logo

༄༅།།ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་འཛམ་གླིང་དཔེ་ཀློག་ཉིན་མོ་བསུ་བའི་བྱ་འགུལ་སྤེལ།

རྩོམ་པ་པོ།:སྟག་རིག་འབྲུག་ཐར། ཡོང་ཁུངས།:མཚོ་སྔོན་པོ་དྲ་བ། དུས་ཚོད།:2020-04-26 ཀློག་གྲངས།:
ད་ལོའི་སྐབས་ཉེར་ལྔ་བའི་འཛམ་གླིང་དཔེ་ཀློག་ཉིན་མོ་དེ་ས་ག་ཟླ་བའི་ཚེས་གཅིག་ལ་འཁེལ་བས་རྟེན་འབྲེལ་ཀུན་འཛོམས་ཀྱི་ཉིན་མོ་ཞིག་ཏུ་ཆགས་ཡོད། ཁྲི་ཀ་རྫོང་མི་རིགས་བཅའ་སྡོད་སློབ་གྲྭས་སྔར་སྲོལ་ལྟར་ཟླ4བའི་ཚེས23ཉིན་སློབ་གྲྭའི་བཀོད་སྒྲིག་ལྟར་དུ་གླིང་སོ་སོས་གཏན་འཁེལ་ས་གནས་སུ་འཛམ་གླིང་དཔེ་དེབ་དང་པར་དབང་གི་ཉིན་མོ་སྟེ། འཛམ་གླིང་དཔེ་ཀློག་ཉིན་མོའི་དུས་ཆེན་བསུས་པ་ཡིན།
དཔེ་ཀློག་གིས་མི་བུ་ཞིག་འཚར་ལོངས་འབྱུང་བར་ཤུགས་རྐྱེན་ཆེན་པོ་ཐེབས་པ་དང་དཔེ་དེབ་ཡག་པོ་ཞིག་གིས་སྐྱེ་བོ་ཞིག་གི་མི་ཚེའི་ལམ་བུར་ཁ་ལོའང་སྒྱུར་ཐུབ་པས། དཔེ་ཆ་ནི་བློ་གྲོས་ཡིན་ལ། བློ་གྲོས་ཀྱི་སྣང་བ་གསལ་བའི་སྒྲོལ་མེ་ཡིན། དཔེ་ཆ་ནི་ཤེས་བྱ་ཡིན་ལ། ཤེས་བྱ་ཡི་མུ་མཐའ་བྲལ་བའི་རྒྱལ་ཁམས་ཡིན། མི་རིགས་ཤིག་གི་བསམ་བློའི་གནས་ཚད་མཐོ་མིན་དེ་ཚད་ངེས་ཅན་ཞིག་གི་སྟེང་ནས་བརྗོད་ན། མི་རིགས་དེས་དཔེ་དེབ་ཀློག་པའི་མང་ཉུང་ལ་རག་ལས་ཡོད།
གནས་ཚུལ་དེར་དམིགས་ནས་སློབ་གྲྭས་ལོ་རིམ་སོ་སོ་ནས་དཔེ་ཀློག་བྱེད་སྒོ་དང་དཔེ་ཀློག་མྱོང་ཚོར་བགྲོ་གླེང་གི་བྱ་འགུལ་སྣ་ཚོགས་སྤེལ། ཚེས23ཉིན་གྱི་ཕྱི་དྲོར། དམའ་འབྲིང་གསུམ་པའི་དགེ་སློབ་ལྔ་བརྒྱ་ལྷག་གོང་མཛུབ་ཁྲིད་ཀྱི་སྣེ་སྟོན་འོག་སློབ་རའི་ལི་ཤུའི་མེ་ཏོག་གི་ཞིང་ཁམས་ནས་མེ་ཏོག་གི་དྲི་བསུང་དང་ལྷན་དུ་ལྗོན་ཤིང་གི་གྲིབ་བསིལ་འོག་རྒྱ་བོད་ཡིག་རིགས་ཀྱི་གཉིས་ཀྱི་དཔེ་ཆ་གང་རུང་ལ་ལྟ་ཀློག་བགྱིས།
ཐོག་མར་རྒན་འཇམ་མགོན་སྐྱབས་དང་རྒན་ཏང་དཔོན་གཉིས་ཀྱིས་དཔེ་ཀློག་གི་དགེ་མཚན་དང་། དཔེ་ཆ་ཀློག་དགོས་པའི་གལ་ཆེན་རང་བཞིན། ན་གཞོན་སློབ་མ་ཚོས་དུས་རྒྱུན་གྱི་ཁོམ་སྐབས་དང་བསྟུན་ཏེ་ཅིས་ཀྱང་དཔེ་ཀློག་བྱ་དགོས་པའི་སྐོར་གྱི་གསུང་བཤད་གལ་ཆེན་གནང་རྗེས། སློབ་ཐུན་གཉིས་ཀྱི་དུས་ཚོད་བེད་སྤྱད་དེ་རང་རང་སར་དཔེ་ཀློག་བྱས། དཔེ་ཀློག་གི་གོ་རིམ་ཁྲོད་དུ་ཉི་མས་ཚ་གདུགས་རབ་ཏུ་རྣོ་ན་ཡང་འཛམ་གླིང་དཔེ་ཀློག་ཉིན་མོའི་གལ་ཆེན་རང་བཞིན་བསམས་ཏེ་དཔེ་ཀློག་བྱེད་པའི་མཁའ་དབུགས་ལེགས་པོ་ཞིག་གསོ་བར་དགེ་རྒན་དག་གིས་སློབ་མ་ཚོའི་མཐའ་སྐོར་ཏེ་ནན་ནན་ཏན་ཏན་དང་བློ་རྩེ་གཅིག་སྒྲིམ་གྱིས་ དཔེ་ཀློག་བྱས་པ་དང་། སློབ་གྲོགས་རྣམས་ཀྱིས་རང་རང་གི་འདོད་པ་ལྟར་བོད་རྒྱ་གཉིས་ཀའི་དཔེ་ཆ་གང་རུང་བསྣམས་ཏེ་ཚོ་སྐོར་ཚོ་སྐོར་དུ་མིག་གི་དབང་བོ་དང་ཡིད་སེམས་གཉི་ག་དཔེ་ཆའི་སྟེང་དུ་སིམ་སྟེ་གསོན་ཤུགས་བཀྲ་བའི་དཔེ་ཀློག་གི་མཁའ་དབུགས་ཤིག་བསྐྲུན་པ་རེད།
མཇུག་མཐར་དགེ་རྒན་དང་སློབ་གྲོགས་རྣམས་ཀྱིས་དཔེ་ཀློག་དུས་ཆེན་གྱི་འཕྲེད་རས་སྟེང་དུ་རང་རང་གི་མིང་རྟགས་བཀོད་ཅིང་དྲན་རྟེན་འདྲ་པར་བསྐྱོན་ཏེ་བྱ་འགུལ་བདེ་ལེགས་ངང་མཇུག་བསྡུས། དེ་རིང་འཛམ་གླིང་དཔེ་ཀློག་གི་དུས་ཆེན་སྤེལ་བ་འདིས་ང་ཚོས་དཔེ་ཀློག་གི་ཉིན་མོ་གཅིག་པུར་དཔེ་ཆ་ལྟ་བའི་འདུ་ཤེས་བསྒྱུར་ཏེ་དུས་རྒྱུན་གྱི་སློབ་གྲྭའི་སློབ་སྦྱོང་འཚོ་བའི་གྲུ་ཟུར་གང་རུང་དུ་ཁོམ་ལོང་གི་དུས་ཚོད་བེད་སྤྱད་དེ་དཔེ་ཆ་ཀློག་དགོས་པའི་འདུ་ཤེས་སྐྱེད་སྲིང་བྱེད་དགོས་སོ། །
འབྲེལ་ཡོད་འོས་སྦྱོར།