༄༅༎རྟགས་འཇུག་ལས་ཡི་གེའི་ངོ་བོ་བཤད་པ།

མིང་ཕྲད་རྩོམ་པའི་གཞི་རུ་གྱུར་པ་ཡི། ། 
སྐད་ཀྱི་གདངས་ཏེ་ཡི་གེ་རྣམ་གཉིས་ལས། ། 
གནས་དང་བྱེད་པའི་རྣམ་འགྱུར་མི་གསལ་ཞིང་། །
སྒྲ་ཙམ་ཤས་ཆེ་བ་ནི་དབྱངས་ཡིག་དང་། ། 
གནས་བྱེད་རྣམ་འགྱུར་གསལ་ཞིང་སྐད་གདངས་ནི། །
ཁྱད་པར་ཅན་དུ་གྱུར་པ་གསལ་བྱེད་དོ། ། 
དབྱངས་གསལ་གཙོ་བྱེད་མགོ་འདོགས་འཕུལ་རྟེན་རྣམས། །
གང་རིགས་སྦྱར་བས་མིང་དང་ཕྲད་སོགས་བྱུང་། །
མིང་ཕྲད་སྦྱར་བས་ཚིག་ཏུ་གྲུབ་པ་དང་། ། ཚིག་ཕྲེང་སྤེལ་བ་ངག་གི་བརྗོད་པའོ། ། 
སྤྱིར་འཇིག་རྟེན་ཁམས་ན་སྐད་རིགས་སྣ་ཚོགས་ཡོད་པ་དང་། དེ་མཚུངས་ཡི་གེའི་རིགས་ཀྱང་མང་། རགས་པར་བསྡུས་ན། ཡི་གེས་སྦྱོར་ཀློག་ཅན་དང་། དཔེ་རིས་ཅན་གཉིས་སུ་འདུས་སོ། ། རིགས་འདི་གཉིས་ཀའི་གྲུབ་ལུགས་མི་འདྲ་བས། ངོ་བོའང་དེ་འདྲ་མི་གཅིག་ལ། དབྱངས་གསལ་གཉིས་རྩ་བར་བྱས་ནས་གནས་རྣམས་སུ་བྱེད་པ་རྣམས་ཕྲད་པ་ལས་བྱུང་བའི་བོད་ཡིག་ལྟ་བུའི་ཡི་གེ་སྦྱོར་ཀློག་ཅན་གྱི་ངོ་བོ་ནི། མིང་དང་ཕྲད་སོགས་རྩོམ་པའི་གཞིར་གྱུར་པའི་སྐད་ཀྱི་གདངས་ཡིན་ཞིང་། དངོས་པོ་གང་དང་གང་གི་རི་མོའི་རྣམ་པ་ཙམ་བྲིས་པ་དེ་རིམ་གྱིས་ཡི་གེར་གྱུར་པའི་རྒྱ་ཡིག་ལྟ་བུའི་ཡི་གེ་དཔེ་རིས་ཅན་གྱི་ངོ་བོ་ནི། སྐད་ཀྱི་གདངས་སམ་སྒྲ་གང་ཞིག་འབྲུ་རུ་ཆགས་པ་མ་ཡིན་གྱི། སྐད་ཆ་མཚོན་བྱེད་ཀྱི་རྟགས་ཙམ་ཡིན་ནོ། ། ཞེས་རྒྱ་སྐད་ཀྱི་བརྡ་སྤྲོད་པའི་གཞུང་རྣམས་སུ་བཤད་པ་ལྟར་རོ། ། 
དེ་ལ་བོད་ཀྱི་ཡི་གེ་གཅིག་གམ་གཉིས་སམ་དུ་མ་འདུས་པའི་མིང་གཞིའི་མཐར་རྗེས་འཇུག་གང་རུང་ཞིག་སྦྱར་བས། དོན་གྱི་ངོ་བོ་ཙམ་སྟོན་པའི་མིང་དང་། ཚིག་སྦྱོར་བྱེད་ཀྱི་ཕྲད་དུ་གྲུབ་པ་དང་། མིང་དུ་མ་རྣམ་དབྱེའམ་ཚིག་ཕྲད་ཀྱིས་མཚམས་སྦྱར་ནས་ཚིག་ཏུ་གྲུབ་པ་དང་ཚིག་གི་ཕྲེང་བ་སྤེལ་ནས་གཞུང་དོན་གསལ་བར་བྱེད་པ་བརྗོད་པར་གྲུབ་བོ། །