༄༅།།ཐེམ་ཆེན་རྫོང་བྱིས་སྐྱོང་ཁང་གཉིས་པས་དམངས་གླུ་འགྲན་བསྡུར་སྐབས་གསུམ་པ་སྤེལ།

སྤྱི་ཟླ10བའི་ཚེས28ཉིན། ཐེམ་ཆེན་རྫོང་བྱིས་སྐྱོང་ཁང་གཉིས་པས་ལོ་ཆུང་བྱིས་པའི་ངག་རིག་སྒྱུ་རྩལ་གྱི་ནུས་པ་སྔོག་འདོན་བྱེད་པ་དང་ལྷག་ཏུ་བོད་མི་རིགས་ཀྱི་དམངས་ཁྲོད་རིག་གནས་སྒྱུ་རྩལ་ལས་དམངས་གླུ་ཡིས་མཚོན་པའི་འཇིག་རྟེན་གྱི་ལྟ་ཚུལ་དང་འཚོ་བའི་དགའ་སྡུག་སོགས་ལ་ཆུང་བྱིས་པའི་དུས་ནས་བཟུང་ངེས་ཤེས་ཟབ་མོ་འཐོབ་སླད། ལག་ཟུང་སྦྲེལ་ཏེ་དབུལ་ཕོངས་དཀའ་ངལ་སེལ།སེམས་པ་སྦྲེལ་ཏེ་འཆམ་མཐུན་ཁྱིམ་གཞི་སྐྲུན་ཞེས་པའི་དམངས་གླུ་འགྲན་བསྡུར་སྐབས་གསུམ་པ་སྤེལ། ཐེངས་འདིའི་འགྲན་བསྡུར་ལ་ཁྱོན་བསྡོམས་སློབ་མ30ཞུགས་ལ། དེ་དག་གིས་དམངས་གླུའི་ནང་དོན་དང་སྐད་ངག་གི་སྙན་ཆ། ལུས་ཀྱི་ཉམས་འགྱུར། སྨྲ་བརྗོད་ཀྱི་དག་ཆ། སྲོལ་རྒྱུན་གྱི་བོད་ལྭ་དང་འདོག་ཆ། སྐ་རགས་བཅིངས་ཚུལ་སོགས་ཀྱི་ཆ་རྐྱེན་དང་བསྟུན་ནས་དབྱངས་རྟ་སྙན་ཞིང་གསོན་ཉམས་ལྡན་པའི་དམངས་གླུའི་སྒྱུ་རྩལ་གྱི་ཁྱད་ཆོས་མངོན་ཇི་ཐུབ་ཀྱིས་འགྲན་བསྡུར་ལ་ཞུགས། འགྲན་བསྡུར་ལ་འཛིན་གྲྭ་འབྲིང་བ་དང་ཆེ་བ་སོ་སོར་དགར་ནས་ཨང་དང་བོ་གཅིག་དང་གཉིས་པ་གཉིས་། གསུམ་པ་གསུམ། རྟིང་སྐུལ་བྱ་དགའ་བཅས་ཀྱི་གཟི་བརྗིད་དཔང་ཡིག་གནང་། དམངས་གླུ་མཐུན་ཚོགས་ཀྱི་ཚོགས་གཙོ་ཚེ་ཡག་རྒྱལ་གྱིས་བཤད་རྒྱུར། ཐེངས་འདིར་བྱིས་སྐྱོང་ཁང་གིས་བྱེད་སྒོ་འདི་ལྟ་བུ་ཞིག་སྤེལ་ནས། ན་ཆུང་བྱིས་པ་ཚོའི་རྒྱུད་ལ་ཆུང་དུས་ནས་དམངས་ཁྲོད་རིག་གནས་སྒྱུ་རྩལ་གྱི་རིན་ཐང་ལ་ངེས་ཤེས་ཟབ་མོ་ཐོབ་ཏུ་འཇུག་པ་དང་། བྱིས་པ་ཚོས་འཚོ་བ་དངོས་བརྒྱུད་ནས་ཚོར་བ་དངོས་ཀྱིས་དམངས་གླུའི་སྒྱུ་རྩལ་རིག་གནས་ལ་ཉམས་ལེན་བྱེད་ཐུབ་སོང་བ་ནི་གོང་རིམ་འགོ་ཁྲིད་དང་དགེ་རྒན་ཚོས་དམངས་གླུའི་སྒྱུ་རྩལ་མ་ཉམས་གོང་སྤེལ་དང་ཉམས་པ་སླར་གསོ་བྱེད་པར་རྒྱབ་སྐྱོར་གནང་བའི་བཀའ་དྲིན་ཡིན་ཞེས་ཡང་ཡང་བཤད། མདོར་ན། བྱེད་སྒོ་འདི་དང་འདི་ལྟ་བུ་ལས་ན་ཆུང་བྱིས་པ་ཚོའི་སློབ་རའི་འཚོ་བ་སྔར་ལས་ཕུན་སུམ་ཚོགས་པར་བཏང་ཡོད་པའི་ཁར། བྱིས་པའི་ཕ་སྐད་ཀྱི་རྨང་གཞི་ཇེ་བརྟན་དང་ཇེ་བཟང་དུ་གཏོང་བ། བྱིས་པའི་ལུས་སེམས་དང་སྐད་ཆ། གོམས་གཤིས། ཚོར་བ། བསམ་གཞིགས། འཆར་ཡན་བཅས་འཕེལ་རྒྱས་སུ་གཏོང་བར་ཡང་ནུས་པ་བླ་ལྷག་ཐོན་ཐུབ་པའི་ཁར། བོད་ཀྱི་དམངས་གླུ་ལེན་སྟངས་དང་ཉམས་བཏོད་སྟངས་ཀྱི་ཐད་ནས་ཀྱང་སློབ་སྦྱོང་ལེགས་པོ་བྱེད་ཐུབ།