ནང་ཆེན་རྫོང་དྭ་དབུལ་སློབ་གསོའི་རོགས་སྐྱོར་ཚོགས་པ་མཚམས་སྦྱོར་མདོར་བསྡུས།

ཆོག་མཆན་ཐོབ་པའི་དཔང་ཡིག

            ནང་ཆེན་རྫོང་དྭ་དབུལ་སློབ་གསོའི་རོགས་སྐྱོར་ཚོགས་པ་འདི་ནི། རྣམ་རྒྱལ་ལགས་ཀྱིས་ཉམས་ཐག་གི་ཁྱིམ་ཚང་དང་ཤེས་རིག་སློབ་སྦྱོང་གི་གོ་སྐབས་དང་བྲལ་བའི་དབུལ་པོའི་བུ་ཕྲུག་དང་། དྭ་ཕྲུག་སོགས་ལ་དང་བླངས་ཞབས་ཞུའི་རོགས་སྐྱོར་གནང་བའི་ཆེད་དུ་སྤྱི་ལོ2006ལོར་མགོ་བཟུང་སྟེ་བཙུགས་པའི་དམངས་ཁྲོད་ཀྱི་ཚོགས་པ་ཞིག་ཡིན།
            སྤྱི་ལོ2009ལོའི་ཟླ་བ11ཚེས་18ཉིན། དངོས་སུ་སྲིད་གཞུང་གི་ཆོག་མཆན་ཐོབ་པ་རེད། ཚོགས་པ་འདིའི་རྩ་འཛུགས་ནི་གྲོས་ཚོགས་དང་ཚོགས་གཙོ་རྒྱུན་ལས་གཞུང་དོན་ཁང་དང་གངས་ལྗོངས་དྭ་དབུལ་ཁྱིམ་སློབ་བཅས་ཀྱིས་གྲུབ་ཡོད།

ཚོགས་པའི་སྒོ་ཆེན།

            ཚོགས་པ་འདིའི་གྲོས་ཚོགས་ནི་ལོ་རེར་ཐེངས་རེ་འཚོགས་ཤིང་། ཚོགས་གཙོས་ཚོགས་པ་འདིའི་འཛིན་སྐྱོང་གི་འགན་བཞེས་ཏེ་གྲོས་ཚོགས་ནས་སྤྱི་མོས་དང་མང་མོས་ཀྱིས་གཏན་ལ་ཕབ་པའི་ལས་དོན་ཁག་ལག་ལེན་དོན་ཐོག་ཏུ་སྨིན་པ་གནང་བཞིན་ཡོད་ཅིང་། རྒྱུན་ལས་གཞུང་དོན་ཁང་གིས་ཚོགས་གཙོའི་འཆར་བཀོད་ལྟར།  ཉམས་ཐག་གི་མི་དམངས་ལ་བྱམས་བརྩེས་བལྟ་སྐྱོང་དང་ཚོགས་པའི་ལས་དོན་ཁག་སྒྲུབ་བཞིན་ཡོད།

ཚོགས་པའི་སྒོ་ཆེན་མདུན་གྱི་སྒོ་བྱང་།

            གངས་ལྗོངས་དྭ་དབུལ་ཁྱིམ་སློབ་ཀྱིས་ཤེས་རིག་སློབ་སྦྱོང་གི་གོ་སྐབས་མ་ཐོབ་པའི་ཉམས་ཐག་དབུལ་པའི་བུ་ཕྲུག་དང་དྭ་ཕྲུག་རྣམ་པར། གནའ་དེང་གི་ཤེས་རིག་སློབ་སྦྱོང་སྤྲོད་པ་དང་ཟས་གོས་གནས་མལ་ལོངས་སྤྱོད་སོགས་ཀྱི་མཐུན་རྐྱེན་གནང་བཞིན་ཡོད་པ་མ་ཟད། སློབ་ཕྲུག་ཁོང་རྣམ་པའི་ལུས་སེམས་བདེ་ཐང་དང་ཀུན་སྤྱོད་ཡ་རབས་སྤྱོད་བཟང་དང་བསམ་བློའི་ཁོག་རྒྱ་ཡངས་ཤིང་། ལྷག་བསམ་དང་གཤིས་བཟང་ཤེས་འཇོན་ལྡན་པའི་རང་ཚུགས་ཅན་གྱི་མི་ཞིག་ཡོང་བར་འགན་ཁུར་ཏེ་སྒོ་ཀུན་ནས་འབད་བརྩོན་ལྷོད་མེད་གནང་བཞིན་ཡོད་རེད།