ། གུང་གཞོན་ཚོགས་པ་ཁྲི་ཀ་རྫོང་སྲིད་ཨུའི་རྩ་འཛུགས་སྒོས་ལོ་གཅིག་གི་ན་གཞོན་དཔེ་ལེགས་མི་སྣ་དང་སྔོན་ཐོན་ཐུན་མོང་ལ་གཟེངས་བསྟོད་བྱེད་པའི་མཚུངས་སུ་ལྔ་བཞིའི་སྙིང་སྟོབས་སྒྲོན་པའི་རིག་རྩལ་འཁྲབ་སྟོན་དེ་ཟླ5བའི་ཚེས4ཉིན་གྱི་ཕྱི་དྲོའི་དུས་ཚོད་གཉིས་དང་ཕྱེད་ཀའི་སྟེང་དུ་ལྟད་མོ་བ་སྟོང་ཕྲག་ལྷག་གི་རེ་བའི་མིག་ཟུང་ཀེམ་ཀེམ་གྱི་ཁྲོད་ནས་ཁྲི་ཀ་རྫོང་རིག་གནས་ཐང་ཆེན་དུ་གཟབ་རྒྱས་ངང་བཤམས་པ་རེད།

ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་མས་བྲོ་འཁྲབ་ཀྱིན་པ།

     ཐེངས་འདིའི་འཁྲབ་སྟོན་ལ་ཁྲི་ཀ་རྫོང་གི་ཞང་དང་གྲོང་རྡལ། སློབ་གྲྭ་སོ་སོའི་གུང་གཞོན་ཚོགས་པ་སོགས་སྡོམ་པའི་ལས་ཁུངས10ལྷག་རྩ་འཛུགས་བཞིན་ཞུགས་ཡོད་ལ། ཚོགས་བྲོ་དང་མཉམ་དཀྲོལ་རོལ་དབྱངས་སོགས་རྣམ་གྲངས་འདྲ་མིན་གྱི་རྩེད་མོ20ལྷག་འདུས། དུས་ཚོད2ཀྱི་ལང་ལོང་གི་འཁྲབ་སྟོན་བརྒྱུད་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་གངས་རིའི་རང་སྒྲ་ཞེས་པའི་བོད་རིགས་ཞབས་བྲོ་དང་གླུ་བྲོ་མཉམ་རྩེད་ཀྱི་སྐྱིད་འཛོམས་ཞེས་པ་གཉིས་ནི་ཀུན་ལས་གཟེངས་སུ་ཐོན་ཞིང་ལྟད་མོ་བའི་བློ་ཡིད་ཅིག་ཅར་དུ་བཀུག་པས་དཔྱད་འདེམ་པའི་འདྲ་མཉམ་དང་དྲང་བཞག་གི་ཐོབ་སྐར་ལས་ཀྱང་ཨང་དང་པོའི་བྱ་དགའ་སློབ་གྲྭ་དེར་སྤྲད་པ་རེད།

བྱ་དགའ་གནང་བའི་ཡུལ་དངོས།

     ཐེངས་འདིའི་འཁྲབ་སྟོན་ནི་རྒྱལ་གཅེས། དམངས་གཙོ། གསར་གཏོད། མདུན་སྐྱོད་ཀྱི་ལྔ་བཞིའི་སྙིང་སྟོབས་ཀྱི་འབོད་སྐུལ་ཞིག་ཡིན་ཞིང་། དེ་བཞིན་དུ་ལས་ཁུངས་དང་སློབ་གྲྭ་སོགས་ཕན་ཚུན་འབྲེལ་འདྲིས་དང་མཐུན་སྒྲིལ། སློབ་སྦྱོང་དང་རྒྱུད་སྒྲོག་གི་རེ་འབོད་ཅིག་ཀྱང་ཡིན་ནོ། །