བོད་ཀྱི་གློག་བརྙན་དྲ་ཚིགས་དང་གློག་བརྙན་དཔྱད་བརྗོད་ཀྱི་ཟུར་སྣེ།
བརྙན་གཟུགས་དུས་རབས་ཀྱི་རེ་བ་ཡོངས་འདུས་ཅན་དང་འཛམ་གླིང་ཤེས་རིག་གི་འགྱུར་བ་སྐྱོམ་འགུལ་ཅན་ཞིག་གིས་བོད་ཡུལ་གྱི་གནས་དང་ཟུར་མི་འདྲ་བ་ལའང་རིམ་གྱིས་གློག་བརྙན་གྱི་རིག་པ་རྙེད་ཞིང་གློག་བརྙན་ལ་འཁྱུད་པའི་དཔུངསྡེའང་ཐོལ་གྱིས་འཕྱུར་བཞིན་ཡོད། དེ་ནི་གློག་བརྙན་རྐྱང་བའི་བློ་འབྱེད་ཀྱི་དགེ་མཚན་ཙམ་མ་ཡིན་པར་གློག་བརྙན་དྲྭ་ཚིགས་དང་དྲྭ་ངོས་ཅི་རིགས་ཀྱིས་བསླངས་པའི་རིག་གསར་གྱི་མེ་ལྕེ་ལའང་འབྲེལ་བ་ཡོད་སྲིད།
འདིར་བོད་ཀྱི་གློག་བརྙན་ལ་བརྒྱུས་ནས་དམིགས་སུ་གླེང་བར་བྱ་བའི་ཡུལ་ནི་བོད་ཀྱི་གློག་བརྙན་དྲྭ་ཚིགས་དང་འབྲེལ་ནས་ཅུང་ཟད་གླེང་བར་ལ། ཧི་མ་ལ་ཡའི་མི་རིགས་ཀྱི་ཁ་ཚ་དགོས་གཏུགས་སུ་གྱུར་བའི་བོད་ཀྱི་བརྙན་གཟུགས་གསར་བའི་དགོས་མཁོ་དང་འཕེལ་འགྱུར་ལ་དམིགས་ནས། བོད་ཀྱི་སློབ་ཆེན་པ་སྐོར་ཞིག་དང་མི་རབས་གསར་བའི་ཤེས་ཡོན་པའི་དཔུང་རྡང་ལས། བོད་ཀྱི་གློག་བརྙན་དྲྭ་ཚིགས་གསར་འབྱེད་པ་བཀྲ་ཤིས་ཕུན་ཚོགས་ལགས་ཀྱིས་བོད་བརྙན་དྲ་བ་ཞེས་པའི་བོད་ཡིག་གི་ལམ་ནས་བོད་ཀྱི་གློག་བརྙན་དྲ་བ་དང་འཛམ་གླིང་ཤར་ནུབ་སྦྲེལ་བྱེད་ཀྱི་གློག་བརྙན་དྲ་ཚིགས་ཤིག་གསར་འབྱེད་གནང་བྱུང་། དེ་ནི་འདས་པའི་སྤྱི་ལོ༢༠༡༠ལོའི་ཟླ༡༠པ་ནས་བཟུང་བོད་བརྙན་དྲ་ཚིགས་ཀྱི་སྒོ་འཕར་ཐོག་མ་ཡོངས་སུ་ཕྱེ་བས། དུས་རབས་འདི་དང་མི་རིགས་འདིའི་ངོས་ཐད་ནས་ལོ་རྒྱུས་ཀྱི་ཟིན་ཐོ་གསར་བ་ཞིག་དང་གཉིས་སུ་མ་མཆིས། ལོ་རབས་དུ་མའི་སྔོན་ནས་བཟུང་བོད་འབྲེལ་གློག་བརྙན་བྱུང་བ་དང་འཕེལ་བ། ཐ་ན་རྒྱལ་ཡོངས་རང་བཞིན་དུ་གྲགས་པའི་གློག་བརྙན་རེ་འགའ་རིམ་གྱིས་ཆགས་པ་རེད། དེ་ལས་ཀྱང