༄༅།།མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་པའི་མཐོ་གཉིས་ལོ་རིམ་ཁག་གིས་དཀྱིལ་རྒྱུགས་སྤྱི་སྡོམ་གྱི་གཟེངས་བསྟོད་ཚོགས་འདུ་བསྡུས།

ཚོགས་འདུར་གོ་རིམ་བཞི་རུ་བགར་ཏེ། ཐོག་མར་དགེ་རྒན་གདུགས་དཀར་རྒྱལ་གྱིས་ཚོགས་འདུ་ལ་མགོ་འཛིན་མཛད་ཅིང་། ཤིས་ཚིག་ཕུལ་ཏེ་རེ་བ་དང་ཡིད་ཆེས་ཀློང་ནས་གཟེངས་བསྟོད་ཚོགས་འདུ་འཚོགས།
གོ་རིམ་དང་པོར་ལོ་རིམ་ཁག་གཙོ་རྒན་འབུམ་རྩེ་ལགས་ཀྱིས་དཀྱིལ་རྒྱུགས་ཀྱི་སྐར་འབྲས་ལ་ཕྱོགས་མི་འདྲ་བ་དང་ཟུར་མི་འདྲ་བ། ལྷག་པར་དུ་དུས་མི་འདྲ་བའི་མཐོ་རྒྱུགས་ཀྱི་སྐར་གྲངས་གཅོད་མཚམས་དང་སྦྱར་ཏེ། དབྱེ་ཞིབ་དང་ཕྱོགས་སྡོམ་གྱིས་སློབ་སྦྱོང་ཐད་ཀྱི་ལེགས་ཆ་རྒྱུན་འཁྱོངས་དང་སྐྱོན་ཆ་ཡོ་བསྲིང་དགོས་པའི་སློབ་གསོ་གནང་བ་མ་ཟད། སློབ་མ་རེ་རེའི་སྡོམ་སྐར་དང་བསླབ་བྱ་རེ་རེའི་སྐར་འབྲས་ལ་སྡུར་བ་བྱས་ཏེ། རང་ཉིད་ཀྱི་སློབ་སྦྱོང་གི་གནས་བབ་ལ་གསལ་འདེབས་དང་ངེས་ཟིན་ཟབ་མོ་ཡོད་དགོས་པའི་སྐུལ་འདེད་གནངས། གོ་རིམ་གཉིས་པར་སྐར་འབྲས་ཕུལ་བྱུང་ཅན་དང་སྐར་འབྲས་ཡར་ཐོན་ཅན་གྱི་སློབ་མ་དང་། སྐར་འབྲས་གཟེངས་སུ་ཐོན་པའི་འཛིན་གྲྭ་བཅས་ལ་བྱ་དགའ་གནང་བ་རེད།  གོ་རིམ་གསུམ་པར་སྲིད་སྟོན་ཁང་གི་ཀྲུའུ་རིན་བསེ་ཐར་འབུམ་གྱིས་སློབ་མའི་ཀུན་སྤྱོད་ཀྱི་ཕྱོགས་ནས་གཏམ་བཤད་གནང་བ་སྟེ། མི་ཞིག་ཡིན་ཕྱིན་ཚོགས་པའི་འདུ་ཤེས་དང་ལ་རྒྱ་ཡོད་དགོས་པ་དང་། རང་ཉིད་ཀྱི་བདེ་བ་ཙམ་གྱི་ཆེད་དུ་གཞན་སྡུག་ལ་མི་སྦྱོར་བ། ང་ཚོ་ཚང་མ་དཔལ་ཡོན་འཛུགས་སྐྲུན་བྱེད་མཁན་ཡིན་ལ་གཏོར་བརླག་བྱེད་པོ་ཡང་ཡིན་པས། གཞན་སྐྱོབ་ཀྱི་ཡོན་ཏན་མེད་ཀྱང་། རང་གཅུན་གྱི་སྡོམ་ཡོད་དགོས་པའི་ཕྱོགས་ནས་ཁ་བརྡའི་བརྗོད་ཅིང་མི་གཤིས་ཇེ་ལེགས་སུ་གཏོང་བའི་ཐད་ནས་རེ་བ་ཁ་ཤས་བཏོན། 
གོ་རིམ་བཞི་བར་སློབ་གཙོ་གཞོན་པ་དགྲ་འདུལ་རྒྱལ་ལགས་ཀྱིས་སློབ་སྐབས་འདིའི་སློབ་མའི་སློབ་སྦྱོང་གི་གནས་ཚུལ་སོགས་ལ་གཞིགས་ཏེ་སྤྱི་སྡོམ་གྱི་ཚུལ་དུ་དུག་གསུམ་གྱི་འཁོར་ནས་མི་འཚོ་བར་དུས་རྒྱུན་ཏུ་རང་ཉིད་སློབ་གཉེར་བ་ཞིག་ཡིན་པ་མི་བརྗེད་པ་དང་། ཕ་མ་དང་དགེ་རྒན་གྱི་རེ་བ་གཏོང་ཟབ་དུ་མི་གཏོང་བར་སློབ་སྦྱོང་གི་ཕྱོགས་ནས་ཕུལ་བྱུང་སློབ་མ་ཚོ་ནང་བཞིན་ཧུར་ཐག་བྱ་དགོས་ཞེས་སློབ་གསོ་གནང་བ་དང་། ཐེངས་འདིའི་དཀྱིལ་རྒྱུགས་ཁྲོད་བསླབས་འབྲས་ཕུལ་བྱུང་ཅན་གྱི་དགེ་སློབ་རྣམས་ལ་གཟེངས་བསྟོད་དང་། སློབ་མ་རྣམས་ཀྱིས་མ་འོངས་པར་སློབ་སྦྱོང་ལ་སྔར་བས་ཀྱང་འབད་པ་བྱེད་དགོས་པའི་སྐུལ་ལྕག་བགྱིས་ཏེ་ཚོགས་འདུ་ཡོངས་སུ་མཇུག་རྫོགས།