མཚོ་ལྷོ་ཁུལ་མི་རིགས་སློབ་འབྲིང་དང་པོས་སྐད་ཡིག་དཔེ་ཀློག་གི་བྱེད་སྒོ་སྤེལ།

       དེ་ཡང་ཇི་སྐད་དུ། དཔེ་ཆ་སྟེགས་ལ་མ་འཇོག་རུམ་དུ་ལོངས། །ནམ་ཁོམ་རུམ་ནས་ཕྱུངས་ཏེ་ཡང་ཡང་ཀློགས། །ཀློག་དོན་སེམས་ནས་མ་བརྗེད་ལག་ཏུ་ལོངས། །དེ་ལས་ཡ་རབས་འདི་ཕྱིའི་བདེ་སྐྱིད་འབྱུང་། །ཞེས་གསུངས་པ་ལྟར་མཐོ་གཉིས་ལོ་རིམ་གྱི་སློབ་གྲོགས་ཡོངས་ཀྱིས་རྒྱལ་སྟོན་གྱི་དུས་ཚོད་བེད་སྤྱད་དེ་འདེམ་སྦྱོང་དེབ་གཉིས་པའི་སློབ་ཚན་རེ་རེ་བཞིན་ཞིབ་ཀྱིས་མཇལ་ཞིང་ནན་གྱིས་བཀླགས་པའི་འབྲས་རྟགས་སུ་ལོ་རིམ་ཡོངས་ཀྱི་སློབ་གྲོགས་བཞི་བཅུ་ལྷག་གིས་དཔེ་ཀློག་གི་མྱོང་བ་སྙན་ཞུ་བྱས་ཤིང་། ཐོག་མའི་བསལ་འདེམ་བརྒྱུད་ནས་སློབ་གྲོགས་བཅུ་གསུམ་སྤྱི་ཟླ་བཅུ་བའི་ཚེས་ཉེར་བརྒྱད་ཉིན་སློབ་གྲྭའི་སྙན་ཞུ་ཚོམས་ཆེན་དུ་སྤེལ་བའི་འགྲན་སྡུར་དངོས་ལ་ཞུགས་ཏེ་དཔེ་ཀློག་མྱོང་རོལ་མཉམ་སྤྱོད་ཀྱི་བྱེད་སྒོ་གཟབ་རྒྱས་ངང་བསྡུས།

       བྱེད་སྒོའི་སྟེང་འགྲན་ཞུགས་པ་རེ་རེས་བཤད་བྱ་རེ་རེ་བདམས་ཡོད་པས་བསྐྱར་ཟློས་མེད་ཅིང་ཉན་མཁན་ཡོངས་ལ་སྤྲོ་བ་འདྲེན་ནུས་པར་མ་ཟད། ཐེངས་འདིའི་བྱེད་སྒོ་འདི་ནི་བོད་ཡིག་གི་རྨང་གཞི་སྲ་བརྟན་དང་རྩོམ་རིག་རོལ་མྱོང་གི་ཆུ་ཚད་མཐོར་འདེགས། སློབ་མའི་སྐྱེས་སྦྱངས་ཀྱི་ཤེས་ཡོན་སྔོག་འདོན། སྨྲ་ལྕེ་སྦྱོང་བརྡར་གྱི་སྤོབས་གདེང་སྐྱེད་སྲིང་བཅས་ལ་ཕན་ནུས་བླ་ལྷག་ཐོན་པའི་ཐུན་མོང་མ་ཡིན་པའི་བྱེད་སྒོ་ཞིག་ཡིན་ལ། དགེ་རྒན་ཏཱ་རེ་རྒྱལ་དང་གཅོད་པ་ཐར་གཉིས་ཀྱིས་དཔེ་སྟོན་རང་བཞིན་གྱི་དཔེ་ཀློག་མྱོང་བཤད་བྱས་པས་ཀྱང་སློབ་མའི་བློ་སྒོ་འབྱེད་ཅིང་མཛུབ་སྟོན་དང་མིག་དཔེ་གཞན་སྟོན་གྱི་ནུས་པ་ཆེན་པོ་ཐོན།

