སློབ་མའི་རྩོམ་འབྲིའི་མོས་པ་དང་ནུས་པ་སྐྱེད་སྲིང་སྐོར་གྱི་ཚོགས་བཤད་གནང་།

རྒན་ལགས་ཀྱིས་སློབ་མ་རྣམ་པར་ཚོགས་བཤད་གནང་བཞིན་པའི་ཚུལ།

     མི་རིགས་སྐད་ཡིག་གི་འཛིན་སྐྱོང་སྤེལ་གསུམ་གྱི་དམིགས་འབེན་བྱེ་བྲག་ཅིག་ནི་བོད་ཀྱི་གཞོན་རབས་པའི་རྩོམ་འབྲིའི་ནུས་པར་རག་ལས་ཤིང་། རང་མི་རིགས་ཀྱི་རྩོམ་རིག་རིག་གནས་ཀྱི་མཁའ་དབུགས་ལེགས་པོ་ཞིག་བཞེངས་སྐྲུན་བྱ་རྒྱུ་ནི་དེང་རབས་སློབ་གསོའི་འགན་ཁུར་གཙོ་བོ་ཞིག་ཡིན།

རྒན་རྣམ་པས་བློ་རྩེ་གཅིག་ལ་གཞོལ་ནས་ཉན་ཚུལ།

     སྤྱི་ཟླ10བའི་ཚེས15ཉིན། ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་དགའ་བ་དང་སྤྲོ་བའི་ཀློང་ནས་བོད་ཁུལ་ན་མཚན་སྙན་རབ་ཏུ་འབར་བའི་ན་གཞོན་རྩོམ་པ་པོ་ཨ་སྨྱོན་བཀྲ་ཤིས་དོན་གྲུབ་གདན་འདྲེན་བྱས་ནས་ཐོག་མར་སློབ་གྲྭའི་སྐད་ཡིག་དགེ་རྒན་རྣམ་པར་བོད་ཀྱི་སྒྲུང་གཏམ་གསར་རྩོམ་གྱི་ཆུ་ཚད་མཐོར་འདེགས་གཏོང་བའི་ཐབས་ལམ་སྐོར་གླེང་བ་ཞེས་པའི་བརྗོད་གཞི་ཞིག་གཏན་འཁེལ་བགྱིས་ནས་བོད་ཀྱི་རྩོམ་རིག་གསར་རྩོམ་གྱི་ལོ་རྒྱུས་དང་བོད་ཀྱི་སྒྲུང་གཏམ་གསར་རྩོམ་གྱི་གནས་བབ། བོད་ཀྱི་སྒྲུང་གཏམ་གསར་རྩོམ་གྱི་ཚད་གཞི། གསར་སྐྱེས་རྩོམ་པ་པོའི་མི་འདང་ས། དཔྱད་བརྗོད་པའི་དཔུང་སྡེ་གཉོམ་ཚུལ། སྒྲུང་གཏམ་གསར་རྩོམ་གྱི་ཐབས་ལམ་བཅས་ཕྱི་གླིང་མཁས་པ་དང་རྒྱལ་ནང་མཁས་པ་གྲགས་ཅན་གྱི་ལེགས་བཤད་རྣམས་ལུང་དྲངས་ནས་འཆད་ཁྲིད་བྱས།

བོད་ཀྱི་སྒྲུང་གཏམ་གསར་རྩོམ་གྱི་ཆུ་ཚད་མཐོར་འདེགས་གཏོང་བའི་ཐབས་ལམ་སྐོར་གསུང་བཞིན་པ།

