༄༅། །གནས་མཇལ་ཞིག་གི་བརྗེད་བྱང་།

       གཙོས་གྲོང་ནས་མཚན་གཅིག་ལ་ཞག་མལ་དུ་བསྡད་རྗེས་ཉིན་གཉིས་པའི་སྔ་ཆར་ལམ་དུ་ཆས། ད་རེས་ཀྱི་གནས་མཇལ་ནི་མདོ་སྨད་ཤོ་བ་དགོན་ཡིན་སྟབས། གཙོས་གྲོང་ནས་དགོན་པ་གང་དེ་ཡོད་སའི་ཤར་ལྷོའི་ཕྱོགས་སུ་བསྐྱོད། ལམ་བར་ནས་སྒར་གསར་དགོན་པའི་ཨ་ཁུ་རབ་རྒྱས་ལགས་ཀྱིས་དགོན་པར་སྣེ་ལེན་བྱེད་རྩིས་ཡིན་པས་དེར་ཐོན་དགོས་ཚུལ་བཤད་པ་ནང་བཞིན་སོང་། ཁོང་ནི་མཛོད་དགེ་སྒར་གསར་དགོན་གྱི་གྲྭ་བ་ཡིན། ཁོང་གིས་སྒར་གསར་དགོན་ནི་ཁྲི་ཆེན་གུང་ཐང་གསུམ་པ་བསྟན་པའི་སྒྲོན་མེས་བཏབ་ཅིང་མཚན་ཆ་ཚང་ལ་སྒར་གསར་དགོན་དགའ་ལྡན་རབ་རྒྱས་གླིང་ཞུ་བར་གསུངས། དགོན་པའི་གྲྭ་གྲངས་མང་ཙམ་མེད་ཀྱང་ཁོ་པ་ཚོའི་ཞབས་ལ་ཡོད་པའི་ལྷམ་དང་གྲྭ་བ་མང་ཤོས་རྒན་པར་མཐོང་དུས། དགོན་སྡེ་འདིའི་སྒྲིག་སྲོལ་དང་སྤྱོད་ལམ་ཡང་ལེགས་པར་གནས་པ་ཡིད་ཚོད་བྱེད་ནུས། དགོན་འདིའི་སྐོར་ལ་ལོ་རྒྱུས་ཞིབ་བུ་གུད་དུ་འདྲི་མ་ནུས་ལ་དེའི་སྐོར་གྱི་ལོ་རྒྱུས་རྒྱུ་ཆ་ཡང་བཙལ་འཚོལ་མེད་པས་འབྲི་བར་མ་སྤོབས། ད་ལོར་ཁོང་གིས་དགོན་སྡེ་འདིའི་གྲྭ་བཙུན་ཡོངས་ལ་ཟས་རིགས་གྱ་ནོམ་པས་ལོ་སར་ཟས་ཀྱི་སྟོན་མོ་ཞིག་ཤོམ་ཀྱིན་ཡོད་ཅིང་། ངེད་ཅག་གིས་ཀྱང་ཁོང་གི་བཀོད་སྒྲིག་འོག་མདུན་དུ་བཤམས་པའི་ཤ་མར་རྩམ་གསུམ་ལ་ཕྱི་ཡོང་མགྲོན་པོའི་སྲོལ་གྱིས་ལོངས་སྤྱོད་བྱས། ཉིན་གུང་ཙམ་དུ་སྒར་གསར་དགོན་ནས་ལམ་དུ་ཆས། གནས་དེ་ག་ནས་ཤོ་བ་དགོན་དུ་སྤྱི་ལེ་མང་པོ་མེད་ཀྱང་བགྲོད་ལམ་ཀྱག་ཀྱོག་ཡིན་ལ་ཁ་བ་ཅུང་ཟད་ཡོད་པས་དུས་ཚོད་མང་པོ་ཟད། ཤོ་བ་དགོན་ནི་བྲག་དཀར་མཐོན་པོ་ཞིག་གི་མདུན་ངོས་སུ་རི་ངོས་ལེབ་མོ་ཞིག་ལ་སྙེ་ནས་ཆགས་འདུག