མེ་ལོང་ལོ་དེབ་དང་འབྲེལ་བོད་ཀྱི་རི་མོ་བྱུང་འཕེལ་སྐོར་གྱི་བསམ་གཞིགས།

　　　　　　　　　　　　　གཅིག
　　སྤྱིར་བོད་ལ་རིག་གནས་ཆེ་ཆུང་བཅུ་ཡོད་པའི་ནང་ཚན་རིག་གནས་ཆེ་བ་ལྔའི་ཡ་གྱལ་བཟོ་རིག་པའི་ཁོངས་གཏོགས་རི་མོ་སྒྱུ་རྩལ་གྱི་རིག་པ་འདི་ཡང་འཛམ་གླིང་ལ་ངོམས་རིན་ཡོད་པའི་སྒྱུ་རྩལ་བརྩམས་ཆོས་ཤིག་ཏུ་ངོས་འཛིན་བྱས་ཆོག་ལ།སྒྱུ་རྩལ་གྱི་རིག་པ་འདི་ནི་རང་རེའི་མེས་པོ་གོང་མ་དག་གིས་གསར་གཏོད་མཛད་པར་མ་ཟད་སྤྱི་ཚོགས་སྟེང་དར་རྒྱས་ཆེན་པོ་ཕྱིན་ཡོད་ནའང་།དུས་རབས་ཀྱི་འཁོར་བསྐྱོད་ཁྲོད་རིག་གནས་སྤྱི་ལ་ཉམས་རྒུད་དང་གོད་ཆགས་ཆེན་པོ་བཟོས་པས་ད་ལྟ་བོད་ཀྱི་རིའི་མོའི་སྒྱུ་རྩལ་གྱི་ཁྲོད་དུའང་ལྷ་རིས་སྒྱུ་རྩལ་གྱི་ཟུར་ཞིག་ལས་རིའི་མོ་སྒྱུ་རྩལ་གྱི་ངོས་ཡོངས་ཧྲལ་ཧྲུལ་ལྟ་བུར་གྱུར་འདུག་ལ།ལྷག་པར་དུ་རི་མོའི་སྒྱུ་རྩལ་འདིས་མི་རབས་ང་ཚོར་གྱེས་ཕྱག་འབུལ་རྒྱུའི་ཉེན་ཁ་ཆེ་བར་ཟད།འཇིག་རྟེན་གྱི་ཁམས་ལའང་བདེ་མོ་འཇོག་སྲིད་པའི་སྣང་བ་ཞིག་ངང་གིས་སྐྱེས་བྱུང་བས་འདིར་ཆེད་དུ་རི་མོའི་བྱུང་འཕེལ་སྐོར་ལ་བསམ་གཞིག་ཅིག་བྱ་འདོད་པ་ཡིན།
　　　　　　　　　　　　　གཉིས།
　　བོད་ཀྱི་ལོ་རྒྱུས་ཁག་ཅིག་དང་རྒྱལ་རབས་དེབ་ཐེར་ཁག་ཅིག་གིས་ང་ཚོར་བདེན་པ་ར་སྤྲོད་གནང་ཡོད་པ་འདིར་གཞིགས་ན།རི་མོའི་སྒྱུ་རྩལ་འདི་བོད་དུ་དར་ནས་དུས་ཡུན་ངེས་ཅན་ཞིག་སོང་ཡོད་པ་མིག་མཐོང་ལག་ཟིན་རེད།རྒྱུ་མཚན་ནི།བོད་ཀྱི་ཕོ་བྲང་ཐོག་མ་ཡུམ་བུ་བླ་མཁར་གྱི་ལྡེབས་རིས་སུ་བོད་རྒྱལ་ཐོག་མ་གཉའ་ཁྲི་བཙན་པོ་བོད་དུ་ཕེབས་སྐབས་ཀྱི་གནས་ཚུལ་རི་མོར་བྲིས་ཡོད་པ་དང་།ལོ་ངོ་ཉིས་སྟོང་ལྷག་གི་ཡར་སྔོན་དུ་བཞེངས་བསྐྲུན་བྱས་པའི་གནའ་བོའི་རྡོ་གཡམ་རི་མོ་སོགས་མཐོང་རྒྱུ་ཡོད་པ། 