ཐེམ་ཆེན་རྫོང་མི་རིགས་སློབ་འབྲིང་དང་པོས་སློབ་མ་རྣམས་ལ་རྡུང་ལེན་འགྲན་སྡུར་གྱི་བྱ་འགུལ་སྤེལ།
དཔྱད་འདེམ་པ་དང་གཟིགས་མོ་བ།
རྡུང་ལེན་དཀྲོལ་བཞིན་པ།
སློབ་མ་དག་གི་སློབ་གསེང་གི་འཚོ་བ་ཕུན་སུམ་ཚོགས་པ་དང་། བོད་རང་གི་དམངས་ཁྲོད་ཀྱི་སྒྱུ་རྩལ་རིག་གནས་ཏེ་སྒྲ་སྙན་རྡུང་ལེན་གྱི་རིག་གནས་དར་སྤེལ་དུ་གཏོང་ཆེད། ཉེ་ཆར། ཐེམ་ཆེན་རྫོང་མི་རིགས་སློབ་འབྲིང་དང་པོས་སློབ་ར་ཡོངས་ལ་ཁ་ཕྱོགས་ཏེ་རྡུང་ལེན་འགྲན་སྡུར་གྱི་བྱ་འགུལ་ཞིག་སྤེལ།
ཐེངས་འདིའི་བྱ་འགུལ་ལ་འཛིན་གྲྭ་སོ་སོ་ནས་ཐོན་པའི་སློབ་མ30ལྷག་ཞུགས་ཡོད་ལ། ཁོ་ཚོའི་མགྲིན་ངག་ལས་ཐོན་པའི་གླུ་སྐད་དང་སོར་རྩེ་ལས་འཁྲུངས་པའི་རྒྱུད་དྲུག་གི་དབྱངས་རྟ་དེས་སློབ་ར་ཡོངས་ལ་དམངས་སྲོལ་རིག་གནས་ཀྱི་མཁའ་དབུགས་ལེགས་པོ་ཞིག་ཆགས་སུ་བཅུག་པར་མ་ཟད། དཀྲོལ་ལེན་པ་དག་གིས་དུས་རབས་ལ་བསྟོད་པ་དང་། རི་ཆུ་ལ་བསྟོད་པ། ཕ་མ་ལ་བསྟོད་པ་སོགས་ཀྱི་དབྱངས་རྟ་རེ་རེ་ཡིས་དགེ་སློབ་ཡོངས་ཀྱི་ཡིད་དབང་ཅིག་ཅར་དུ་བཀུག
ཐེངས་འདིའི་བྱ་འགུལ་བརྒྱུད་ནས་སློབ་མ་དག་གིས་དམངས་སྲོལ་རིག་གནས་ལ་སྔར་ལས་ལྷག་པའི་དོ་ཁུར་གྱི་འདུ་ཤེས་ཇེ་དྲག་ཏུ་བཏང་བར་མ་ཟད། སྒྲ་སྙན་རྡུང་ལེན་གྱི་འགྱུར་ཁུགས་ཁྲོད་ན་རང་རེའི་མི་རིགས་ཀྱི་སྲོལ་རྒྱུན་གྱི་དབྱངས་རྟ་གང་མང་ཞིག་བསྐོང་ཡོད་པ་ཡང་རྟོགས་སུ་བཅུག
མཇུག་མཐར། སློབ་གཙོ་གཞོན་པ་ཚེ་རིང་ཉི་མ་ཡིས་ཐེངས་འདིའི་བྱ་འགུལ་ལ་སྤྱི་བསྡོམས་བྱས་པ་དང་། དམའ་འབྲིང་གསུམ་པའི་འཛིན་གྲྭ་གསུམ་པའི་སློབ་མ་ལྕགས་མོ་འཚོ་ལ་བྱ་དགའ་ཨང་དང་པོ་དང་། མཐོ་འབྲིང་གསུམ་པའི་འཛིན་གྲྭ་གཉིས་པའི་སློབ་བུ་རྡོ་རྗེ་ཚེ་བརྟན་དང་མཐོ་འབྲིང་གཉིས་པའི་འཛིན་གྲྭ་གསུམ་པའི་སློབ་མ་རྡོ་རྗེ་འཚོ་ལ་བྱ་དགའ་ཨང་གཉིས་པ། དམའ་འབྲིང་གཉིས་པའི་འཛིན་གྲྭ་ལྔ་བའི་སློབ་མ་བསམ་འཕེལ་ནོར་བུ་དང་མཐོ་འབྲིང་དང་པོའི་འཛིན་གྲྭ་གཉིས་པའི་སློབ་བུ་ཀུན་བཟང་རང་གྲོལ། དམའ་འབྲིང་གཉིས་པའི་འཛིན་གྲྭ་བཞི་བའི་སློབ་མ་ནོར་ལྷ་བཅས་ལ་བྱ་དགའ་ཨང་གསུམ་པ་ཐོབ།
