༄༅།།འདིས་མི་ཚེ་གསོན་པོར་བསྒྱུར་ཐུབ།

མི་སེམས་གསོན་པོར་བཟོ་མཁན་གྱི་སྐད་ཆ་དང་ཡིག་འབྲུ་རེ་རེས་འཛམ་གླིང་ཡོམ་ཡོམ་དུ་བསྒུལ་མྱོང་།
ལམ་ཁྲིད་ཀྱི་གྲོགས་པོ་གསུམ། ལེགས་བཤད་ནི་སྐད་ཆ་ཞིག་དང་ཁྱོད་དེ་ལ་ཉན་མཁན་དང་ཡི་རང་བྱེད་མཁན་ཞིག་ཡིན་ན། དེ་ནི་གླུ་གར་ལ་བལྟས་པ་ནང་བཞིན་གནས་སྐབས་ཚོར་འདུ་ཙམ་གྱིས་མཇུག་རྫོགས་འགྲོ་བ་ཡིན།
ལེགས་བཤད་ནི་ཁ་ཟས་ནང་བཞིན་ཉིན་རེའི་འཚོ་བའི་ནང་། དང་དུ་མ་བླངས་ཐབས་མེད་ཅིག་ཏུ་ཆགས་ན་ད་གཟོད་ཁྱོད་ཀྱི་མི་ཚེའི་རྣམ་ཤེས་དེ་གསོན་པོར་འགྲེང་ཐུབ།
ས་པཎ་གྱིས། སྔོན་ཆད་གཞན་གྱི་ཡིད་ལ་མ་ཤར་བ། །དེ་འདྲ་གང་གིས་ཤེས་ཏེ་བློ་གྲོས་ལྡན། །རྒན་པོ་རྣམས་ཀྱིས་ཡང་ཡང་རྣམ་དཔྱད་པའི། །དོན་དེ་རྟོགས་ཀྱང་དེ་ལ་ངོ་མཚར་ཅི། །
ལེགས་བཤད་འདིས་ནི་བྱུང་ཟིན་རིག་གནས་ཁོ་ནས་ཀླད་པར་མི་བརྫང་བར་འདིའི་ཕ་རོལ་གྱི་ཤེས་བྱའི་གནམ་མཐའ་དེ་ངེས་པར་བསྙེག་དགོས་པར་བསྟན་ཡོད།
སློབ་དཔོན་དཔའ་བོས། ཐོས་པ་གཏི་མུག་མན་སེལ་སྒྲོན་མེ་ཡིན། །རྐུན་པོ་ལ་སོགས་མི་འཁྱེར་ནོར་གྱི་མཆོག །ཀུན་ཏུ་རྨོངས་པའི་དགྲ་འཇོམས་མཚོན་ཆ་ཡིན། །ཐབས་ཚུལ་མན་ངག་སྟོན་པ་གྲོགས་ཀྱི་མཆོག །
ལེགས་བཤད་འདིས་རང་ཉིད་ཀྱིས་གཟུགས་བཟང་དང་ནོར་སྒྲུབ། ཐོབ་འཚོལ་བ་དང་གྲོགས་པོ་སོགས་ཀྱི་ཤུལ་ལམ་ཨུ་ཚུགས་ཀྱིས་འདེད་པ་ལས་རིག་གནས་ཡོན་ཏན་ཞིག་དང་དཔུང་བསྒྲིགས་ན་དེས་ནི་ནམ་ཡང་རང་ཉིད་ལམ་ཐོག་ཏུ་འཇོག་ཐུབ་པར་བཤད།
དབྱིན་ཇིའི་ས་སི་པུས་ཡ་ལགས་ཀྱིས། བཅུད་ཀྱིས་གང་བའི་བུམ་པ་ལ། །སྒྲ་ནི་ཅུང་ཟད་ཡོད་མ་ཡིན། །ཕྱེད་ཙམ་གང་བའི་བུམ་པ་དེའི། །ཉག་ཉོག་སྒྲ་ཡིས་རྣ་བ་སུན། །
ལེགས་བཤད་འདིས་སྣ་མང་ཤེས་བྱ་ལྟོ་བར་མིད་ལ། ཕྱོགས་ཀུན་མིག་ལ་ཤར་བའི་མི་དེའི་ཀླད་པ་ནི་ཁོད་ཡངས་པའི་གཙང་བོ་བཞིན་མེར་མེར་དུ་བཞུར་འགྲོ་བ་ཞིག་ལ། དེ་ལས་ལྡོག་པའི་མི་ནི་ལུང་གཤོང་གུ་དོག་གི་ཆུ་ཕྲན་བཞིན་ཤག་ཤག་གི་སྒྲ་བར་མེད་དུ་གྲག་ཀྱང་རྣ་བར་སུན་པ་ལས་སྙིང་བོས་དབེན་པར་བསྟན་ཡོད།