མང་རྫོང་མི་རིགས་སློབ་འབྲིང་གིས་བོད་ཀྱི་ཡིག་གཟུགས་གསོ་སྐྱོང་འཛིན་གྲྭའི་སློབ་ཚུགས་མཛད་སྒོ་སྤེལ་བ།

མང་རྫོང་མི་རིགས་སློབ་འབྲིང་གིས་ཐོན་མིའི་ཕྱག་རྒྱུན་བོད་ཀྱི་ཡིག་གཟུགས་གསོ་སྐྱོང་འཛིན་གྲྭའི་སློབ་ཚུགས་མཛད་སྒོ་སྤེལ།

སློབ་གཚོ་དགྲ་འདུལ་རྒྱལ་གྱིས་ཟུར་གཙང་གཡང་འབུམ་ལ་ཁ་བཏགས་ཕུལ་བ།

སློབ་གཙོ་དགྲ་འདུལ་རྒྱལ་གྱིས་གཏམ་བཤད་སྤེལ་བ།

གཙང་བཀྲ་ཤིས་ལྷུན་པོའི༧ལྷ་ཁང་བློ་བཟང་རྡོ་རྗེ་མཆོག་གིས་ཕུལ་བའི་ཤིས་ཚིག

མཚོ་སྔོན་དགེ་ཐོན་སློབ་ཆེན་གྱི་རྒན་མཚོ་སྐྱེས་དོན་གྲུབ་ཚེ་རིང་གིས་ཕུལ་བའི་ཤིས་ཚིག

སྡེར་ནང་ས་བྲིས་ཀྱི་རྒྱུན་འཛིན་པ་རྒན་ངག་དབང་རྒྱ་མཚོས་ཕུལ་བའི་ཤིས་ཚིག

ཡིག་གཟུགས་དཔེ་དེབ།

སྦྱང་ཤིང་སོགས་ཡིག་གཟུགས་འབྲི་བྱེད་ཡོ་ཆས།

མང་རྫོང་མི་རིགས་སློབ་འབྲིང་གིས་ཐོན་མིའི་ཕྱག་རྒྱུན་བོད་ཀྱི་ཡིག་གཟུགས་གསོ་སྐྱོང་འཛིན་གྲྭའི་སློབ་ཚུགས་མཛད་སྒོ་སྤེལ།

     སྤྱི་ཟླ3པའི་ཚེས22ཉིན། མང་རྫོང་མི་རིགས་སློབ་འབྲིང་ཞིང་སྡེ་གཞོན་ནུ་ཕོ་བྲང་དུ་ཐོན་མིའི་ཕྱག་རྒྱུན་བོད་ཀྱི་ཡིག་གཟུགས་གསོ་སྦྱོང་འཛིན་གྲྭའི་སློབ་ཚུགས་མཛད་སྒོ་སྤེལ་བ་རེད།
     ཐེངས་འདིའི་གསོ་སྦྱོང་འཛིན་གྲྭ་ནི་མང་རྫོང་མི་རིགས་སློབ་འབྲིང་གི་སློབ་ཨུ་དང་སློབ་སྟོན་ཁང་གི་རྒྱབ་སྐྱོར་འོག ཞིང་སྡེ་གཞོན་ནུ་ཕོ་བྲང་གིས་རྩ་འཛུགས་སྒོས་ཡིག་གཟུགས་དགའ་ཕྱོགས་སྐྱེད་སྲིང་འཛིན་གྲྭའི་རྨང་གཞིའི་སྟེང་སྒྲུབ་པ་ཡིན་ལ། ཡིག་གཟུགས་གསོ་སྦྱོང་དགེ་རྒན་ཏུ་ཆེད་དུ་གཞོན་སྐྱེས་བྲིས་པ་ཟུར་གཙང་གཡང་འབུམ་གདན་འདྲེན་ཞུས་ཡོད།
     སློབ་ཚུགས་མཛད་སྒོའི་སྟེང་མང་རྫོང་མི་རིགས་སློབ་འབྲིང་གི་སློབ་གཙོ་དགྲ་འདུལ་རྒྱལ་དང་བཀྲ་ཤིས་ཚེ་བརྟན། སློབ་སྟོན་ཁང་གི་འགོ་བ་བསོད་ནམས་དབང་རྒྱལ། ཞིང་སྡེ་གཞོན་ནུ་ཕོ་བྲང་གི་འགོ་བ་ཚེ་རིང་སྐྱིད་སོགས་གཙོ་བྱས་ཏེ། བོད་ཡིག་དགེ་རྒན་དང་ཡིག་གཟུགས་དགའ་ཕྱོགས་འཛིན་གྲྭའི་སློབ་ཕྲུག་ལ་སོགས་མི་སྣ100ལྷག་ཞུགས་ཡོད།
     སློབ་གཙོ་དགྲ་འདུལ་རྒྱལ་གྱིས་ཡིག་གཟུགས་འཛིན་གྲྭ་འདི་འདྲ་ཞིག་སྒྲུབ་པའི་དགོས་པ་དང་དམིགས་ཡུལ། ཉིང་དགོས་ལ་སོགས་པ་ངོ་སྤྲོད་ཀྱི་ཚུལ་གྱིས་ཤིས་ཚིག་ཕུལ་བ་དང་། གཞོན་སྐྱེས་བྲིས་པ་ཟུར་གཙང་གཡང་འབུམ་གྱིས་ཐེངས་འདིའི་གསབ་སྦྱོང་འཛིན་གྲྭ་སྒྲུབ་པའི་ཀུན་སློང་དང་འཆར་གཞི། གྲ་སྒྲིག་ལ་སོགས་པའི་ཕྱོགས་ནས་གཏམ་བཤད་གལ་ཆེན་གནང་བ་རེད།
     གཞན་ཡང་རེབ་འདིའི་མཛད་སྒོའི་སྟེང་དུ་ལྷ་ཁང་བློ་བཟང་རྡོ་རྗེ་དང་རྒྱ་ཡེ་བཀྲ་བྷོ། མཚོ་སྐྱེས་དོན་གྲུབ་ཚེ་རིང་། སྡེར་ནང་ས་བྲིས་ཀྱི་རྒྱུད་འཛིན་པ་ངག་དབང་རྒྱ་མཚོ་སོགས་དེང་རབས་བོད་ཀྱི་ཡིག་གཟུགས་མཁས་པ་དང་དགེ་རྒན་ཆེན་མོ་དག་གིས་ཆེད་དུ་ཤིས་ཚིག་བསྐུར་པས། ཡིག་གཟུགས་གསོ་སྦྱོང་འཛིན་གྲྭ་འདི་ནི་མང་རྫོང་མི་རིགས་སློབ་འབྲིང་གཅིག་པུ་མ་ཡིན་པར། བོད་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་སློབ་དཔོན་ཆེན་པོ་དང་ཡིག་གཟུགས་མཁས་པ་མང་པོས་ཡིད་ཆེས་དང་གདེང་འཇོག ཐུགས་ཁུར་དང་རྒྱབ་སྐྱོར་གྱི་ལྷག་བསམ་མངོན་པར་མཚོན་པ་རེད།

