ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་བོད་ཡིག་བློར་འཛིན་འགྲན་སྡུར་སྐབས་གསུམ་པ་སྤེལ།

ཤེས་བྱ་བློར་འཛིནཔ།

ཤེས་བྱ་བློར་འཛིནཔ།

སློབ་མའི་ཚོགས།

     ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་བོད་ཀྱི་རིག་གནས་ཤེས་བྱ་བློར་འཛིན་གྱི་ནུས་པ་སྐྱེད་སྲིང་དང་། སྤོབས་པ་མཐོར་འདེགས། བསླབ་ཕྱིའི་ཤེས་བྱ་ཕུན་སུམ་ཇེ་ཚོགས་སུ་གཏོང་བ། མི་སྒེར་གྱི་རྨང་གཞིའི་ཆུ་ཚད་འཕེལ་རྒྱས་དང་རིགས་ལམ་མྱུར་བའི་དགོས་མཁོར་དམིགས་ཏེ། སྤྱི་ལོ2015ལོའི་ཟླ6པའི་ཚེས26ཉིན་གྱི་ཕྱི་དྲོའི་དུས་ཚོད་བེད་སྤྱད་ནས་བློར་འཛིན་འགྲན་སྡུར་གྱི་བྱ་འགུལ་སྐབས་གསུམ་པ་སྤེལ།
     འཛིན་གྲྭ་སོ་སོའི་སློབ་གྲོགས་ཚང་མས་ཟླ་ངོ་གཅིག་ལྷག་གི་རིང་དུ་ནངས་སྔ་དགོང་འཕྱི་སྒོས་དུས་ཚོད་དམ་འཛིན་དང་། བློར་འཛིན་གྱི་ཕྱོགས་ལ་ཧུར་བརྩོན་གྱིས་གྲ་སྒྲིག་གང་ལེགས་མཛད་དེ་འབྲས་བུ་གཡུར་དུ་ཟ་བ་ཞིག་ལེན་རྒྱུའི་ཆོད་སེམས་དང་ཡིད་ཆེས་ཀྱིས་ཁེངས་ཏེ་རེབ་འདིའི་འགྲན་བསྡུར་ལ་ཞུགས་ཤིང་བློར་འཛིན་གྱི་ནང་དོན་ལ། སུམ་ཅུ་བའི་རྩ་བ་དང་ལེགས་བཤད་ལྗོན་དབང་། ཆུའི་བསྟན་བཅོས་དང་ཤིང་གི་བསྟན་བཅོས། ས་སྐྱ་ལེགས་བཤད་སོགས་ཡིན་པའི་ཁར་ཐུན་མོང་འགྲན་བསྡུར་ལ་འཛིན་གྲྭ་རེ་རེ་ཞུགས་པ་དང་མི་སྒེར་ལ་འཛིན་གྲྭ་རེ་ནས་སློབ་མ་གསུམ་རེ་འགྲན་བསྡུར་ལ་ཞུགས།
     འགྲན་བསྡུར་དངོས་སུ་མགོ་མ་བརྩམ་གོང་། འཛིན་གྲྭ་སོ་སོས་དབྱངས་གཅིག་གདངས་གཅིག་ཏུ་ལྷ་མོ་དབྱངས་ཅན་མའི་བསྟོད་པ་ཚར་གཅིག་ཆོས་ཀྱི་མགོ་མ་སྐྱབས་འགྲོའི་ཚབ་ལ་བློ་འདོན་བྱས། དེའི་མུར་འགྲན་ཞུགས་པ་ཐམས་ཅད་ཀྱིས་དག་ཆ་ལྡན་ལ་བྱང་ཚད་མྱུར་བ། སྤོབས་པ་ཆེ་ཞིང་སྒྲའི་འདེགས་འཇོག་བཟང་བའི་སྒོ་ནས་དགེ་རྒན་དག་གི་བཀོད་སྒྲིག་ལྟར་དུ་བློ་ལ་སྐྱོར། སློབ་མ་ཚོའི་གཅིག་ལས་གཅིག་ལྷག་གི་ཚ་ཚ་འུར་འུར་དང་འཁྲུག་ཆ་དོད་པ། ཛ་དྲག་གི་འགྲན་བསྡུར་བརྒྱུད། འགྲན་རིམ་རེ་ཞིག་མཇུག་རྫོགས་ནའང་། ཆེས་མཇུག་མཐར་སློབ་གྲོགས་རྣམས་ལ་འབྲས་རྟགས་ངོམ་པའི་སྟེགས་བུ་ཞིག་བསྐྲུན་ཏེ་བཀོད་སྒྲིག་བྱས་པའི་བློར་འཛིན་ནང་དོན་ལས་གཞན་སློབ་གྲོགས་ལ་ལས་བོད་ཀྱི་ལོ་རྒྱུས་ཀྱི་སྡོམ་དང་སློབ་གཉེར་བྱེད་ཚུལ་གྱི་བསླབ་བྱ། དགེ་ལྡན་ལེགས་བཤད། གདུགས་དཀར་སོགས་ཆུ་བཞུར་བ་ལྟར་ཤར་མར་བློ་རུ་སྐྱོར་བར་བློ་ལྡན་སློབ་གྲོགས་རྣམས་ཀྱིས་བསྟོད་པའི་ཐལ་མོ་ལྷང་ལྷང་དུ་བརྡབས་པའི་མི་ཚད། ལྷག་པར་དགེ་རྒན་རྣམས་ཀྱང་བཞུགས་སྟེགས་ལས་རང་དབང་མེད་པར་ཡར་བཞེངས་ནས་ཡི་རང་གི་ལྷ་རྫས་ཁ་བཏགས་འབུལ་ཏེ་ཚོགས་རའི་མདུན་ནས་དམིགས་སུ་བསལ་ཏེ་བློར་འཛིན་ཕྱོགས་སུ་ཤུགས་རྒྱག་དགོས་ཚུལ་སྔོན་བྱོན་སྐྱེས་ཆེན་དམ་པ་དག་གི་བློར་འཛིན་སྙིང་སྟོབས་དང་སྦྱར་ཏེ་བསྔགས་བརྗོད་ཀྱི་མེ་ཏོག་གཏོར།
     རེབ་འདིའི་བློར་འཛིན་འགྲན་བསྡུར་སྔོན་མའི་འགྲན་བསྡུར་དང་བསྡུར་ན་སློབ་མ་ཚོའི་སྤོབས་པའི་གཟེངས་མཐོ་བ། ཟབ་ཞུགས་ཀྱི་ཚད་ལས་བརྒལ་བ། དཔའ་ཁས་ལེན་གྱི་སློབ་བུ་འཚང་ཁ་ཤིག་ཤིག་ཏུ་འགྲན་བསྡུར་ལ་ཞུགས་པས་རྒྱལ་ཁ་དང་གྲུབ་འབྲས། ཡིད་ཆེས་ཀྱི་ཀློང་ནས་སྐབས་གསུམ་པའི་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་བློར་འཛིན་འགྲན་བསྡུར་བདེ་བླག་ངང་མཇུག་རྫོགས།