ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་དཔེ་ཀློག་མྱོང་ཚོར་བགྲོ་གླེང་སྐབས་དང་པོ་སྤེལ།
ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་དཔེ་ཀློག་མྱོང་ཚོར་བགྲོ་གླེང་སྐབས་དང་པོ་སྤེལ།
དཔེ་ཀློག་མྱོང་ཚོར་གླེང་བ།
དཔེ་ཀློག་མྱོང་ཚོར་གླེང་བའི་ཡུལ་དངོས།
ཡུལ་དངོས་ཀྱི་རྣམ་པ།
ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སློབ་བུ་ཚོའི་དཔེ་ཀློག་གི་མོས་པ་སྐྱེད་སྲིང་དང་སློབ་མ་ཚོ་དཔེ་ཀློག་ལ་དགའ་བའི་འདུན་མ་སློང་བ། དཔེ་ཀློག་ལས་ཐོབ་པའི་མྱོང་སྣང་ངོམ་སའི་སྟེགས་བུ་ཞིག་བསྐྲུན་ཆེད། ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་ཤེས་རིག་ཡར་སྐུལ་ཚོགས་པའི་གཙོ་སྒྲུབ་བྱས་ཤིང་བོད་ཡིག་ཁྲིད་དཔྱོད་ཁང་གིས་རོགས་སྒྲུབ་མཛད་པའི་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་དཔེ་ཀློག་མྱོང་ཚོར་བགྲོ་གླེང་སྐབས་དང་པོ་དེ་སྤྱི་ཟླ6པའི་ཚེས19ཉིན་གྱི་ཕྱི་དྲོར། དབྱར་ཟླ་ལྔ་བའི་ཚ་བ་ཆེ་ན་ཡང་སློབ་གྲྭའི་ར་སྐོར་གྱི་ནགས་ལྗོན་མང་པོའི་གསེང་དུ་བདེ་ལེགས་ངང་སྤེལ།
དཔེ་ཆ་ནི་བློ་སྒོ་འབྱེད་པའི་ལྡེ་མིག་ཡིན་ལ། དཔེ་ཆ་འདོར་བ་ནི་ཤེས་ཡོན་འདོར་བ་རང་ཡིན་པས། དམའ་འབྲིང་སློབ་མ་ཞིག་ཡིན་ན་བསླབ་གཞིའི་དཔེ་ཆ་གཅིག་པུས་ཤེས་བྱའི་མཐོང་ཐོས་རྒྱ་བསྐྱེད་མི་ཐུབ་པར། བསླབ་ཕྱིའི་དཔེ་ཆ་སྣ་ཚོགས་པ་ལྟ་ཀློག་བྱ་རྒྱུ་ཧ་ཅང་གལ་ཆེ། རྒྱུན་པར་བསླབ་ཕྱིའི་དཔེ་ཆ་ཀློག་པའི་གོམས་གཤིས་བཟང་པོ་ཡོད་ཚེ་རིག་པའི་ཁོ་ལག་རྒྱས་པ་དང་བསམ་བློའི་འདུ་ཤེས་བསྐྱེད་པར་ཕན་ཐོགས་ཆེན་པོ་ཡོད། དེར་དམིགས་ཏེ་དམའ་འབྲིང་གི་སློབ་བུ་སྟོང་ཕྲག་གཅིག་ལྷག་གི་ཁྲོད་ནས་དཔེ་ཆར་ལྟ་རྒྱུར་མོས་པའི་སློབ་བུ་བཅུ་དང་མཚོ་ལྷོ་ཁུལ་མི་རིགས་མཐོ་འབྲིང་གཉིས་པའི་སློབ་བུ་བཞི་གདན་འདྲེན་བྱས་ཏེ་དཔེ་ཀློག་མྱོང་ཚོར་བགྲོ་གླེང་གི་བྱ་འགུལ་འདི་སྤེལ།
