བོད་མིའི་འཚོ་བའི་དཔེ་རིས་མཚོན་བྱེད་ཀྱི་ཤིང་དཔར།
གླང་བོ་དོན་འགྲུབ།
ཤིང་དཔར་ནི་བོད་ཀྱི་སྲོལ་རྒྱུན་གྱི་ནང་པའི་བསྟན་བཅོས་ཀྱི་དཔར་དང་མི་མཚུངས་ལ་དེང་སྐབས་གསར་དར་གྱི་བརྐོས་རིས་ལ་ཡང་མི་འདྲ་བར་དེང་རབས་ཀྱི་རི་མོ་བ་རྣམས་ཀྱིས་བོད་ཀྱི་སྲོལ་རྒྱུན་རིག་གནས་གཞིར་བྱས་ཏེ་གསར་དུ་སྤེལ་བའི་བརྐོས་རིས་ཤིག་ཡིན།
ཤིང་དཔར་གྱི་སྒྱུ་རྩལ་གྱི་ཁྱད་ཆོས་ནི་ཐིག་རིས་རྨང་གཞི་བྱས་པའི་སྟེང་སྲོལ་རྒྱུན་གྱི་ཐང་གའི་ཚོན་མདོག་གཙོར་བྱས་ནས་བོད་ཀྱི་སྒྱུ་རྩལ་ཁྲོད་ཀྱི་དཔེ་རིས་དང་མཛེས་དཔྱོད་ཀྱི་ཐོན་ཁུངས་གྱ་ནོམ་པ་ནང་འདྲེན་བྱས་པར་བརྒྱུད་མི་རིགས་རང་བཞིན་དང་། ས་གནས་རང་བཞིན། དུས་རབས་རང་བཞིན། དེ་མིན་སྒྱུ་རྩལ་པ་རྣམས་ཀྱི་གསར་རྩོམ་གྱི་ཁྱད་ཆོས་བཅས་མངོན་པར་མཚོན་པ་ཡིན། དེར་མ་ཟད་སྲོལ་རྒྱུན་བརྐོས་རིས་ཀྱི་མཛེས་དཔྱོད་ཀྱི་རྣམ་པ་ལས་ལྷག་པའི་རང་རྐྱ་འཕེར་བ་དང་། ཁྱད་ཆོས་གཟེངས་སུ་ཐོན་པ། གསར་སྐྲུན་གྱི་སྟོབས་དང་ལྡན་པའི་སྒྱུ་རྩལ་གྱི་ཐབས་ལམ་གྱིས་བོད་ཀྱི་སྲོལ་རྒྱུན་གྱི་བརྐོས་རིས་ལ་ཁྱད་དུ་འཕགས་པའི་འཕེལ་རྒྱས་བྱུང་བས། ཀྲུང་གོའི་བརྐོས་རིས་སྣ་མང་ཅན་དུ་འགྱུར་བར་དངོས་གནས་ཀྱི་སྙིང་བོ་མངའ་ཞིང་འཕེལ་རྒྱས་ཀྱི་མདུན་ལྗོངས་ཡངས་པོ་ལྡན།
ཤིང་དཔར་འབྲི་བཞེངས་བྱེད་པའི་རྒྱུ་ཆ་གཙོ་བོ་ནི་རང་བྱུང་གཏེར་རྫས་དང་སྐྱེ་དངོས་ལས་བཟོས་པའི་ཚོན་རྫས་ཀྱིས་གྲུབ་པ་ཡིན་ཞིང་། ཚོན་རྩི་འདིའི་རིགས་ལ་བཀྲག་མདངས་ཆེ་ཞིང་ཡུན་རིང་དུ་མི་འགྱུར་བའི་ཁྱད་ཆོས་ལྡན་པས་ཤིང་དཔར་གྱི་ཚོན་ནུས་དང་སྐྱེ་སྟོབས་རྒྱས་པའི་རྐྱེན་དུ་གྱུར།
སྒྲོལ་མ་དང་ལུག་ཁྱུ།
སྔ་མའི་བོད་བརྒྱུད་ནང་བསྟན་དར་སྤེལ་ཁྲོད་ནང་ཆོས་བསྟན་བཅོས་ཀྱི་ཤིང་དཔར་གྱིས་ནུས་པ་གལ་ཆེན་ཐོན་ཡོད་ཅིང་། བོད་ཁམས་སུ་དཔར་བརྐོས་ཀྱི་རྨང་གཞི་སྟུག་པོ་ཡོད་པས་ཀུན་གྱིས་མཐོང་ཆེན་དང་རྒྱབ་སྐྱོར་ཆེན་པོ་ཐོབ་པའི་ཁར། སྲོལ་རྒྱུན་གྱི་དཔར་བརྐོས་ནི་གཙོ་བོ་ནང་པའི་བསྟན་བཅོས་ཡིན་པས་བོད་མི་རིགས་ཀྱི་སེམས་ཁོངས་སུ་ཁྱད་དུ་འཕགས་པའི་གོ་གནས་ཟིན་ཡོད་ལ། དུས་རབས་གསར་བའི་འགྲོས་དང་བསྟུན་ནས་ཤིང་དཔར་ཞེས་བྱ་བའི་སྒྱུ་རྩལ་གསར་བ་འདི་རྔ་བ་ཁུལ་དུ་རིམ་གྱིས་འཕེལ་རྒྱས་བྱུང་།
ཤིང་དཔར་ནི་བོད་ཀྱི་སྲོལ་རྒྱུན་གྱི་བརྐོས་རིས་སྟེང་འཕེལ་རྒྱུས་བྱུང་བ་ཞིག་ཡིན་ཏེ། ཐོག་མར་དཔར་ཤིང་བཟོ་བ་དང་ཐིག་རིས་བརྐོ་བ་ཡིན་ལ། དེའི་འཕྲོར་གཏེར་རྫས་ལས་གྲུབ་པའི་ཚོན་རྩི་སྣ་ཚོགས་དཔར་ཤིང་སྟེང་དུ་བྱུག་པ། མཇུག་མཐར་སྲོལ་རྒྱུན་གྱི་ལག་བཟོའི་བོད་ཤོག་ཐོག་དཔར་བ་བཅས་རིམ་པ་དུ་མ་བརྒྱུད་མཐར་ཤིང་དཔར་བརྩམས་ཆོས་བྱུང་བ་ཡིན། དེང་དུས་ཀྱི་ཤིང་དཔར་ནི་སྔ་མའི་ཆོས་ཀྱི་བསྟན་བཅོས་ཀྱི་དཔར་དང་མི་འདྲ་བར་ཚོན་མདོག་སྣ་ཚོགས་འདུས་པར་མ་ཟད། ནང་དོན་ཐད་དེང་གི་བོད་མིའི་ཕུན་སུམ་ཚོགས་པའི་འཚོ་བ་ཁ་སྣོན་བྱས་ཡོད་པས་མཐུན་མོང་མ་ཡིན་པའི་ཁྱད་ཆོས་ཀྱིས་ཕྱུག་ཡོད་པ་རེད།
