མང་རྫོང་སྐབས་དང་པོའི་ཡིད་འོང་སློབ་རའི་རིག་གནས་སྒྱུ་རྩལ་དུས་ཆེན་སྤེལ་བ།

གླང་ཆེན་ས་གཤགས།

ས་འགྱོག

ཐག་འཐེན་འགྲན་བསྡུར།

     མང་རྫོང་གི་སློབ་གྲྭ་སོ་སོའི་རིག་གནས་འཚོ་བ་ཕུན་སུམ་ཇེ་ཚོགས་སུ་གཏོང་བ་དང་། ལྷག་པར་དུ་སློབ་མའི་སྤོབས་པ་སྐྱེད་སྲིང་དང་ནུས་པ་མཐོར་འདེགས་སུ་གཏོང་ཆེད། མང་རྫོང་སྐབས་དང་པོའི་ཡིད་འོང་སློབ་རའི་རིག་གནས་སྒྱུ་རྩལ་དུས་ཆེན་གྱི་སྲོལ་རྒྱུན་ལུས་རྩལ་འགྲན་བསྡུར་འདི་རྫོང་ཨུ་དང་རྫོང་མི་དམངས་སྲིད་གཞུང་གི་ཐུགས་ཁུར་དང་རྒྱབ་སྐྱོར་འོག་རྫོང་སློབ་གསོ་ཅུའུ་དང་རྫོང་རིག་གནས་ཅུའུ་གཉིས་ཀྱིས་གཙོ་སྒྲུབ་གནང་བ་ཡིན་ལ། སྤྱི་ཟླ5བའི་ཚེས27ཉིན། སློབ་རའི་རིག་གནས་སྒྱུ་རྩལ་གྱི་སྲོལ་རྒྱུན་ལུས་རྩལ་འགྲན་བསྡུར་དེ་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་པའི་ལུས་རྩལ་ར་བ་རུ་གཟབ་རྒྱས་ངང་ཚོགས།
     ཐེངས་འདིའི་འགྲན་ཞུགས་ཀྱི་སློབ་གྲྭ་ལ་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་པ་དང་། མང་རྫོང་མི་རིགས་སློབ་འབྲིང་དང་། མགོ་མང་གྲོང་བརྡལ་དཀྱིལ་སྙིང་སློབ་ཆུང་དང་། མང་ར་ཞང་དཀྱིལ་སྙིང་སློབ་ཆུང་དང་། ཐར་ཤུལ་ཞང་དཀྱིལ་སྙིང་སློབ་ཆུང་བཅས་ཡོད་པས་གཞི་རྒྱ་ཧ་ཅང་ཆེ་ལ། འགྲན་བསྡུར་རྣམ་གྲངས་ཀྱི་ཐད་ནས་ཀྱང་ཐག་འཐེན་དང་། ས་འགྱོག་དང་། གླང་ཆེན་ས་གཤགས་དང་། ཐག་ལྡིང་དང་། དམངས་གླུ་དང་ཞབས་བྲོ་བཅས་ཡོད། གདོང་ལ་འཛུམ་གྱིས་ཁེངས་ཤིང་འགྲན་ཞུགས་ཀྱི་སློབ་མ་རེ་རེའི་ཁྱད་མཚར་གྱི་འཁྲབ་སྟོན་ཁྲོད་ནས་དགེ་སློབ་ཡོངས་ལ་རེ་བའི་སྤོབས་པ་དང་སྐྱིད་པའི་སྣང་བ་བསྩལ་བྱུང་།