       མིའི་རིགས་ལ་ཤུལ་དུ་བཞག་པའི་ཆེས་རྩ་ཆེ་བའི་དངོས་པོ་ནི་དཔེ་ཆ་ཡིན་ལ། མི་རབས་ནས་མི་རབས་ལ་ཕུལ་བའི་ལེགས་སྐྱེས་ཀྱི་མཆོག་ཀྱང་དཔེ་ཆ་ཡིན་པས། ཕུགས་བསམ་གྱི་འདོད་འདུན་རུམ་ནས་རེ་སྙེག་གི་གོམ་མཚམས་མི་འཇོག་པའི་དམ་བཅའ་བརྟན་པོ་དང་། རང་གི་རེ་འབྲས་ཡོད་ཚད་དོན་སྨིན་ཡོང་བའི་ཆེད་དུ་བརྩོན་འགྲུས་ཀྱི་རྟ་ཕོར་ལྕག་གིས་སྐུལ་བཞིན་ཤེས་རིག་གི་ཐང་ཆེན་འགྲིམ་ནས་ལྔ་རིག་གི་མེ་ཏོག་འཐུ་བ་ནི་འཇིག་རྟེན་འདིའི་ཆེས་བདེ་སྐྱིད་ཀྱི་འཚོ་བ་ཡིན་པ་སེམས་ལ་ཉར་དགོས།

       ཤེས་བྱ་ཟབ་མོའི་ཆུ་གཏེར་ལ། །མཐའ་དང་མཐིལ་ཞེས་དབེན་ན་ཡང་། །གང་ལ་འབད་པ་དེ་རྟོགས་པ། །རྒྱུ་དང་འབྲས་བུའི་ཆོས་ཉིད་ལགས། །ཞེས་པ་ལྟར་རིག་པའི་མེ་ལྕེ་འཕྱུར་ཅིང་དཔྱད་པའི་ས་ཆེན་འགུལ་བའི་དཔེ་ཀློག་གི་མྱོང་བ་སོ་སོས་དགེ་སློབ་ཡོངས་ཀྱི་སློབ་སྦྱོང་གི་འཚོ་བར་སྔར་ལས་ལྷག་པའི་སྐྱེས་སྟོབས་ཀྱི་ཤེས་རབ་གསར་བ་ཞིག་གནང་བྱུང་།

       བྱེད་སྒོའི་མཇུག་ཏུ་དགེ་རྒན་བསོད་ནམས་བཀྲ་ཤིས་ལགས་ཀྱིས་སློབ་གྲྭ་ཡོངས་ཀྱི་བོད་ཡིག་དགེ་རྒན་རྣམས་ཀྱི་ཚབ་བྱས་ཏེ་བྱེད་སྒོ་ཆེ་མ་ཆུང་གསུམ་སྤེལ་བའི་དམིགས་ཡུལ་དང་དེའི་གལ་ཆེན་རང་བཞིན་གྱི་སྐོར་ནས་གསུང་བཤད་གང་ལེགས་གནང་བ་དང་། དཔྱད་འདེམ་དགེ་རྒན་སྟག་ཐར་རྒྱལ་ལགས་ཀྱིས་བྱེད་སྒོའི་ཁྱད་ཆོས་དང་ལེགས་ཆ། འགྲན་ཞུགས་པ་སོ་སོའི་སྟ་གོན་དང་འཇོན་ནུས་ལ་བསྔགས་བརྗོད་མཛད་པ་དང་། ཞོར་དུ་རྗེས་ཕྱོགས་སུ་མཉམ་འཇོག་བྱ་དགོས་པའི་སྐོར་ནས་བུམ་པ་གང་བྱོའི་ཚུལ་དུ་གདམས་ངག་ལྷུག་པོར་བསྩལ་བས། ཚོགས་ཞུགས་དགེ་སློབ་དགུ་བརྒྱར་ཉེ་བས་དགའ་བསུ་དང་གདེང་འཇོག་ཆེན་པོ་གནང་སྟེ་བྱེད་སྒོ་རྒྱལ་ཁའི་ངང་མཇུག་བསྡུས་སོ། །