1995ལོར་མཚོ་སྔོན་འབའ་རྫོང་ས་ཁུལ་ཞིག་ཏུ་གནའ་རྫས་རིག་དངོས་མང་བོ་ཞིག་རྙེད་སོན་བྱུང་བ་ཀྲུང་གོའི་གནའ་རྫས་རྟག་དཔྱད་མཁས་པ་དག་གིས་དེ་ནི་བོད་ཀྱི་ཡིག་ཚང་ལས་བྱུང་བའི་སྲིན་མོའི་དུས་རབས་ཀྱི་སྒྱུ་རྩལ་རིག་དངོས་ཤིག་ཡིན་པར་ངོས་འཛིན་དང་བཅས་འཛམ་གླིང་ལ་ཁྱབ་བསྒྲགས་བྱས་པ་དང་།གནའ་རྫས་འཚོལ་ཞིབ་པ་དག་གིས་རྟག་དཔྱད་ཞིབ་འཇུག་བྱས་པ་ལྟར་ན།བོད་ཡུལ་སྟོད་སྨད་བར་གསུམ་དུ་གནའ་ཤུལ་དང་གནའ་རྫས་མང་དུ་རྙེད་པའི་ཁྲོད་རྫ་ཁོག་དང་སླ་ང་། ཕོར་བ། སོར་གདུབ། རྣ་ལོང་། ཕྲེང་རིལ། མགུལ་རྒྱན། འགྲོན་བུ། ཁྲབ་རྨོག་སོགས་ཡོད་ལ།དེ་དག་གི་སྟེང་དུ་ཡོད་པའི་རི་མོ་ནི་ཧ་ཅང་ཕུན་སུམ་ཚོགས་ཏེ།བརྐོས་རིས་དང་ཐག་རིས།ལེབ་ཤད་རི་མོ།འཚེར་ཅན་རི་མོ།སྨྱུག་གཟེབ་རི་མོ་སོགས་ཧ་ཅང་མང་ཞིང་།བྲག་ངོས་ཀྱི་རི་མོ་ལའང་ཤྭ་བའི་གཟུགས་དང་།རྒྱ་སྟག་གི་གཟུགས།ཁྱུང་ཆེན་གྱི་གཟུགས།གྱད་མི་སྟོབས་ཆེན་གྱི་གཟུགས་རིས་སོགས་ཡོད་ལུགས་ལ་དཔྱད་ཏེ །ཡ་ཐོག་གི་མི་རྒྱུད་ཚོས་སྐྱེས་བུ་དང་དེ་འབྲེལ་གྱི་དངོས་པོ་རྣམས་ལ་རང་བཞིན་གྱི་ནུས་ཤུགས་ཇི་ལྟར་ཡོད་པའི་བརྡ་མཚོན་དུ་རི་མོ་དེའི་རིགས་བཀོད་པ་ཞིག་ཡིན་སྲིད་ཞེས་བཤད་པ་འདི་ལ་དཔག་ན།ཁ་བ་ཅན་གྱི་ཡུལ་གྲུ་འདིར་མེས་པོ་གོང་མ་དག་གི་འབད་པའི་ཕྱག་ཟུང་ལ་བརྟེན་ནས་རི་མོའི་སྒྱུ་རྩལ་འདི་གསར་བཏོད་བྱས་ཏེ་སྤྱི་ཚོགས་སྟེང་ཁྱབ་བརྡལ་བཏང་བའི་ལོ་རྒྱུས་དང་མཛད་རྣམ་སོགས་མངོན་སུམ་དུ་རྟོགས་ཐུབ་པར་མ་ཟད་བོད་དུ་རི་མོ་བྲིས་འབུར་ཅི་རིགས་དར་བའི་ལོ་རྒྱུས་ཧ་ཅང་རྒྱུན་རིང་བོ་ཞིག་ཡོད་པའང་རྗེས་དཔག་ཚད་མས་གསལ་བོར་རྟོགས་ཐུབ་པའོ ། །
　　　　　　　　　　　　　གསུམ།