     ཁོམ་ལོང་མེད་པའི་དུས་ཚོད་ཀྱི་རྐྱེན་པས་ངལ་གསོ་ཡང་མ་མཛད་པར། དེའི་རྗེས་ཏག་ཏག་ཏུ་སློབ་གྲྭའི་ལོ་རིམ་དྲུག་པ་ནས་དམའ་འབྲིང་གསུམ་པའི་བར་གྱི་སློབ་མ་ཚོར། རྩོམ་འབྲིའི་ཐབས་ལམ་དང་། རྩོམ་འབྲིའི་དགའ་ཕྱོགས་སྐྱེད་སྲིང་བྱ་ཚུལ། རྩོམ་འབྲིའི་ནུས་པ་མཐོར་འདེགས་གཏོང་ཚུལ་བཅས་ཀྱི་ཐད་དུ་ཅི་ཞིག་འབྲི། ཇི་ལྟར་འབྲི་ཞེས་པའི་ཁ་བྱང་དམིགས་སུ་བཟུང་ནས་སློབ་མ་སྟོང་ཕྲག་གཉིས་ལ་གསུང་བཤད་གལ་ཆེན་གནང་། རྒན་ལགས་ཀྱིས་རྩོམ་ཡིག་འབྲི་རྒྱུར་མོས་པ་ཡོད་དགོས་ཤིང་། དུས་རྒྱུན་སྨྱུག་ཁ་མ་ལྷོད་པར་རྒྱུན་འབྲི་བྱེད་པའི་ཁ་ཏ་སློབ་གསོ་རིམ་པ་གསུམ་དུ་བགར་ནས་སློབ་མ་ཚོས་གོ་སླ་བའི་ཚིག་གི་འགྲོས་ལ་བཅོལ་ཏེ། དུས་རྒྱུན་གྱི་སློབ་སྦྱོང་འཚོ་བའི་གྲུ་ཟུང་གང་རུང་གི་དཔེར་བརྗོད་དང་བྱེད་ཐབས་སོགས་སྟབས་བདེ་མོས་སློབ་མའི་རྒྱུད་ལ་བུམ་པ་གང་བྱོའི་ཚུལ་དུ་བཞག མ་ཟད་སློབ་གྲྭའི་ཞོགས་གླུ་ཚགས་པར་སྔར་ལས་འཐུས་ཇེ་ཚང་དང་སྤྱོད་སྒོ་ཇེ་ཆེ། ཀུན་གྱིས་ཐེ་གཏོགས་དང་གཟེངས་བསྟོད། ལྟ་རིན་ཡོད་ཅིང་གླེང་རིན་ཡོད་པའི་ཚགས་པར་ལེགས་ཤོས་ཤིག་ཏུ་འགྱུར་ཆེད། ད་ལོའི་སློབ་སྐབས་ནས་བཟུང་ཟླ་རེར་བོད་ཡིག་ཚགས་པར་གཅིག་དང་རྒྱ་ཡིག་དང་དབྱིན་ཡིག་ཚགས་པར་གཅིག་སྟེ་སྡོམ་པས་ཚགས་ཤོག་གཉིས་ཅན་གྱི་ཞོགས་གླུ་ཚགས་པར་ལྕགས་པར་དུ་བཏབ་ནས་སློབ་གྲྭའི་དགེ་སློབ་རྣམས་ཀྱི་སྤྱན་ལམ་དུ་བསྟར་ཐུབ་པ་བྱུང་ལ། རྒན་ལགས་ཀྱིས་སྐུ་དངོས་སུ་ལོ་རིམ་སོ་སོ་དང་འཛིན་གྲྭ་སོ་སོར་ཞོགས་གླུ་ཚགས་པར་འགྲེམ་ཞོར་མཉམ་བསྐྱོན་འདྲ་པར་བླངས་ནས་སློབ་མ་ཚོའི་ཐལ་མོ་རྡེབ་སྒྲའི་ཁྲོད་ཚོགས་བཤད་བདེ་ལེགས་ངང་མཇུག་རྫོགས།

སློབ་གྲྭའི་རྐང་འཛིན་རྩོམ་པ་པོ་དང་ལྷན་དུ་པར་བསྐྱོན་པ།

གདན་ཞུའི་སྐུ་མགྲོན་ངོ་སྤྲོད།
     དེང་རབས་བོད་ཀྱི་ན་གཞོན་རྩོམ་པ་པོ་ཨ་སྨྱོན་བཀྲ་ཤིས་དོན་གྲུབ་ནི་1967ལོར་མདོ་སྨད་ཁྲི་ཀའི་ཡུལ་ཀྱི་སྐེ་བ་ཚོ་དྲུག་ཏུ་གྲགས་པའི་ཀླུ་ཕུགས་སྡེ་བ་རུ་སྐྱེས། 1990ལོར་ནུབ་བྱང་མི་རིགས་སློབ་ཆེན་བོད་ཡིག་སྡེ་ཁག་ནས་མཐར་ཕྱིན་ཏེ་མཚོ་སྔོན་མི་རིགས་དཔེ་བསྐྲུན་ཁང་དུ་ལས་བགོས་བྱས། ཁོ་ནི་རྒྱལ་ཁབ་རིམ་པ་དང་པོའི་རྩོམ་པ་པོ་དང་མཚོ་སྔོན་རྩོམ་པ་པོ་མཐུན་ཚོགས་ཀྱི་ཀྲུའུ་ཞི་གཞོན་པ། སྦྲང་ཆར་རྩོམ་སྒྲིག་ཁང་གི་ཀྲུའུ་རིན་གཞོན་པ། སྤྱི་ཁྱབ་རྩོམ་སྒྲིག་པ་ཆེན་མོ། ཁོང་གི་བརྩམས་ཆོས《སྟོན་ཀྱི་རང་སྒྲ》ལ་རྒྱལ་ཡོངས་རྟ་མཆོག་རྟགས་མའི་རྩོམ་རིག་བྱ་དགའ་འཐོབ། ད་དུང་བརྩམས་ཆོས་ཁ་ཤས་ལ་རྒྱལ་ཡོངས་གངས་ཅན་རྟགས་མའི་རྩོམ་པ་པོ་དང་། རྒྱལ་ཡོས་གྲངས་ཉུང་མི་རིགས་ཕུལ་བྱུང་རྩོམ་པ་པོ། ཞིང་ཆེན་སྐབས་གསུམ་པ་བཞི་བ། བདུན་པ་བཅས་ཀྱི་ཕུལ་བྱུང་རྩོམ་པ་པོ་བཅས་སུ་བདམས་ཡོད། ཁོང་གི་བརྩམས་ཆོས་མང་པོ་ཞིག་རྒྱ་ཡིག་དང་དབྱིན་ཡིག འཇར་པན་དང་ཧྥ་རན་སིའི་ཡི་གེ་ལ་བསྒྱུར་ཡོད།