ལྷ་ཀླུ་སློབ་ཆུང་གི་ལྗང་མདོག་གི་སློབ་རའི་རིག་གནས།
མཁོ་མེད་དངོས་པོ་བསྐྱར་བཟོ་བྱས་པའི་བརྩམས་ཆོས་འགྲེམ་སྟོན།
ལྷ་ཀླུ་སློབ་ཆུང་གི་ཁོར་ཡུག་སྲུང་སྐྱོབ་ཀྱི་གྱང་ལྡེབས།
2009ལོར་བོད་ལྗོངས་ལྷ་ས་གྲོང་ཁྱེར་གྱི་ལྷ་ཀླུ་སློབ་ཆུང་གིས་ཁོར་ཡུག་སྲུང་སྐྱོབ་ཀྱི་སློབ་གྲྭའི་བསླབ་གཞི་ཞིག་ཞིབ་འཇུག་བྱས་ནས་པར་དུ་བསྐྲུན་ཞིང་། སློབ་མའི་ལོ་ཚོད་ཀྱི་ཁྱད་ཆོས་དང་ཤེས་བྱའི་སྒྲིག་གཞི་གཞིར་བྱས་ཏེ་རིམ་དགར་སློབ་གསོ་བསྒྲུབས་པས། ལྗང་མདོག་གི་སློབ་གསོ་དེ་སློབ་གྲྭ་དང་འཛིན་གྲྭ་རེ་རེར་སྤེལ་བ་རེད། ཉི་མ་རེ་རེར་སློབ་མ་རྣམས་ཀྱིས་ལུས་རྩལ་ར་བར《ང་ནི་ཁོར་ཡུག་སྲུང་སྐྱོབ་པ་ཆུང་ཆུང་ཡིན》ཞེས་པ་དང《ལྗང་མདོག་གི་སློབ་རའི་སྐོར་བྲོ》འཁྲབ་ཀྱིན་ཡོད་པ་རེད།
ཁོར་ཡུག་སྲུང་སྐྱོབ་པ་ཆུང་ཆུང་རྣམས་ཀྱིས་ཁྲོམ་སྲང་དུ་ཁོར་ཡུག་སྲུང་སྐྱོབ་ཀྱི་ཤེས་བྱ་ཁྱབ་སྒྲོག་བྱེད་བཞིན་པ།
གཟའ་འཁོར་རེ་རེར་སྤེལ་བཞིན་པའི་ལག་བཟོའི་སློབ་མཐུན་ནི་སློབ་མ་རྣམས་ཆེས་དགའ་བའི་བྱ་འགུལ་ཞིག་ཡིན་ཞིང་། མཁོ་མེད་དངོས་པོ་བསྐྱར་བཟོ་བྱེད་པའི་མུ་འབྲེལ་བྱ་འགུལ་སྟེང་འཛིན་གྲྭའི་སྒྲིག་བཟོ་ཚན་ཆུང་དང་དགེ་རྒན་གྱི་མཛུབ་སྟོན། ཁྱིམ་བདག་ནང་དུ་ཞུགས་པར་བརྒྱུད་ནས་སློབ་མ་རྣམས་ཀྱི་ལག་བཟོའི་བརྩམས་ཆོས་འགྲེམ་སྟོན་བྱེད་པ་སོགས་སློབ་གྲྭ་དེ་གའི་ཐུན་མོང་མ་ཡིན་པའི་ཁྱད་ཆོས་ཤིག་ཏུ་གྱུར་འདུག
ལྷ་ཀླུ་སློབ་ཆུང་དུ་སོང་མ་ཐག་ཁོར་ཡུག་སྲུང་སྐྱོབ་ཀྱི་བར་ཁྱམས་སུ་ཁ་མདོག་རྣམ་པར་བཀྲ་བའི་ཁོར་ཡུག་སྲུང་སྐྱོབ་ཀྱི་མཛེས་རིས་དང་སློབ་མ་རྣམས་ཀྱི་ལག་བཟོའི་བརྩམས་ཆོས་དེ་མིག་མདུན་དུ་མངོན་འོང་། གཅིག་ཐོག་ཏུ་ཁོར་ཡུག་སྲུང་སྐྱོབ་ཉིན་མོའི་བྱུང་ཚུལ་དང་ཁོར་ཡུག་སྲུང་སྐྱོབ་ཀྱི་རྒྱུན་ཤེས། ཁོར་ཡུག་སྲུང་སྐྱོབ་ཀྱི་སྒྲིག་བཟོའི་སྟེགས་བུ་ཆུང་ཆུང་བཅས་བཤམས་འདུག་པ་དང་། ཉིས་ཐོག་ཏུ་ལྷ་ཀླུ་བརླན་སའི་རྒྱལ་ཁབ་རང་བྱུང་སྲུང་སྐྱོབ་ས་ཁུལ་དང་ལྗང་མདོག་གི་ཁོར་ཡུག་སྲུང་སྐྱོབ་ཀྱི་མཚོན་རྟགས་བཀོད་འདུག སུམ་ཐོག་ཏུ་རི་དྭགས་གཙོད་དང་འཛམ་གླིང་གི་ཁོར་ཡུག་ཉམས་བཞིན་པའི་ཉེན་ཁ་སོགས་བཀོད་འདུག རིག་གནས་བར་ཁྱམས་རེ་རེར་ཁོར་ཡུག་སྲུང་སྐྱོབ་ཀྱི་འགྲེལ་བཤད་པ་གཅིག་རེ་ཡོད་ཅིང་། ཁོང་ཚོས་སློབ་མ་རེ་རེར་ཁོར་ཡུག་སྲུང་སྐྱོབ་ཀྱི་ཤེས་བྱ་རྟོགས་སུ་བཅུག་པ་རེད།