　　འཛམ་གླིང་སུམ་གཉིས་ས་ཡི་དཀྱིལ་འཁོར་ལ་དབང་བསྒྱུར་མྱོང་བར་བཤད་པའི་བོད་རྒྱལ་བཙན་པོ་སྲུང་བཙན་སྒམ་པོས་ཐུ་བྷོད་བཙན་པོའི་སྲིད་དབང་བཙུགས་ཏེ་བོད་ཁམས་གཅིག་གྱུར་བྱས་པ་ནས་རིམ་བཞིན་བོད་ཡུལ་སྟོད་སྨད་བར་གསུམ་གྱི་སྟོབས་ཤུགས་གཅིག་སྒྲིལ་བྱུང་བས།བོད་ཀྱི་མཛེས་རིས་སྒྱུ་རྩལ་འདི་ལའང་དམིགས་ཡུལ་ཡོད་པ་དང་གཅིག་བསྡུས་ཀྱི་སྟོབས་ཤུགས་ཡོད་པ་ཞིག་ཏུ་ཆགས་ཡོད་པར་འདོད།དེ་ནི་སྐབས་དེའི་སྐྱུ་ར་ལྷ་ཆེན་གྱིས་བོད་སྔར་ཡོད་ཀྱི་རི་མོ་དང་བལ་བོའི་བཟོ་རྒྱུན་གཉིས་གཞི་གཅིག་ཏུ་འབྲེལ་ནས་བྲིས་རྒྱུན་གསར་བ་སྤེལ་བ་ལ་ཕྱིས་སུ་སྔ་འགྱུར་སྐྱུ་ར་ལྷ་ཆེན་གྱི་ལུགས་ཞེས་འབོད་པ་བྱུང་བ་དང་།ཤིང་རིས་བརྐོས་དཀྲོལ་སྒྱུ་རྩལ་སོགས་རེ་རེ་ནས་ཆ་ཚང་ཞིང་འཐུས་སྒོ་ཚང་བ་ཞིག་དར་ཡོད་པ་ནི།མངའ་བདག་ཁྲི་རལ་བ་ཅན་གྱི་ཡན་ཆད་དུ་ལྷ་ཁང་སྟོང་རྩ་བརྒྱད་བཞེངས་པར་གྲགས་པ་དང་།ཆོས་རྒྱལ་སྲོང་བཙན་སྒམ་པོའི་སྐུ་དུས་སུ་དགའ་བཞི་ལྷུན་གྱིས་གྲུབ་པའི་གཙུག་ལག་ཁང་གི་བཞེངས་སྟངས་སྟེ།སྒོ་བཞི་དཀྱིལ་འཁོར་གྱི་དབྱིབས་སུ་བྱས་པས་ཆོས་པ་རྣམས་དགའ་བ།རྩིགས་པ་གཡང་དྲུང་གི་རིས་སུ་བྱས་པས་བོན་པོ་རྣམས་དགའ་བ།ཀྭ་བ་ཕུར་བུའི་དབྱིབས་སུ་བྱས་པས་སྔགས་པ་རྣམས་དགའ་བ།འཆའ་དང་དྲ་མ་ལ་སོགས་པ་མིག་མང་གི་རིས་སུ་བྱས་པས་འབངས་རྣམས་དགའ་བ་ཞེས་པའི་བཞེངས་སྟངས་འདི་ལས་ཤུགས་ཀྱིས་རྟོགས་ཐུབ་པ་དང་།བོད་ཀྱི་ལོ་རྒྱུས་དེབ་ཐེར་ཁག་ཏུ་ར་ས་འཕྲུལ་སྣང་གི་རྟེན་གྱི་གཙོ་བོ་ཐུགས་རྗེ་ཆེན་པོ་རང་བྱུང་ལྔ་ལྡན་དང་སྤྱན་རས་གཟིགས།སྒྲོལ་མ།རྟ་མགྲིན་བཅས་ཀྱི་སྐུ་རང་བྱོན་དུ་བྱུང་བ་རྣམས་ཀྱང་བལ་བོའི་ལྷ་བཟོས་འབུར་དུ་བརྐོས་པ་སོགས་ཕྱི་ནས་དར་བའི་ལྷ་རིས་སྒྱུ་རྩལ་ལ་མཐོང་ཆེན་བྱས་ཡོད་པ་སོགས་ཀྱིས་ང་ཚོ་བོད་ཁ་བ་ཅན་གྱི་ཡུལ་གྲུ་འདིར་གནའ་སྔ་མོ་ནས་ལྷ་རིས་སྒྱུ་རྩལ་ལའང་བྲིས་འབུར་ཅི་རིགས་ཀྱི་ཁྱད་ཆས་ཕུན་སུམ་ཚོགས་པ་དར་རྒྱས་ཆེན་པོ་ཕྱིན་ཡོད་པར་མ་ཟད།ཕྱི་ནང་ཟུང་འབྲེལ་གྱི་ལག་རྩལ་གསར་བ་སོགས་མངོན་གསལ་ཏོད་པོ་ཡོད་པའང་གསལ་བཤད་གནང་འདུག
　　　　　　　　　　　　　བཞི།
