ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་བོད་ཡིག་ཤེས་བྱའི་འགྲན་བསྡུར་སྐབས་གསུམ་པ་སྤེལ།

ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་བོད་ཡིག་ཤེས་བྱའི་འགྲན་བསྡུར་སྐབས་གསུམ་པ་སྤེལ།

ཡུལ་དངོས་ཀྱི་ཟུར་ཞིག

ཡུལ་དངོས་ཀྱི་ཟུར་ཞིག

     ད་ལྟའི་སྤྱི་ཚོགས་སུ་ང་ཚོས་བསླབ་དེབ་ཁོ་ནའི་སྟེང་གི་ཤེས་བྱ་སྣ་གཅིག་པུ་སྦྱང་པས་མི་ཆོག་པར། ཕ་མེས་གོང་མ་དག་གི་རྣམ་དཔྱོད་ཀྱི་རྩལ་ལས་འཁྲུངས་པའི་དམངས་སྲོལ་རིག་གནས་དང་ངག་རྒྱུད་རིག་གནས། ཀུན་སྤྱོད་སློབ་གསོ། རྒྱུན་སྤྱོད་ཤེས་བྱ་སོགས་ཕྱི་རོལ་ཡུལ་ལ་ངོས་འཛིན་བྱེད་པའི་ཤེས་རིག་གི་ཆུ་ཚད་ཇེ་མཐོར་བཏང་སྟེ་སློབ་མའི་ཕྱོགས་ཡོངས་ཡར་རྒྱས་གོང་འཕེལ་དུ་འགྲོ་རྒྱུ་ནི་ཁ་ཚ་དགོས་གཏུག་གི་གནད་དམ་པ་ཡིན། དེར་བརྟེན། ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་དམའ་འབྲིང་རིམ་པས་ཀྱང་སྤྱི་ཟླ4བའི་ཚེས18ནས་ཚེས19བར་གྱི་ཉིན་གཉིས་དུས་ཚོད་བེད་སྤྱད་དེ་བོད་ཡིག་རྨང་གཞིའི་ཤེས་བྱའི་སྐོར་གྱི་འགྲན་སྡུར་སྐབས་གསུམ་པ་སྤེལ།
     སློབ་མའི་བོད་ཡིག་གི་རྨང་གཞིའི་ཤེས་བྱ་འཐུས་ཇེ་ཚང་དང་གྲ་ཇེ་རྒྱས་སུ་གཏོང་ཆེད་དམའ་འབྲིང་གི་བོད་ཡིག་དགེ་རྒན་རྣམ་པས་སྔོན་བྱོན་མཁས་པའི་བསྟན་བཅོས་གྲགས་ཅན་ལ་གཞི་བཅོལ་ཏེ་མི་སྣ་དང་ལོ་རྒྱུས། ས་རྒྱུས། ཆབ་སྲིད། བདེ་ཐང་། སྐྱེ་ཁམས་སོགས་ཀྱི་གཏན་ཆགས་ཤེས་བྱ། སྐབས་ཐོག་ཏུ་བློ་རིག་འགུལ་རྒྱུའམ་བསམ་གཞིག་གཏོང་རྒྱུའི་གབ་ཚིག གཏམ་དཔེ། དཔེ་ཆོས་དང་བརྗོད་པ་སྤེལ་རྒྱུ། སྨྲ་ལྕེ་སྦྱོང་བརྡར་བཅས་དམངས་སྲོལ་དང་ད་ལྟའི་སྤྱི་ཚོགས་ཁྲོད་མིག་མཐོང་ལག་ཟིན་དུ་གྱུར་བའི་རྒྱུད་བཀོལ་ཤེས་བྱའི་རྒྱུ་ཆ་སྣ་ཚོགས་འཚོལ་སྡུད་བྱས་ཏེ་ནང་དོན་རྒྱ་ཆེ་ཞིང་སྣ་འཛོམས་ཀྱི་རང་བཞིན་ལྡན་པ། སློབ་སྦྱོང་ལ་སྐུལ་འདེད། སྤོབས་པ་དང་བསམ་གཞིག་གི་ནུས་པ་ཇེ་ཆེར་བསྐྱེད་པ། མ་འོངས་འབྱུང་འགྱུར་ལ་དམིགས་ཡུལ་གསལ་བ། རྩེད་མཚར་དང་སྤྲོ་སྣང་གི་ཁྱད་ཆོས་དོད་པའི་དྲི་བ110ཙམ་སྨྱན་མང་གཟུགས་ཀྱི་ལམ་ནས་བྱ་འགུལ་འཁྲུག་ཆ་དོད་པ་རུ་གྲ་སྒྲིག་གང་ལེགས་བྱས།
