༄༅།།མཚོ་ལྷོ་ཁུལ་མི་རིགས་མཐོ་འབྲིང་གཉིས་པས《རྨ་གཡང་ཕྱུག་མོའི》དེབ་ལྔ་བའི་འགྲེམས་སྤེལ་མཛད་སྒོ་བསྡུས།

      ༢༠༢༡ལོའི་ཟླ༣པའི་ཚེས༢༦ཉིན།  མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གཉིས་པས《རྨ་གཡང་ཕྱུག་མོའི》སྤྱིའི་འདོན་ཐེངས་ལྔ་བའི་འགྲེམས་སྤེལ་གྱི་མཛད་སྒོ་སྣ་འཛོམས་ཐོག་ཁང་ཆེན་མོ་རིག་བྱེད་ཕུན་ཚོགས་གླིང་གི་མདུན་དུ་སྤེལ།       ཞོགས་པའི་སློབ་གསེང་རྩལ་སྦྱོང་གི་དུས་ཚོད་བེད་སྤྱད་ནས་སློབ་གྲྭའི་དགེ་སློབ་ཡོངས་རྒྱལ་དར་མདུན་གྱི་ཐང་ཆེན་དུ་གྲལ་དག་མོར་འཚོགས་ཤིང་འགྲེམས་སྤེལ་གྱི་སྟ་གོན་རྣམས་ལེགས་པར་གྲུབ་རྗེས་བྱ་འགུལ་དངོས་སུ་མགོ་བརྩམས།  སློབ་གཙོ་གཞོན་པ་སྟོབས་ལྡན་གྱིས་མཛད་སྒོར་མདོ་འཛིན་གནང་ཞིང་།  དེའི་རྗེས་བོད་རྒྱ་དབྱིན་གསུམ་གྱི་རྩོམ་སྒྲིག་པའི་དགེ་རྒན་གྱིས་ཐེངས་འདིའི་དེབ་ལྔ་བར་རྩོམ་ཡིག་བཀོད་པའི་དགེ་སློབ་ཀུན་གྱི་མིང་ཐོ་བསྒྲགས་ཤིང་།   ཀུན་གྱི་ལག་ཟུང་ཐལ་མོའི་རྡེབ་སྒྲ་དང་བཅས་རྩོམ་པ་པོ་རྣམས་སྟེགས་བུར་གདན་དྲངས་ཏེ་《རྨ་གཡང་ཕྱུག་མོ》དུས་དེབ་རེ་རེའི་ལེགས་སྐྱེས་དང་བཅས་བསྔགས་བརྗོད་ཀྱི་མེ་ཏོག་གཏོར་ཞིང་རྗེས་དྲན་གྱི་མཉམ་པར་བླངས།   གཞན་ལོ་རིམ་ཁག་གསུམ་གྱི་འཛིན་གྲྭ་སོ་སོར་ཡང་དེབ་བཅུ་རེ་རིམ་པར་གནང་ཞིང་།   དེར་འབྲེལ་ནས་སློབ་གཙོ་གཞོན་པ་སྟོབས་ལྡན་གྱིས་སློབ་གྲོགས་གཞན་དག་གིས་ཀྱང་ཁོ་ཚོར་ཁ་མིག་ཡར་ལྟ་དང་སློབ་སྦྱོང་གི་མིག་དཔེར་བཟུང་ནས།   རང་གི་རྩོམ་འབྲིའི་ནུས་པ་གོང་འཕེལ་དུ་གཏོང་བར་འབད་བརྩོན་བྱ་རྒྱུ་དང་།  སྤྱིའི་འདོན་ཐེངས་དེབ་དྲུག་པའང་ད་ལོའི་ཟླ་དྲུག་པའི་ནང་སྒོར་འཐོན་རྒྱུའི་འཆར་གཞི་ཡོད་པས། སློབ་གྲོགས་ཀུན་གྱིས་བོད་རྒྱ་དབྱིན་གསུམ་གང་རུང་གི་ལམ་ནས་རྩོམ་ཡིག་བྲིས་ཏེ།  དུས་ལྟར་《རྨ་གཡང་ཕྱུག་མོའི》དུས་དེབ་རྩོམ་སྒྲིག་ཁང་དུ་སྤྲད་དགོས་པ་སོགས་སློབ་སྦྱོང་ཡར་སྐུལ་གྱི་སྙིང་ཕུར་བཏབ་ཅིང་།    བློ་འབྱེད་ལམ་སྟོན་གྱི་ཞལ་ཏ་གནང་ནས་མཛད་སྒོའི་མཇུག་བསྡུས།       ཐེངས་འདིའི《རྨ་གཡང་ཕྱུག་མོའི》སྤྱིའི་འདོན་ཐེངས་དེབ་ལྔ་བའི་སྟེང་སློབ་གྲྭའི་དགེ་སློབ་རྣམས་གཙོ་བྱས་ཕྱི་ཕྱོགས་ཀྱི་རྩོམ་པ་པོས་བྲིས་པའི་དཔྱད་རྩོམ་དང་སྒྲུང་གཏམ། སྙན་ངག  ལྷུག་རྩོམ།  བསྒྱུར་རྩོམ་སོགས་བོད་རྒྱ་དབྱིན་གསུམ་གྱི་རྩོམ་ཡིག་ཁྱོན་བསྡོམས༦༤ལྷག་བཀོད་ཡོད་ལ།  གཞན་དགེ་སློབ་ཀུན་གྱིས་བྲིས་པའི་བོད་རྒྱའི་ཡིག་གཟུགས་དང་མཛེས་རིས།  སློབ་གྲྭའི་སློབ་ཁྲིད་སློབ་གསོའི་གནས་ཚུལ་སྟོན་པའི་འདྲ་པར་ཡང་མང་པོ་བཀོད་འདུག    སློབ་གྲྭའི་མགོ་ཁྲིད་རྣམས་ཀྱི་ཐུགས་ཁུར་དང་རྒྱབ་སྐྱོར་འོག་བསྒྲུབས་པའི་《རྨ་གཡང་ཕྱུག་མོའི་》སློབ་རའི་དུས་དེབ་ཀྱིས་སྤྱིར་སློབ་གྲྭའི་དགེ་སློབ་ཀུན་གྱི་རྩོམ་འབྲིའི་ནུས་པ་མཐོར་འདེགས་བྱེད་པར་ཕན་འབྲས་རྒྱ་ཆེར་ཐོན་བཞིན་པ་ནི་མིག་མཐོང་ལག་ཟིན་ཡིན་ལ།   སྒོས་སུ་དེ་རིང་གི་མཛད་སྒོ་འདི་ལྟ་བུ་བསྡུས་པར་བརྟེན་ནས་རྩོམ་ཡིག་བཀོད་པ་རྣམས་ཀྱིས་སྔར་ལས་ཀྱང་རྩོམ་འབྲིར་གཞོལ་བའི་སྐུལ་ལྕག་ཏུ་འགྱུར་བ་དང་། དགོད་མ་ཐུབ་པ་རྣམས་ཀྱིས་དེབ་དྲུག་པའི་སྟེང་འགོད་པར་འབད་བརྩོན་བྱེད་པ་དང་། སློབ་གྲོགས་གཞན་ཀུན་གྱི་རྩོམ་འབྲིའི་དགའ་ཕྱོགས་བསྐྱེད་སྲིང་དང་ནུས་པ་མཐོར་འདེགས་བྱེད་པ་སོགས་ལ་སྐུལ་འདེད་ཀྱི་ནུས་པ་མི་དམན་པ་ཐོན་ནོ།།