༄༅།།གསེར་ཆེན་རྫོང་མི་རིགས་སློབ་འབྲིང་གིས་དབྱངས་ཀྱི་རྨི་ལམ་ཞེས་པའི་སློབ་རའི་གླུ་གཞས་འགྲན་བསྡུར་སྤེལ།

གླུ་གཞས་ནི་མིའི་རིགས་ཀྱི་འཚོ་བའི་ཁྲོད་ཀྱི་དགའ་སྐྱོ་ཆགས་སྡང་གི་སྣང་བརྙན་གསར་བཞེངས་བྱེད་པའི་ངག་ཐོག་སྒྱུ་རྩལ་གྱི་ཁོངས་གཏོགས་ཤིག་ཡིན་ལ། གླུ་གཞས་ཀྱིས་ནང་སེམས་ཀྱི་འགྱུར་བ་དབྱངས་སུ་དྲངས་ཏེ་འཚོ་བའི་ཁ་དོག་དང་ནང་སེམས་ཀྱི་བདེ་སྡུག་སོགས་རྗེན་པར་སྟོན་པའི་ཁྱད་ཆོས་དང་ལྡན་པས། ང་ཚོས་གླུ་གཞས་སྒྱུ་རྩལ་གྱི་བྱ་གཞག་ལ་བརྩོན་ལེན་སྒོས་མི་རིགས་མཐུན་སྒྲིལ་དང་འཛམ་གླིང་ཞི་བདེ་འབྱུང་བའི་འབོད་སྐུལ་གཏོང་དགོས་པ་མ་ཟད། “ཐོག་མའི་བསམ་འདུན་མི་བརྗེད་པར་འགན་འཁྲི་ཡིད་ལ་བརྟན་པོར་འཆང”བའི་ལམ་ལུགས་གཞིར་བཟུང་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རིན་ཐང་ལྟ་བ་གཏིང་ཟབ་དུ་སྤེལ་བའི་ཆ་ལ་སྔ་ན་མེད་པའི་མཐུན་རྐྱེན་གང་ལེགས་སྐྲུན་དགོས་པ་རེད། ཁྱད་པར་དུ་སློབ་རའི་རིག་གནས་སྒྱུ་རྩལ་ཡར་རྒྱས་སུ་བཏང་སྟེ་ཏང་གི་མི་རིགས་སློབ་གསོའི་འོས་འགན་ལེགས་འགྲུབ་དང་འཆམ་མཐུན་སློབ་ར་འཛུགས་སྐྲུན་བྱེད་པའི་ཐད་ལ་སྔར་མེད་ཀྱི་བྱས་རྗེས་གང་ནུས་འཇོག་པར་བརྩོན་ལེན་བྱས་ཏེ་རྒྱལ་གཅེས་རིང་ལུགས་ཀྱི་བསམ་བློའི་ཀུན་སློང་རྣམ་དག་རྒྱུན་འཁྱོངས་དང་སྤྱོད་ཡོན་གཉིས་ལྡན་གྱི་མ་འོངས་པའི་མེས་རྒྱལ་གྱི་བདག་པོ་གསར་བ་སྐྱེད་སྲིང་བྱེད་པའི་སེམས་ཤུགས་སྔར་ལས་ཇེ་ཆེར་གཏོང་དགོས་པ་རེད། གཞན་ཡང་སྤྲོ་སྐྱིད་ལྡན་པའི་སློབ་རའི་འཚོ་བ་ཕུན་སུམ་ཚོགས་པར་བྱ་རྒྱུ་ནི་སློབ་མའི་མ་འོངས་པའི་ཕུགས་འདུན་དོན་གཉེར་གྱི་ཆ་ལ་མེད་དུ་མི་རུང་བའི་རྩ་བའི་རྨང་གཞིར་གྱུར་ཡོད་སྟབས་ང་ཚོས་དུས་དང་རྣམ་པ་ཀུན་ཏུ་རང་དབང་དང་འདྲ་མཉམ་གྱི་སློབ་མའི་དགའ་ཕྱོགས་སྔོག་འདོན་གྱི་ཆ་ལ་ཡང་གཞན་དྲིང་མི་འཇོག་པའི་ནུས་པ་གང་ཡོད་འདོན་དགོས་པ་རེད། 