　　མི་ལོ་དུ་མའི་ཡར་སྔོན་ནས་ཁ་བ་ཅན་གྱི་ཡུལ་གྲུ་འདི་ནི་རི་མོ་བྲིས་འབུར་ཅི་རིགས་ཀྱི་རྣམ་པ་ཆེས་ཆེར་དར་བའི་སྒྱུ་རྩལ་གྱི་ཞིང་ཁམས་ཤིག་ཏུ་ངོས་བཟུང་ཆོག་པ་དང་།མི་རིགས་གཞན་དང་གཞན་ལ་ངོམས་ཆོག་ཆོག་གི་སྒྱུ་རྩལ་སྔོན་ཐོན་གྱི་ཁྱིམ་གཞིས་ཆེན་པོ་ཞིག་ཡིན་ནའང་། ལོ་ཟླའི་འཁོར་བསྐྱོད་དང་དུས་རབས་འཕོ་འགྱུར་ཁྲོད།  བོད་ཀྱི་རིག་གནས་སྤྱི་ལ་གོད་ཆགས་ཆེན་པོ་ཐེབས་པ་དང་ལྷན་དུ་བཟོ་རིག་པའི་ཁོངས་གཏོགས་རི་མོའི་སྒྱུ་རྩལ་གྱི་ཚེ་སྲོག་ལའང་འཇབ་རྒོད་དང་།གཏོར་བཤིག་གང་མང་ཐེབས་པའི་རྐྱེན་གྱིས་སྒྱུ་རྩལ་གྱི་རྣམ་པ་འདི་གོང་འཕེལ་དུ་འགྲོ་བ་ལ་འགལ་རྐྱེན་བཟོས་ཤིང་ཉམས་རྒུད་ཆེན་པོ་ཐེབས་པ་རེད།དེ་བས་ད་ལྟ་ང་ཚོ་བོད་ཀྱི་རི་མོའི་སྒྱུ་རྩལ་སྤྱིའི་ཁྲོད་ནས་ལྷ་རིས་སྒྱུ་རྩལ་ཁོ་ན་ལས་ཟུར་ཟ་རི་མོ་དང་།འཁྱུག་བྲིས་རི་མོ།ལྡེབས་རིས་རི་མོ་ལ་སོགས་པའི་སྒྱུ་རྩལ་གྱི་རྣམ་པ་མང་བོ་ཞིག་འཇིག་རྟེན་འདིར་གསོན་ཐུབ་གྱིན་མེད་པ་དང་།མི་ཡུལ་དང་གཏན་དུ་བྲལ་ལ་ཉེ་བ་ལྟ་བུའི་ཚོར་སྣང་ཞིག་བདག་ལ་ངང་ངམ་ཤུགས་ཀྱིས་སྐྱེས་སུ་བཅུག་པ་དང་།ང་ཚོའི་ལག་ཏུ་འཆི་ལ་ཉེ་བའི་རིག་གནས་འདིར་སྲུང་སྐྱོབ་གནང་རྒྱུ་ནི་ང་ཚོ་ཐུན་མོང་གི་འོས་འགན་ཞིག་ཏུ་ཆགས་ཡོད་པར་འདོད་པའི་བསམ་བློ་ཞིག་འགོག་མེད་དུ་སྐྱེས་སོང་།
　　　　　　　　　　　　　ལྔ།
　　བོད་ཀྱི་ལྷ་རིས་སྒྱུ་རྩལ་དེའང་ཡར་རྒྱས་ཆེན་པོ་ཕྱིན་ཡོད་པ་ལྟ་བུར་སྣང་ཡང་།ཞིབ་ཏུ་བསམ་ན་དེ་ཡང་ཧ་ཅང་ཉེན་ཁ་ཆེ་བའི་ཚོད་དུ་སླེབས་འདུག་སྟེ།མེས་པོ་གོང་མའི་ཕྱག་སྲོལ་ལྟར་ཁྱད་ཆོས་མངོན་པར་གསལ་བའི་བྱེའུ་སྒང་ལུགས་དང་།སྨན་ཐང་ལུགས།མཁྱེན་རྩེ་ལུགས།སྒར་བྲིས་ལུགས་སོགས་རང་ལུགས་སོ་སོར་མ་འདྲེས་པར་ཅི་བཞིན་ངེས་ཟིན་མཁན་དང་དེ་ལྟར་འབྲི་མཁན་ཧ་ཅང་དཀོན་པོ་རེད།དཔེར་ན།བོད་དུ་ཐང་ག་སྣ་ཚོགས་འབྲི་བཞེངས་བྱེད་མཁན་ཅུང་མིང་གྲགས་ཡོད་མཁན་ཚོའི་སར་ཕྱིན་ཏེ་འདི་ནི་ལུགས་གང་གི་འབྲི་སྲོལ་ཡིན་ཞེས་སོགས་སྐད་ཆ་དྲིས་ཚེ།དེ་ནི་བདག་གི་དགེ་རྒན་གྱི་ཕྱག་སྲོལ་ཡིན་ལྟ་བུ་བཤད་རྒྱུ་ལས་ལུགས་གང་ཡིན་དང་དེ་དག་རེ་རེ་བཞིན་ངོ་སྤྲོད་ཞིབ་རྒྱས་གནང་ཐུབ་མཁན་ཡང་ཧ་ཅང་ཉུང་ཉུང་རེད།དེ་བས་ང་ཚོའི་ཐང་ཀ་འབྲི་སྟངས་དང་།ཚོན་བསྡེབས་སྟངས།འབག་སྐུ་བཟོ་སྟངས་སོགས་གང་ལ་བལྟས་ན་མང་ཆེ་བ་སྤྱི་འགྲོས་ཤིག་གི་འབྲི་ཟོལ་ལྟར་ཇི་མ་ཇི་བཞིན་འབྲི་བ་དང་།དཔར་ལོག་རྒྱག་པ་སོགས་བྱེད་པ་ལས་སྒྱུ་རྩལ་གྱི་ཐབས་ལམ་གསར་བ་ཞིག་བསྙེགས་ཡོད་མཁན་ནི་ཧ་ཅང་དཀོན་པོ་སྣང་བ་འདི་ནི་ཐང་ག་བཞེངས་བསྐྲུན་གྱི་སྒྱ་རྩལ་འདིའང་ཉེན་ཁའི་ཕྱོགས་སུ་སོང་ཡོད་པ་ཞིག་ཏུ་ངོས་འཛིན་བྱས་ཆོག    དེས་ཕྱིར་ལྷ་རིས་སྒྱུ་རྩལ་གྱི་རྣམ་པ་འདི་ནི་དུས་རབས་དང་མཐུན་པའི་སྒོ་ནས་ཡར་རྒྱས་གོང་འཕེལ་ཏུ་བཏང་དུ་ཆོག་པ་ནི་སྔོན་བྱོན་མཁས་དབང་དག་གིས་ང་ཚོར་བསྡོམས་ཚིག་བཀོད་མྱོང་སྟེ།སྒྱུ་རྩལ་ལོ་རྒྱུས་ལ་མགོ་མེད་ཏེ་མིའི་ཤེས་རིག་བྱུང་བའི་ལོ་རྒྱུས་དང་མཉམ་པས་སོ། །སྒྱུ་རྩལ་གྱི་རྣམ་པ་ལའང་ཚད་བཟུང་མི་བྱ་སྟེ།སྤྱི་ཚོགས་དང་དུས་རབས་རེ་རེ་ལ་སྐབས་དེའི་རྣམ་པའི་སྒྱུ་རྩལ་འབྱུང་ངེས་སོ། །ཞེས་གསུངས་པ་ལྟར་དུས་རབས་དང་མཐུན་པའི་སྒྱུ་རྩལ་གྱི་རྣམ་པ་ཞིག་མངོན་ཆོག་པར་འདོད།དེ་ལྟ་ན་བོད་ཀྱི་ལྷ་རིས་སྒྱུ་རྩལ་གྱི་རྣམ་པ་གོང་དུ་འཕེལ་ཡོད་མེད་ཀྱི་གནས་སྟངས་ཀྱང་དེ་ལྟ་བུ་ཞིག་ལས་མ་འདས་པས་ང་ཚོས་ཅིས་ཀྱང་བསམ་གཞིགས་གནང་དགོས་པའི་སྣང་བ་ཞིག་ཤར་འོང་།དེ་བས་བོད་ཀྱི་རི་མོ་བ་དང་རི་མོའི་སྒྱུ་རྩལ་འདི་ད་ལྟ་ནས་སྲུང་སྐྱོབ་མ་བྱས་ན་བོད་ཀྱི་རི་མོ་བ་དང་རི་མོའི་སྒྱུ་རྩལ་གྱི་མདུན་ལམ་ལ་རེ་བ་མེད་ལ།ལྷག་པར་དུ་རི་མོའི་སྒྱུ་རྩལ་འདིས་བོད་མི་རིགས་ལ་འདོན་འོས་པའི་སྒྱུ་རྩལ་གྱི་འོས་འགན་འདོན་ཐུབ་རྒྱུ་མ་རེད་བསམ།བོད་ཀྱི་རི་མོ་བ་ཞིག་དང་རི་མོ་ལ་དགའ་མོས་ཡོད་མཁན་ཞིག་ཡིན་ན་ངེས་པར་དུ་བོད་ཀྱི་རི་མོའི་སྒྱུ་རྩལ་གྱི་རིག་གནས་འདི་རྗེས་སུ་ལུས་པའི་གནས་བབས་དེ་ངེས་པར་དུ་ཁས་ལེན་དགོས་ལ།གནས་བབས་འདི་བསྒྱུར་བའི་ཆེད་དུ་ང་ཚོས་ད་ལྟ་ནས་དཔུང་བ་མཉམ་གཤིབས་དང་ཡིད་སེམས་གཅིག་མཐུན་གྱིས་བརྩོན་པ་གནང་རྒྱུ་ནི་གལ་ཆེན་ལས་ཀྱང་དོན་ཆེན་ཞིག་རེད་ལ།འདི་ནི་བོད་ཀྱི་རིག་གནས་ལ་དགའ་མོས་ཡོད་པ་དང་ལྷག་པར་དུ།རི་མོའི་སྒྱུ་རྩལ་ལ་དུངས་པ་ཟབ་པའི་རི་མོ་བ་དག་གི་འོས་འགན་ཉག་གཅིག་ཏུ་ཁས་ལེན་དགོས་སོ  ། །
　　　　　　　　　　　　　དྲུག
　　རྒྱུ་མཚན་དེས་དབང་གིས།ཉིས་སྟོང་བཞི་ལོ་ནས་བཟུང་མདོ་སྨད་ཀླུ་ཚང་དགོན་ཆེནདུ་གྲྭ་རྐྱང་འགས་གཙོ་སྒྲུབ་བྱས་ཏེ་ཞབས་རྗེས་ཞེས་པའི་རི་མོའི་དེབ་ཅིག་གཙོ་སྒྲིག་བྱས་པ་ཡིན་ལ།དེབ་དེནི་ཐོག་མར་སྙན་ངག་དང་རི་མོ་གཉིས་ཚོགས་ཀྱིས་དེབ་ཅིག་ཡིན།རིམ་བཞིན་བོད་ཀྱི་བསམ་བློ་བ་དང་ཤེས་ལྡན་པ་རྒན་རྒྱ་གྲོལ་སོགས་ཀྱི་མཛུབ་སྟོན་འོག་ཉིས་སྟོང་ལྔ་ལོ་ནས་བཟུང་དེབ་དེའི་ཁ་བྱང་ལ་མེ་ལོང་ཞེས་གསར་དུ་བཏགས་ཤིང་རི་མོ་རྐྱང་བའི་དེབ་ཅིག་ཏུ་བསྒྱུར་ནས་ལོ་རེ་བཞིན་དཔར་འགྲེམ་བྱས།ཡིན་ནའང་བརྩམ་ཆོས་ཀྱི་ཡོངས་ཁུངས་ཞན་པ་དང་སྒྲིག་སྦྱོར་གྱི་ལས་ཚགས་ལྕི་བ།པར་བསྐྲུན་གྱི་འགྲོ་སོང་དཀའ་བ་སོགས་རང་ཉིད་དང་འཚམས་པའི་ལས་དོན་ཞིག་གཏན་ནས་མིན་ལ།ལྷག་པར་དུ་རང་ཉིད་ཀྱིས་ཐང་ག་དང་རི་མོ་སྣ་ཚོགས་སྦྱངས་མྱོང་མེད་པའི་ཁར་རྩོམ་སྒྲིག་ཉམས་མྱོང་དང་རིག་གནས་ཆུ་ཚོད་སོགས་ཧ་ཅང་ཞན་སྟབས་དེབ་འདི་འདྲ་ཞིག་གི་རྩོམ་སྒྲིག་པ་བྱ་རྒྱུའི་ཆ་རྐྱེན་ཡོངས་སུ་བྲལ་བས་དཀའ་ཁག་གང་མང་ལ་འཕྲད་རྐྱེན།ང་རང་རྩོམ་སྒྲིག་པའི་ལས་སྟེགས་ལས་ཕྱིར་འབུད་བྱ་རྒྱུའི་དགོངས་ཞུ་བྱས་ཀྱང་ལས་གྲོགས་དག་འཐད་པ་མ་བྱུང་།ཡིན་ནའང་ང་ཚོས་མཉམ་དུ་ཀྱག་ཀྱོག་དང་དཀའ་སྡུག་གི་ལམ་བུ་གང་མང་ཞིག་བརྒྱུད་མཐར།ངའི་ལས་གྲོགས་དག་གོང་བརྗོད་ཆ་རྐྱེན་དེ་དག་གིས་དབང་གིས་རེ་རེ་བཞིན་རྩོམ་སྒྲིག་པའི་ལས་སྟེགས་ལས་ཕྱིར་འབུད་བྱས་པས་ང་དང་མེ་ལོང་ལོ་དེབ་གྱི་ལས་དབང་ལ་སླར་ཡང་གོད་ཆགས་དང་བརྡབས་རྐྱེན་མང་དུ་ཐེབས།དཀའ་ཁག་གང་མང་ལ་གདོང་གཏུགས་པའི་སྐབས་དེར་ངས་དྲན་འོངས་པ་ནི་དེང་རབས་བོད་ཀྱི་བསམ་བློ་བ་དང་སྙན་ངག་པ་ཆེན་མོ་རྒན་རྒྱ་གྲོལ་ལགས་ཀྱིས་མེ་ལོང་ལོ་དེབ་ལ་གནང་བའི་སེམས་ཀྱི་སྐད་ཆ་ཞིག་རེད།དེ་ནི་ཁོང་གིས་མེ་ལོང་ཞེས་པའི་རི་མོའི་དུས་དེབ་ཅིག་བཏོན་པ་འདི་ནི་གྲྭ་རྐྱང་འགས་བོད་ཀྱི་ལོ་རྒྱུས་ཀྱི་སྟོང་ཆ་ཞིག་བསྐངས་པ་ཡིན་ལ།འདི་ནི་བོད་ཀྱི་རི་མོའི་ལོ་རྒྱུས་སུ་སྔར་མེད་ཀྱི་ཟིན་ཐོ་གསར་བ་ཞིག་བསྐྲུན་པ་ཡིན།བོད་ཀྱི་རི་མོ་སྒྱུ་རྩལ་གྱི་ཐབས་ལམ་གསར་བ་ཞིག་བསྙེགས་པའི་གོམ་པ་དང་བོ་སྤོས་པ་རེད།འདི་ནི་བོད་ཀྱི་འཚོ་བ་མཚོན་པའི་མེ་ལོང་ཞིག་ཏུ་འགྱུར་ངེས་པའི་ཁར་བོད་ཀྱི་རི་མོ་འདི་ཡང་སྒྱུ་རྩལ་གྱི་མེ་ལོང་ཞིག་ཏུ་འགྱུར་བའི་སྐུལ་འདེབས་གནང་ཐུབ་པ་རེད།ཅེས་གསུངས་པའི་སྐད་ཆ་དེ་རེད། དེ་བས་བདག་གིས་ལོ་རེ་བཞིན་པར་བསྐྲུན་བྱ་མི་ཐུབ་ནའང་།ཐེངས་གཅིག་དཔར་བསྐྲུན་བྱ་ཐུབ་ན་ཡང་ལོ་རྒྱུས་ཀྱི་སྟོང་ཆ་བསྐང་བ་ཡིན་པར་བསམ་ནས་སྤོབས་པ་དང་སེམས་ཤུགས་ཆེ་རུ་བསྐྱེད་ཏེ་དཔར་བསྐྲུན་བྱ་རྒྱུའི་སེམས་ཐག་བཅད་ནས་གངས་ལྗོངས་ཚན་རྩལ་རིག་གནས་འཕེལ་རྒྱས་གླིང་དུ་དཔེ་དེབ་སྒྲིག་སྦྱོར་གྱི་ལས་ཀར་ཞུགས།གནའ་མི་བོད་ཀྱི་གཏམ་དཔེ་ལ།ལས་ཞིག་ཡོད་ན་ལམ་ཞིག་ཡོད་ཞེས་པའི་དཔེ་ལྟར།ས་གནས་དེའི་དཔེ་སྐྲུན་ཁང་གི་དཔེ་དེབ་སྒྲིག་སྦྱོར་བ་རོང་ཚང་ཀླུ་རྒྱལ་གྱིས་འདི་ལྟར་བོད་རང་གི་རིག་གནས་རྒྱུན་འཛིན་དར་སྤེལ་གཏོང