་ཉམས་དགའ་བའི་གནས་ནི་སྤྱི་ལོ༢༠༠༢ལོར་བོད་ཀྱི་གློག་བརྙན་ཐོག་མ་སྟེ་ལྷིང་འཇགས་ཀྱི་མ་ཎི་རྡོ་འབུམ་བྱུང་རྗེས། ས་སྒང་གཞུང་གི་བོད་ཁུལ་དུ་གློག་བརྙན་ལ་འཇུག་པའི་རིག་གསར་གྱི་རླབས་རྒྱུན་ངང་གིས་སྐྱོམ་ཞིང་ཐོལ་གྱིས་འབར། དེ་དང་སྦྲགས་ནས་བོད་ཀྱི་གློག་བརྙན་དྲ་ཚིགས་བོད་བརྙན་དྲ་བ་དང་པྲ་དྲ་ཞེས་རང་རྐྱ་འཕེར་བའི་བོད་ཀྱི་གློག་བརྙན་རྩོམ་རིག་དང་གཟུགས་འདས་ཤེས་རིག་སྤེལ་བྱེད་ཀྱི་སྡིངས་ཆ་ཆེན་མོ་གཉིས་རིམ་པ་བཞིན་བྱུང་བ་རེད། ཟུར་གཞན་ཞིག་ནས་པྲ་དྲའི་བྱུང་འཕེལ་ལ་འཇུག་གྱུར་ན། བོད་ཀྱི་གློག་བརྙན་རྩོམ་རིག་དང་གློག་བརྙན་གཟུགས་འདས་ཁོ་ན་ལ་དམིགས་ནས་གསར་འབྱེད་བྱུང་བའི་བོད་ཀྱི་གློག་བརྙན་དྲ་ཚིགས་གཉིས་པ་པྲ་དྲ་ཞེས་པ་ལེགས་འགྲུབ་བྱུང་བ་ནི་དགའ་མགུའི་ཡི་རང་གི་མཆོད་པའི་གནས་སུ་གྱུར་བ་རེད། དེ་ནི་ན་གཞོན་གསར་བའི་དཔུང་སྡེ་འཐོར་རླུང་དང་དམར་པོ། ཏིང་འཛིན་བཀྲིས་སོགས་ཀྱིས་གཙོ་སྒྲུབ་མཛད་པའི་བོད་ཡིག་གི་ཆེད་སྤྱོད་གློག་བརྙན་དྲ་ཚིགས་ཞིག་ཡིན་ལ། འདས་པའི་སྤྱི་ལོ༢༠༡༣ལོའི་ཟླ༥པའི་ཚེས༡༩ཉིན་ནམ་བོད་རྩིས་ལྟར་ན་ས་ག་ཟླ་བའི་དུས་བཟང་དང་བསྡོངས་ནས་བོད་ཡུལ་ལ་གློག་བརྙན་དྲ་ཚིགས་གསར་བ་ངང་གིས་འབྱེད་པ་རེད། ཕྱིས་སུ་དྲ་ཚིགས་རང་སྟེང་གི་དགོས་ངེས་དང་དུས་བསྟུན་གྱི་དབང་གིས་ཕྱོགས་བསྡུས་རང་བཞིན་གྱི་དྲ་ཚིགས་སུ་གྱུར་བ་རེད། ངེས་པ་དོན་གྱི་བོད་ཡིག་གི་ལམ་ནས་གློག་བརྙན་དྲ་ཚིགས་སུ་གླེང་དགོས་ན་ཉེ་ཆར་འདི་ལས་མེད་ལ་འདི་ལས་བལྟ་ས་དང་ཉན་ས་མི་འདུག