2019ལོའི་ཟླ12ཚེས21ཉིན་གྱི་ཕྱི་དྲོ། གསེར་ཆེན་རྫོང་མི་རིགས་སློབ་འབྲིང་གིས་དབྱངས་ཀྱི་རྨི་ལམ་ཞེས་པའི་སློབ་རའི་གླུ་གཞས་འགྲན་བསྡུར་གྱི་བྱ་འགུལ་དེ་སློབ་གྲྭའི་རྟགས་བརྒྱད་ར་བར་དུས་ལྟར་བསྡུས་པ་ཡིན་ལ། སློབ་གྲྭའི་སློབ་སྤྱི་ཚེ་རིང་དོན་འགྲུབ་དང་སློབ་སྤྱི་གཞོན་པ་བསོད་ནམས་ཚེ་རིང་དང་ཚེ་གཟུངས། སློབ་སྟོན་ཁང་གི་ཀྲུའུ་རིན་བཀྲ་ཤིས་མཚོ་བཅས་སློབ་གྲྭའི་མགོ་ཁྲིད་ཀྱིས་སྣེ་ཁྲིད་པའི་དམའ་གཅིག་དང་དམའ་གཉིས་རིམ་པའི་དགེ་སློབ་དག་གི་གདོང་ལ་ཟོལ་བཅོས་བྲལ་བའི་འཛུམ་མདངས་ལྷུག་པོར་གྲོལ་ཏེ་སློབ་རའི་གླུ་གཞས་འགྲན་ཚོགས་ཀྱི་ཡུལ་དངོས་སུ་ཕེབས་པ་རེད།  ཐེངས་འདིའི་སློབ་རའི་གླུ་གཞས་འགྲན་བསྡུར་གྱི་བྱ་འགུལ་གྱི་དཔྱད་འདེམས་པ་དགེ་རྒན་རིན་ཆེན་ཉི་མ་དང་དགེ་རྒན་གུ་རུ་རྡོ་རྗེ། དགེ་རྒན་ཚེ་མགོན་རྒྱལ་དང་དགེ་རྒན་གསང་བདག་ཚེ་རིང་།  དགེ་རྒན་གངས་རི་རྒྱལ་དང་དགེ་རྒན་ཚེ་རིང་རྣམ་རྒྱལ་བཅས་ཀྱིས་གཅིག་ནས་འདྲ་མཉམ་དང་དྲང་བདེན་གྱི་རྩ་བའི་དམིགས་འབེན་གཞིར་འཛིན་པ་དང་གཉིས་ནས་སློབ་མའི་སྐད་ངག་གི་འགུགས་ལུགས་དང་དབྱངས་ཀྱི་འདེགས་འཇོག ལུས་ཀྱི་ཉམས་འགྱུར་དང་གོན་པ་སོགས་ཀྱི་ཁྱད་ཆོས་དང་བསྟུན་ནས་འགྲན་ཞུགས་སློབ་གྲོགས་རེ་རེ་ལ་དོན་དངོས་དང་མཐུན་པའི་སྒོ་ནས་དཔྱད་བསྡུར་བྱས་པ་བརྒྱུད་ནས་འགྲན་ཞུགས་སློབ་གྲོགས་ཉེར་གཅིག་གིས་བོད་རྒྱ་སྐད་གཉིས་ཀྱི་ལམ་ནས་བླངས་པའི་གླུ་གཞས་བརྩམས་ཆོས་དག་ལས་བྱ་དགའ་ཨང་དང་པོ་ཅན་གཅིག་དང་བྱ་དགའ་ཨང་གཉིས་པ་ཅན་གཉིས། བྱ་དགའ་ཨང་གསུམ་པ་ཅན་གསུམ་བདམས་ཐོན་བྱུང་བ་ཡིན་ལ། འདི་དག་ལས་དམའ་གསུམ་འཛིན་གྲྭ་གསུམ་པའི་སློབ་གྲོགས་འཕགས་མོ་ཆོས་སྒྲོན་གྱིས་བླངས་པའི《བོད་རིགས་བྱིས་པའི་སྨོན་འདུན》ཞེས་པའི་གླུ་གཞས་ལ་བྱ་དགའ་ཨང་དང་པོ་ཐོབ་པ་དང་། དམའ་གསུམ་འཛིན་གྲྭ་བཅུ་གཉིས་ཀྱི་སློབ་གྲོགས་སྐལ་བཟང་སྒྲོལ་མས་བླངས་པའི་གླུ་གཞས《དྭངས་གཙང་གི་ཁ་བཏགས》དང་དམའ་གཅིག་འཛིན་གྲྭ་དྲུག་པའི་སློབ་གྲོགས་འཇིགས་མེད་རྡོ་རྗེ་ཡིས་བླངས་པའི་གླུ་གཞས《རྨི་ལམ་གྱི་ཨ་མ》ཞེས་པ་གཉིས་ལ་བྱ་དགའ་ཨང་གསུམ་པ་ཐོབ་པ་རེད། དམའ་གཉིས་འཛིན་གྲྭ་ལྔ་བའི་སློབ་གྲོགས་གནམ་སྐྱིད་མཚོས་བླངས་པའི་གླུ་གཞས《ལོ་འཁོར》ཞེས་པ་དང་དམའ་གཉིས་འཛིན་གྲྭ་བཅུ་བའི་སློབ་གྲོགས་ཚེ་ཐར་མཚོས་བླངས་པའི་གླུ་གཞས《བོད་དབྱངས་སྙན་མོ》དམའ་གསུམ་འཛིན་གྲྭ་བཅུ་གསུམ་གྱི་སློབ་གྲོགས་དཔལ་ལྡན་དོན་འགྲུབ་ཀྱིས་བླངས་པའི་གླུ་གཞས《སྤུན་ཟླ》བཅས་ལ་བྱ་དགའ་ཨང་གསུམ་པ་ཐོབ་པ་མ་ཟད། སློབ་གྲྭའི་འབྲེལ་ཡོད་མགོ་ཁྲིད་དག་གིས་ཡུལ་དངོས་ནས་བྱ་དགའ་ཐོབ་པའི་སློབ་གྲོགས་དག་ལ་བྱ་དགའི་གཟེངས་རྟགས་བསྩལ་བ་རེད། སློབ་རའི་གླུ་གཞས་འགྲན་བསྡུར་གྱི་བྱ་འགུལ་འདི་སྤེལ་བ་བརྒྱུད་ནས་དགེ་སློབ་དག་གི་སེམས་ལ་སྔ་ན་མེད་པའི་བག་ཆགས་ཟབ་མོ་ཞིག་བཞག་བྱུང་བ་ནི་སློབ་མའི་དགའ་ཕྱོགས་སྣ་མང་ཅན་དང་སློབ་རའི་རིག་གནས་སྒྱུ་རྩལ་ཡར་རྒྱས་གོང་འཕེལ་དུ་གཏོང་བའི་ཆ་ལ་ནུས་པ་གང་ཡོད་འདོན་པར་འདོད་པའི་ཀུན་སློང་དང་། རྗེས་ཕྱོགས་ཀྱི་སློབ་རའི་འཚོ་བ་སྔར་ལས་མཛེས་ཤིང་སྡུག་ལ་ཕུན་སུམ་ཚོགས་པའི་ཁྱད་ཆོས་ཀྱིས་ཀུན་ནས་ཕྱུག་པར་བྱ་བར་འབད་པ་ཆེར་བསྐྱེད་སྒོས་སློབ་མ་རང་སྟེང་གི་ཐུན་མོང་མ་ཡིན་པའི་དགའ་ཕྱོགས་མངོན་འགྱུར་བྱ་བར་མཐུན་རྐྱེན་གང་ལེགས་སྐྲུན་པར་བྱས་པ་རེད།