་བ་ནི་ཁྱེད་ཀྱི་ཆེད་དུ་མ་ཡིན་པར།ང་ཚོ་ཐུན་མོང་གི་དོན་དུ་ཡིན།དེའི་ཕྱིར་བོད་རང་གི་རིག་གནས་སྲུང་སྐྱོབ་དང་ཡར་རྒྱས་གཏོང་ཅི་ཐུབ་བྱ་རྒྱུ་ནི་ང་ཚོ་ཚང་མའི་སེམས་འདུན་གཅིག་ཡིན་པ་དང་དམིགས་ཡུལ་ཡང་གཅིག་ཡིན་སྟབས།སྐྱིད་ཀྱི་རྟ་བོ་མཉམ་ཞོན་དང་སྡུག་གི་ཁུར་བོ་མཉམ་ཁུར་ཞེས་པའི་དཔེ་ལྟར་དུ།མེ་ལོང་ལོ་དེབ་གྱི་རྩོམ་སྒྲིག་པའི་ལས་འགན་འདི་འུ་གཉིས་ཐུན་མོང་གིས་དེང་ལེན་བྱས་ཆོག་ཞེས་ཁས་བླངས་པས་བདག་ལ་སྔར་མེད་ཀྱི་སེམས་ཤུགས་གསར་བ་ཞིག་དང་ལྷད་མེད་ཀྱི་སྤོབས་པའི་ངར་ཤུགས་ཞིག་ཡང་བསྐྱར་བསྩལ་བྱུང་།དེ་ནས་བཟུང་རོང་ཚང་ཀླུ་རྒྱལ་དང་མཉམ་དུ་མེ་ལོང་ལོ་དེབ་དེ་ཉིད་ཡང་བསྐྱར་རྩོམ་སྒྲིག་བྱས་ཏེ་ལོ་རེ་བཞིན་དཔར་འགྲེམ་བྱས་པ་ཡིན།
　　　　　　　　　　　　　བདུན།
　　མེ་ལོང་དེབ་འདིའི་འོས་འགན་གཙོ་བོ་ནི་བོད་ཀྱི་རི་མོའི་སྒྱུ་རྩལ་གྱི་རྣམ་པ་དར་སྤེལ་གཏོང་བའི་རྒྱུན་རིང་གི་བསམ་བློ་དང་།འདུ་ཤེས་འཛིན་སྟངས་སྙིང་བོར་བཟུང་ནས་བོད་ཀྱི་རི་མོ་སྐུལ་འདེབས་དང་རི་མོ་བ་གསོ་སྐྱོང་དམིགས་སུ་འཛིན་རྒྱུ་དེ་ཡིན་པ་ལས་རི་མོ་འགྲེམ་སྟོན་གནད་དུ་འཛིན་རྒྱུའི་འདུན་པ་མེད་ལ།དཔེ་དེབ་འདི་འདྲ་ཞིག་རྩོམ་སྒྲིག་བྱས་པའི་གོ་རིམ་ཁྲོད་ཚོང་ལས་དང་ཁེ་སྤོགས་གཉེར་བའི་ཧམ་སེམས་དེ་བས་ཀྱང་མེད།དུས་རབས་འདིའི་མི་རབས་ང་ཚོའི་ལག་ཏུ་འཆི་ལ་ཉེ་བའི་རི་མོའི་སྒྱུ་རྩལ་གྱི་ལས་དབང་ལ་བསམ་གཞིགས་གནང་མཁན་ཞིག་དང་།བོད་ཀྱི་རིག་གནས་སྤྱིའི་བདེ་སྡུག་ལ་སེམས་ཁྲལ་གནང་མཁན་ཞིག་ཡིན་ན།ང་ཚོས་སྒྲུབ་གྱིན་པའི་ལས་ཀ་འདིར་མཛུབ་སྟོན་གང་ལེགས་རེ་གནང་རྒྱུའི་རེ་བ་དང་ཡིད་ཆེས་དུས་ནམ་ཡང་ཀློག་པ་བོ་དང་གཟིགས་མོ་པ་ལྷན་རྒྱས་ཚོར་བསྲིངས་ནས་ཡོད།
ཞེས་མེ་ལོང་ལོ་དེབ་གྱི་རྩོམ་སྒྲིག་པ་བན་ཤུལ་འཇམ་དབྱངས་ཀྱིས་གུས་འདུད་དང་བཅས་ཕུལ་བ་དགེའོ ། །