གསེར་ཆེན་རྫོང་གིས་བྱིས་པའི་སློབ་གྲྭའི་སྐབས་ཐོག་དགེ་རྒན་བསྡུས་ཏེ་ལས་སྔོན་གསོ་སྦྱོང་བྱས་པ།

མཚོ་སྔོན་དགེ་ཐོན་སློབ་ཆེན་སློབ་གསོ་རིག་པའི་གླིང་གི་སློབ་སྔོན་སློབ་གསོའི་ཆེད་མཁས་པའམ་
དགེ་རྒན་ཆེན་མོ་ཧོ་ཅིན་ལགས་ཀྱིས་འཆད་ཁྲིད་གནང་བཞིན་པ།

          སྤུས་ཚད་བཟང་བ་དང་ལས་གནས་ཀྱི་རྣམ་པ་ལེགས་པའི་བྱིས་པའི་དགེ་རྒན་རུ་ཁག་འཛུགས་སྐྲུན་དང་།  མིག་དཔེ་གཞན་སྟོན། ལས་གནས་ལ་དགའ་བའི་རང་རྟོགས་རང་བཞིན།  དེ་མིན་སློབ་ཁྲིད་ཀྱི་ཆུ་ཚད་མཐོར་འདེགས་འབྱུང་བ་བཅས་བྱེད་ཆེད། གསེར་ཆེན་རྫོང་སློབ་གསོ་ཅུས་ཟླ2པའི་ཚེས26ནས་ཚེས28བར་གསར་དུ་བསྡུས་པའི་སློབ་སྔོན་བྱིས་པའི་དགེ་རྒན101ལ་གསེར་ཆེན་རྫོང་སློབ་ཆུང་དང་པོར་དུས་ཡུན་ཉིན་གཉིས་ཀྱི་ལས་སྔོན་གསོ་སྦྱོང་གནང་བ་རེད།
          གསར་དུ་བསྡུས་པའི་དགེ་རྒན་རྣམས་ཀྱི་ཡོན་ཚད་མཐོ་ནའང་བྱིས་པའི་ཆེད་ལས་དགེ་རྒན་མིན་པ་ཅུང་མང་བའི་དངོས་ཡོད་གནས་ཚུལ་ལ་གཞིག་སྟེ། གསོ་སྦྱོང་བྱ་བར་མཚོ་སྔོན་དགེ་ཐོན་སློབ་ཆེན་གྱི་སློབ་གསོ་ཆེད་མཁས་པ་དང་དགེ་རྒན་ཆེན་མོ་དང་། རྫོང་སློབ་གསོ་ཚན་ཞིབ་ཁང་གི་སློབ་སྟོན་ཚན་ཞིབ་རྐང་འཛིན་པ།  ཕུལ་བྱུང་བྱིས་པའི་དགེ་རྒན་རྣམས་གདན་དྲངས་ཤིང་།  བྱིས་པའི་དགེ་རྒན་གྱི་སྤྱོད་ལེགས་སྲོལ་བཟང་དང་། དགེ་རྒན་གྱི་སློབ་གསོའི་རྒྱུན་ལས། བདེ་འཇགས་སློབ་གསོའི་བྱ་འགུལ།  ལག་རྩལ་བཟོ་སྐྲུན།  བྱམས་སེམས་སློབ་གསོའི་བྱ་འགུལ་སོགས་ནང་དོན་གཙོ་བྱས་པའི་ལས་སྔོན་གསོ་སྦྱོང་གནང་།

ཁུལ་རིམ་པའི་རྐང་འཛིན་དགེ་རྒན་ནམ་རྫོང་སློབ་གསོ་ཅུའི་འགོ་
གཙོ་གཅོད་པ་དོན་འགྲུབ་ཀྱིས་སློབ་ཁྲིད་བྱེད་པ།

          ལས་སྔོན་གསོ་སྦྱོང་བྱས་པར་བརྒྱུད།  གསར་དུ་བསྡུས་པའི་བྱིས་པའི་དགེ་རྒན་རྣམས་ཀྱིས་དུས་སྐབས་གསར་བའི་ནང་སློབ་སྔོན་སློབ་གསོ་འཕེལ་རྒྱས་ལ་འཕྲད་པའི་གནས་བབ་གསར་བ་དང་དགོངས་ཚུལ་གསར་བ་དག་ལ་ངེས་གསལ་བྱུང་ཞིང་།  བྱིས་པའི་དགེ་རྒན་གྱི་རྨང་གཞི་ནུས་རྩལ་ངོས་འཛིན་དང་སློབ་སྔོན་སློབ་གསོའི་འཆད་ཁྲིད་ལམ་ལུགས་ལ་རྒྱུས་ལོན་ཡག་པོ་བྱས་ཏེ།  མགྱོགས་མྱུར་ངང་སློབ་སྔོན་སློབ་གསོའི་སློབ་ཁྲིད་བྱ་བ་དང་དགེ་རྒན་གྱི་ལས་རིགས་ཀུན་སྤྱོད་ཚད་གཞི་དག་ལ་རྒྱུས་ལོན་བྱེད་པར་རྨང་གཞི་སྲ་བརྟན་ཏུ་བཏང་།
          དེར་མ་ཟད་ཟླ3པའི་ཚེས5ནས་ཚེས6བར་གསར་དུ་བསྡུས་པའི་སྐབས་ཐོག་བྱིས་པའི་དགེ་རྒན101རྫོང་རིམ་པའི་བྱིས་པའི་སློབ་གྲྭ5ལ་བསྐྱོད་དེ་ལས་གནས་གསོ་སྦྱོང་དང་གཟིགས་ཞིབ་སློབ་སྦྱོང་བྱེད་པར་བཀོད་སྒྲིག་བྱས་ཤིང་།  ཟླ3པའི་ཚེས10ཡི་སྔོན་ཁོ་ཚོ་ཁག་དབྱེ་སྟེ་རྫོང་ཡོངས་ཀྱི་ཡུལ་ཚོ་དང་གྲོང་རྡལ།  སྡེ་བ་བཅས་ཀྱི་བྱིས་པའི་སློབ་གྲྭ59རུ་སློབ་ཁྲིད་དུ་བསྐྱོད་དགོས་པ་དང་། བྱིས་པའི་དགེ་རྒན་འདི་དག་གི་ལས་ཞུགས་སློབ་ཁྲིད་ལས་གསེར་ཆེན་རྫོང་གི་སློབ་སྔོན་སློབ་གསོའི་བདེ་ཐང་དང་།  རྒྱུན་རིང་། གཏན་འཇགས་འཕེལ་རྒྱས་བཅས་ལ་སྐྱེ་སྟོབས་གསར་བ་སྐྲུན་ངེས།