༄༅༎ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་དྲ་ཐོག་སློབ་ཁྲིད་ལ་གསོན་ཤུགས་བརྟས།

ཏོག་གསར་གློ་ཚད་རིམས་ནད་ཀྱི་རྐྱེན་པས་སློབ་གྲྭ་སོ་སོ་སློབ་མགོ་ཚུགས་པའི་འཆར་གཞི་ཕྱིར་འགྱངས་བྱས་ན་ཡང་། མཚོ་སྔོན་ཞིང་ཆེན་སློབ་གསོ་ཐིན་གྱི་བཀོད་སྒྲིག་ལྟར་དུ་སློབ་གྲྭ་སོ་སོའི་སློབ་མ་ཚོར་དྲ་ལམ་སློབ་ཁྲིད་ཀྱི་ཐབས་ལམ་སྤྱོད་པའི་དགོངས་ཚུལ་བཏོན་པར་བརྟེན། ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་ཀྱང་གོང་རིམ་སློབ་གསོ་ཐིན་གྱི་དགོངས་དོན་ལྟར་དུ་རིག་ཚན་དང་རྩིས་ཚན་གྱི་བསླབ་ཁག་དག་བསྐྱར་སྦྱོང་གཙོ་བོར་བཟུང་སྟེ་ཟླ3པའི་ཚེས1ནས་བཟུང་ཤེས་བྱ་བརྒྱུད་སྤྲོད་དྲ་ལམ་ནས་སྤྱད་དང་སྤྱོད་བཞིན་ཡོད།
སློབ་གྲྭའི་སློབ་མ་མང་ཆེ་བའི་ཐོན་ཁུངས་ནི་མཁར་གྲོང་དང་བར་ཐག་རིང་བོར་ཕྱེ་བའི་རི་སུལ་ལུང་རྒྱུད་དུ་གཞིས་ཆགས་པའི་འབྲོག་ཕྱོགས་དང་རོང་ཕྱོགས་ཡིན་སྟབས། ཁ་པར་དང་དྲ་རྒྱའི་བརྡ་རྟགས་ཧ་ཅང་གཉོམ་པ་དང་། གལ་ཏེ་སློབ་ཐུན་མགོ་རྔ་ཚང་བ་ཞིག་ལ་ཉན་དགོས་ཚེ། སྒང་མགོ་དང་རི་རྩེར་འཛེགས་ནས་སློབ་ཁྲིད་ལ་ཉན་དགོས་པའི་དཀའ་ཁག་ཀྱང་མང་པོར་འཕྲད་ཡོད། ཡིན་ན་ཡང་། དགེ་རྒན་དང་ཁྱིམ་བདག་རྣམ་པའི་མཉམ་འབྲེལ་གྱི་རྩོལ་བ་ལ་བརྟེན་ཏེ། ཅི་ནུས་གང་ཐུབ་ཀྱིས་ཁྱིམ་བདག་ལ་ལས་སྐུད་མེད་དྲ་འཐེན་པ་དང་། ཁྱིམ་བདག་ལ་ལས་བརྡ་རྟགས་ཡོད་སའི་ཁྱིམ་མཚེས་ཚང་ལ་བྱིས་པ་བཅོལ་ནས་སློབ་ཐུན་གཅིག་ཀྱང་འཐུས་ཤོར་དུ་མ་བཏང་བར་གཟབ་ཉན་བྱེད་བཞིན་པའི་སྣང་ཚུལ་ལེགས་པོ་ཞིག་མཐོང་འོང་། ཁ་སང་དེ་རིང་དགེ་རྒན་རྣམ་པས་ཀྱང་བསླབ་ཁག་སོ་སོའི་དཔེ་ཆ་དང་སློབ་ཁྲིད་དཔྱད་གཞིའི་རྒྱུ་ཆ་ད་དུང་ལག་སོན་བྱུང་མེད་ནའང་། ཕན་ཚུན་གཡོར་བསྐྱི་དང་བསྐྱར་དཔར་ཉོ་བསྡུ་བྱས་ཏེ་སྐར་མ་སུམ་ཅུའི་ཡུན་གྱི་སློབ་ཐུན་གཅིག་ལ་ཉིན་ཕྱེད་རིང་དུ་སྟ་གོན་བཟང་བོ་བྱས་ནསPPTལམ་ནས་སློབ་གྲོགས་ཚོར་སྒྲ་དག་གསལ་གསུམ་ཚང་བའི་སྒོ་ནས་སློབ་ཁྲིད་ལ་ནན་ཏན་བྱེད་བཞིན་པ་མ་ཟད། དྲ་ལམ་ལས་བྱ་བགོས་རྗེས་དྲ་ཐོག་ཏུ་སློབ་མ་རེ་རེའི་ལས་བྱར་ཞུ་དག་དང་གདེང་འཇོག་ཏན་ཏིག་བྱེད་གིན་འདུག