རེབ་གོང་མཛེས་རྩལ་གླིང་།

རྨ་ལྷོ་ཁུལ་རེབ་གོང་མཛེས་རྩལ་གླིང་།

　　མཚོ་སྔོན་ཞིང་ཆེན་རྨ་ལྷོ་བོད་རིགས་རང་སྐྱོང་ཁུལ་སེང་གེ་གཞོངས་སུ་ཡོད་པའི་རེབ་གོང་མཛེས་རྩལ་གླིང་ནི2006ལོར་བཙུགས་པ་ཡིན་ཞིང་། དེ་ནི་བོད་ཀྱི་ཁྱད་ཆོས་གཟེངས་སུ་ཐོན་པའི་རིག་གནས་སྒྱུ་རྩལ་ལས་ཁུངས་ཞིག་ཡིན། 2006ལོར་རྒྱལ་སྲིད་སྤྱི་ཁྱབ་ཁང་གིས་རིག་གནས་པུའུ་ཡིས་རྒྱལ་ཁབ་རིམ་པའི་གཟུགས་འདས་ཤུལ་བཞག་རིག་གནས་ཀྱི་མིང་ཐོ་རིམ་པ་དང་པོ་གཏན་ཁེལ་བྱས་པར་ཆོག་མཆན་གནང་རྗེས“རེབ་གོང་རིག་གནས”དེའི་གྲས་སུ་བཞག་པ་དང་། 2008ལོའི་ཟླ6པར་རང་རྒྱལ་གྱི་གཟུགས་འདས་ཤུལ་བཞག་རིག་གནས་ཉིན་མོ་སྐབས་གསུམ་པར་རྒྱལ་ཁབ་རིམ་པའི་རིག་གནས་སྐྱེ་ཁམས་སྲུང་སྐྱོབ་ཚོད་ལྟའི་ཁུལ་གསུམ་པར་བཞག རེབ་གོང་སྒྱུ་རྩལ་གྱིས་སངས་རྒྱས་འཁྲུངས་རབས་དང་། བོད་ཀྱི་ལོ་རྒྱུས་ཀྱི་མི་སྣ་གྲགས་ཅན། ལྷ་སྒྲུང་། ངག་རྒྱུན། དེ་མིན་འཇིག་རྟེན་འཁོར་བ་སོགས་བརྗོད་བྱར་བཟུང་ནས་དེའི་ཁོངས་སུ་ཐང་ག་དང་། ལྡེབས་རིས། གཙགས་དྲུབ། འཇིམ་བརྙན་སོགས་རིགས་མང་པོ་འདུས།

མུ་ཏིག་གི་ཐང་ག་ཆེན་མོ།

　　རེབ་གོང་མཛེས་རྩལ་གླིང་ནི“རྒྱལ་ཁབ་ཀྱི་གཟུགས་འདས་ཤུལ་བཞག་རིག་གནས་ཏེ་རེབ་གོང་སྒྱུ་རྩལ”འགྲེམ་སྟོན་དང་། གྲོས་ཞིབ། གསོ་སྦྱོང་། བསྡུ་ཉར་བཅས་བྱེད་པའི་ཕྱོགས་བསྡུས་རང་བཞིན་གྱི་མང་ཚོགས་རིག་གནས་སྒྱུ་རྩལ་ཚོགས་པ་ཞིག་ཡིན་ཞིང་།  མཛེས་རྩལ་གླིང་འདིས་རྒྱལ་ཁབ་ཀྱི་གཟུགས་འདས་ཤུལ་བཞག་རིག་གནས་འཛིན་སྤྱོད་སྤེལ་གསུམ་བྱེད་པ་དང་མཉམ་དུ། རྨ་ལྷོ་ཁུལ་བྱིས་པའི་ཕན་བདེ་ཁང་དུ་དྭ་ཕྲུག་བཅུ་དང་། ཁྱིམ་ཚང་ལ་དཀའ་ངལ་ཆེ་བའི་སློབ་མ23བཅས་བསྡུས་ནས་རིན་མི་ལེན་པར་ཐང་ག་འབྲི་སྦྱངས་ཀྱི་ལག་རྩལ་སློབ་ཏུ་བཅུག་པས། ཕྱོགས་གཅིག་ནས་སློབ་མ་རྣམས་ཀྱི་འཚོ་བར་མཁོ་བའི་ལག་རྩལ་ཞིག་རྟོགས་པ་དང་། ཡང་གཅིག་ན་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་བྱེད་ཐུབ་པ་རེད།
　　ཐང་གའི་ལྷ་རིས་པ་གསང་བདག་ལགས་ཀྱིས་བཤད་པ་ལྟར་ན། བོད་ཀྱི་སྲོལ་ལུགས་ལ་ཐང་གའི་ལྷ་རིས་པ་ནི་ཆོས་སྡེའམ་ཡང་ན་ཁྱིམ་བརྒྱུད་དུ་བྱུང་བ་མ་ཟད། བླ་མས་དབང་སྐུར་བ་དང་བྱིན་རླབས་གནང་བ་སོགས་ཆོས་ལུགས་ཀྱི་ཆོ་ག་མང་དུ་བྱེད་དགོས་ཤིང་། བླ་མའམ་སྐྱེས་པ་རྣམས་མ་རྟོགས་གཞན་གྱིས་ཐང་ག་འབྲི་བཞེངས་བྱེད་མི་ཆོག་མོད། ཁོང་གིས་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་ལེགས་པོ་བྱེད་པར་དམིགས་ནས་ཁོང་རང་ཉིད་ཀྱི་བུ་མོར་སྒྱུ་རྩལ་དེ་ཁྲིད་པ་རེད།
　　དེང་དུས་ཀྱི་རེབ་གོང་སྒྱུ་རྩལ་ནི་འཛམ་གླིང་ལ་ཁ་ཕྱོགས་ཤིང་། རྒྱལ་ཁབ་ཕྱི་ནང་གི་སྒྱུ་རྩལ་ལ་སྤྲོ་བ་ཡོད་མཁན་རྣམས་ཀྱི་གཟིགས་ཞིབ་དང་སློབ་སྦྱོང་བྱེད་པ་ཇེ་མང་ནས་ཇེ་མང་དུ་ཕྱིན་པ་དང་མཉམ་དུ། མཚོ་སྔོན་ཞིང་ཆེན་གྱི་སྔོན་ཐོན་རིག་གནས་ཐོན་ལས་ཀྱི་འཛུགས་སྐྲུན་དང་འཕེལ་རྒྱས་ལ་སྐུལ་འདེད་བྱས་ལ། གཞན་གནས་སྐོར་ལས་རིགས་ཀྱིས་ཡུལ་དེ་གའི་དཔལ་འབྱོར་འཕེལ་རྒྱས་དང་མི་དམངས་མང་ཚོགས་ཀྱི་འཚོ་བའི་ཆུ་ཚད་མཐོར་འདེགས་བྱེད་པར་སྒུལ་ཤུགས་གསར་དུ་བསྣན་པ་རེད།