ཆགས་སྟངས་འདི་ཡང་སྔོན་མ་དགོན་སྡེ་ཞིབ་འཇུག་པ་ཞིག་གིས་བཤད་པ་ལྟར་བོད་དགོན་ཕལ་ཆེ་བ་རི་བོ་རྒྱབ་ཏུ་བླངས་ནས(依山而建)ཆགས་འདུག་ཅེས་པ་དང་ཀུན་ནས་མཐུན། དགོན་སྡེ་འདི་ནི་དེང་གི་སྲིད་འཛིན་གྱི་དབྱེ་སྟངས་ལྟར་ན་ཀན་ལྷོ་ཁུལ་ཅོ་ནེ་རྫོང་ཤོ་བ་ཡུལ་ཚོའི་ཁོངས་སུ་གཏོགས། དེ་ལས་ཤོ་བ་ཡུལ་ཚོ་འདི་ལ་ཤོ་བ་ཧོར་རིགས་རང་སྐྱོང་ཡུལ་ཚོའམ་ཧོར་རིགས་ཤང་ཞེས་བྲིས་འདུག གནས་འདི་གར་ཡང་ཡུལ་ལུང་གང་དེའི་སྐད་ཉམས་སེ་བ་ཞིག་ཡོད་མོད་ཀྱང་ཕལ་ཆེ་བའི་ཁ་ནས་ཨ་མདོའི་སྐད་གསལ་ཐག་ཆོད་པ་རེ་སྨྲ་ཐུབ་པས་ངེད་ཅག་གོ་བརྡ་འཕྲོད་པ་ལའང་ཁག་པོ་མེད་དོ། །        ཤོ་བ་དགོན་ནས་ཤར་གྱི་སྤྱི་ལེ་བཅུ་གྲངས་ཀྱི་ཕྱོགས་ན་བྲག་དགོན་སྐུ་ཕྲེང་རིམ་པའི་སྒྲུབ་ཕུག་ཡོད་ལ། སྒྲུབ་ཕུག་དེ红土泉ཟེར་བའི་རྒྱ་མ་བོད་ཀྱི་སྡེ་བ་ཞིག་བརྒྱུད་དེ་འགྲོ་དགོས་ཤིང་། ལམ་སའི་ལམ་ཡང་གུ་དོག་པོ་ཀྱག་ཀྱོག་ཆེ་བ་ཞིག་འདུག རི་བོའི་ཉག་ཁ་ཞིག་ཏུ་རྐང་ལམ་ཞིག་ལས་མེད་ཅིང་རྐང་པ་བརྒྱབ་ཏེ་སོང་ན་ཐད་ཀར་སྒྲུབ་ཕུག་ཡོད་སར་སླེབས་ཐུབ། སྒྲུབ་ཕུག་གི་ནང་དུ་འཛུལ་ཚེ། སྒོ་འགྲམ་དུ་རིང་ཚད་ལ་ཁྲུ་གཉིས་ཙམ་ཡོད་པའི་སྒྲོལ་ལྗང་གི་སྐུ་མཆོད་མེ་སྒྲོན་སའི་ཅོག་ཙེ་ལེབ་མོ་དང་བཅས་ཡོད། དེའི་ཕྱི་རུ་སོང་ཚེ་སྒྲུབ་ཆུ་དྭངས་མོ་མཐིལ་མཐོང་བ་ཞིག་བསྐྱིལ་ཡོད། སྒྲུབ་ཕུག་གི་ཕུ་དོག་ལ་མདའ་ཡངས་པར་འདུག་སྟེ་ཕལ་ཆེར་མི་ཆེན་ཞིག་ཡར་འགྲེང་ནས་འགྲོ་ཐུབ་པའི་ཚད་དུ་སྣང་། གནས་འདི་རུ་བྲག་སྒོམ་པ་སྐུ་ཕྲེང་རིམ་བྱོན་གྱིས་སྒྲུབ་པ་ཉམས་ལེན་གནང་ཞིང་། མཛད་པ་འཕྲིན་ལས་བསྐྱངས་ཡོང་གཤིས།⑦ དད་ལྡན་མཇལ་བ་མང་པོ་འཁོར་སའི་གནས་གལ་ཆེན་ཞིག་ཏུ་ཆགས་ཡོད། ལྷག་པར་སྒྲུབ་ཕུག་འདིར་ཡོད་པའི་སྒྲུབ་ཆུ་ཁ་ལ་རེག་པའམ། སྒྲུབ་ཆུས་ལུས་འཁྲུད་པ་སོགས་ཀྱིས་ནད་དྲག་སྐྱེད་བྱུང་བ་དང་བུ་སྦྲུམ་པ་བཅས་ལ་ཕན་བདོག་པར་བཤད། དངོས་གནས་ཡིད་ལ་འཆར་དཀའ་བ་ཞིག་ནི། སྔོན་བྱོན་རི་ཁྲོད་འགྲིམ་པའི་ཉམས་ལེན་པ་དེ་དག་གིས་མི་མེད་ལུང་སྟོང་། རི་གཟར་ནགས་སྟུག གཅན་གཟན་གྱི་འཇིགས་པ་ཆེ་ས། ཉེན་ཁ་རབ་ཏུ་རྒོལ་བའི་གནས་ཁྱད་དུ་འཕགས་པ་དེ་འདྲ་ཅི་ལྟར་རྙེད་པ་ཡིན་ནམ། འདི་ཡང་སྔོན་མའི་ཟིན་ཐོ་ཞིག་ཏུ་རང་ལ་དྲི་བའི་ཚུལ་དུ་བྲིས་མྱོང་ཡོད་ཀྱང་། ད་ལྟའི་ཆར་སྔར་བཞིན་ལན་ཡང་དག་པ། འོས་འཚམ་པ་ཞིག་རྙེད་མ་ཐུབ་པ་འདྲ། རྗེས་མར་སྔར་བཞིན་འཚོལ་ངེས་སོ། །   
མཆན།
①③ བྲག་དགོན་པ་དཀོན་མཆོག་བསྟན་པ་རབ་རྒྱས། «མདོ་སྨད་ཆོས་འབྱུང་།» ཀན་སུའུ་མི་རིགས་དཔེ་སྐྲུན་ཁང་། ༢༠༡༥ལོའི་ཟླ༤པར། ཤ༦༩༩  ཤ ༦༩༥-༧༠༠
② བཀྲ་ཤིས་ཕུན་ཚོགས། «ཀན་ལྷོའི་རེབ་ཚའི་དགོན་ཆུང་གསུམ་གྱི་ལོ་རྒྱུས་དང་ད་ལྟའི་གནས་བབ་ལ་དཔྱད་པ།» ཀན་ལྷོའི་མི་རིགས་རིག་གནས་ཞིབ་འཇུག ༢༠༢༠ལོའི་སྤྱིའི་དེབ་གྲངས་བཅུ་དྲུག་པ།
④ ཤོ་བ་རིན་པོ་ཆེའི་ཡང་སྤྲུལ་སྐོར་ལའང་བཤད་ཚུལ་རེ་འགའ་མཆིས་ཀྱང་འདིར་བྲི་བར་མི་བྱའོ། །
⑤ སྤྱིར་བཏང་བྲག་དགོན་པ་དང་བྲག་སྒོམ་པ་ཞེས་འབྲི་སྲོལ་མི་འདྲ་བ་གཉིས་མཆིས་ཀྱང་གཉིས་ཀ་དག་པར་སྣང་།
⑥ བཀྲ་ཤིས་ཕུན་ཚོགས། དམངས་ཁྲོད་དུ་ཉར་བའི«ཤོ་བ་རིན་པོ་ཆེའི་རྣམ་ཐར»ལ་ཐོག་མར་དཔྱད་པ། ཀན་ལྷོའི་མི་རིགས་རིག་གནས་ཞིབ་འཇུག ༢༠༢༠·༡ སྤྱིའི་དེབ་གྲངས་བཅུ་གསུམ་པ།
⑦ མགོན་པོ་སྐྱིད། «བྲག་དགོན་པ་དཀོན་མཆོག་བསྟན་པ་རབ་རྒྱས་ཀྱི་མཛད་རྣམ་ལ་དཔྱད་པ།» ཀན་ལྷོའི་མི་རིགས་རིག་གནས་ཞིབ་འཇུག ༢༠༡༩·༤ སྤྱིའི་དེབ་གྲངས་བཅུ་གཉིས་པ།