སློབ་མ་རྣམས་ཀྱང་ཕ་མའི་བཀོད་སྒྲིག་དང་སྣེ་ཁྲིད་ཀྱི་འོག་ཏུ་ལ་ལས་གློག་ཀླད་དང་འགའ་ཤས་ཀྱིས་ཁ་པར་གྱི་ལམ་ནས་སློབ་ཐུན་རེ་རེར་རྣ་ཅོར་ཅོར་དང་མིག་རིག་རིག་སྒོས་བློ་རྩེ་གཅིག་སྒྲིམ་གྱིས་གཟབ་ཉན་བྱེད་པའི་མི་ཚད། དུས་ཐོག་ཏུ་ཟིན་བྲིས་འདེབས་པ་དང་གཤར་སྦྱོང་ཡག་པོ་བྱེད་གིན་འདུག སྣང་ཚུལ་འདི་ལས་བཀའ་རྒྱ་ལྟ་བུའི་རིམས་ནད་ཀྱིས་ང་ཚོའི་སློབ་སྦྱོང་ལ་བར་གེགས་ཐེབས་ན་ཡང་། དགེ་རྒན་ཚོའི་སྐྱོང་བྱ་ནི་སློབ་མ་ཡིན་པས། དྲ་ལམ་སློབ་ཁྲིད་ཀྱི་བྱེད་ཐབས་འདིས་གསེར་ལས་དཀོན་པའི་སློབ་ཚོགས་ཀྱི་ཉིན་མཚན་དུ་མ་ཞིག་འཕྲོ་བརླག་ཏུ་བཟོས་ཀྱང་། རིག་གནས་ཤེས་བྱར་འགྲམ་ཆུ་ལྡང་བའི་སློབ་གྲོགས་ཚོ་རང་གི་བུ་ཕྲུག་ལ་དུང་བའི་ཚུལ་གྱིས་གཅིག་གཅིག་གཉིས་གཉིས་སྒོས་སློབ་ཁྲིད་བྱེད་པའི་མཁའ་དབུགས་ལེགས་པོ་ཞིག་ཁྱབ་པ་དང་། སློབ་མ་ཚོས་ཀྱང་རང་གི་ཕུགས་བསམ་དྲོན་མོ་དང་རང་གི་ལས་རིགས་འདི་རྨང་ནས་མ་བོར་བར་ཉིན་གཅིག་ཉིན་གཉིས་སྒོས་རང་རང་སར་སློབ་སྦྱོང་ལ་བྲེལ་འདུག འོན་ཏེ། རང་གི་བུ་ཕྲུག་ལ་ཤ་མི་ཚ་བའི་ཁྱིམ་བདག་ལ་ལས་བྱིས་པས་དྲ་ལམ་སློབ་ཁྲིད་ལ་ཉན་པར་རེ་བ་ནན་མོ་མ་བཟུང་བས། ལ་ལས་དྲ་ལམ་སློབ་ཁྲིད་སྣང་མེད་དུ་བཞག་སྟེ་ཁྱིམ་ཕྱི་ནང་དུ་རྩེད་འཇོ་ལ་མགོ་འཁོར་བ་དང་ཕྱི་རོལ་དུ་འཁྱམ་ཉུལ་ལ་འགྲོ་བའི་སྣང་ཚུལ་ངན་པ་དང་། སློབ་མ་ལ་ཤས་ཀྱིས་ཁ་པར་གྱི་དྲ་ལམ་སློབ་ཁྲིད་འཆར་དུ་བཅུག་ན་ཡང་། རྣམ་རིག་མི་སྒྲིམ་པར་ཁ་པར་ཐོག་གི་མ་ལག་གཞན་པ་སྟེ། སྐད་འཕྲིན་དང་མགྱོགས་འཕྲིན། འདར་འཕྲིན། རྩེད་འཇོའི་དོ་རའི་ནང་དུ་འཛུལ་ཏེ་རིན་ཆེན་དུས་ཚོད་ཆུད་ཟོས་སུ་གཏོང་བཞིན་པའི་ཐ་ཤལ་གྱི་སྤྱོད་ངན་ཡང་ས་སྤེལ་གིན་འདུག དེ་བས་ཁྱིམ་བདག་རྣམ་པས་ཀྱང་གནས་ཚུལ་ངན་པའི་རིགས་འདི་ཐེར་འདོན་སྒོས་དྲ་ལམ་སློབ་ཁྲིད་ནི་སློབ་གྲྭའི་སློབ་ཁང་དུ་རྒན་ལགས་ཀྱིས་སློབ་ཁྲིད་བྱེད་པའི་མྱོང་སྣང་དངོས་མའི་ཚུལ་དུ་བཟུང་ནས་ཐིགས་པ་བསགས་པའི་རྒྱ་མཚོ་བཞིན་ཉིན་རེའི་ཤེས་བྱ་རང་གི་ཡིད་ཀྱི་གུར་ཁང་དུ་འདྲེན་རྒྱུ་གལ་ཆེའོ།།