ཟུར་གཙང་གཡང་འབུམ་ངོ་སྤྲོད་མདོར་བསྡུས།

     ཟུར་གཙང་གཡང་འབུམ། བོད་ལུགས་གསོ་རིག་རབ་འབྱམས་པ། མཚོ་སྔོན་ཡིག་མཁན་མཐུན་ཚོགས་ཀྱི་ཚོགས་མི་ཡིན་ཞིང་། 1980ལོར་མདོ་སྨད་གཅན་ཚ་རྫོང་གི་སྣང་རའི་གྲོང་བརྒྱད་ཀྱི་སྡེར་གཏོགས་པའི་ཤིང་སྒར་གྲོང་ཚོའི་ཟུར་གཙང་ཚོ་བ་རུ་སྐྱེས། ཆུང་དུས་ནས་ས་དེ་གའི་སློབ་ཆུང་དང་སློབ་འབྲིང་འགྲིམ་པའི་སྐལ་བ་ཐོབ། སྔ་ཕྱིར་ཀོས་ནན་རྫོང་བོད་ཡིག་སློབ་འབྲིང་དང་མཚོ་ལྷོ་ཁུལ་འཕྲོད་བསྟེན་སློབ་གྲྭ། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་། བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོ་སོགས་སུ་འགྲིམས་ནས་གསོ་རིག་གཙོས་པའི་རིག་གནས་ཆེ་ཆུང་ལ་སྦྱངས་པ་ལྷོད་མེད་བྱས།
     1995ལོ་ནས་བཟུང་དབུས་གཙང་ཕྱོགས་ཀྱི་ཡིག་མཁན་དྲུང་ཡིག་རྣམ་རྒྱལ་ལགས་དང་། ཕྲིན་དགའ་ལགས། ཆོས་འཕེལ་ལགས། རྡོ་སྦིས་གྲགས་པ་སོགས་ཀྱིས་ཕྱག་བྲིས་གནང་བའི《བོད་ཡིག་གི་ཡིག་གཟུགས་དཔེ་གཞི》ཞེས་པ་དང《བོད་ཡིག་གི་དཔེ་གཟུགས》སོགས་ཚད་ལྡན་གྱི་བྲིས་རྒྱུན་ལ་སྦྱངས་པ་ནན་ཆེར་བྱས་ཤིང་། ལྷག་པར་གཙང་བཀྲིས་ལྷུན་པོར་བཞུགས་པའི་དགེ་མིང་འཛིན་པ་ལྷ་ཁང་བློ་བཟང་རྡོ་རྗེ་དང་རྨེ་རུ་དགོན་བསྟན་འགྱུར་དཔར་ཁང་དུ་བཞུགས་པའི་སྙེ་མོ་བ་བཀྲ་ཤིས་དོན་གྲུབ། ནོར་བུ་གླིང་ཁའི་འགྱུར་མེད་ཚུལ་ཁྲིམས་སོགས་ཀྱི་དྲུང་དུ་སྨྱུ་གུ་བཟོ་ལུགས་ནས་བརྩམས་ཏེ་ཀ་ཁ་དང་ཟློས་ཧྲལ། ཚུགས། འཁྱུགས། སྙེ་བྲིས། ལན་ཝར་སོགས་ལ་མཐོང་བརྒྱུད་ཕྱག་ལེན་བཞིན་ལོ་མང་སྦྱངས་པས་གྲུབ་འབྲས་ཆེན་པོ་ཐོབ།
     སྔ་གཞུག་ཏུ《བོད་ཡིག་འབྲི་ཚུལ་བློ་གསར་མིག་འབྱེད》དང《བོད་ཀྱི་ཡིག་གཟུགས་སྤྱི་རྣམ》།《བཀྲས་ལྷུན་དགོན་གྱི་བྲིས་རྒྱུན་བློ་བཟང་དགྱེས་པའི་མཆོད་སྤྲིན》སོགས་དཔར་བསྐྲུན་འགྲེམས་སྤེལ་བྱས་དང་བྱེད་མུས་སུ་མཆིས།