     ཐེངས་འདིའི་བྱ་འགུལ་དུ་ལོ་རིམ་བདུན་པའི་འཛིན་གྲྭ་བཅུ་གཉིས་དང་ལོ་རིམ་བརྒྱད་པའི་འཛིན་གྲྭ་བཅུ་ཡི་འགྲན་ཞུགས་པ3རེ་སྟེ་ཁྱོན་བསྡོམས་སློབ་མ66ཞུགས་ཐུབ་པ་བྱུང་། འགྲན་སྡུར་གྱི་བྱེད་ཐབས་ལ་ངེས་པར་ལན་འདེབས་དགོས་པའི་དྲི་བའི་སྐོར་དང་། འཕྲོག་ལན་གྱི་སྐོར། ཉེན་ཁ་ཅན་གྱི་དྲི་བའི་སྐོར་བཅས་རིམ་པ་གསུམ་དུ་བགར་ནས་འགྲན་བསྡུར་བྱས་པར་འགྲན་ཞུགས་པ་རྣམ་པར་སྐབས་རེར་དངངས་འཚབ་དྲག་པོ་སྟེར་ཞིང་ལན་རེར་སྤྲོ་མཚར་ཆེ་བའི་མཁའ་དབུགས་ཤིག་ཀྱང་བཅོས་མིན་དུ་བསྐྲུན། ཡིན་ཡང་འགྲན་སྡུར་རིམ་པ་སོ་སོའི་བར་རྒྱན་དུ་སྨྲ་ལྕེ་བདེ་བའི་མདོ་འཛིན་པའི་ཁ་མཚར་འདྲེས་མ་དང་སློབ་མ་ཚོའི་ཁྲོད་ཀྱི་གླུ་བ་གླུ་མའི་སྙན་འཇེབས་ཀྱི་གླུ་སྐད་ཀྱིས་ལྷོད་གཡེང་དང་བག་ཕེབས། སེམས་ཁམས་ཞི་འཇགས་སུ་བསྒྱུར།
     ཉིན་གཉིས་ཀྱི་ཕྱི་དྲོའི་དུས་ཚོད་བེད་སྤྱད་དེ་ཛ་དྲག་དང་དཀའ་ཚེགས། ཟང་ཟིང་དང་ཧུར་ཐག་གི་གོ་རིམ་མང་པོ་ཞིག་བརྒྱུད་མཐར་ལོ་རིམ་སོ་སོ་ནས་མི་སྒེར་གྱི་བྱ་དགའ་ཨང་བཅུ་ཐམ་པ་བདམས་ཐོན་བྱུང་བ་དང་། ཐུན་མོང་ལ་བྱ་དགའ་དྲུག་བདམས་ཏེ་བྱ་དགའི་མཚན་སྙན་དཔང་ཡིག་དང་ལེགས་སྐྱེས་དངོས་པོ་རེ་སྦྱར་ནས་བསྩལ་གནང་མཛད་པར་དགེ་སློབ་ཡོངས་ཀྱིས་ལྷག་བསམ་འཁོལ་བའི་ངང་དགའ་བསུའི་རྟེན་འབྲེལ་དུ་ཚོགས་རའི་ཁྱོན་ཀུན་ལག་ཟུང་གི་ལྷང་ལྷང་ཐལ་མོའི་རྡེབ་སྒྲས་ཁེངས།
     རེབ་འདིའི་བྱ་འགུལ་སྤེལ་བ་བརྒྱུད་སློབ་གྲོགས་ཀུན་གྱི་སྤོབས་སེམས་མཐོ་རུ་འདེགས་པར་རམ་སྐྱོར་བསྣན་ཡོད་ཅིང་བློ་རིག་གི་སྒོ་མོ་ཇེ་ཆེར་བསྐྱེད་པ། སློབ་སྦྱོང་ལ་ཧུར་བརྩོན་བྱེད་པར་སྐུལ་འདེད་ཀྱི་ནུས་པ་གལ་ཆེན་ཐོན་པ་རེད། སླད་མར་ཡང་རེབ་འདིའི་འགྲན་སྡུར་དང་མཚུངས་པའི་བྱ་འགུལ་མང་པོ་སྤེལ་བར་དགེ་སློབ་ཀུན་ལ་རེ་སྒུག་ཤིན་ཏུ་ཆེ་བ་མཚོན་ནོ། །