བོད་ཀྱི་གློག་བརྙན་དྲ་ཚིགས་ཀྱི་འཕྲེད་ཚད་གཞན་ཞིག་ནས་བལྟས་ན། བོད་གློག་བརྙན་གྱི་དབྱིངས་རིམ་དུ་ཕན་ཆར་འཇོ་བའི་རྒྱ་ཡིག་གི་ལམ་ནས་དྲ་ཚིགས་སྐོར་ཞིག་འདུག་སྟེ་བོད་ལྗོངས་རིག་གནས་དྲ་བ་དང་བོད་མིའི་རིག་གནས་དྲྭ་བ། པེ་ཅིང་མི་རིགས་གློག་བརྙན་དྲ་བ། ཧི་མ་ལ་ཡའི་གློག་བརྙ་དྲ་ཚིགས་སོགས་ཀྱིས་བོད་ཀྱི་གློག་བརྙན་ཤེས་རིག་ས་ཁོངས་ལ་ཤུགས་སྣོན་དང་མཐུན་རྐྱེན་ཡག་ཤོས་སྦྱོར་དམུས་སུ་ཡོད། དེ་ལས་ཀྱང་བོད་ཀྱི་གློག་བརྙན་རྩོམ་རིག་དང་གློག་བརྙན་གཟུགས་འདས་ལ་ཕན་ནུས་ཤུགས་ཆེར་བསྐྱེད་པའི་བོད་ཀྱི་གཙོ་རྒྱུགས་དྲ་ཚིགས་གཞན་དག་ནི་མཚོ་སྔོན་པོ་དྲ་བ་དང་ན་གཞོན་གསར་བ། དགེ་འདུན་ཆོས་འཕེལ་དྲ་བ། རིག་འབྱུང་དྲ་བ། ཀྲུང་གོའི་བོད་ལྗོངས་དྲ་བ། མགར་གྱི་དྲ་བ་སོགས་ཀྱི་དྲ་ཚིགས་སུ་བོད་ཀྱི་གློག་བརྙན་རྐྱང་བའི་ས་ཁོངས་མེད་ཀྱང་། དྲ་ཚིགས་ཀྱི་ལྟ་མཁན་དང་རིག་གནས་སྲི་ཞུའི་སླད་དུ་གློག་བརྙན་གྱི་ས་མིག་རེ་དང་གློག་བརྙན་དང་འབྲེལ་བའི་སྡེ་ཚན་རེའང་བཀོད་ཡོད། དེ་ནི་གློག་བརྙན་ཆེད་སྤྱོད་མ་ཡིན་པའི་དྲ་ཚིགས་དག་གིས་གློག་བརྙན་ལ་སྒྲུབ་པའི་སྲི་ཞུའི་རིན་ཐང་དང་སྒྲོམ་གཞི་ཆུང་ངུ་ཞིག་ཡིན་ངེས། བོད་ཀྱི་གློག་བརྙན་དྲ་ཚིགས་དང་རྒྱ་ནག་གི་གློག་བརྙན་དྲ་ཚིགས་ཀྱི་གྲངས་ཚད་དང་བྱང་ཚད་བསྡུར་བའི་ཆ་ཞིག་བྱས་ན། རྒྱ་ནག་གི་ཆེད་སྤྱོད་གློག་བརྙན་དྲ་ཚིགས་ཁོ་ན་རྩིས་ཞིབ་བྱས་པ་ལྟར་ན། ཕལ་ཆེར་ཆིག་སྟོང་ལྷག་ལས་བརྒལ་བའི་གློག་བརྙན་ཆེད་སྤྱོད་དྲ་ཚིགས་སུ་འཕེལ་གྱིན་འདུག དེ་ལས་དྲ་དབང་ཆོག་མཆན་དང་མི་སྒེར་རམ་ཚོགས་སྤྱིའི་ཆེད་སྤྱོད་གློག་བརྙན་དྲ་ཚིགས་གསར་འབྱེད་གནང་བཞིན་པ་ནི་བགྲང་གིས་མི་ལང་བའི་གནས་སུ་སླེབས་ཡོད། འོན་ཀྱང་། དུས་རབས་གཅིག་གི་འགྲོས་མཚམས་སུ་འཚོ་ཞིང་ཤེས་རིག་གསར་བའི་སྐྱོམ་སྟངས་སུ་རྒྱུགས་པའི་མི་རིགས་དང་ས་ཁུལ། རིག་གནས་དང་བསམ་བློ་གང་ལའང་དུས་བསྟུན་གྱི་སྦྱོར་བ་དང་ལག་ལེན་ཞིག་མེད་ན། དེ་ལས་ལྷག་པའི་རྗེས་ལུས་ཞིག་དང་མཐའ་འཁོབ་ཞིག་ཡོད་མི་སྲིད་པ་ལྟ་བུ་རེད།
