རྒན་སྨན་བླ་སྐྱབས་ཀྱི་གླུ་ཚིག་བརྩམས་ཆོས་ཀྱི་སྒྱུ་རྩལ་སྐོར་རགས་ཙམ་གླེང་བ།
དང་པོ། ཁོང་གི་མི་གཤིས་ལ་འབྲེལ་བའི་བརྩམས་ཆོས་སྒྱུ་རྩལ།
སྒྱུ་རྩལ་ངོས་སྟངས་ནས་བརྗོད་ན།སྒྱུ་རྩལ་ནི་དོན་ངོས་མིའི་དང་འཚོ་བ་འབྲེལ་བ་དམ་ཟབ་ཏུ་ཆགས་པའི་དངོས་ཆས་ཅི་རིགས་དང་མིའི་སེམས་ཀྱི་ཟབ་སར་ལྷུང་བའི་ཆེས་ལྐོག་གྱུར་གྱི་སྣང་བརྙན་གསར་བ་ཅིག་ལ་ངོས་འཛིན་ཆོག་པའམ།སྒྱུ་རྩལ་གྱིས་སྣང་བརྙན་བསྐྲུན་ཐུབ་པ་དང་མིའི་དངོས་ཀྱི་ངོ་བོ་ཟབ་ནའང་སྒྱུ་རྩལ་ཧེ་བག་རང་བཞིན་གྱིས་ཆགས་འདུག་པ་དེ་མངོན་ཐུབ།ཡང་ན་འཚོ་བའི་ཉིང་བཅུད་ནི་སྒྱུ་རྩལ་ལ་ངོས་འཛིན་བྱས་པར་བྱེད་དང་།སྒྱུ་རྩལ་གྱི་འབྱུང་ཁུངས་ཡང་འཚོ་བའི་གསར་བསྐྲུན་དང་བློ་རིག་ལ་ངོས་འཛིན་པ་དང་སྣོད་བཅུད་ཀྱི་ཆེས་མཛེས་སྡུག་ལྡན་པ་ལས་དོན་སྙིང་ལྐོག་གྱུར་གྱི་གནས་ལུགས་གསལ་བོ་དེ་མཚོན་པར་བྱེད་པའི་དྲང་བདེན་གྱི་གནས་ལུགས་དེ་མཚོན་ཐུབ་པར་བྱས་ཡོད།གླུ་ཚིག་བརྩམས་པ་པོ་ཁོང་ནི་གཞན་ལས་ཆེས་འབུར་ཐོན་ཡིན་པའི་སྒྱུ་རྩལ་གྱི་མི་གཤིས་དེ་ཆུང་དུས་ནས་རང་སྟེང་དུ་གྲུབ་པ་ཡོད་པ་དང་།དེའི་སྟེང་དུ་ཁོང་གི་སྦྱོང་བརྡར་དང་བློ་རིག་ལ་བརྟེན་ནས་སྒྱུ་རྩལ་གྱི་ལམ་ཆུང་བསྐྲུན་པའི་མི་སྣར་གྱུར་བ་དང་།ཁོང་གིས་དུས་རྒྱུན་འཚོ་བའི་ནང་གི་དུས་རྒྱུན་སྤྱིར་བཏང་སྐད་ཆའི་ནང་དུ་རྩེད་མོ་དང་ཀུ་རེ་ནང་དུའང་མི་ལ་འདང་རྒྱག་རྒྱུ་ཡོད་པའི་བར་སྣང་བསྩོལ་བ་དང་།བརྙན་བཟློས་དང་བཞད་གར་གྱི་ལམ་བུ་ནས་མི་རྣམས་ལ་དགོད་སྤྲོ་དང་གསར་རྟོག་ངོས་འཛིན་དང་བསམ་གཞིག་བསློང་བའི་བར་སྟོང་དེ་དག་གིས་ཁོང་གིས་སྒྱུ་རྩལ་གྱིས་བསླངས་པ་དང་།དེ་ཡང་རིམ་པར་གསལ་བཤད་བྱས་ན་ཁོང་གིས་གླུ་ཚིག་མངས་རིས་སྒྲ་བརྙན་དང་ཆུ་ལེན་བུ་མོ་གཉིས་ལ་མཚོན་ན།བོད་ཀྱི་འཚོ་བའི་ནང་དུ་ཆེས་རྒྱུགས་ཆེ་བ་དང་གོམས་གཤིས་མྱོངས་གོམས་དུ་གྱུར་བའི་འདྲེས་ལྡན་དུ་གྱུར་ཡོད་མོད།ཁོང་ལ་མཚོན་ན་སྒྱུ་རྩལ་གྱི་མིག་བུ་སྤྱད་ནས་དེ་ཡི་ཡ་མཚར་རང་གཤིས་དང་སྐད་ཆའི་ཉིང་བཅུད་འདུས་པའི་ཚིག་འབྲི་དག་གིས་འཚོ་བ་གསོན་ཉམས་ལྡན་པར་བྱས་ཡོད་ལ།ཉན་པ་དང་བལྟས་པ་ཙམ་གྱིས་མི་རྣམས་ཀྱིས་བརྗོད་འདོད་པ་དེ་བརྗོད་མ་ཤེས་པར་ལས་པའི་རང་བཞིན་དང་ངོ་བོ་དེ་གསལ་འདོན་བྱས་པ་དེ་ལ་སྒྱུ་རྩལ་གྱི་སྣང་བརྙན་འདྲེས་ནས་བསྡད་ཡོད།ཁོང་གི་གླུ་ཚིག་ནི་བསྟོད་པ་ཙམ་དང་སྙན་ངག་ཙམ་མ་ཡིན་པར་གསོན་ཉམས་རང་ཤུགས་སུ་འདྲེས་པའི་ཚིག་གི་སྦྱོར་བ་ཡིན་པ་དང་།དེ་ལ་གཟུགས་སྒྲ་དྲོ་རོ་སོགས་འདོད་ཡོན་ལོངས་སུ་སྤྱད་པའི་དྭངས་ཉུག་འདྲེས་ནས་ཡོད་ལ།ངོ་བོ་དང་རང་བཞིན་ལ་འདྲེས་ཆ་ཆེ་བའི་གསལ་འདོན་གྱི་ཞིབ་ཆ་འདྲེས་ནས་བསྡད་ཡོད།དེ་ནི་ཁོང་གིས་རིག་རྩལ་ལམ་བུ་དེ་སྒྱུ་རྩལ་གྱི་བརྙན་རིས་དེ།ཚིག་གི་བརྙན་རིས།གསོན་ཉམས་བློས་བསླངས་དོད་ཆ་ལྡན་པར་འདུག་སྙམ།ཁོ་བོ་མཚོན་།སྒྱུ་རྩལ་བརྩམས་ཆོས་དེ་ཙམ་ཡིད་ཚིམ་པ་གཏན་ནས་མེད་ལ།སྒྱུ་རྩལ་དེ་ད་དུང་མཐོ་རླབས་སུ་བསྐྲུན་ཐུབ་ཡོད་མེད་ཀྱང་ང་ཚོའི་ཁ་ཚོན་གཅོད་དཀའ་བ་དང་།ཁོང་གིས་ཀྱང་ཁ་ཚོན་ཆོད་དཀའ་བའི་སྒྱུ་རྩལ་གྱི་དུངས་ཞེན་དང་རེ་ཕུགས་སུ་ཚད་ཇི་འདྲ་ཞིག་ལ་ཐོན་ན་ཡང་རྩེ་རེད་ཅེས་བརྗོད་ཐབས་བྲལ་བ་དེ་རེད་དོ།ཁོང་གི་ཚིག་འབྲུ་རེ་རེ་ལ་དབྱངས་ཀྱི་གཤོག་པ་བསྩལ་དེ་ལེན་མཁན་ཞིག་གིས་ལེན་སྐབས།དེ་ནི་སྒྱུ་རྩལ་ཞིག་གི་གྲུབ་སྣང་དུ་འདོད་མོད།ཚིག་འབྲུ་དང་དབྱངས་ཡོད་ཚད་སྒྱུ་རྩལ་དུ་གྲུབ་པའི་ངེས་པ་མེད་པས།སྒྱུ་རྩལ་གྱི་སྣང་བརྙན་དང་པོ་ནི་རྩོམ་མཁན་གྱི་མིག་འདྲིས་རྣ་འདྲེས་སོགས་བདག་དབང་དུ་གྱུར་བའི་མྱོང་སྣང་ཚོར་དེ་ཡིན་ལ།དེ་ལ་བརྟེན་ནས་བྲིས་པའི་གླུ་ཚིག་དང་།གླུ་ཚིག་དེ་ལ་ཡིད་འདྲེས་པའི་དབྱངས་ཀྱི་ང་རོ་བསྩོལ་མཁན་དེ་དབྱངས་རྩོམ་མཁན་དང་།ཚིག་དང་དབྱངས་ལ་ཡིད་འདྲེས་པའི་ལེན་མཁན་གྱི་ཉམས་འགྱུར་སྣང་བརྙན་དེ་དག་གིས་བསྐྲུན་པའི་དབྱངས་ཀྱི་རྣམ་པ་དེ་ལ་སྒྱུ་རྩལ་ལྡན་མིན་དེ་སྤྱི་འགྲོས་ཀྱི་འཚོ་བའི་སྣང་བརྙན་ཅིག་ལ་བཏེགས་ནས་བསྡད་ཡོད་སྙམ་ཡོང་།དེ་ནི་དབྱངས་ཀྱི་རྣམ་པ་ཁོ་ན་ཙམ་མིན་པ་དང་།ཚིག་འབྲི་རྣ་བར་སྙན་པ་ཙམ་ཡང་མིན་ཏེ།དེ་ལས་འཚོ་བ་དང་དུས་གསུམ་གང་ལ་ཕྱིར་རྟོགས་དང་ཕུགས་འདུན་མཚོན་པའི་འཚོ་བའི་ཉིང་བཅུད་དེ་གསལ་རྟོགས་བྱེད་པ་དང་།སྒྱུ་རྩལ་གྱི་གསལ་རྟོགས་འདོན་མཁན་དེ་ཕྱིར་དུ་འཚོ་བའི་ནང་དུ་ཡོད་མེད་ལ་འབྲེལ་ནས་བསྡད་ཡོད་སྙམ་ལ།དེ་ཕྱིར་སྒྱུ་རྩལ་གྱི་འགོ་ཁུངས་དེ་ནི་མིའི་འཚོ་བ་འབྲེལ་བ་དང་།སྣང་བརྙན་གྱི་འགོ་ཁུངས་དེ་ཡང་དེ་དང་འབྲེལ་ནས་ཡོད་མོད།དེ་ཉིད་བསྔོག་འདོན་བྱེད་མཁན་ནི་མིའི་ནང་དུ་མི་ཉུང་ཤས་མ་གཏོགས་མེད་པར་འདོད་ལ།རྒན་སྨན་བླ་ལགས་ཀྱིས་ཁོང་གི་མི་ཚེ་ཧྲིལ་བོའི་ནང་དུ་དེ་འདྲའི་སྒྱུ་རྩལ་གྱི་བརྩམས་ཆོས་ལེགས་ཤོས་བསྐྲུན་ཐུབ་བྱུང་བ་དེ་ནི་མི་གཅིག་གཉིས་ཀྱི་བསྔགས་བརྗོད་མ་ཡིན་པར་ཀུན་གྱིས་སེམས་ནས་ཁོང་ལ་བསྩལ་བའི་སྒྱུ་རྩལ་གྱི་ལྡིང་ཁང་དེ་ཁོང་གི་མི་གཤིས་སྒྱུ་རྩལ་ལ་ནམ་ཡང་ཁ་འགར་ཐུབ་མེད་པ་ལྟ་བུའོ།
གཉིས། ཁོང་གི་སེམས་ཁོང་ནས་འབུས་པའི་བོད་མི་རིགས།
ཁོང་ལ་མཚོན་ན། བོད་མི་རིགས་ཀྱི་མི་གཤིས་དང་འཚོ་བའི་གོམས་གཤིས་ལ་དགའ་ཞེན་གཏིང་གྱིས་མི་ལོན་པ་ཡོད་པ་དང་། དེ་འདྲ་མེད་ན་དེ་འདྲའི་སྣང་བརྙན་བསྐྲུན་མི་ཐུབ་པ་གཞིར་བཞག་སྟངས་ནས་གཞིགས་ན། ཁོང་གིས་མི་རིགས་འདི་ལ་བཅིངས་པའི་བརྩེ་སེམས་དེ་ཇི་འདྲ་ཞིག་ཡིན་ཞེས་བརྗོད་ཐབས་བྲལ་ལ། ཁོང་གི་སྒྱུ་རྩལ་བརྩམས་ཀྱི་གཏིང་སར་འཐིམ་པའི་ཚིག་འབྲུ་རེ་རེ་བར་ན་གསེར་མདོག་ལྟར་ལྷམ་མེར་འཕྲོས་པ་འདུག་པ་ཀུན་གྱིས་ཤེས་ཐུབ་ལ། འདིར་མི་མང་ཁ་ན་སངས་རྒྱས་ཡོད་པ་ལྟར་བསྟོད་པའི་མཐེ་བོང་བསྒྲེང་དགོས་དོན་མེད་ལ། དེ་ལས་ཟུར་ཞིག་འཕྲོས་ན། ཁོང་གིས་མདོ་དབུས་ཁམས་གསུམ་གང་ལའང་ཕྱོགས་རིས་མེད་པར་དེ་དག་གི་སེམས་ཁམས་དང་འདྲེས་པའི་གླུ་ཚིག་བརྩམས་ཡོད་ལ།གླུ་བའི་ངག་སྒོ་དང་རེ་རེ་དང་མི་གཤིས་ལ་མཐུན་པའི་གླུ་ཚིག་དང་སྐད་ངག་དཔྱད་འདེམས་གནང་ཡོད་པ་དང་། དཔྱད་འདེམས་ཁྲོད་དུའང་རེ་བ་མཐོ་དྲགས་པས་མི་ལ་ཕོག་ཐུག་བཟོས་པ་ནི་སྨྲོས་མེད་ཡིན་ཏེ། ཁོང་གི་སྒྱུ་རྩལ་དུངས་པ་དང་སྒྱུ་རྩལ་སྣང་བརྙན་གྱི་དཔྱད་འདེམས་གང་ཡིན་ཀྱང་བོད་མི་རིགས་ཀྱི་ཤེས་རིག་སྒྱུ་རྩལ་ལ་ཁ་ཕྱོགས་ནས་ཡོད་པར་འདོད། ཁོང་གིས་སྒྱུ་རྩལ་བརྩམས་ཆོས་དེ་དག་དུས་རབས་ཅིག་ནང་དུ་བོད་མི་རིགས་ཀྱིས་སྒྱུ་རྩལ་འཚོ་བ་འདྲ་བའི་སྣང་བརྙན་དེ་སྒྱུ་རྩལ་གྱི་གར་སྟེགས་སུ་ཕུད་པ་དང་། ཀུན་གྱི་སྤྱན་ངོར་ཕུལ་བ་ནི་ཇི་འདྲའི་རླབས་ཆེན་ཞིག་རེད་ལ། ང་ཚོའི་འཚོ་བ་ནི་སྒྱུ་རྩལ་བཞིན་འཚོ་བའི་སྣང་བརྙན་དེ་ཡང་བསྐྱར་ང་ཚོའི་མིག་ལམ་བསྩལ་བ་དང་།བོད་མི་ཁྲི་སྟོང་མང་པོ་ལ་འདི་ལྟར་བསམ་གཞིགས་གཏོང་རྒྱུ་ཡོད་པའི་སྣང་བརྙན་བརྩམས་ཆོས་དེ་དག་ལ་སྙན་དབྱངས་རོལ་བ་ཙམ་མ་ཡིན་པར་ཚིག་འབྲུ་རེ་རེ་དང་སྣང་བརྙན་རེ་རེ་དབྱངས་རྟ་རེ་རེ་ལ། ཞིབ་འདང་ལེགས་པོ་ཞིག་གཏོང་རྒྱུ་དང་། རང་སྣང་གི་འཚོ་བ་ལ་ཞེན་འདྲེས་ལེགས་པོ་ཡོད་པ་དང་། རང་རེའི་མི་རིགས་ཀྱི་འཚོ་བའི་གོམས་གཤིས་དང་བློ་གྲོས། བྱམས་སྣང་སྙིང་རྗེ། དྲིན་བཟོ་དྲང་གཤིས། བརྩེ་སེམས་དུངས་མོས།གསལ་རིགས་སྣང་རྟོགས།འཚོ་འདྲེས་བག་ཆགས། བདེན་སྣང་རྟོག་འགྱུ་སོགས་བོད་མི་རིགས་ལ་ལྡན་པའི་ཐུན་མིན་ཁྱད་ཆོས་དེ་སྒྱུ་རྩལ་གྱི་ལམ་ནས་གསལ་བསྒྲོགས་བྱས་ཡོད་ལ། ང་རང་ལ་མཚོན་ནས་བཤད་ན། རྒན་སྨན་བླའི་དགོང་འཚོགས་དེ་ལ་བལྟས་རྗེས། རང་རེའི་མི་རིགས་ཀྱི་འཚོ་བ་ནི་དེ་འདྲའི་བབ་ཆགས་ཡིན་ཀྱང་། སྒྱུ་རྩལ་པས་མིག་སྣང་ན། ཇི་འདྲའི་དུངས་ཞེན་ཆགས་དགོས་པའི་མི་རིགས་ཤིག་དང་ཆེས་རླབས་ཆེན་གྱི་མི་རིགས་ཡིན་པ། འཛམ་གླིང་སྔོན་ཐོན་གྱི་གྲས་ལ་རེ་བ་འདུག་པའི་མི་རིགས་ཤིག མཐོ་སྒང་གི་ས་གཤིས་དང་ཁོར་ཡུག་ལ་འདང་ཞེན་དུངས་པ་ལྷག་ཏུ་ཆེ་བའི་མི་རིགས་ཤིག ཡར་ཐོན་དང་བློ་བསྐྱེད་མཐོ་བའི་མི་རིགས་ཤིག་ཡིན་པ་ད་གཟོད་ཤེས་ཐུབ་པ་བྱུང་སོང་། དུས་ཚོད་ཐུང་ངུ་ནང་དུ་ཤར་མར་བྲིས་པའི་ནོར་འཛོལ་ཡོད་ན་དགོངས་དག་ཞུ་ངེས་ཡིན།