མདོ་འཛིན་པས་ཐོག་མར་སློབ་གྲོགས་ཡོངས་ཡར་བཞེངས་སུ་བཅུག་སྟེ་བསྟོད་པ་ཆུ་འཛིན་དཀར་པོ་མ་ཚར་གཅིག་ཆོས་ཀྱི་མགོ་མ་སྐྱབས་འགྲོའི་ཚུལ་དུ་བློ་འདོན་ཐེངས་ཤིག་བྱས་ཤིང་། དཔྱད་འདེམ་པ་དང་སྐར་གྲངས་འགོད་སྟངས་བཅས་གསལ་ཐག་ཆོད་པ་ཞིག་བཤད་པའི་འཕྲོར། སློབ་གཙོ་གཞོན་པ་སྐལ་བཟང་དོན་གྲུབ་ཀྱིས་དཔེ་ཀློག་གི་དགེ་མཚན་རེ་རེ་སྔོན་བྱོན་མཁས་པའི་མཛད་རྗེས་ལ་ཕྱིར་གཞིགས་ཀྱི་ཚུལ་དུ་ངོ་སྤྲོད་དང་ཁུངས་བཙུན་པའི་རྒྱུ་མཚན་གསུང་། དེའི་འཕྲོར་མཐོ་འབྲིང་དུ་གདན་འདྲེན་བྱས་པའི་ཟུར་ཞུགས་སློབ་མ་ཚོས་དཔེ་ཆ་ཀློག་པའི་ཕན་ཡོན་དང་དཔེ་ཀློག་གི་གལ་ཆེན་རང་བཞིན་རང་གི་མྱོང་བ་དང་བརྒྱུད་དེ་སློབ་གྲོགས་རྣམས་ལ་རྒྱུ་མཚན་སྦྱར་ཏེ་བགྲོ་གླེང་བྱས། ཕྱིས་སུ་རང་སློབ་གྲྭའི་འགྲན་ཞུགས་པ་རྣམས་ཀྱིས་ཉེ་བའི་ཟླ་ངོ་འདི་འགའི་རིང་དཔེ་ཆ་དང་རྩོམ་ཡིག་གང་རུང་བཀླགས་པའི་མྱོང་བ་དང་བློ་སྐྱེད། བསམ་གཞིག་སོགས་གླེང་བའི་སྟ་གོན་ཕུན་སུམ་ཚོགས་པ་དེ་འགྲན་ཞུགས་པ་རེ་རེའི་སྨྲ་བརྗོད་དག་ཅིང་སྤོབས་པ་ལྡན་ལ། རྒྱུ་མཚན་སྣ་ཚོགས་དྲངས་ཏེ་རང་གིས་ཉེ་སྔོན་སློབ་གསེང་དུ་ཀློག་པའི་དཔེ་ཆ་ངོ་སྤྲོད། རྩོམ་པ་པོ་དང་ནང་དོན་མདོར་བསྡུས། དཔེ་ཆ་བཀླགས་རྗེས་ཀྱི་མྱོང་ཚོར། དཔེ་ཆ་བཀླགས་རྗེས་ཀྱི་བློ་སྐྱེད། རིན་ཐང་ལྟ་བ་སོགས་ཚིག་ཉུང་དོན་འདུས་སྒོས་གསལ་ཁ་དོད་པའི་ངང་སྒྲོག་འདོན་བྱས་པ་རེད། བགྲོ་གླེང་གི་གོ་རིམ་དུ་ཉན་མཁན་སློབ་མ་ཚོས་དྲི་བ་འདོན་པ་དང་དཔྱད་འདེམ་དགེ་རྒན་ཚོས་སློབ་མ་རེ་རེ་ལ་འོས་ཤིང་འཚམ་པའི་དཔྱད་བརྗོད་ཐུང་ངུ་སྤེལ་ཏེ་ཚོགས་ར་ཡོངས་གསོན་ཤུགས་ཅན་དུ་བསྒྱུར། རེབ་འདིའི་བྱ་འགུལ་སྤྱིའི་ཆ་ནས་གོ་རིམ་ལྡན་ལ། གཏན་ཚིགས་དང་གཏམ་རྒྱུད་ཀྱིས་ཕྱུག་པ། རྒྱུ་འབྲས་དང་གནས་ལུགས་ཀྱིས་བཅིངས་པའི་བརྗོད་པ་བདེ་མོས་འགྲན་ཞུགས་པ་རེ་རེའི་སྨྲ་ལྕེའི་བྱང་ཚད་ཅི་དགར་ངོམ་ཐུབ་པ་བྱུང་། མཇུག་མཐར་དགེ་རྒན་འཐུས་ཚབ་པས་དཔེ་ཀློག་མྱོང་ཚོར་བགྲོ་གླེང་ཐད་མཉམ་འཇོག་དགོས་པའི་གནད་དོན་དང་། དཔེ་ཀློག་མྱོང་ཚོར་བགྲོ་གླེང་བྱ་འགུལ་སྤྱི་སྡོམ། རྗེས་ཕྱོགས་དཔེ་ཆ་མང་པོ་ཀློག་དགོས་པའི་འབོད་སྐུལ་གནང་བ་རེད། མཇུག་མཐར་མདོ་འཛིན་པས་སོ་སོའི་སྐར་གྲངས་ཁྱབ་བསྒྲགས་བྱས་ཤིང་ཨང་རིམ་ལྟར་བྱ་དགའི་ལེགས་སྐྱེས་གནང་ཞིང་ཚང་མའི་རེ་འདོད་ལྟར་བྱ་འགུལ་བདེ་བླག་ངང་སྤེལ་བ་རེད།