བོད་ཀྱི་གློག་བརྙན་བྱུང་རྗེས། གློག་བརྙན་དང་འབྲེལ་བའི་དྲ་ཚིགས་སམ་དྲ་ངོས་ས་མིག་འབྱུང་དགོས་པ་ནི་གློག་བརྙན་ཤེས་རིག་གི་འཚོ་གནས་དང་གློག་བརྙན་སྒྱུ་རྩལ་གྱི་ཁྱབ་ཁོངས་གཙོ་བོ་ཞིག་ཡིན་པས། ཉེ་ཆར་བོད་ནང་དུ་བོད་ཡིག་གི་ལམ་ནས་གློག་བརྙན་དྲ་ཚིགས་འདི་གཉིས་ལ་སྦྲེལ་ནས་བོད་ཀྱི་གློག་བརྙན་རྩོམ་རིག་ལ་སྔར་བྱུང་མ་མྱོང་བའི་རིག་གསར་རྩོམ་རིགས་ཀྱི་བརྡ་རྟགས་ཤིག་ངང་གིས་མཆེད་པ་རེད། བརྙན་གཟུགས་རྩོམ་རིག་གི་རིམ་ཚད་མི་འདྲ་བ་ནི་གློག་བརྙན་ལོ་རྒྱུས་དང་གཞུང་ལུགས། གློག་བརྙན་དཔྱད་འཇོག་དང་འཁྲབ་གཞུང། གློག་བརྙན་ཟབ་འཇུག་དང་འཚོལ་ཞིབ་ཀྱིས་བརྡར་ཤ་བཅད་པ་ཡིན། གང་ལྟར། བོད་ཀྱི་གློག་བརྙན་དྲ་ཚིགས་བོད་བརྙན་དྲ་བ་དང་། པྲ་དྲ་གཉིས་བྱུང་བ་དང་སྦྲགས་ནས། གློག་བརྙན་ཆེད་ལས་ཅན་དང་ཆེད་ལས་མ་ཡིན་པའི་སྡེ། གློག་བརྙན་འཚོལ་ཞིབ་པ་དང་ཨ་གསར་ཅན་གྱི་དཔུང་། གློག་བརྙན་མོས་བ་ཅན་དང་གྲགས་སྐམ་ཅན་གྱི་རིགས། གློག་བརྙན་ཕུགས་བསམ་ཅན་དང་ཉམས་སྣང་ཅན་གྱི་ཚོགས་དང་ཚོགས་ཀྱིས་གློག་བརྙན་ལ་གཞིགས་ནས་འཛམ་གླིང་གི་གློག་བརྙན་ཕྱི་ནང་དང་བོད་ཀྱི་གློག་བརྙན་གྱི་དཔྱད་འཇོག་མི་འདྲ་བའི་ཟུར་དང་ཁྱོན་ནས་སྒྱུ་རྩལ་རྩོམ་རིགས་ཀྱི་སྐྱོམ་སྟངས་ཤུགས་ཆེར་འཕེལ་དམུས་སུ་བྱུང་། དེ་ནི་བོད་ཀྱི་གནའ་དེང་རྩོམ་རིག་བྱུང་འཕེལ་གྱི་ངོས་ཐད་ནས་གླེང་ནའང་དུས་གསར་གྱི་སྒྱུ་རྩལ་རྩོམ་རིག་གི་མཁའ་དབུགས་གསར་བ་ཡིན་ངེས། ཉེ་ཆར་བོད་ཀྱི་གློག་བརྙན་དྲ་ཚིགས་འདི་དག་ལ་གཞིགས་ནས་བོད་ཀྱི་གློག་བརྙན་རྩོམ་རིག་ལ་བཞག་པའི་བརྙན་གཟུགས་ཀྱི་ཁོར་ཡུག་དང་རྩོམ་རིགས་ཀྱི་བར་སྟོང་གསར་བ་ཆེས་གཙོ་རྒྱུགས་ཅན་དང་དགའ་སྣང་ཅན་གྱི་སྡིངས་ཆ་ཞིག་བསྐྲུན་པ་ནི་ལོ་རྒྱུས་ཀྱི་འཕེལ་རྟགས་ཡིན། གཙོ་བོ་བོད་ཀྱི་གློག་བརྙན་དཔྱད་འཇོག་དང་གློག་བརྙན་ཕྲན་དཔྱད། གློག་བརྙན་ངོ་སྤྲོད། གློག་བརྙན་རྒྱུན་ཤེས། གློག་བརྙན་གསར་འཕྲིན། གློག་བརྙན་གཞུང་ལུགས། གློག་བརྙན་འཁྲབ་གཞུང་། གློག་བརྙན་མི་སྣའི་སྡིངས་ཆ་སོགས་ཀྱི་མ་ལག་ཅུང་འཐུས་སྒོ་ཚང་བ་ཞིག་གྲུབ་སོང་བ་རེད། དེ་བཞིན། ཕྱི་ནང་གི་གློག་བརྙན་དཔྱད་འཇོག་དང་གློག་བརྙན་མདོར་བསྟན། གློག་བརྙན་རིག་གཞུང་སོགས་འགྲེམས་པ་ནི་ཁ་སང་གི་རྨི་ལམ་དུ་འཕྲུལ་བའི་གློག་བརྙན་མཛེས་དཔྱོད་དེ་ཉིད་དེ་རིང་གི་དངོས་ཡོད་དུ་སྣང་བའི་གློག་བརྙན་དྲ་བའི་ལས་གཞི་གསར་བ་རུ་གྱུར་བ་རེད། སང་ཉིན་གྱི་བོད་ཀྱི་གློག་བརྙན་ཕྱོགས་བསྡུས་སྒྱུ་རྩལ་ལའང་རེ་བའི་རྩེ་དང་ལག་ལེན་གྱི་གནད་ལ་རག་ལས་བ་གསལ་འབྱེད་བྱེད་ཐུབ། དུས་དང་བསྟུན་ནས་བོད་ཡིག་གི་གློག་བརྙན་རྩོམ་རིག་ལའང་སྔར་བྱུང་མ་མྱོང་བའི་སྐྱོམ་འགུལ་ཆེན་མོ་ཞིག་བྱུང་བ་རེད། དཔེར་ན། གློག་བརྙན་ཆེད་དེབ་དང་གློག་བརྙན་ཚགས་ཤོག གློག་བརྙན་ཆེད་བཀོད་དུས་དེབ། གློག་བརྙན་ལོ་རྒྱུས་གཞུང་ལུགས་སོགས་ཀྱི་ཆ་ཅུང་ཟད་ཆགས་མགོ་རྩོམ་གྱིན་ཡོད།
མདོར་ན། ལོ་རྒྱུས་སུ་བྱུང་མ་མྱོང་བའི་བོད་ཀྱི་གློག་བརྙན་དྲ་ཚིགས་བོད་བརྙན་དྲ་བ་ནི་འདི་ལས་གློག་བརྙན་གྱི་སྡིངས་ཆ་གསར་བ་དང་བློ་འབྱེད་གསར་བའི་རིག་སྒོ་འབྱེད་ཀྱིན་ཡོད། དེ་བཞིན། པྲ་དྲའི་ཕྱོགས་བསྡུས་རང་བཞིན་གྱི་གློག་བརྙན་སྟེགས་བུ་ཞིག་དང་བོད་གློག་བརྙན་གྱི་སྒྱུ་རྩལ་ཁྱིམ་ར་ཆེན་པོ་ཞིག་གྲུབ་དམུས་སུ་མཆིས་པ་ནི་མཆོད་པར་འོས་སོ།
