གཡང་མོ་ལུག་གི་མིང་འདོགས་ཚུལ།

　　གཡང་དཀར་ལུག་ནི་རྒྱུ་ཕྱིང་བལ་ལས་བཟོས་པའི་གྱོན་པ་དང་། ཕྱིང་ཞྭ།ཚར་ཞྭ། སློག་པ་དང་ཚ་རུ་སོགས་ཀྱི་ཐོན་ཁུངས་ཡིན་པར་མ་ཟད། ལུག་གི་ཤ་ཞིམ་ལ་ལྟོ་བར་འཇུ་སླ་བ།ལུག་གི་ནང་ཁྲོལ་ཧ་ཅང་ཞིམ་ལ་ལུག་ཤ་སྡུད་གསོག་བྱེད་སླ་བ་ཞིག་ཡིན།དུས་རྒྱུན་དབྱར་ལྗོངས་སུ་ཚ་བ་ཆེ་བས་ཤ་མང་པོ་ཡོད་ན་རུལ་སླ་རྐྱེན་ལུག་བཤས་ན་ཤ་ཉུང་ལ་ཞིམ་པས་གཙོ་བོ་དབྱར་ཁར་ལུག་བཤའ་བ་རེད། ལུག་གི་རུལ་མ་ནི་འབྲོག་པའི་མེ་འབུད་བྱེད་ཀྱི་འབུད་ཆ་བཟང་བོ་ཡིན་པ་མ་ཟད་གྲལ་དག་ལ་མེ་ཤུགས་ཆེ་བ་ཞིག་ཡིན།ལུག་གི་བལ་ཀྱིས་ཕྱིང་གདན་དང་ཕྱིང་ལྭ་བཟོ་བ།ད་དུང་ཉལ་ཐུལའང་བཟོ་བས་ད་ལྟའི་ཆར་ལུག་བལ་ཁོ་ན་རྒྱུ་སྤུན་བྱས་པའི་ཉལ་ཐུལ་ཤིག་ལ་སྒོར་སྟོང་ཆ་རེ་སྟེར་དགོས་ཀྱི་འདུག
　　ལུག་གི་ལོ་ཚོད་ཀྱིས་མིང་འདོགས་ཚུལ།
　　ཕོ་ལུག་ལ་ལོ་ཚོད་དར་ལ་བབ་པ་ལ་ཤ་བཟན་དང་།དེའི་འཕྲོར་ཐུང་བ།ཕོ་ལག་ཟེར་ཞིང་།མོ་ལུག་ལ་མ་མོ་དང་ཚེར་མོ།ལག་མོ་ཟེར་བ་ལྟ་བུ།ད་དུང་ཕོ་ལུག་དང་མོ་ལུག་གང་རུང་ལ་ལོ་ཚོད་ཀྱི་ཆ་ནས་ལུ་གུ་དང་ལག་ག་དང་སོ་གཉིས།སོ་བཞི།སོ་དྲུག་དང་ཁ་གང་ཞེས་པའི་མིང་འདོགས་སྲོལ་ཡོད་པ་འདི་ལུག་འཚོ་སྐྱོང་བྱེད་པའི་འབྲོག་ཡུལ་སྤྱིའི་ཐུན་མོང་དུ་སྤྱོད་པའི་མིང་ཞིག་ཏུ་ཆགས་ཡོད།གཞན་གཙོ་བོ་དཔྱིད་དགུན་དུ་ཕོ་མོ་མཉམ་བསྲེས་བྱས་པའི་ཁྱུ་ལ་ལུག་ཁྱུ་དང་།མ་མོ་དང་ལུ་གུ་ཕྱོགས་གཅིག་ཏུ་འཚོ་བ་ལ་མ་ཁྱུ་དང་དེའི་རྫི་བོར་མ་རྫི་ཟེར།ཡང་ཕ་ལུག་བཟང་ཤོས་ཕྱོགས་གཅིག་ཏུ་དགར་ནས་འཚོ་བ་ལ་ཤ་ཁྱུ་དང་དེའི་རྫི་བོ་ལ་ཤར་རྫི་ཟེར།
　　ཁ་དོག་ལས་མིང་འདོགས་ཚུལ།
　　སྤྱིར་གཡང་མོ་ལུག་གི་ཁ་དོག་དཀར་པོ་ཡིན་ནའང་ལུག་མང་ཆེ་བའི་མགོའི་སྤུ་ཁ་དང་ལ་དཀར་སེར་སྨུག་ནག་གང་རུང་འདྲེས་ནས་ཡོད་པས་མིང་ཡང་མི་འདྲ་བ་དུ་མ་བཏགས་ཡོད་པ་དཔེར་ན།ལུག་གི་མགོའི་སྤུ་མདོག་དཀར་པོའི་ཆ་ལ་སེར་པོའི་ཆ་ཅུང་ཙམ་ཡོད་པ་ལ་རྒྱ་རྒྱ་དང་རྭ་མེད་པ་ལ་རྒྱ་ཐོ།མགོའི་སྤུ་མདོག་དཀར་པོའི་ཆ་ལ་དམར་པོའི་ཆ་ཅུང་ཙམ་ཡོད་པ་ལ་ཁམ་ཁམ་དང་རྭ་མེད་པ་ལ་ཁམ་ཐོ་ཟེར།མགོའི་སྤུ་མདོག་ནག་པོའི་ནང་དུ་དཀར་པོའི་ཆ་ཅུང་ཙམ་ལས་མི་འདུག་པ་ལ་ཁྲ་གཞས་དང་རྭ་མེད་པ་ལ་ཁྲ་ཐོ་ཟེར།མགོའི་སྤུ་མདོག་སྔོ་ནག་ནང་དུ་སྔོ་ནག་གི་ཆ་ཅུང་ཡོད་པ་ལ་སྔོ་གཞས་དང་རྭ་མེད་པ་ལ་སྔོ་ཐོ་ཟེར་།མགོའི་སྤུ་མདོག་དཀར་ནག་གཉིས་ལ་མང་ཉུང་མེད་པ་ལ་སྨུག་གཞས་དང་རྭ་མེད་པ་ལ་སྨུག་ཐོ་ཟེར།མགོའི་སྤུ་མདོག་ཡོད་ཚད་ནག་པོ་ཡིན་པ་ལང་སྨུག་གཞས་དང་རྭ་མེད་པ་ལ་སྨུག་ཐོ་ཟེར།གོང་བཀོད་ཀྱི་མིང་དེ་དག་རེ་རེའི་མཐའ་ལ་མ་ཞིག་སྦྱར་ན་མ་མོའི་མིང་གི་རྣམ་གྲངས་ཐོན་པ་རེད།ལུག་གི་ནང་ནས་ཀྱང་རྣ་གསོས་པ་སྟེ་ལུ་གུའི་དུས་སུ་ཕྱ་བྱས་པ་ལ་ནར་སོན་ན་ཤ་བཟན་དང་ལུ་གུའི་དུས་སུ་ཕྱ་མ་བླངས་པ་ལ་ཁྲོམ་ཟེར།ཁྲོམ་ནི་ལུག་རྒྱུད་སྤེལ་བའི་ཨ་ཕ་ལྟ་བུ་ཡིན་པས་ལུ་གུའི་དུས་སུ་ལུ་གུ་བཟང་ཤོས་སམ་སྤུ་ཁ་ཡག་ཤོས་ཤིག་འདེམས་པ་རེད།ཕོ་ལུག་ཡོད་ཚད་ལ་ལུ་གུའི་དུས་སུ་ཕྱ་མ་བླངས་ན་ནར་སོན་ན་ཤ་མི་ཞིམ་ལ་འཚོ་སྐྱོང་དཀའ་བ་ཡིན།ད་དུང་ལུག་འཚོ་སྐྱོང་བྱེད་པའི་ས་བབ་ཀྱི་དྲོད་གྲང་དང་རྩ་ཆུའི་དགོས་དབང་ལྟར་དཔྱིད་ལུག་དང་དགུན་ལུག་གཉིས་སུ་བཀར་ཡོད་པས་དཔྱིད་ལུག་གསོ་དུས་སྟོན་ཀ་ནས་བཟུང་ཁྲོམ་ལ་དབོ་ཁེབ་རྒྱག་པ་ཞེས་འོག་ཁེབ་བརྒྱབ་ནས་ལུག་རྒྱུད་སྤེལ་དུ་མི་འཇུག་པ་དང་དཔྱིད་ལུག་གསོ་ན་དབོ་ཁེབ་རྒྱག་མི་དགོས་པར་རང་ཡན་ཏུ་བཏང་ཆོག་པ་རེད།