༄༅།།མཚོ་ལྷོ་ཁུལ་མི་རིགས་མཐོ་འབྲིང་དང་པོས་བསླབ་ཚན་ཟློས་གར་འཁྲབ་སྟོན་གྱི་བྱ་འགུལ་སྤེལ།

སློབ་མའི་ཕྱོགས་བསྡུས་སྤུས་ཚད་མཐོར་འདེགས་དང་བསླབ་ཚན་བཅོས་བསྒྱུར་གྱི་དགོངས་དོན་དངོས་བསྟར། སློབ་རའི་རིག་གནས་གསར་སྐྲུན་བྱེད་པ། སྒོས་སུ་སློབ་བུ་རྣམས་ཀྱི་འཇོན་ནུས་སྔོག་འདོན་དང་བསླབ་ཚན་གྱི་བསམ་བློའི་ནང་དོན་ལ་གོ་རྒྱ་བསྐྱེད་པ་དང་སྒྱུ་རྩལ་ཁྱད་ཆོས་མྱོང་རོལ་བྱ་བའི་ཆེད་དུ་མཚོ་ལྷོ་ཁུལ་མི་རིགས་མཐོ་འབྲིང་དང་པོའི་མཐོ་གཉིས་བོད་ཡིག་ཚན་ཆུང་གིས་སྤྱི་ལོ༢༠༢༠ལོའི་ཟླ༦ཚེས༡༣ཉིན་གྱི་ཕྱི་དྲོ་སློབ་གྲྭའི་སྙན་ཞུའི་ཚོམས་ཁང་ཆེན་མོ་རུ༼ཁྲིད་ཀྱི་བརྗོད་དོན་གར་དུ་འཁྲབ་སྟེ་རྟོགས། ། སྒྱུ་རྩལ་མངར་ཁ་ལག་ལེན་ཁྲོད་ནས་མྱངས། །༽ཞེས་པ་བརྗོད་གཞིར་བྱས་པའི་བོད་ཡིག་བསླབ་ཚན་ཟློས་གར་འཁྲབ་སྟོན་འགྲན་བསྡུར་གྱི་བྱ་འགུལ་སྤེལ། ཐེངས་འདིའི་བསླབ་ཚན་ཟློས་གར་འཁྲབ་སྟོན་བྱ་འགུལ་གྱི་འཁྲབ་གཞུང་ཕལ་ཆེར་དགེ་རྒན་རྣམས་ཀྱི་མཛུབ་སྟོན་ལ་བརྟེན་ནས་སློབ་མ་རང་ངོས་ནས《ར་ལོ》དང《མདོག་འགྱུར་ད་བྱིད》སོགས་སྒྲུང་གཏམ་དང《ཧོར་གླིང་གཡུལ་འགྱེད》 དང《ཤན་འདན་སྟག་སེང་ཁ་སྤྲོད》སོགས་གླིང་སྒྲུང་གི་སྒྲུང་ཚན། ད་དུང《ཕ་སེམས་བུ་ཐོགས། བུ་སེམས་རྡོ་ཐོགས》དང《ཨ་རིག་གླེན་པའི་དབུས་ལམ》བོད་དམངས་ཁྲོད་ཀྱི་གཏམ་རྒྱུད་སོགས་ཀྱི་ནང་དོན་འཁྲབ་གཞུང་དུ་བཅོས་སྒྲིག་བྱས་པ་དང་། ད་དུང་གསར་རྩོམ་བྱས་པའི་འཁྲབ་གཞུང《རླུང་ལ་བལྟ་བ》སོགས་བརྗོད་གཞིར་བཟུང་སྟེ་འཁྲབ་སྟོན་བྱས་ཤིང་། དེ་དག་གི་ནང་དོན་ལ་མི་རིགས་རང་བཞིན་དང་དུས་རབས་བཞིན། སློབ་གསོ་རང་བཞིན་གྱི་བསམ་བློས་ཕྱུག་ཅིང་། རྣམ་པ་ཕུན་སུམ་ཚོགས་པ། བརྗོད་དོན་འབུར་དུ་ཐོན་པ། སྒྱུ་རྩལ་གྱི་རང་བཞིན་ཤུགས་དྲག་པ། འཁྲབ་ཆས་གསར་བཟོ་དང་འཁྲབ་ར་ཇུས་འགོད་ངོ་མཚར་བ། ལུས་ཀྱི་བྱ་བྱེད། གདོང་གི་ཉམས་འགྱུར། ངག་གི་སྨྲ་བརྗོད། གར་གྱི་སྟངས་སྟབས། གླུ་ཡི་འགྱུར་ཁུགས་སོགས་ཀྱི་ཐུན་མོང་མ་ཡིན་པའི་ཁྱད་ཆོས་ཀྱིས་ཡོངས་སུ་གཏམས་པར་བྱས་ཡོད། དཔྱད་འདེམ་དགེ་རྒན་རྣམས་ཀྱིས་འདྲ་མཉམ་དང་དྲང་བདེན་རྩ་དོན་དུ་བཟུང་ནས་དཔྱད་འདེམ་བྱས་པ་བརྒྱུད་མཐོ་གཉིས་འཛིན་གྲྭ་གསུམ་པ་སོགས་འཛིན་གྲྭ༡༠ལ་ཐུན་མོང་གི་བྱ་དགའ་རིམ་པར་ཐོབ་པ་དང་། བསོད་ནམས་སྒྲོལ་མ་སོགས་སློབ་གྲོགས༡༠ལ་ཕུལ་བྱུང་འཁྲབ་སྟོན་པ་དང་། དགྲ་འདུལ་རྒྱལ་སོགས་སློབ༤ལ་འཁྲབ་གཞུང་རྩོམ་པ་པོ། སློབ་གྲོགས་རྡོ་རྗེ་ཚེ་རིང་ལ་འཁྲབ་ཁྲིད་པ་ཆུང་ཆུང་གི་མཚན་སྙན་ཐོབ།
ཐེངས་འདིའི་བྱ་འགུལ་བརྒྱུད་ནས་སློབ་མའི་སློབ་སྦྱོང་གི་འཚོ་བར་སྔ་ན་མེད་པའི་གསོན་ཤུགས་ཀྱིས་བརྟས་ཤིང་། སློབ་མའི་རྩོམ་རིག་གསར་རྩོམ་དང་འཁྲབ་སྟོན་གྱི་ནུས་པ་སྔོག་འདོན་བྱེད་པར་དགེ་མཚན་བླ་ལྷག་ཐོན་ཡོད།